Pic Wilson (2400m)

EGUNA: 2025/11/29

ABIAPUNTUA: Bois d'Aumede (1190m)

ZAILTASUNA: S3

IRAUPENA: 

• Igoera: Lau ordu
• Jaitsiera: Ordu eta erdi

NOLA AILEGATU: 

Lourdes hiritik hegoaldera joanda, Argeles-Gazost herrira ailegatuko gara. Bertan Cauterets aldera bideratuko gaituzten seinaleei kasu eginen diegu. Pierrefite-Nestalas herritik goiti ailegatuko gara Cauteretsera. Herria zeharkatu, eta goitiko partean Pont d'Espagnera doan bide nagusia ezker utzita baserri arteko errepide estutik iganen gara Igau baserrira. Baserriaren ondoan aparkaleku ttipi bat dago. Elurrik ez badago, baserritik goiti segitzen duen bidea ere autoz igaten ahal da zati batean.

ARRASTOA:

Powered by Wikiloc

KRONIKA:

Wilson mendia Moun Ne ezagunaren itzalean gelditzen da. Eski aldetik, ordea, badu bere interesa, batik bat ipar eta hego orientazioak hautatzeko aukera ematen digulako baldintzen arabera. Horregatik jo genuen bertara azaroko azken asteburuan. Plana kaskora hegoaldetik igan eta jaitsiera baldintzen hoberenen bila egitea zen...

8:50 : Bois d'Aumede (1190m)

Pistaz 100 bat metro irabaztea lortu genuen eta bigarren bihurgune hetsiaren ondoan utzi genuen autoa. Elurra autotik beretik genuen eta eskiak zangoetan abiatu ahal izan ginen.

Pista akitu arte igan eta bide estuago bati pasatzen dio lekukoa. Bertatik eginen genuen goiti basotik atera arte.

1400 metro inguruan bidea belai baten atakara ailegatzen da. Belaia erdiz erdi pasatuko genuen goitiko parteko eskindegiraino.

Belai hau izanen zen jaitsiera eskiatuko genuen azken zatia.

Gaineko eskindegia alanbrearen gainetik zeharkatu eta goiti segitu genuen.

Cabaliros mendirantz doan bide nagusia eskuinetara utzi eta hego-mendebaldera eginez bertze baso zati bat zeharkatuko genuen. Bigarren baso zati hau igateko bai, baina jaisteko ez zegoen baldintzetan. Hala ere, azkenean zirkularra egin eta bertze alde batetik jaitsiko ginen.

1600 metro inguruan basoa behin-betiko gibelean utziko genuen eta Moun Ne ederra aitzinean agertu zitzaigun. Inguru honetatik eskiz bertara igateko aukera dago.

Malda zabaletatik goiti norantza berean iganez segitu genuen.

Zailtasunik gabeko igoera parte honetan...

Bourg Debat erreka gure eskuinetara genuela, elur gutixeago zuen zeharkaldia egin genuen...

Elur gogorrarekin esposizio pixka bat izaten ahal duen zeharkaldia da, baina guk baldintza onetan harrapatu genuen.

Hala, 1800 metro inguruan bizkar batera aterata, Wilson mendia eta bertara eramamen gintuzten hego orientazioko maldak ikusgai genituen.

Metro batzuk galdu, erreka ttipia gurutzatu eta eskuinetara altuera irabazten hasi ginen.

Oraingoan Bourg Dessus errekaren ondotik egin genuen goiti, hasmentan ezkerretara utzita...

Eskiatzeko malda ederrak daude inguru honetan eta elurraren kalitatea uste baino hobea zen gainera. Parean ikusten den arrasto horri segituz kaskoraino ailegatuko ginen; lehenik haren eskuinetara ikusten den lepotxo batera iganez eta bertatik iparraldeko maldetatik kaskora ailegatuz.

Paraje ederrak eskiatzeko eta leku aski bakoitzak bere sinadura uzteko!

Lepora atera aitzineko zatia tentetu eta 40 bat gradutaraino ailegatzen da. Elur-jausi arriskuarekin edo elur gogorrarekin kasu eman beharreko lekua da.

Guk elur guria genuen eta arazorik gabe atera ginen lepora.

Lepotik ezker biratu eta kaskoraino azken maldari ekin genion. Wilsonen benetako tontorra argazkian eskuinetara ikusten den harritsua da. Eskiz normalean ezkerretara gelditzen den tontor zurira ailegatzen da jendea, 25 metro beheitiago.

Ipar-ekialdeko orientazioa duen maldatik ailegatu ginen goiti.

11:39 : Pic Wilson (2375m)

Gailur nagusiaren hegoaldean gelditzen den gailurtxoan trantsizioa egin eta jaisteko prestatu ginen. Igoeran hego aurpegian elurra nahiko ongi zegoela ziurtatu genuen, baina iparraldekoek elur hautsa zutela ikusita bertatik jaitsi eta zirkularra egitea erabaki genuen.

Hala ipar-ekialdeko norabidea hartu genuen Touyeres deitzen den paraje aldera.

Mala bikainak ditu isurialde honek, baina zoritxarrez elur baldintzak ez ziren goitian pentsatu genuen bezain onak. Altuera galdu ahala, kostra geruza fin batek estaltzen zuen elur freskoa eskiatzea pixka bat deserosoago eginez.

Catarrabes errekaren eskuinetik Peyre basoraino eskiatuko genuen. Bertan Bourg Debat bailarara eramanen gintuen bidea hartu eta eskuinetara eginez igoeran zeharkatutako belaiaren gaineraino ailegatu ginen.

13:44 : Bois d'Aumede (1190m)

Belaian azken bihurguneak egin eta basoko bidea eskiak bizkarrean genituela jaitsiko genuen. Ezagutzen ez nuen itzulia eginda, kontent akitu genuen eguna Cauterets inguruan.

 

Adi (1458m) eta Iturrunburu (1338m)

EGUNA: 2025/11/22

ABIAPUNTUA: Sorogaingo aterpetxea (821m)

ZAILTASUNA: S2

IRAUPENA:

• Sorogain - Adi : Bi ordu eta erdi
• Adi - Iturrunburu : 45 minutu
• Iturrunburu - Sorogain : 20 minutu

NOLA AILEGATU:

Elurra dagoelarik Sorogainera hegoaldetik bakarrik ailegatuko gara. Iruñetik Zubirira joko dugu eta bertatik Erroko mendatean barrena Erroibarren barneratuko gara. Gerendiain herria pasatuta ezkerretara Sorogainera igaten den bidea hartuko dugu. Bide honetan elurra ez dute kentzen, beraz ailegatzeko kateak behar izatea posible da, edo baita ez ailegatzea ere.

ARRASTOA:

Powered by Wikiloc

KRONIKA:

Lehen elurte handiak elurra etxe ondoraino ekarri zigun eta beraz eski denboraldia estreinatzeko ez genuen urrunegi joan beharrik izan. Sorogain ingurua bertatik bizikletaz pasatuta ezagutzen dut gehienbat eta banuen gogoa alde horretan eskiak paratzeko. Adiko mendira egindako zirkular polit hau bertaratzeko aitzakia bikaina izan zen. Eskiatzeko paraje arras aproposak eskaintzen dituen parajea da!

8:27 : Sorogaingo aterpetxea (821m)

Goiz abiatu ginen etxetik elurtearen ondoko lehen larunbata izaki jende aunitz egotea espero baikenuen. Lehenak izan ginen hetsia dagoen aterpetxearen ondoan aparkatzen, eta gure sorpresarako egun osoan zehar aski jende guti hurbilduko zen bertara. Errepide elurtuaren ondotik iparralderantz egin genuen lehen zatia.

500 bat metro eginda, errekatxoa gurutzatu eta ezkerretara ateratzen den pista bat hartuko genuen.

Pista hau Odiako basoan goiti igaten da. Iparrak diren magalak dira pistak igaten dituenak, beraz pentsatzeko da elurrak dezente iraunen duena zati honetan.

Galbiderik ez duen pista 1200 metro ingururaino igaten pago artetik. Puntu honetan ipar-mendebalderantz segituko genuen basotik atera arte.

Fite utziko genuen basoa eta elur sakonetik Adiko mendiaren hegoaldeko bizkarrera aterako ginen.

Behin bizkarrean, gainez gain kaskoraino joatea bertzerik ez zitzaigun gelditzen. Zati honetan lainoa eta haizea izan genituen bidelagun.

Kasik ohartu gabe gailur inguruan ginen. Eskindegia zeharkatu eta bertan ginen!

10:42 : Adi (1458m)

Kaskoan eski batekin arazo bat izan nuen eta denbora dezente egon ginen konpontzen. Ondotik argazkia eta beheiti abiatu ginen.

Iturrunburu aldera jaisteko bi aukera daude: eskindegia berriz zeharkatu gabe haren ezkerretik jaistea edo hura zeharkatu eta eskuinetik jaistea. Guk bigarren aukera hartu genuen malda zabalagoak baitaude bertatik. Hala ere, elurraren kalitatea ez zen ona eta ahal zen moduan jaitsi ginen.

11:38 : Adatungo lepoa (1200m)

250 metroko jaitsieraren ondotik Adatungo lepora ailegatu ginen. Bertan lainorik ez zen eta gure ondoko helburua zen Iturrunburu mendia ikusten ahal genuen ekialdean. 

Berriz foka-larruak paratu eta bertara zuzendu ginen bizkarrez bizkar.

Lepo honetatik bertatik pasatzen den GR11aren bidea hartuko genuen zati batean.

Aratungo gain harritsua iparraldetik inguratu genuen GR-ari segituz. Zati honetan elur guti baldin badago eskiak kentzea beharrezkoa izaten ahal da.

Behin Aratun inguratuta malda etzanetatik harrapatuko genuen Iturrunburuko gaina.

Paraje politak elurrak apaindurik...

Azken zatitxoa pixka bat tentetzen da, baina ez du zailtasun berezirik...

12:19 : Iturrunburu (1338m)

Kaskoan trantsizioa eta bigarren jaitsierari ekiteko prestatu ginen.

Eta bigarren hau lehendabizikoa baino aise hobea izanen zen. Sorogaingo lepo aldera jaitsi ginen elur hautsezko malda zabal eta politetatik.

Gozatu ederra hartu genuen!

Jaitsitako malda ongi sinatuta utzi genuen...

12:55 . Aztakarriko erreka (946m)

Elurraren kalitatea ikusita, berriz ere fokak paratu eta malda igatea erabaki genuen.

Malda leun eskiagarriak nonahi daude inguru honetan.

13:30 : Iturrunburuko iparraldeko bizkarra (1240m)

Eguneko hirugarren igoera kaskoa baino iparralderagoko bizkar honetan akitu genuen. Berriz ere Sorogaingo lepo alderako malda bikainak jaitsiko genituen.

 

14:28 : Sorogaingo aterpetxea (821m)

Azken zatia Sorogaingo lepotik aterpetxe aldera jaisten den errepidearen bazterretik eskiatuz egin genuen. Hala ere, ez genuen aterpetxeraino bertaraino ailegatzerik lortu eta eskiak bizkarrean akitu genuen eguna. Ibilbide eta egun zoragarria!

Mouscate (2232m)

EGUNA: 2025/11/09

ABIAPUNTUA: Pont Lamary (1175m)

ZAILTASUNA: Erraza

IRAUPENA: 

• Igoera: 3 ordu
• Jaitsiera: 2 ordu

NOLA AILEGATU:

Lamaryko aparkalekua Lescun herritik goiti dago. Lescunera ailegatzeko, gure kasuan, Nafarroa Beherea eta Zuberoako probintziak zeharkatzea da lasterrena. Donibane Garazi, Lartzabale, Maule eta Atharratze herriak pasatuta, Montori herrian utziko ditugu Euskal Herriko lurrak. Lanne-en-Baretous herrira ailegatuko gara hurrena eta herri hau pasata eskuinetara Arette herrira doan bidegurutzea ikusiko dugu. Bertara joanen gara. Arettetetik Issor herrian barrena, Aspeko bailarara iritsiko gara. Behin hemen, Zaragozako norabidea hartuko dugu eta kilometro batzuz bailara sartu ondotik, eskuinetara Lescun herrira doan desbideratzea aurkituko dugu. Puntu honetara Pirinioen hegoaldetik ere ailega daiteke, Jaca eta Somporteko tunelean barrena. Lescun herrira iritsi baino pixkat lehenago, Masousako aparkalekura gidatuko gaituzten seinaleei segituko diegu. Aparkaleku honetatik bi kilometro inguruko pistak Lamaryko zubiaren ondoko aparkalekuan utziko gaitu.

ARRASTOA:

Powered by Wikiloc

KRONIKA:

Berriz gure Pirinioetako lekurik kuttunenean gara! Oraingoan denboraldiko lehen fundamentuzko elurtea eta gero mendiak zer itxura duen ikusteko ibilaldia egin dugu. Inguruko kasko aunitz ezagunak ditut jadanik, baina sekula ez nintzen Hiru Erregeen Mahaia eta Petretxema mendien artean erdi atzendua gelditzen den Mouscaten izana. Pedaingo zirkutik goiti egin dugu igoera, egun zoragarriaz paraje hauetan alimaleko gozatua hartuz.

8:40 : Pont Lamary (1175m)

Goizean igan ginen aparkalekura. Bertze Pirinioetako leku aunitzetan ez bezala aparkalekua hutsik harrapatu genuen. Eta hala izaten segitu dezala! Aparkalekutik goiti doan bidea hartuko genuen, aski ezaguna duguna.

Metro batzuk eginda, dudarik gabe inguru honetako protagonista nagusiak diren Ansabereko orratzak ikusten hasi ginen.

Bertze baso zati bat zeharkatu eta...

...Ansabereko zelaitxora atera ginen. Energia berezia transmititzen didan lekua da hau, Pirinioetako kuttunena!

Puntu honetan bide nagusia utzi eta zelaitxoan dagoen etxolaren ondotik pasatuta, zelaiaren hondarreraino ailegatuko ginen.

Handik eskuinetara igaten hasten den bidexka hartuko genuen. Bidexka hau basoaren artean gelditzen den soilgune batetik igaten da Pedaingo zirkuraino.

Igan ahala, Ansabereko orratzen eskuinean eguneko helburu nagusia zen Mouscate mendia agertzen hasi zen. Ez da orratzak bezain ikusgarria, baina itxura ederra du!

Ez gara inoiz inguru honetaz aspertzen! Ezkerretik eskuinera Sobarcal, Ansabereko bi orratzak eta Mouscate.

9:35 : Cabane de Pedain (1605m)

Bidexkatik Pedaingo zirku berdera atera ginen. Zirku honen erdi-erdian dagoen etxola bisitatzeko baliatu genuen.

Ongi isolatutako etxola da. 2017an gau bat egin genuen bertan eta berriz ere itzultzeko gogoa ematen du haren egoera ikusteak.

Etxola inguruak utzi eta Mouscateren eskuinetara gelditzen den leporantz zuzendu ginen.

1800 metrotik goiti elurra zapaltzen hasi ginen, eta metroak irabazi ahala elur geruza gero eta lodiagoa zen. Horrek igoera motelaraziko zigun.

Arrastoa irekitzen mantso-mantso...

Lepoa gero eta hurbilago...

10:44 : Col d'Esqueste (2114m)

Elur geruza 30 bat zentimetrokoa zen leporako azken zatian. Hala ere, udako bidea segitzea lortu genuen eta arazo handirik gabe ailegatu ginen lepora.

Lepotik goiti elurraren baldintzak aldatu ziren. Kostra gogor bat zegoen goitiko geruzan, tarteka hausten zena, baina hausten ez bazen kranpoirik gabe ibiltzea eragozten zuen. Hala, kranpoiak paratu eta goiti segitu genuen. Lepotik ezkerretara biratuko ginen (hegoalderantz) eta lehen puntatxoa eskuinetik inguratuko genun.

Ondotik lepo gisako batera ailegatu, metro batzuk galdu eta azken maldak igateari ekinen genion.

Gailurrerako azken zatian zeharkaldi bat egin genuen eta mendebaldeko bizkarra harrapatuta bertatik egin genuen azken zatia.

Gure gibelean Paquiza de Linzola mendia ikusten zen, baita Kartxela ingurua ere.

Azken metroak mendebaldeko bizkarretik...

11:38 : Mouscate (2232m)

Autotik hiru ordu eskas pasatu genituen tontorrera ailegatzen.

Kaskoan alimaleko egonaldia egin genuen. Eguzkitan goxo zegoen eta hamaiketakoa astira egin genuen. Neguan eta udaberrian eskiekin ibiltzen garelarik aunitzetan ez dugu halako patxadarik izaten, elurraren kalitateari begiratzen baitiogu. Beraz eskertzen da tarteka halakoak egitea.

Azken begiratua Petretxema aldera eta beheitirakoari ekinen genion. Berez hasmentako intentzioa bertarainoko zeharkaldia egitea zen, eta Ansabereko etxoletatik beheiti jaistea. Baina elurrarekin gure progresioa motela zen eta aunitz luzatuko ginela pentsatuta bide beretik jaistea erabaki genuen.

Jaitsiera igoerako bide beretik eginen genuen. Guk geuk egindako arrastoa baloatu genuen elurtua zen partea erosoago jaisteko. Argazkian kaskotik beheiti egindako arrastia ikusten ahal da. Gure bisitaren lekuko isila...

Lepora itzuli eta Lescungo isurialdean barneratuko ginen berriz.

Igoeran ez bezala, elur zatia ziztu bizian jaitsi genuen eta laster plantatu ginen etxola inguruan. Kranpoiak, polainak eta abarrak bildu, eta autoraino bidexka erosotik itzultzea bertzeik ez zitzaigun gelditzen.

Lehendabizi Ansabereko zelaira eta gero bertatik Lamaryko aparkalekura...

Parean Aspeko bailarako mendi elurtuak ikusten genituela egin genuen azken zatia. Itxura ona zuten, baina oraindik bertze elurte on bat falta zaie eskiak paratzeko.

14:18 : Pont Lamary (1175m)

Hala agurtu genuen berriz ere txoko eder hau, Pirinioetako lekurik ederrena!