Neouvielle (3091m)

EGUNA: 2022/05/21

ABIAPUNTUA: Lac d'Aubert (2150m)

ZAILTASUNA:

• Eski zailtasuna: S3

DENBORAK:

• Igoera: 3 ordu
• Jaitsiera: Ordu bat

NOLA AILEGATU:

Saint Lary Soulan herritik hegoalderantz errepidea hartu, Bielsako tunel alderantz. Haranean gora hainbat kilometro egin ondotik, Aragnouet herriko Fabian auzoan Neouvielleko Erreserba Naturalera igotzen den errepidea hartuko dugu. Oredon lakura heltzean, eskuinetara biratuko gara Aubert lakuko aparkalekura igateko. Bide zati hau udan pagatu behar izaten da Oredon lakuaren ondoan dagoen

Neouvielle eta Ramougn Aumarreko lakutik

ARRASTOA:

Powered by Wikiloc

KRONIKA:

Kitto, eskiarenak aurtengoz eman ditu bereak. Neouvielleko lakuetara igaten den bidea "erdi" irekita dagoela probestu dugu, Neouvielleko igoera klasikoarekin denboraldia akitzeko. Elurrez ikaragarria izan ez den arren, arras ongi baliatu dugula erraten ahal da eta inoizko ateraldirik gehien egin ditut, 31 egunez mendian eskiatuz. 

Gaua pasatzeko leku zoragarria

6:04 : Lac d'Aubert (2150m)

Ilargiaren argitan abiatu ginen lakua inguratzen duen bidetik. Tenperatura goxoa genuen, beroegia ordu horretarako...

Urtegiaren pareta gainetik pasatzen da bidea. Parean bigarren jaitsiera eginen genuen ingurua genuen, Ramougn mendiaren ekialdeko malda ederra.

Ez genituen eskiak bizkarrean luze eramanen. 15 minutuan haien gainean ginen, izozterik jasan ez zuen elur guriaren gainetik.

Breche de Barriseko lepotxoraino doan bidea hego eta ekialdeko orientaziodun maldetatik pasatzen da eta bertako elurra lasterrago desagertzen da. Egun horretan bilatuta elur jarraia harrapatu genuen, baina guti iraunen du tenperatura hauekin...

Harkaitzen arteko elur mingainetatik egin genuen goiti...

...eta laster batean Breche de Barriseko itsasargi lana egiten duen arbola bistaratu genuen. Erreferentzia ona da.

7:01 : Breche de Barris (2439m)

Ordubete eskasean Ramougn eta Neouvielle mendien iparraldeko maldetara pasatzeko pasabide natural honetan ginen.

Metro batzuetan eskiak eskutan eraman genituen, puntu honetan ohikoa izaten den bezala. Jadanik ez genituen berriz kenduko gailur ondoraino. Lepotxoa gibelean utzita parean genuen Breche de Chausenque arrakala hartuko genuen erreferntzia gisa.

Zeharkaldi luzea egiten da bertaraino ailegatzeko.

Behin Chausenque arrakalaren azpiko aldera ailegatuta Neouvielle mendiaren iparraldeko magala irekitzen da gure aitzinean. Ezkerretara biratu eta malda tenteagoetan barneratuko ginen.

Goiz ateratzeari esker eta berez lakuraino autoz igatea debekatua zegoelako, bakar-bakarrik egin genuen gailurrerainokoa. Arraroa mendi ezagun honetan larunbat goizean horrela ibiltzea.

Gailurra begien bistan... Argazkiaren eskuineko aldera joan eta gero ezkerretara zeharkaldi bat eginda kokatuko ginen tontorpean.

Malda tenteagoa da azken zatian, baina erraza. Gainera elurra guri harrapatu genuen eta aise igan ginen goiti. Gailurraren azpiko lepotxo hori baino goitixeago utziko genituen eskiak...

Azken metroak eskien gainean...

Eskiak gailurretik 50 bat metrora utziko genituen eta iparraldeko ertzetik segituko genuen. Hasmenatan ongi markatutako arrastotik...

...eta azken zatian harkaitz-bloke erraldoien artetik eskaldatxo errazak eginez. Niretako laugarren aldia bazen ere, pixka bat erratu ginen zati honetan eta tximinia deseroso (III) batetik atera ginen gailurrera.

9:03 : Neouvielle (3091m)

Bide osoan bezala, kaskoan ere bakar-bakarrik ginen, inguru ederraz gozatzen.

Ez sobera urrun aste bat fiteago igandako Trois Conseillers mendia genuen. Irudian ikusten den ertza elurtuta harrapatu genuen guk. Ikaragarria da aste batean zenbat elur kendu duen...

 

 

Hala, eguneko lehen jaitsierari ekin genion. Antzinako glaziarra kokatua zegoela iparraldeko maldatik beheiti egin eta ahal izan genuelarik eskuinetara biratu ginen Crete de Barris d'Aubert ertza zeharkatzeko puntuaren bila.

 

 

9:57 : Crete de Barris d'Aubert (2657m)

Argazian ageri den kanaletik zeharkatuko genuen Barriseko gandor luzea. Ondotik, berriz ere foka-larruak paratu eta goiti abiatuko ginen.

Bigarren igoera Ramougn mendiaren ekialdeko malda ederretatik egin genuen. Joan den urteko abuztuan ibili ginen inguru honetan, mendi horretara igateko bidean.

10:40 : Crete des Laquettes (2850m)

Ramougn eskuinean utzi eta Laquetteseko ertzeko bizkar honetaraino igan ginen. 

Cap de Long inguruko mendietara ikuspegi bikaina genuen bertatik, Campbieil eta Pic Long buru zirela.

 

 

Ramougnen ekialdeko maldatik jaitsi ginen beheitiraino eta erraten ahal dut kristoren altxorra harrapatu genuela. Neouvielleren bide arruntak baino aise jaitsiera hobea du. Kasik 700 metroko malda zabalak uste baino elur hobearekin...

 

Azpiko zatian elur mingainetatik luzatu genuen jaitsiera.

11:22 : Lac d'Aubert (2150m)

Urtegitik metro gutitara kendu genituen eskiak, nostalgia pixka batekin. Orain urte (gutienez) erdi esperoan egon behar hain gustuko dugun elurraren gainean irristatu ahal izateko.

 

BIDEOA:

 

Trois Conseillers (3039m)

EGUNA: 2022/05/13-14

ABIAPUNTUA: Vallee de la Glere (1676m)

ZAILTASUNA: S3

.

DENBORAK:

• Vallee de la Glere - Refuge de la Glere : Ordu eta erdi
  
• Refuge de la Glere - Pic des Trois Conseillers : 3 ordu eta erdi
• Pic des Trois Conseillers - Vallee de la Glere : Ordu eta erdi

NOLA AILEGATU:
Lourdes hiritik Gaveseko bailaran barneratuko gara Luz Saint Sauveur herri ezaguneraino. Hemendik Tourmalet mendateko errepidea hartuko dugu eta Bareges herria pasata, Tournaboupeko aprkalekura iritsi baino pixka bat lehenago, eskuinetara ateratzen den errepidetxo bat hartuko dugu Plateau de Lienz aldera. Lienzera ailegatzean, ostatu baten ondotik abiatzen den pista hartuko dugu. Pista honetatik Glereko bailaran barneratuko gara, 1676 metro inguruan autoa utzi arte.

ARRASTOA:

Powered by Wikiloc

KRONIKA:

Ez ohiko beroa ari du maitz honetan eta honenbertzez eskiari guti gelditzen zaio Pirinioetan. Asteburu honetan nire eski sehaska izan zen Glereko aterpean izan gara, Turon de Neouvielle eta Neouvielle eski klasikoen artean altxapean pasatzen den Trois Conseillers mendia igaten. Mendi bakartia da neguko baldintzak daudelarik, ezin baita gailurreraino eskiz ailegatu. Horrek originaltasuna eta lasaitasuna ematen dio, eta gainera Breche de Neouvielleko lepoaren azpian eguzkia mantso arte hartzen ez duten malda politak ditu.

2022/05/13

17:56 : Vallee de la Glere (1676m)

Oroitzapenak borborka hasten zaizkit Glere bailaran sartzen naizen aldioro. Etortzen zait nire lehen mendi eski eguna izan zen hura, etortzen zait Packeko paradisuan pasatutako asteburua edota Pic Longeko gandorrean iragandako zeharkaldi zirraragarria. Honakoa ere berezia izanen zen. Niretako hain gustuko dudan Neouvielleko sektoreko azken 3000ko gailur nagusia eta Lorearendako lehen 3000 metrotik goitiko gailurra eskiz.

Pixka bat porteatuta 1850 metro inguruan eskiak paratu ahal izan genituen, pistaren bazterrean zegoen elur lauso jarraian. Halere, pixka bat goitixeago berriz kendu beharko genituen zatitxo batean.

2000 metrotik goiti elur kantitatea handitzen zen eta pistatik kanpo maldetatik igan ahal izan ginen.

Pixka bat geroago aterpea bistaratu genuen...

19:18 : Refuge de la Glere (2153m)

Arimarik ez zebilen aterpe inguruan. Egun batzuk lehenago hetsi zuten eta parte librea zegoen irekita.

Hori bai, parte libra hori bikaina da Gleren. Jantoki zabala egurrezko estufa eta guzi, eta goitian bi gela irekita 10 bat lagunendako lekuarekin.

Tenperatura goxoa lagun, kanpoan afaldu genuen eta ilunabar ederrari begira egon ginen. Etxean gaudelarik gozatzen ez ditugun gauzak estimatzen dira horrelakoetan. Ez dago horrelako telebista kanalik!

Arratsaldeko hodeiak uxatu ziren eguneko azken eguzki izpiekin batera eta biharamuneko helburu zen Trois Conseillers ikusi eta aztertu ahal izan genuen.

Protagonismorik handiena Neouvielle handiak du halere. Tente altxatzen da bertze guzien gainetik...

2022/05/14

6:41 : Refuge de la Glere (2153m)

Bortz eta erdietan ernatu ginen eta gauzak prestatuta goiti abiatu. Gau garbiak elurrari pixka bat gogortzen lagundu zion eta goiti igateko baldintzak aski onak ziren.

Turon de Neouvielle aldera doan bidea segitu genuen aterpea utzi eta bizkarez bizkar. Packe aterperako bidea desbideratzen den inguruan, ordea, iparraldera doan bidea utzi eta ezkerretara biratzen hasi ginen Neouvielle mendia erreferentzia gisa hartuta. Bide hau egiten dute Gleretik mendi honetara doazenek eta hortaz arrasto ugari genituen galbiderik gabe segitzeko.

7:31 : Lac det Mail (2332m)

Laku zabal hau eskuinetara utzi genuen. Turonera doan bidea ere argazkiko magal leunetatik pasatzen da.

Metro batzuk galdu eta Espadeko gandorren azpiko zirku hetsian barneratu ginen. Bailaratxo honetatik segituko genuen goiti harresi baten azira ailegatu arte.

Aipatu harresia eskuinetara jota inguratzen da. Gibelean ikusten den lepotik joanen ginateke Neouvielle aldera.

Guk Neouvielleko bidea utzi eta eskuinetara egin genuen, izen bereko arrakala ezagunaren bila.

Puntu horretatik Trois Conseillerseko gailurrak nahiko hurbil ikusten ziren. Gu ezkerreko ertzetik altuena den ezkerreko gailurrera iganen ginen.

Maniporteteko lakuak kokatuak dauden lautadatxo zabal hau zeharkatu beharko genuen leporako azen maldari ekin aitzinetik. Garai batean inguru honetan jadanik desagertata dagoen Maniporteteko glaziarra zegoen.

Leporako azken malda pixka bat tentetzen da, baina elurra ez zegoen sobera gogorra eta kutxilak paratu gabe gainditu ahal izan genuen. Ezkerrean ikusten den lepoa genuen helburu.

Azken metroak lepora ailegatzeko...

9:16 : Breche de Neouvielle (2926m)

Neouvielle mendira igaten den Trois Conseillers ertz ezaguna bertatik hasten delako da ezagun lepotxo hau. Leku ikusgarria da neguan eta inor ere ez zebilen inguruan. Trois Conseillersera ez da jende aunitz hurbiltzen eskiekin eta zorionez bakarrik izanen ginen egun horretan.

Zorionez eta zoritxarrez... izan ere, ertzeko elur guri eta ustelduan arrasto sakna ireki behar izan genuen gailurrerako bidean.

Ertza nahiko zabala da punturen bat kenduta. Elur gogorra harrapatuz gero esposizio pixka bat izan dezake zatiren batean, baina oro har erraza da.

10:00 : Pic des Trois Conseillers (3039m)

Hiru ordu eta erdi inguru pasatu genituen gailurrera ailegatzeko. Esfortzuak bere saria izan zuen eta 3000ko polit hau guretako genuen oso-osorik... 

Niretako gailur berezia zen, honekin Neouvielleko sektoreko 3000ko nagusi guziak igan bainituen. Gainera, tontor honetatik sektore guziak ikusteko aukera dago.

Tartean, Neouvielle (2010ean, 2014an eta 2017an igana) eta Ramougn (2021ean)...

Estaragne (2013an),  Campbieil (2017an), Maou, Badet, Long eta Estibere Male (2020an) eta Bugarret eta Crabounouse (2017an).

Pic Long ikusgarriaren gibelean Gavarnieko mendiak ere ageriz ziren...

Eta nola ez Turon de Neouvielle, eskiz igan nuen lehen mendia izan zen 2010ean. Mendi berezia niretako... Gerora 2017an ere izan nintzen bertan.

Glereko aterpea tokitan ikusten zen...

Egonaldi luzea egin genuen goian, tenperatura eta ingurua lagun. Ondotik ertz elurtutik eskietara itzuli eta jaitsierari ekinen genion.

Jaitsieran goitiko partean elur ona harrapatu genuen, baina metroak jaitsi ahala, gero eta pisuago zegoen. Goiz abiatu ginen, bai, baina gailurreko egonaldia luzeegia izan zen eta beranduegi hasi ginen jaisten.

Jaitsiera zuzenean iparraldera eginen genuen, berriz Lac det Mail lakutik pasatu gabe. Horrela, Maniportet, Verts, Mourele eta Mounicoteko lakuak inguratu genituen. Laku aunitz jaitsiera ona izateko? Bada, nahiko ona da egia erran eta elur onarekin makilak ez lirateke kasik erabili ere egin beharko bulkatzeko.

12:08 : Lac de la Glere (2103m)

Glereko lakuan akitu genuen jaitsiera. Hortil metro batzuk igan beharko genituen aterpera itzultzeko, bertan utziak baikenituen zenbait gauza.

Lakua iparraldeko aldetik inguratu genuen...

12:33 : Refuge de la Glere (2153m)

..eta beti gogorra egiten den maldatxo motzetik berriz ere aterpean ginen.

 

14:08 : Vallee de la Glere (1676m)

Aterpetik gauzak bildu, kanpoko terrazan bazkaldu eta autorainoko bidea egin genuen. Denboraldiko azkena ote? Ikusiko dugu...