2015/01/25

Antxola (1119m)

EGUNA: 2015/01/25

IRTEERA: Otondoko Borda - Iñarbegi (600m)

ZAILTASUNA:
  • Eski zailtasuna: S2
DENBORA:
  • Igoera: Ordu bat eta erdi
  • Jaitsiera: Ordu erdi bat
NOLA AILEGATU:
Erratzutik Baigorrira doan errepidea hartu behar da, baina herritik atera orduko eskuinetara biratu behar da Iñarbil auzoraino. Behin auzoan gaudela, lehen etxeak pasata eskuinetara Iñarbegi auzora ateratzen den errepidetxo bat ikusiko dugu. Bertatik segituko dugu. Iñarbegira ailegatzean, lehen etxeak dauden bailaratxora jaitsi aitzinetik, gure ezkerretara zementuzko bide bat hartuko dugu. Bertatik segitu behar da bidea akitzen den arte.

DESKRIBAPENA:
Elurra kota baxuetan egin du eta herrian bertan eskiatzeko aukera ezin hobeak izanik, zertarako mugitu! Iñarbegi aldera jo genuen bertatik Auzako hegoaldeko zonaldea ezagutzeko. 

Ibilbidearen krokisa Iñarbegitik.


10:00 : Otondoko borda (600m).
Autoa etxea baino ehun bat metro goitiago utzi behar da. Leku aunitzik ez dago, baina auto gehiagorik ere ez, beraz primeran. Ezer gutti du ikusteko honek Artesiagan izaten den auto pilaketarekin. Beraz, lasaiago eta gainera aise politago Saioa baino, nahiz eta onartu behar den Saioak eskiada hobea duela eta elur hobea izaten dela bertan.

Autoa uzten den lekuan bertan pista ttiki bat ateratzen da. Hortik abiatu ginen.


Lehen metroak pistatik maldarik gabe eginda, erreka bat zeharkatu eta pista goraka hasten da. Segidan oihanen artean irekitzen den soilgune handi batera ailegatu ginen. Bertatik igoko ginen ekialdeko norabidean.


Auzako tontor zuria begibistan genuen ia hasieratik.


Metroak irabazi ahal, paisaia ere gero eta ikusgarriagoa da.


Iratze-lekuan goiti, segidan jarri genituen eskiak. 15 minutuko porteoa bertzerik ez genuen egin behar izan.


Iñarbegiko zelaitxoa beheitian gelditu zen poliki-poliki...


Iratze-lekua osorik igota, oihanean sartu ginen eta tontortxo batera ailegatu. Burdinkurutx bezala ezagutzen da. Hemen, ezkerretara biratu eta Istauzko lepo aldera jaitsi ginen. Begibistan genuen Antxola eta bere hegoaldeko malda polita.


Gibelera begirada Burdinkurutx aldera.


Lepotik tontorrera tita batean igotzen da. Ekialdera Aldudeko harana dotore zegoen benetan, baita Pirinioak ere urrunean.


11:41 : Antxola (1119m).
Gailurretik Auza alderako ikuspegia aparta da, baita Elorta eta Olate aldera ere.


Argazki batzuk eta beheiti, haize hotza baitzebilen gailurrean.


Behin lehen malda jaitsita, Istauzko kaskoa utzi genuen gure ezkerretara.


Auzari bertze argazki bat jaitsieran.


13:44 : Otondoko borda (600m).
Berriz ere autora bueltan.


Iñarbegi. Eskiatzeko aukera politak eskaintzen dituen bertze xoko bat, guttitan bada ere.


BIDEOA:


2015/01/04

Tuc du Plan de la Serre (1977m)

EGUNA: 2015/01/04

IRTEERA: Eth Portilhon / Col du Portillon (1293m)

ZAILTASUNA:
  • Eski Zailtasuna: S2
DENBORA:
  • Igoera: 2 ordu eta erdi
  • Jaitsiera: Ordu bat
NOLA IRITSI:
Baionan A64 autopista hartuta Montrejeau eta Luchongo irteera arte jarraituko dugu. Hemen Luchongo norabideari segika bertaraino iritsiko gara. Behin Luchonen gaudela Col du Portillon mendatera igotzen den bidea hartu behar da. Lepoan bertan dagoen aparkalekuan utzi kotxea.

DESKRIBAPENA:
Bigarren eguna Luchon inguruan eta aitzineko egunean hauts goxoa dastatuta ez genuen bigarrenean zapore txarragoarekin gelditu nahi. Hortaz, ipar aurpegiak eta basoa bila, Portillongo mendatera abiatu ginen. Garona eta Val d'Araneko mugan, azken asteburuan elur gehienetarikoa egin duen zonaldea omen da hau. Dena den, hemen ere haizeak bere lana egin zuen eta basoa ez genuen nahi bezain ongi harrapatu. Bai ordea basotik gorakoa...

9:41 : Eth Portilhon / Col du Portillon (1293m).
Presa handiegirik gabe abiatu ginen lepoa baino 300 metro beherago ateratzen den pistatik. Elur gehiegirik ez zegoen beheitiko zati honetan, baina pista zuri-zuri aurkitu genuen. Pista hartu eta berehala, Bareges edo Varetjako lepora eramanen gintuen norabidea zein den adierazten zigun seinalea begiztatu genuen. 50 minutu leporaino. Tranpa zeukan ordea, 50 minutu horiek laburbidetik joanda baitira. Laburbidean ordea, elur guttiegi zegoen eskiekin igotzeko eta pista aspergarrian goiti igo ginen 5 kilometroan zehar!



Pista une oro pinadiaren barnetik doa. Noizbehinka zabalune batzuk paisaiaz gozatzen uzten ziguten.


Bi ordu luzez goraka ibilita, azkenean basotik atera ginen eta pista utzi ahal izan genuen. Gure ezkerretan egoera nahiko txarrean dagoen etxola hau utzi genuen.


Segidan bistaratu genuen Plan de la Serre mendia ere, elur dexente zuela zirudien. Ez zen aunitz falta lepora ailegatzeko!


12:21 : Coth de Varetja / Col de Bareges (1749m).
Bi ordu eta erdi malda goiti eta 500 metroko desnibela bertzerik ez genuen gainditu. Ia-ia buelta hartzekotan ere ibili ginen, baina lepo honetara ailegatzen pena guztiak airean joan ziren. Benasque eta Luchongo 3000ko handiak parez pare genituen. Pirinioetako txoko eder horietako bat. Gainera, lepoan bertan bi etxola daude, horietako bat egoera arras onean. Dudarik gabe, gaua pasatzeko leku zoragarria.


Hasiera batean gure helburua Tuc d'Aubas mendia bazen ere, eskuinetara genuen Plan de la Serre mendiak aise itxura hobea zuen eta bertara igo ginen. Malda zoragarria izanen genuen jaisteko!


Horrela, poliki-poliki maldari bere 230 metroak jaten hais ginen.


Gibelean lepoa eta Tuc d'Aubas aise elur guttiagorekin.


Azken metroak malda suabean goiti.


13:21 : Tuc du Plan de la Serre (1977m).
Hiru ordu eta berrogei minutu pasa genituen goraka, baina ingurunearen edertasunak merezi zuen benetan. Luchon eta Benasqueko mendi pila aitzinean genituen: Grand Quayrat, Lezat, Crabioules, Maupas, Boum, Mail Pintrat, Salvaguardia, Sacroux, Mina, Alba, Maladeta eta Aneto berbera ere!


1300 metro beheitiago berriz Luchon herria.


Gailur ttiki-handi honetan...


Zerbait jan eta beheiti abiatu ginen. Zinez gozatu genuen oihanera arteko zatian.


15:38 : Eth Portilhon / Col du Portillon (1293m).
Eta horrela eman genion Luchonen pasatako asteburuari bukaera, elur goxo eta eguraldi ikaragarriarekin! Bertze bat arte!


BIDEOA:

2015/01/03

Cap de la Pene de Soulit (2031m)

EGUNA: 2015/01/03

IRTEERA: Col de Peyresourde (1569m)

ZAILTASUNA:
  • Eski zailtasuna: S2
  • Zailtasun globala: F
DENBORA:
  • Igoera: Ordu bat eta erdi
  • Jaitsiera: 45 minutu
NOLA IRITSI:
Baionan A64 autopista hartuta Montrejeau eta Luchongo irteera arte jarraituko dugu. Hemen Luchongo norabideari segika bertaraino iritsiko gara. Behin Luchonen gaudela Col de Peyresourde mendatera igotzen den errepidea hartu behar da, lepoan bertan aparkatuz.

DESKRIBAPENA:
Eguberrietako oporretako azken asteari zuku pixka bat atera asmoz, etxean ezin gelditu eta Campango bailarara abiatu ginen aitzineko asteburuan botatako elur hauts horren berri ba ote zuten jakiteko asmoz. Harat ailegatuta egoera arraroa, herriak elurrez zuri-zuri eta mendiak justu xamar. Haizeak bereak eta bi egin zituen. Itxura hau zuten Payolle inguruko mendiek. Elurra bai, baina geruza fina,



Gauzak horrela, Payolle gibelean utzi, Aspingo lepo famatua zeharkatu eta Aure eta Lourongo haranetara jaitsi ginen, hemendik Peyresourde mendatera igotzeko. Irakurria nuenez Luchon inguruan bota omen zuen elurrik gehien. Hortaz, bertako aukera ugariak nola zeuden ikustera joan ginen.

10:26 : Col de Peyresourde (1569m).
Erran bezala, Peyresourdeko lepoan plantatu ginen Cap de la Pene de Soulit mendia igotzeko asmoz. Hara ailegatu eta ekialdeko aurpegia (normalean igotzen dena) erabat soilduta zegoela ikusi genuen. Mendebaldekoa ordea zuri-zuri. Hortaz, autoa utzi, gauzak prestatu eta goiti!


Peyresourdeko lepotik gailurrera, arista zabala igotzea bertzerik ez da egin behar. Guk aristaren mendebaldeko aurpegia hautatu genuen bai igo eta baita jaisteko ere, bertan baitzegoen elurra. Eta a zer nolako elurra!


Gibelean, Luchon inguruko mendiek eskaintzen dituzten aukera ugariak ikus daitezke. Mendi borobil eta goxoak eskirako. Bertze zerbait dira Luchongo 3000koak...


Bidean goiti egin ahala ikuspegia gero eta zabalagoa. Tartean Arbizon ikusgarria!


11:56 : Cap de la Pene Soulit (2031m).
Hala, nahikoa lasai igota ere, laister batean plantatu ginen gailurrean.


Gailurraren mendebaldean lehen aipatutako Arbizon mendia eta baita ezagunak ditudan Portarras eta Pichaley ere. Ze itxura zuen Pradako jaitsierak!


Tarte zabalean egon ginen eguraldiaz gozatzen...


Eta ondotik beheiti. Lehen metroak eskiak eskutan belarra zela eta, baina gero elur hauts goxoan. Mendebaldeko malda jaitsi genuen ia errepideraino, gero pixka bat igo eta berriz jaisteko. Primerakoa!


Luchongo bailara gailurretik.


13:30 : Col de Peyresourde (1569m).
Berriz autora bueltan, lepotik hurbil dagoen eski estazioraino mugitu ginen garagardo bat hartzeko asmoz.


Igotako mendiaren mendebaldeko aurpegia Peyresourde eta Peyragudeseko eski estazioa lotzen dituen bidetik. Ezkerreko lepotik gailurrerako bidea egin genuen guk, itzaletan dagoen malda ia beheraino jaitsi, berriz igo eta bigarren jaitsiera lepoan akituz.


BIDEOA: