Aiguillette (2517m)

EGUNA: 2019/02/24

IRTEERA: Tunnel d'Aragnouet-Bielsa / Iparraldeko sarrera (1821m)

ZAILTASUNA: S3

DENBORAK:

• Igoera (iparraldetik): Bi ordu 
• Jaitsiera (hegoaldera): Ordu bat

NOLA AILEGATU:

Euskal Herriko ipar partetik joanez gero, azkarrena Baionan A64 autopista hartu eta bertati joatea Saint Lary Soulango irteera hartu arte. Behin autopistatik aterata aipatutako herriraino iritsi beharko dugu. Saint Lary gurutzatu eta Aragnouet-Bielsa tunelera doan bidea segiko dugu. Tunelera ailegatu baino hiru kilometro inguru lehenago, bihurgune itxi batean kokatua dagoen eraikin zahar baten ondoan utzi behar da autoa.

Euskal Herriko hegoaldetik joan nahi badugu ordea, hobe da Iruñeatik Jacara doan autobidea hartzea. Jacatik Huescara jarraitzen duen errepidea segiko dugu baina segidan Fiscal herri aldera desbideratuko gara. Fiscaletik Ainsara segiko dugu eta hemen iparraldera biratuko gara lehen aipatutako tuneleraino igoz Cinca ibaiaren ertzetik. Tunela zeharkatuta pixka bat jaitsi (3 km) eta lehen aipatutako lekuan utzi behar da autoa.

KRONIKA:

Bezperan Louron haran politeko Balencouseko sektorea eski aritaldi ederra egin ondotik, inguruko bertze hego magalak elurrez eskasten hasiak zirela ikusita eta berriz leku berean ez genuela eskiatu nahi erabakita, altuera irabaziz Aragnouet-Bielsa tunel ingurura zuzendu ginen. Udaberriko elurra bilatzen segitu asmoz, tunelaren ipar ahoan hasi eta hegoan akitzen den ibilbide polita diseinatu genuen.

9:23 : Tunnel d'Aragnouet-Bielsa / Iparraldeko sarrera (1821m)

Gaua Pirinioen hego isurialdean pasatu genuen, Bielsan hain zuzen ere. Presarik gabe Parzango gasolindegiko tabernan gosaldu eta tunela bertze behin zeharkatuta iparraldera duen aparkalekuan utzi genuen autoa. Leku honetan beti bezala mugimendua ugaria zen. Alde batetik, izotz-eskaladatzaileak eta bertzetik, eskiatzaile eta erraketazaleak.

Aparkalekua utzi eta hego-mendebalderantz igotzen hasi ginen malda eztietatik.

Beheitiko zati honetan fresko egin arren, elurra ez zegoen gogorregi eta kutxilarik gabe egin genuen zati gehiena.

Aiguilletteko lepora hurbiltzen garlitz mendia gibelean genuela.

10:52 : Col IGN 2392m. (2392m)
Aiguillette mendiaren iparraldera kokatua dagoen izenik gabeko lepora ailegatzeko azken malda tenteagoan kutxilak jarri genituen seguruago igotzeko. Lepora ailegatuta ikuspegi ikusgarriaz gozatu ahal izan genuen. Barroudeko zirku ikusgarria ez da ahuntzaren gauerdiko eztula.

Lepotik eskiak motxilara eta elurrik gabeko ertz erraza igotzeari ekin genion Barroudeko harresi tenteen parean. Aipatu zati hau elurrik gabe erraza dela, baina elurrarekin arriskutsua izan daitekeela mendebalderantz dituen amildegiengatik.

11:46 : Pic de l'Aiguillette (2517m)
Ertza eta mendebaldeko aurpegia astira igo ondotik gailurrean ginen. Bertatik hurbil ikusten dira Port Vieux eta Barrosako mendiak.

Eta nola ez Barroudeko zirkuko tontor altuak. Irudian ezkerretik hasita Port Vieux, Munia, Troumouse, Heid, Gerbats, Gela, Soum des Salettes eta Campbieil bertzeak bertze.

Iparraldean Cintes Blanqueseko gandorra, Campbieil, Estaragne, Mechant eta Bugatet malkartsuekin.

Abiapuntua ere ikusten da tontorretik. Eskuinean berriz Garlitz mendia.

Asteburuko bigarren tontorra...

Lau ezagun zahar: Gela, 2018an igoa; Soum des Salettes, 2013an; Campbieil, 2017an; eta Estaragne, 2013an.

Gailur ingurua elurrik gabe zegoen baina metro eskas batzuk beheitiago eskiak jarri ahal izan genituen. Udaberriko elurra bilatuz Pinarrako bailararantz jaitsiko ginen, hegoaldeko maldetatik beraz.

Kaskotik Pinarraren sakonean dagoen etxola honetaraino malda zabal eta ederretatik eskiatu genuen. Hemendik oraindik bertze zatitxo bat eskiatu ahal izanen genuen.

1900 metro ingururarte jaitsi ginen eskiatuz. Bailararen bertze magaletik gehiago jaisteko aukera genuen, baina badaezpada udako bide aldera jaitsi ginen ingurua ez genuelako ezagutzen.

Hortik aitzin eskiak motxilara eta ttipi-ttapa Bielsako tunelaren hegoaldeko sarreraraino...

13:49 : Tunnel d'Aragnouet-Bielsa / Hegoaldeko sarrera (1664m)
Tunelaren hegoaldeko sarreran akitu genuen ibilbidea, Pinarrako ur-jauziaren azpian. Hortik autoaren bila joateko auto-stop egin genuen.

BIDEOA:

Lion (2102m)

EGUNA: 2019/02/23

IRTEERA: Cazaux dessus (1289m)

ZAILTASUNA: S2

DENBORAK:

• Igoera : Bi ordu
• Jaitsiera : 45 minutu

NOLA AILEGATU:

Euskal Herritik Baionan A64 autopista hartu eta bertatik segitu behar da 16. irteeraraino. Hemen Arreauko norabidea segituko dugu eta herrixka hau pasatuta Lourongo bailara politean barneratuko Aurekoa gure eskuinetara utziz. Bagneres de Luchongo norabidea segitu behar dugu, Peyresourde mendate ezaguna igotzen hastearekin batera ezkerretara Cazaux-Frechet herrirako norabidea hartuz. Hemendik goiti segituko dugu Cazaux Dessus herrixkaraino.

KRONIKA:

Jaungoikoak mendiak egin zituen egunean, mendi batzuk eskirako espresuki diseinatu zituen. Louron eta Luchongo bailaren artean zutitzen diren gailur borobilak dira horren adibiderik nabarmenenak. Horietan dago kokatua Balencouseko sektorea, eskiatzaileen gozamenerako malda anitz eskaintzen dituena.

8:55 : Cazaux Dessus (1289m)

Hasmentan Bastan inguruan asteburua pasatzeko intentzioa genuen, baina plana aldrebestu eta Lourongo bailara politera zuzendu ginen larunbat goizaldeko ordu ttikietan. Buelta handirik eman gabe Cazaux Dessus herrian gaua pasatu eta goizean goitixeago dauden antenen ondoan utzi genuen autoa. Bertatik haran zoragarri honen ikuspegi zoragarria genuen, elurrak apainduta goititik beheitiraino.

Gauzak prestatu eta Balencouseko sektorean barneratuko gintuen pista elurtua hartu genuen.

9:49 : Cabane de Balencous (1565m)
Pista etxola honen inguruan akitzen da. Hemendik orientazio desberdinetako aukera anitz ditugu eskura.

Guk harantxoaren azpiko segituko genuen, bertan baitzegoen elur gehien.

Bertze etxola honen ondotik pasa eta malda zabal eta ederretan sartu ginen.

10:47 : Col de Louron (2001m)
Erran bezala, malda zabalak eta tontor borobilduak dira sektore honen ezaugarri nagusiak. Ia edozein aldetatik eskiatu daiteke. Guk Lourongo lepo zabala gibelean utzi eta Lion mendia aukeratu genuen bere hegoaldeko maldetan eskiatzeko.

11:01 : Pic du Lion (2102m)
Eski eta erraketazaleendako paradisua izateaz gain, bere kokapenagatik mendi altuenen begiratoki aparta da Liongo tontorra.

Aneto-Maladeta inguruak, Jean Arlaud, Gourgs Blancs eta Crabioules mendiak.

Bachimalako mendigunea.

Soum des Salettes, Campbieil, Pic Long, Turon de Neouvielle, Neouvielle, Pichaley...

Iparraldean Bareilleseko sektorea, esploratu beharreko bertze bat...

Egote ederra gailurrean haize pixka bat ibili arren...

Lehen jaitsiera on baten ondotik, 1870 metro inguruan berriz foka-larruak jarri eta gailurrera itzuli ginen. Hego-mendebaldeko maldak elur arras onarekin zeuden.

Berriz Lionera bidean Pouy Loubyko bertze gailur eskiagarria gibelean utziz.

12:55 : Pic du Lion (2102m)
Bigarrenez tontorrean, urrunago Sommet du Tech mendia ageri dela.

Bigarren jaitsiera ere aski ona izan zen, elur malda zabalak gustura eskiatuz. Ondotik pista hartu eta beheiti segitu genuen.

13:43 : Cazaux Dessus (1289m)
Honaino sektoretxo honi egindako bisita. Ez zen hasmentan genuen plana, baina bigarren platerak ez dira txarragoak izaten batzuetan.

BIDEOA:

Soum d'Aas (2427m), Ayous (2288m)

EGUNA: 2019/02/15-17

IRTEERA: Gabas (1067m)

ZAILTASUNA: S2

DENBORAK:

• Gabas - Cabane de Bious Oumette : Ordu bat
• Cabane de Bious Oumette - Soum d'Aas : Hiru ordu
• Soum d'Aas - Cabane de Bious Oumette : Ordu bat
• Cabane de Bious Oumette - Pic d'Ayous : Hiru ordu eta erdi
• Pic d'Ayous - Cabane de Bious Oumette : Ordu bat eta erdi
• Cabane de Bious Oumette - Gabas : 20 minutu

NOLA AILEGATU:

Erratzutik aterata Behe Nafarroara pasatu behar da Izpegitik. Baigorritik Garazira jo eta hemendik Donapaleu aldera. Donapaleutik Sauveterre de Bearn aldera doan bidea hartu behar da baina seinaleetan Oloron ikustean azken honetara joanen gara. Oloronetik Paue aldera hartu, baina hiria gibelean utzi eta gutxira Laruns eta Artouste alder bideratzen gaituzten seinaleak ikusiko ditugu. Laruns gibelean utzi eta Artoustera ailegatu baino lehen Gabas herrira ailegatuko gara. Herria osorik gurutzatu eta goiko zatian, bihurgune itxi batean aparkaleku bat dago, justu Bious Artigueseko urtegira ateratzen den errepidetxoaren ondoan. Aparkaleku honetan utziko dugu autoa. Hemendik Biousera doan errepidea itxita egoten da negu osoan zehar nahiz eta elurrik ez izan.

KRONIKA:

Elurra ausarki dagoelarik eta eguraldi ona iragarrita dagoelarik jende lepo betetzen dira eski pistez gain mendi-eskiko ibilbiderik klasikoenak. Egun horietan zaila izaten da jaitsierako arrastoak ukitu gabeko maldetan egitea. Bious-Artigues inguruko sektore "gordea" leku aproposa da jende artetik urrun eskiatu nahi duenarendako. Mendi ibilbide anitz, orientazio gehienak aukeran eta oinarrizko kanpamendua muntatzeko etxola erosoa.

2019/02/15

18:08 : Gabas (1067m)

Lanetik hiruretan atera eta ziztu bizian Piriniorako bidea hartu genuen. Bious-Artiguesera errepide elurtua abiatzen den puntura ailegatu orduko arratsaldeko seiak jotzear zeuden. Gauzak bizi-bizi prestatu eta hesia zeharkatuta goiti abiatu ginen.

Eguzkiak onenak emanak zituen ordurako eta gailurrak bakarrik ukitzen zituen...

Errepide elurtua segitzeak ordea ez du misterio handirik. Duela bi negu bertatik eskiak parrilan jarri eta bizikletaz igoak ginen eta bagenekien ilunduz gero ere erraz ailegatuko ginela etxolara.

Bidea pare bat elur-jausik zeharkatzen dute eta horietan eskiak kendu behar izan genituen momentu batez.

Midi d'Ossau handia bistaratu genuenerako etxola hurbil zegoela bagenekien. Ondoko bi egunetan presente izanen genuen erraldoi hau...

19:07 : Cabane de Bious Oumette (1302m)
Hala ordubete eskasean gure etxetxoan ginen. Lehen lana sua pizteko egurra biltzea. Horretan jardun ginen inguruko basoetan kopetako argiaren laguntzaz ordubete inguruz.

Ondotik afaldu eta su-bazterreko egonaldi goxoaren ondotik lotara...

2019/02/16
8:44 : Cabane de Bious Oumette
Zazpi eta erdietarako jarri genuen iratzargailua. Lasai gosaldu eta prestatu ondotik goiti abiatu ginen. Eguneko helburua duela bi negu etxola honetan izan ginen aitzineko aldian igo ezin izan genuen Soum d'Aas mendia.

Etxola utzi eta errepide elurtik Bious Artigueseko lakurantz abiatu ginen.

9:06 : Lac de Bious-Artigues (1422m)
Lehen malda gaindituta urtegitxo honen bazterretik segitu genuen mendebalderanzko norabidean lakua inguratuz.

Laster gure eskuinetara abiatzen den basoko pista batetik Aaseko harantxoan barneratu ginen. Lehen zatian zuhaitz artetik ibiliko ginen...

Basoa gibelean utzita Soum d'Aas eta Auliou mendien hego magal zabal eta ederretan barneratu ginen.

Mendi-eskirako txoko bikaina udaberriko elurra bilatu nahi dugularik...

Bertze sektore batzutan ehundaka lagun ibiliko ziren bitartean, Soum d'Aaseko hego malda zabala zortzi lagunek eskiatuko genuen, gu biok eta bertze bi hirukotek. Luxu bat garai honetarako!

Malda errazetatik 2050 metro inguruan dagoen lakutxora ailegatu ginen. Hortik gure eguneko helburua zen Soum d'Aas (erdiko tontorra) ikusi genuen lehendabiziko aldiz. Bertara ailegatzeko bi tontorren arteko izenik gabeko lepotxora igoko ginen eskiekin eta handik ezkerretara biratuta gailurrera ertz errazetik.

Lepotxora ailegatzeko azken metroetan malda dezente tentetzen da eta hego haize biziaren ondorioz elurra guritu ezinean zebilenez, azken zatitxoan eskiak bizkarrera eraman genituen.

Arestian erran bezala, lepotxoan eskiak utzi eta azken zatia oinez eginen genuen.

2406 metrora dagoen sasigailurretik gandor zabala zehazkatzea bertzerik ez zen gelditzen benetako gailurrera ailegatzeko. Zati honetan haizeak bolada gogorrak zituen, baina ongi ibiltzeko moduan.

12:14 : Soum d'Aas (2427m)
Hala ailegatu ginen ikuspegi ikaragarri ederra duen mendi ezezagun honetara.

Iparraldean Sesques ingurua...

Hego-mendebaldean Aspe eta Bisaurin inguruak...

Mendebaldean gure Lescun maiteko mendiak...

Ekialdean tontor erraldoiak: Ger, Lurien, Palas, Balaitous, Frondella, Arriel, Picos del Infierno, Garmo Negro, Vignemale... eta nola ez Midi ederra.

Mendiaren bertze aldean berez biharamunerako helburu ziren Gazies eta Auleko hego malda politak genituen. Azkenean haize gogorra iragarrita zegoenez ez ginen haietara igoko eta plana aldatuko genuen.

Inguruaz gozatu ondotik ttipi-ttapa eskiak utziak genituen lepotxora itzuli ginen.

Eta eskiak oinetan hego malda zabaletan "galdu" ginen, udaberriko elur goxoaz gozatuz.

Aas bailara bikainak zapore ezin hobea utzi zigun.

14:31 : Lac de Bious-Artigues (1422m)
Basoa ahal bezala eskiatuta, urtegiko pareten gainetik lakua zeharkatu genuen Midiren begiradapean...

...eta Bious-Oumettera azken maldak eskiatu genituen.

14:44 : Cabane de Bious-Oumette (1302m)
Sei orduko ibilaldiaren ondotik lehen egunekoak eginda genituen.

Eguzkitan eman genuen arratsaldean etxolako atarian atseden hartzen.

Ilunabarra etxola barnetik...

Afaldu eta goiz sartu ginen lo zakuetan...

2019/02/17
9:06 : Cabane de Bious-Oumette (1302m)
Hirugarren eguna paradisuan. Egun honetarako asmoa Auleko bailaran barneratzea zen, baina haize gogorra iragarri zuten eta Ayous aldera joatea pentsatu genuen baso artetik leku babestuagoa iruditzen baitzitzaigun.

Gazies bertze aldi baterako utzi genuen.

9:26 : Lac de Bious-Artigues (1422m)
Helburu zehatzik gabe Bious-Artigues lakura igo eta bazterreko pistatik Ayouseko aterpe alderako norbaidea hartu genuen. Handik bezperan ibilitako Aaseko bailara (ezkerrekoa) eta eguneko hasmentako helburua zen Aulekoa (eskuinekoa) bistan genituen.

9:58 : Pont de Bious (1538m)
Pista luzeari segika Biouseko zelai zabalera ailegatu ginen. Hemen eskuinetara biratu eta basoan sartuko ginen.

GRko marka zuri-gorriak segituz zeharkatu genuen basoa.

10:27 : Col Long d'Ayous (1704m)
Puntu honetan atera ginen basotik eta elur malda ederretatik mendebalderantz jo genuen berez udako bideak Roumassot eta Mieyko lakuetara segitzen duen arren.

Gu erran bezala lakuak baino iparralderago pasatu ginen, bi lakuen arteko ur-jauzitxo saihesteko.

Ayouseko aterpe inguruetara atera ginen honela. Laugarren aldia nuen leku honetan, baina bertze guzietan bezala aho zabalik gelditu nintzen. Gainera, udan ez bezala, lasaitasuna zen nagusi eta ia inor ez zebilen inguruan. Jarraian, metro batzuk galdu eta eskuinetara ikusten den Ayouseko lepora igoko ginen.

Gentauko lakua gibelean utzi eta malda tenteagoetatik goiti segitu genuen.

12:07 : Col d'Ayous (2178m)
Lepo zabaleraino ailegatu ginen eskiak oinetan genituela. Handik erabakia hartu eta izen bereko gailurra igoko genuela erabaki genuen.

Eskiak utzi eta oinez segitu genuen ertza ipar-mendebaldeko maldetatik inguratuz eta azken malda igoz.

12:41 : Pic d'Ayous (2288m)
Hiru ordu eta erdi ibili ondotik gailurrean ginen. Handik bezperan eskiatutako Aaseko malda eguzkitsuak parez pare genituen.

Oinetan aldiz, Ayouseko aterpetxea paraje liluragarrian.

Bakar-bakarrik egon ginen gailurrean eta ia ez genuen inor ikusi egun osoan. Gailurra utzi eta igotako bide beretik eginen genuen etxolarainoko bidea.

15:03 : Cabane de Bious-Oumette (1302m)
Behin etxolara bueltan, gauzak bildu eta etxola garbitzeko momentua ailegatu zen.

Lurreko sua, koltxoiak, ura eta egurra hurbil, behar den guzia du etxolatxo honek. Makurrik ezean itzuliko gara!

15:55 : Gabas (1067m)
Etxola utzi eta errepide elurtutik autora itzuli ginen. Nekatuta baina asteburu bikaina pasa izanaren pozarekin.

BIDEOA: