2017/10/13

Midi d'Ossau (2884m)

EGUNA: 2017/10/12-13

IRTEERA: Cabane de l'Araille (1733m)

ZAILTASUNA:
Nahiko erraza (PD). Zailtasunak 2345 eta 2657 metro artean daude kokatuta, gehienbat gainditu behar diren hiru tximinietan. Tximiniez aparte hainbat trepada ere egin behar dira zati horretan.
  • Lehen tximinia: 15 bat metro izanen ditu eta II+ gradukoa da. 
  • Bigarren tximinia: 20 bat metro izanen ditu eta II gradukoa da.
  • Hirugarren tximinia: 30 bat metro izanen ditu eta I gradukoa da.
DENBORAK:
  • Cabane de l'Araille - Refuge de Pombie : Ordu bat eta laurden
  • Refuge de Pombie - Midi d'Ossau : Bi ordu eta erdi
  • Midi d'Ossau - Cabane de l'Araille : Hiru ordu
NOLA AILEGATU:
Iruñeatik Pirinioetako autobidean barrena, Jacara ailegatu behar da eta hemendik Formigal eski estaziora segitu behar da. Eski estazioa atzean utzi eta gero Pourtaleteko mendatera ailegatuko gara. Mendatetik kilometro bat iparralderago dago irteerako aparkalekua.

KRONIKA:
Altueraz Pirinioetako erregea Aneto baldin bada, itxura eta presentzia aldetik, Midi d'Ossau izan daiteke gure mendilerro kuttuneko erregeetako bat inolako zalantzarik gabe.
Ayouseko lakuetatik, 2017ko ekainean

Edozein xokotatik ikusgai, bere itxurak ezagutzeko errazenetarikoa egiten du eta pirineista ororen jomuga bihurtu da.
Anayeteko lakutik, 2010eko uztailean
Hori gutxi balitz, bere ibilbideak ere hainbat zailtasun ditu eta gailurrera igotzeko egin behar den esfortzu horrek plus bat ematen dio Midi handiari.
Montagnon d'Iseyetik, 2014ko urrian
 Hainbat urte Pirinioetako mendietan goiti eta beheiti ibili ondotik, beti agendan egon den mendia izan da niretzat, baina gauza batengatik edo bertzearengatik gibelatu egin da klasiko erraldoi honen igoera. Azkenean egin diogu bixita mendi bikain honi. Ongi etorri Midi d'Ossau!
Soba ingurutik, 2016ko abuztuan

2017/10/12
17:35 : Cabane de l'Araille (1733m)
Lan ondoan autoa hartu eta Pourtalet aldera zuzendu ginen ilundu baino lehen Pombieko aterpera ailegatzeko asmoz. Berez egunean bertan egin daitekeen gailurra da, aterpean lo egin beharrik gabe, baina esfortzua gutxitzeko eta gehienbat tximinietara lehenago ailegatzeko bi egunetan egitea erabaki genuen.


Motxilan betiko gauzez gain, arnesa, zortzia, 30 metroko soka eta kaskoa eramanen genituen, tximiniak jaisteko rapelen bat muntatu beharko bagenu ere.


Hala abiatu ginen Aneouko zirku ederretik arratsalde epelean.


Lehen helburua Soum de Pombieko lepora igotzea da. 400 metro inguruko desnibela du igoera honek baina bide sigisagatsutik erraz egiten da.


Pourtalet ingurua igoeratik...


Bidea zabala da, autopista bat...


16:28 : Col de Soum de Pombie (2129m)
Lepotik Midi d'Ossauren ikuspegia bikaina da. Behatz puntekin gailurra ukituko bagenu bezala...


Ekialdea, Palas eta Balaitous ere agertzen hasi zitzaizkigun...


Lepotik aterperako jaitsiera gozoan egiten da...


18:47 : Refuge de Pombie (2031m)
Autotik ordubete pasatxoan ailegatu ginen aterpe klasiko honetara. Midiren paretatzarraren azpian kokatuta, urtero milaka mendizale eta eskalatzaile hartzen ditu aterpe txiki politak. Logelan kokatu eta zazpi eta erdietan afaldu ondotik goiz sartuko ginen lotara. Aterpea erdu hutsik zegoen eta gau ona pasatu genuen.


Egunaren azken eguzki izpiak, hurrengo egun handian zain...


2017/10/13
8:05 : Refuge de Pombie (2031m)
Egunsenti ederrak Midi d'Ossauren pareta gorrixkaz margotzen zuen. Gosaldu eta lehengoetarikoetatik izan ginen aterpea uzten.


Pombie aterpea eguneko lehen argitan.


Raillere de Pombieko zonalde harritsua zeharkatuta zeharka igotzen den bidexkak Suzoneko lepora eramanen gintuen.

8:33 : Col de Suzon (2127m)
Lepora uste baino lehenago ailegatu ginen. Bertze aldean, Magnabaigteko bailaratxo polita agertu zitzaigun.


Gu ordea, ezkerretara biratu eta belarrezko ertza igotzen hasiko ginen paretaren azpian kokatu arte.


8:58 : Paretaren hasiera (2345m)
Behin lehen tximiniaren azpian kokatuta, kaskoa jantzi eta bi aldiz pentsatu geba igotzeari ekin genion. Lehen erran bezala, 15 bat metrokoa da, nahiko estua eta punturik zailena azken zatian dauka, ezkerretara biratu eta plaka leun bat gainditu behar da. Iltze batek laguntzen du pausu hau gainditzen.


Tximinia gaindituta bidexka zatietatik segitu genuen aitzinera.


Berehala agertu zitzaigun bigarren tximinia ere. Bi aukera daude, pitzaduratik bertatik igotzea edo pixka bat eskuinerago irudian mendizalea igotzen ari den bidetik. Guk ere eskuineko aukera hautatuko genuen.


Oro har, helduleku onak ditu tximinia honek eta erraz gainditu genuen.


Hemendik goiti berriz ere bidexka zatiak agertu ziren hirugarren eta azken tximiniarako bidean.


Tximinien artean I graduko hainbat pausu gainditu behar dira. Erne egotea eskatzen duen mendia da Midi.


Eta azkenik hirugarren tximinia gainditu genuen, 30 bat metrokoa eta errazagoa da.


9:50 : Croix du Portillon (2657m)
Ordubete eskasean gainditu genituen mendiaren zailtasunik handienak. Handik aitzin Rein de Pombieko aldapa harritsu baina errazak gailurrean utziko gintuen.


Igo ahala ingurua gero eta ikusgarriago ageri zitzaigun, ikuspegi urrun ailegatzen zen.


Behin ertzera ailegatuta, arrail pare bat gainditu eta gailurrera ailegatu ginen.


10:19 : Midi d'Ossau (2884m)
Bidean jende guzia aitzinatuta, lehendabizikoak izan ginen tontorrera ailegatzen. Bidean ikaragarri gozatu genuen eta azkenean gurea zen Midi. Kristoren poza!


Ayouseko lakuen ingurua gailurretik.


Iparraldeko tontorra eta gainditutako ertz zatia. Erraza da.


Aspe eta inguruaak...


Gailurrean ordubete inguruz egon ginen inguruaz gozatzen. Jende uholdea ailegatzen hasi zenean abiatu ginen beheiti. Beheitirakoan ateratako argazki honetan ikusten da tontor honen handitasuna.


11:53 : Croix du Portillon (2657m)
Jaitsieran tximinien hasiera markatzen duen gurutzera ailegatu eta tximiniak jaisteari ekin genion.


Goitiko tximinia kontuz baina arazorik gabe destrepatu genuen, erdikoan ere ez genuen soka erabili nahiko ongi ikusi baikenuen jaitsiera.


Tximinien arteko zatian...


Beheitiko tximinian jendetza harrapatu genuen goiti zihoala. Soka bat jarrita zuten eta bertatik rapelatzen utzi ziguten. Honenbertzez, zailatsun teknikoak gaindituta, materiala gorde eta beheitirakoari segitu genion.


13:16 : Col de Suzon (2127m)
Goiz aterata tximietako jende ilarak saihestea lortu genuen. Suzoenko lepo ingurutik tximinietan ordu horretan zeuden tapoiak ikusteko aukera izan genuen etxeko lanak ongi egindako sentsazio goxoarekin.


Ziztu bizian Pombieko garagardo freskoaren bila segitu genuen.


13:40 : Refuge de Pombie (2031m)
Berriz ere aterpean, zerbait jan eta garagardo bana edanez atsedenaldi zabala hartu genuen.


Leku zoragarrian dago Pombieko aterpea, izen bereko lakuaren ondoan.


15:08 : Col de Soum de Pombie (2129m)
Atseden luzearen ondotik, autorako itzulerari ekin genion Midi d'Ossau handia agurtuz.


Aparkalekua begibistan.


15:39 : Cabane de l'Araille (1733m)
Hasmentako puntuan akitu zen Pirinioetako klasiko handi honetara egindako ateraldi bikaina. Dudarik gabe merezi izan zuen!


BIDEOA:

2017/10/08

Tologorri (1073m)

EGUNA: 2017/10/08

IRTEERA: Lendoño Goikoa (441m)

ZAILTASUNA: Erraza (F)

DENBORAK:
  • Igoera (La Barrerillatik): Ordu bat eta erdi
  • Jaitsiera (Menerdigatik): Ordu bat eta erdi
NOLA AILEGATU:
Mendi honen ibilbide ezagunena den hau egiteko Lendoño Goikoa herrixkara igo behar da. Bizkaiko Urduña herri historikotik goiti, seinaleei segituz, ailegatuko gara herrixka honetara. Bortz edo sei baserriz osatutako auzo bat bertzerik ez da. Bertara ailegatu baino 300 bat metro lehenago, ezkerretara ateratzen den bide bat ikusiko dugu, "Iturrigorriko Bidea" jartzen duena. Bide hau hartu eta segidan dagoen aparkaleku ttikian utziko dugu autoa.

KRONIKA:
Duela lau urte, Urduñan izan nintzen aldi bakar hartan, atentzioa deitu zidan Salbadako mendizerrak, Gaztelako meseta bat-batean amildegi bihurtzen den puntu honek. Mendizerra ikusgarrian punta batek bertze guzien gainetik deitzen du: Iturrigorri edo Tologorri izenez ezagutzen den mendia da. Orduan sortu zitzaidan mendi honetara bisita egiteko nahia eta nahi hori betetzeko aukera izan dut oraingoan.

9:44 : Lendoño Goikoa (441m)
Bezperan Gorbeia igota, arratsaldean bertan hurbildu ginen Urduñara eta han afaldu ondotik, Lendoño Goikoako aparkalekuan pasatu genuen gaua. Bezperan ez bezala, autorik ez eta lasaitasuna aparkaleku ttikian. Hasmentatik ikusi genuen honek ez zuela Gorbeiako jende uholdearekin deus ikustekorik izanen. Goizean ernatzean, Iturrigorrik dotore eman zizkigun egun onak.



Prestatu eta aparkalekutik bertatik abiatzen den pistatik pagadi trinkoan sartu ginen. Lehen metroak pistatik egin daitezke, baina bidexka batzuk pistaren "S"ak laburtzen laguntzen dute, malda handikoak izan arren. Oihaneko zati honetan garrantzitsua da harri seinaleei erne segitzea bidea ez galtzeko.


Altuera azkar irabazten da basoan zehar eta irteeran Iturrigorrik bertze aurpegi bat erakusten digu, aise eztiagoa. Hasmentan igoezina zirudien menditzarrak, malda guttiko alfonbra berdetik igotzeko gonbidapena egiten digu.


Lekuak dena den ez du ikusgarritasuna galtzen eta basoaren irteeratik bertatik ikuspegi ederrez gozatzeko aukera dago.


Eta zer erran Bidexka Beltza edo Senda Negra izenez ezagutzen den bideaz. Harresi zaharkaezinen azpian, belardi malkartsuan, maisuki zizelkatutako bide polita da.


10:57 : Barrerillako Ataka (850m)
Bidexka Beltza eta inguruko amildegiak utzi eta Barrerillako Ataka zeharkatuta Burgoseko mesetan sartu ginen.


Paisaia erabat aldatzen da goian, malda malkartsuek zelai berdeei uzten diete lekua. Gailurra hurbil ikusten da hemendik.


Pagadi dotoreak, leku hau oraindik eta ederrago bihurtzen du. Merezi du bertara joatea.


11:46 : Tologorri / Iturrigorri (1073m)
Mendiari izena ematen dion iturrian bertako batzukin itzulerako bidearen inguruan solasaldi luzea izanda, lasai ederrean azken metroak egin eta gailurra zapaldu genuen. Bertze aldean, Urduña, Amurrio eta Laudio herriek osatzen duten bailara zabala ireki zitzaigun parez pare.



Kaskoko egonaldi luzearen ondotik, jaitsiera bertze bide batetik egitea erabaki genuen, ingurua gehiago ezagutu asmoz. Iparraldera, amildegiaren ertzetik abiatu ginen Menerdigako etxolen bila.


Gibelean berriki igotako Tologorri mendia, itxura arras ezberdina du hemendik ikusita edo autoa utzi genuen lekutik ikusita.


Nehin Menerdigako etxolak bistaratuta, amildegiaren ertzean kokatuta dagoen ataka bilatu bertzerik ez da egin behar, mesetatik bailararako pasabidea aurkitzeko.


12:45 : Menerdigako Ataka (1060m)
Erran bezala, ataka hau zeharkatu eta amildegian barneratu ginen berriz ere.


Kasu honetan, kaitsieran erabiliko genuen bidexkak, zeharkaldi luze bat egiten du harresiaren azpitik metroak galduz juxtu Tologorriren oinean kokatu arte.


13:31 : Garondoko lepoa (538m)
Lepora honetara heltzean, hesia bertze ataka batetik zeharkatu eta seinale batean ongi adierazita dagoen Venta Fria baserrira doan bidea hartu behar da hasierako puntura ailegatzeko.


Tologorri berriz ere ikusgarri ageri zaigu hemendik...


13:53 : Lendoño Goikoa (441m)
Venta Fria baserriaren ondotik pasa eta errepideak segidan eraman gintuen ibilaldia hasi genuen leku berera. Ezusteko polita eskaini zigun Tologorrik eta Salbada mendizerrak.