2016/12/09

Bernatuara (2516m)

EGUNA: 2016/12/08-09

IRTEERA: Vallee d'Ossoue (1554m)

ZAILTASUNA: 
  • Eski zailtasuna: S1
DENBORAK:
  • Vallee d'Ossoue - Cabane de Lourdes : Bi ordu
  • Cabane de Lourdes - Bernatuara : Bi ordu
NOLA AILEGATU:
Lourdes (Frantzia) hiritik iparralderuntz Argelesera joan behar da eta hemendik Luz Saint Sauveur herrian barna Gavarniera. Gavarnie herria gurutzatu eta eski estazioko errepidea hartu behar da, baina lehenengo bihurgunean errepide hau utzi eta eskuinera jo behar dugu Ossoueko urtegi aldera, hasmentan asfaltatuta eta gero nahiko zakar dagoen pista batetik. Autoz goraino igo ahal denean Millaseko lautadan utzi behar da autoa. Gure kasuan ordea elurra zegoen bidean (negu gehienean itxita egoten da errepide hau) eta bide bazterrean aparkatu behar izan genuen, IGN mapan 1554 metrotara dagoen puntuaren ingururan.

KRONIKA:
Aurtengo hirugarren aldia Ossoue bailara ederrean, baina aitzineko biekin konparatuta desberdina izan da. Abendu gorrian Ossoue bailaratik marmotak eta jendea desagertzen dira, eta bailara bakarti eta basati bilakatzen da. Vignemale handiaren oinetan, mendi eskirako aukera anitz eskaintzen digu Pirinioetako txoko honek.

2016/12/08
15:23 : Vallee d'Ossoue (1554m)
Goizean Gavarnierainoko bidea egin eta gero, gure ustearen kontra Ossoueko errepidean uste baino elur gehiago harrapatu genuen eta nahiko behean utzi behar izan genuen autoa. Honetakoan bizikletek ere ez ziguten balio izanen eta hortaz autoa utzi genuen lekutik Millaseko lautadatxorainoko bide zatia "irentsi" beharko genuen.



Bidearen zatirik handiena elur eta izotzez estalita zegoen eta segidan jarri genituen eskiak.


Arestian aipatu bezala, Ossoueko bailara bakartia eta basatia da neguan. Berezia da oso bertan barneratzea.


16:19 : Cabane de Milhas (1680m)
Pistatik lehen etxola honetara ailegatu ginen. Gaua pasatzeko leku aproposa izan daiteke, baina guk gorago dagoen Lourdeseko etxolaraino ailegatu nahi genuen. Aipatu bi hauez gain, Ossoueko urtegiaren ondoan ere bertze bat dagoela, eta hirurak irekita daudela.


Milhaseko etxolatik aitzinera zati batean elurrik gabe zegoen pista eta eskiak bizkarrean eraman behar izan genituen.


16:38 : Espugue de Millas (1714m)
Berez hau da autoarekin ailegatzen ahal denean abiapuntua. Guri ordubete inguru kosta zitzaigun honaino ailegatzea. Maiatzean Grand Tapourako igoera ere puntu honetatik hasi genuen.


Millaseko lautadatik goiti elur preziatuak estaltzen zuen lurzorua eta eskiak jarri genituen berriz ere.


Eguneko azken argiak goiz ailegatzen dira abendu gorrian.


Millasetik malda bat gainditu eta Lourdeseko etxolako lautada zabala bistaratu genuen.


Azken metroak etxolara ailegatzeko.


17:32 : Cabane de Lourdes (1947m)
Etxola honetan pasatuko genuen gaua biharamunean Bernatuara mendia igotzeko. Etxola nahiko handia izan arren ez dago sobera ongi zaindua. Bi zati ditu: artzainak erabiltzen zuen zatia eta mendizaleendako den zatia. Artzainaren zatia abandonatua dago eta jadanik ageri da ez duela bertan pasatzen uda. Handia da, hiru gelatxorekin, baina zabor dexente eta jende kaka ere badago barnean. Bertze zatia ttikiagoa da, bi burdinazko litera ditu. Ezer gehiagorik ez. Bertan pasatu genuen gaua. ç

Ailegatu eta lehen momentuan ezustekoa izan genuen. Afaltzeko hainbat gauza eraman arren, gasa atzendu zitzaigula konturatu ginen. Horrenbertzez, eramandako latak hotzak eta platerrik eta kazorik ezean, palara botata jan behar izan genituen. Afari mundiala eta gero, bederatzi eta erdietarako lotara.


Cabane de Lourdes la nuit...


2016/12/09
8:32 : Cabane de Lourdes (1947m)
Gau luzeak dira abendukoak eta hamar orduko egonaldia egin genuen lo zakuetan. Prest ginen bigarren konbaterako!


Etxolatik atera eta segidan Canauko bailaratxoan sartu ginen. Bailararen amaieran gure helburua ageri zen zuri-zuri.


Lehen metroak nahiko etzanak dira eta errekaren eskuinaldetik egiten dira. Ondotik erreka gurutzatu eta azken zati aldapatsuagoan sartu ginen.


Bakardadea, hotza, elur-hautsa eta haizea unibertso zurian.


Gailurra baino beheraxeago ertz zabalera atera ginen eta gustura hartu genituen eguneko lehen eguzki izpiak. Neguaren erdian Bernatuararen ipar aurpegiak ez du eguzkirik ikusten.


Gailurrera ailegatzeko azken malda bat bertzerik ez zen gelditzen, Zati honetan ere, eguzkitan egon arren, elur.hautsa harraoatu genuen.


Azken metroak Bernatuarako laku izoztua behean eta Gabiet mendi dotorea goraxeago genituela.


Sasigailurrera ailegatzen Canauko bailara guzia oinetan genuela.


Sasigailurretik ertz erraz eta polit bat bertzerik ez zen gelditzen.


Gailurreraino eskiak hanketan genituela iritsiko ginen.


11:13 : Bernatuara / Bernatoire (2516m)
Taillon, Gabietous eta Gabiet mendiak gailurretik.


Mendebaldean Tendeñera, Garmo Negro, Picos del Infierno, Balaitous...


Egote ederra zegoen gailurrean haizerik gabe eta eguzki goxoarekin eta tarte zabala hartu genuen zerbait jan eta ikusmiraz gozatzeko.


Ondoren eskiak jantzi eta Bernatuarako ipar aurpegiko elur goxoa dastatu genuen.


Lehen malda jaitsita gailurra gibelean genuela.


Azpiko zati laua gaindituta Canauko bailara izkutu eta ederra agurtu genuen. Mendi eskirako paradisu txiki horietako bat...


13:20 : Cabane de Lourdes (1947m)
Berriz etxolara bueltan pixka batean atseden hartu, trasteak bildu eta beheitirako bidean segitu genuen.


Gibelera begirada bat etxola dagoen paraje ederrari...


14:35 : Espugue de Millas (1714m)
...eta Millaseko lautadaraino eskiatu genuen. Hemen eskiak bizkarrera eta bezperan igotako pista zatia jaisteari ekin genion.


Mendi egun bikainak eta elur goxoak uzten duten zapore onarekin utzi genuen Ossoueko bailara.


15:49 : Vallee d'Ossoue (1554m).
Pimene eta Astazu mendien begiradapean agurtu genuen Gavarnie ingurua, inoiz hutsik egiten duen zonaldea.


BIDEOA:

2016/12/03

Col d'Ayous (2178m)

EGUNA: 2016/12/02-03

IRTEERA: Gabas (1067m)

ZAILTASUNA:
  • Eski zailtasuna: S2
DENBORAK:
  • Gabas - Cabane de Bious Oumette : 45 minutu
  • Cabane de Bious Oumette - Col d'Ayous (Aas bailaratik) : 3 ordu
  • Col d'Ayous - Cabane de Bious Oumette : Ordu eta erdi
  • Cabane de Bious Oumette - Gabas : 30 minutu
NOLA AILEGATU:
Erratzutik aterata Behe Nafarroara pasatu behar da Izpegitik. Baigorritik Garazira jo eta hemendik Donapaleu aldera. Donapaleutik Sauveterre de Bearn aldera doan bidea hartu behar da baina seinaleetan Oloron ikustean azken honetara joanen gara. Oloronetik Paue aldera hartu, baina hiria gibelean utzi eta gutxira Laruns eta Artouste alder bideratzen gaituzten seinaleak ikusiko ditugu. Laruns gibelean utzi eta Artoustera ailegatu baino lehen Gabas herrira ailegatuko gara. Herria osorik gurutzatu eta goiko zatian, bihurgune itxi batean aparkaleku bat dago, justu Bious Artigueseko urtegira ateratzen den errepidetxoaren ondoan. Aparkaleku honetan utziko dugu autoa. Hemendik Biousera doan errepidea itxita egoten da negu osoan zehar nahiz eta elurrik ez izan.


KRONIKA:
Bagenuen gogoa aurtengo eski denboraldia estreinatzeko eta ongi hasteko abenturatxo polita prestatu genuen. Ez zen dena nahi bezala atera baina mendi asteburu bikaina pasa genuen Ossau inguruan.

2016/12/02
16:28 : Gabas (1067m).
Ortziral eguerdian egin genuen Ossauko bailara ederrerainoko bidea eta Larunsen erosketa egin eta zerbait erosi ondotik aparkalekuan plantatu ginen. Plana egina zegoen. Bizikletaz traste guziekin Bious-Oumetteko etxolaraino igo, biharamunean Ass de Bielleko bailaratxotik Soum d'Aaseko mendiaren hego aupegia eskiatzeko. Momentuko elur egoera ikusita baziren autotik bertatik eskiatzeko moduko lekuak baina gu arras baikor abenturatxo honetan murgildu ginen. Harrapatuko ote genuen elurrik? Auskalo, baina goazen!


Aparkalekutik Bious-Oumettera errepidea segitzea bertzerik ez da egin behar. Erran bezala, elurrik ez izan arren ere itxita egoten da bide negu osoan zehar. Kuriosoa da hala ere elurra kentzeko makina pasatzen dela.


Bidean izotz plaka batzuk harrapatu genituen baina aitzinera hala ere!


Eguneko azken izpiekin ailegatuko ginen etxolara.


Leku honetan dago Bious-Oumetteko udako aparkalekua eta errekaren onodan, argazkian ongi ikusten ez bada ere, izen bereko etxola.


Lehen etapa uste bezala gainditua!


Errepidetik etxolara 300 bat metro izanen dira eta hauek bizikleta eskutan genuela egin behar izan genituen.


Eguzki izpiak Midi d'Ossau urre kolorez margotuz.


17:17 : Cabane de Bious-Oumette (1302m).
Etxolara ailegatu eta sorpresa polita eraman genuen arras baldintza onean baitzegoen. Bi ohe koltxoi eta guzi behean, mahai eta lurreko su batekin eta goian bertze solairutxo bat bertze koltxoi batekin. Horrez gin, egurra eta ura esku-eskura ditu. Behar den guzia beraz, Wifia izan ezik!


Lehen lana  kokatu ondotik sua egitea noski.


Goxotasuna...


Sua da leku hauetan eta gehinbat neguean elementurik garrantzitsuena.


Artea...


Banabar zuriak, zingerra eta Tiramisu bikainarekin afaldu ondotik lo egitera joateko momentua ailegatu zen. Gogotsu geunden biharamunean eskiak janzteko.


2016/12/03
9:19 : Cabane de Bious-Oumette (1302m).
Gaua luzea eta gero zazpi eta erdietan ernatu ginen.


Gosaria, gauzak prestatu eta gorako bidea hartuko genuen.


François eta Lorerekin geldituak ginen errepidean eta haiekin eginen genuen eguneko itzulia.


10:12 : Lac de Bious-Artigues (1422m).
Abiatu eta berehala pare bat ezusteko izan genituen eta denbora dexente pasa genuen lakurainoko bide motza egiten. Lakuaren presa gainetik zeharkatu eta Ass de Bielleko bailaran barneratuko ginen.


Midi d'Ossau Bious-Artigueseko lakutik.


Elurra behe-behetik harrapatu genuen, 1300 metrotatik alegia, baina gogor zegoen eta eskiak bizkarrean eramatea erabaki genuen lehen zatian.


11:14 : Cabane d'Aas de Bielle (1668m).
Basoa zeharkatuta etxolatxo polit honetara ailegatu ginen. Zoritxarrez itxita dagoen etxola.


Etxolatik hurbil eskiak jantzi genituen eta goiti.


Lehen erram bezala, hasieran gure asmoa Soum d'Aaseko hego aupegitik eskiatzea zen baina argazkian ikusten den bezala elurrez justu samar zegoen eta Ayous inguruan askoz elur geiago ikusten zenez, bertara jo genuen. Asmoa Ayouseko lepora pasa eta Ayouseko laluen inguruan eskiatzea zen. Gero aurkituko genuen elurra ikusita agian hau izan zen eguneko lehen erabaki okerra. Izan ere, ziur aski, Soum d'Aas mendia igo eta iparraldeko magalean askoz elur gehiago aurkituko genuen.


12:58 : Col d'Ass de Bielle (2100m).
Ayouseko lepora joateko lehenik bertze lepo honetatik pasa behar da. Lepoaren bertze aldean Hourquette de Larryko lepoa eta mendia ageri ziren, baita Aspeko bailara aldera jaisten den Baigt de Saint Courseko bailaratxo polita ere. Ayouseko lepoa argazkiaren ezker-ezkerrean ikusten den eguzkitan dagoen mendiaren ondoan dago. Bertara joateko mapetan bideak beheko bailarara jaitsi  eta gora egiten du. Guk ordea ez jaisteagatik zuzenean zeharkaldia egitea erabaki genuen.


Hau izan zen eguneko bigarren erabaki okerra. Zeharkaldiaren hasierako zatia erraz zen, baina geroago zati arras aldapatsua eta espuesto xamarra pasatu behar zen. Hain aldapatsua izanik ezin genuen eskiz pasa eta oinez ere ia izterretaraino sartzen ginen elur hautsetan. denbora asko galdu genuen zati honetan.


Komeria batzuk pasata malda errazetatik Aypuseko lepora ailegatu ginen.


14:09 : Col d'Ayous (2178m).
Lepora ailegatu eta eguneko lehen geldialdia egin genuen jateko. Aitzineko guziak geldialdi teknikoak izan ziren. Nahiko berandu zen eta oraindik jaitsiera luzea genuen autoranio, hortaz Ayous edo Larry mendiak ez igotzea erabaki genuen.


Eta Gentau laku aldera jaisteari ekin genion.


15:05 : Lac Gentau (1947m).
Honela eremu zoragarri honetan barneratu ginen. Gainera lakuak ez zeuden oraindik izoztuta eta horrk edertasuna handitzen zuen.


Gentau eta Miey lakuak pasata Roumassotekoa bistaratu genuen.


Hemendik aitzin elurra gutxitu eta eskiak bizkarrean eraman behar izan genituen beheko pistan berriz jarri arte.


Neguko arratsalde apaleko argiekin zoragarri zegoen dena.


17:36 : Cabane de Bious-Oumette (1302m).
Berriz ere etxolara bueltan gauzak bildu eta nahiko berandu beherako bideari ekin genion berriz ere bizikletaz.


Etxola ederra agurtu genuen. Itzultzeko moduko dudarik gabe!


18:07 : Gabas (1067m).
Egunaren azken argiekin batera ailegatu ginen autora. Ez genuen nahi bezain bertze eskiatu, ezta gailurrik egin ere, baina mendi itzuli bikaina egin genuenaren pozarekin bukatu genuen eguna.


BIDEOA: