hodei guztien gainetik...: 2025

2025/04/29

Pic des Quatre Termes (2724m)

EGUNA: 2025/04/18

ABIAPUNTUA: La Mongie (1740m)

ZAILTASUNA: S3

DENBORAK:

Igoera : 3 ordu
Jaitsiera : 45 minutu

NOLA AILEGATU:

A64 Pirinioetako autopistan zehar joanen gara Tarbes hiriraino. Hemen utziko dugu autopista eta Bagneres de Bigorre herrira eramaten gaituzten seinaleak segituko ditugu. Herri hau gibelean utzi, Campan herritik pasa eta Sainte-Marie-de-Campan herrian eskuinetara biratuko gara Tourmalet mendate ezaguneko errepidean goiti. Mendatera ailegatu baino 4 kilometro lehenago aurkituko dugu La Mongieko eski estazio ezaguna.

ARRASTOA:

KRONIKA:

Bigarren eguna genuen La Mongieko eski estazioan. Bezperan Contade mendiaren iparraldeko maldetan ibili ondotik, bigarrenean guretako klasiko bilakatzen ari den Quatre Termes mendian izan ginen. Erran behar da guretako ez ezik, La Mongietik abiatuta egiten diren mendi-eski ibilbideetatik klasikoena ere badela. Abiapuntu altua, 1000 metroko igoera eta jaitsiera zuzena eta paraje ederra nahikoa aitzakia dira mendi honi urtero bisita egiteko.

8:28 : La Mongie (1740m)

Estazioko taberna batean kafea hartu, eta Sapins izeneko pista gorritik eskiak zangoetan genituela ekin genion egunari.

Bezperako eguraldi eguzkitsuak ez zuen aitzineko egunetako elurra urtzea lortu eta beraz elur dezente genuen azpitik beretik.

Pista goitiko partean eskuinetara biratzen delarik, hau utzi eta zuzen segituko genuen. Argazkiaren erdian ikusten diren izeien eskuineko maldetatik iganen ginen.

Malda tente samarra da aipatu berri dudana, baina elur guri genuen goizetik eta zailtasunik gabe igan genuen.

Malda hori gaindituta zirku batean barneratuko ginen. Metro zelai batzuk egin eta eskuinetara biratuko ginen zirkutik ateratzeko.

Ingurua ikusgarria da argazkian ikusten den bezala.

Teste Guilhem da zirku honetako gailur nagusia bere 2670 metroekin. Hala ere, gure eguneko kaskoa eskuinerago gelditzen da eta hau baino altuagoa da.

Inguruaz gozatzen...

Zirkuaren azpiko lautadatxoa eskuinetara malda tente bat iganez utziko genuen. Puntu honetatik aitzim eguzki beroak joko gintuen eta elur fite pisutzen hasiko zen.

Ekialdeko orientazioa duen malda hau ere tente samarra da.

Behin malda gaindituta, bertze zati zelai bat genuen atseden hartzeko.

Puntu honetan Quatre Termes mendia ikusten hasiko ginen, eta bere ezkerretara harat ailegatzeko lepoa. Ondoko irtengunea argazkiaren ezkerreko edo eskuineko maldatik gainditzen ahal da. Gu beroa zela eta ezkerreko aldeko itzala bilatuz iganen ginen.

Kostra egoeran zegoen elur malda bat gainditu genuen itzaletik.

Eta leporako azken malda igateari ekin genion. Gure gibelean beranduago eskaitu genituen malda ederrak ageri ziren, nahiz eta ez genuen elur kalitate onegiaz gozatzeko aukerarik izan.

Lepora ailegatuta Quatre Termesera igateko ertz motza gure eskuinetara gelditzen zen. Lorea lepoan gelditu zen eta nik kaskora igatea erabaki nuen. Zailtasun handirik ez du ertzak, baina igateko elur sakona izan nuen eta kosta zitzaidan gailurrera ailegatzea.

10:59 : Pic des Quatre Termes (2724m)

Bigarren aldiz nintzen mendi honen gailurrean. Lehen aldia 2013an izan zen, duela 12 urte. Orduko hartan La Mongietik abiatuta hiru eguneko zeharkaldi polita egin genuen eta azken egunean Quatre Termes mendia igan genuen.

Neouvielle ingurua zuri-zuri ikusten zen tontorretik...

Iparraldean Midi de Bigorre...

Sobera luzatu gabe, eskietara itzuli eta jaisten hasi ginen. Elur heze eta pisua izan genuen jaitsiera osoan eta ahalik eta bira gutien egiten saiatu ginen.

Parajeaz gozatzeko tarteren bat hartuz...

12:03 : La Mongie (1740m)

Autoaren ondoraino eskiatu ahal izan genuen behintzat, eta nahiz eta elur eskasa izan kontent akitu genuen eguna.

2025/04/28

Pas de la Crabe (2477m) eta Breche du Contade (2680m)

EGUNA: 2025/04/17

ABIAPUNTUA: La Mongie (1740m)

ZAILTASUNA: S3

DENBORAK:

La Mongie - Pas de la Crabe : Bi ordu eta erdi
La Mongie - Breche de Contade : Hiru ordu
Bi jaitsierak : 45 minutu

NOLA AILEGATU:

ARRASTOA:

KRONIKA:

Denboraldia aitzinera doan heinean La Mongieko eski estazioa mendi eskirako gotorleku bilakatzen da. 1700 metrotik goiti egoteak eta eski pistak zapalduetan elurrak luzaroago irauteak estazioa hetsi eta gero inguruaz baliatzeko aukera ematen dute. Kasu honetan, bi eguneko zeharkaldi bat egiteko abiatu ginen bertatik, baina Pourteilhgo zirkutxoko bazterretan eskiatzen akitu genuen.

10:00 : La Mongie (1740m)

Presarik gabe abiatu ginen estaziotik, goizeko eguraldi eskas eta hotza hobetzeko iragarpena alde baikenuen. Sarreran aipatu bezala, hasmentako asmoa Pas de la Crabe pasabidera igan eta bertatik Aygues Cluseseko aterpe berrira pasatzea zen, ondotik han mendiren bat edo bertze eskiatu eta biharamunean Quatre Termes ingurutik itzultzeko.

Mendebaldera egin genuen poliki-poliki estazioaren azpiko parteko pistetatik.

Fite ezkerretara altuera irabazten hasiko ginen Espade mendi ikusgarria parean genuela.

Zati bat pistaz kanpo egin ondotik, Pourteilh pista hartu eta hegoalderantz biratuko ginen.

Pista honetatik izen bereko zirkuan sartuko ginen.

Laino alferrak bazterrak estaltzen ari zirela sartu ginen Pourteilh zirkuan. Leku polita da, baina tamalez eski pistak daude inguru horretan eta xarma kentzen diote. Erran beharrik ez da, ingurune honetan eskiatzeko aukera eski estazioa hesten delarik hasten dela.

Zirkuan pixka bat barneratu ginen eski pistak utzi eta eskuinetara biratu aitzinetik.

2300 metro inguruan pistak utzi eta eskuinetara (mendebalderantz) hartu genuen. Parean genuen Crabeko lepotxoa, bertze aldera pasatzen utziko ziguna. Bertara ailegatzeko azken 100 metroak tenteagoak dira eta bezperan botatako elurrak hortzak estutzera behartu gintuen.

12:21 : Pas de la Crabe (2477m)

Behin lepoan, laino zela eta, bertze aldera ez pasatzea erabaki genuen. Aygues Cluses aterpera deitu, erreserba ezeztatu eta bide beretik jaisten hasi ginen.

Elur sakonean eskiatuz fite ailegatu ginen bueltan pistetara.

Puntu horretan lainoak saretzen hasiak zirela eta elurra nahiko ona zela ikusita, berriz foka-larruak paratu eta Pourteilhgo zirkutik goiti pistak igateari ekin genion.

Laino tartean agertzen hasia zen Contade azpiko maldek atentzioa deitu ziguten. Inguru horretan ez dago pistarik eta lepotik beheitiko maldak leun eta erakargarri ikusten ziren. Hortaz, sobera pentsatu gabe handik goiti abiatu ginen.

Inguru horretan ez zen inor ere ibilia egun horretan eta beraz arrastoa sakona ireki behar izan genuen. Poliki-poliki Contade mendiaren ezkerretara gelditzen den irudiko lepora zuzendu ginen.

Gure gibelean geroago eskiatuko genituen malda ederrak utziz...

15:15 : Breche du Contade (2680m)

Azken metroak kanaltxo estuago eta tenteago batetik egiten dira, baina elur-baldintza egokietan leporaino eskiak zangoetan ailegatzea posible da. Lepotxotik kaskora 30 metro inguruko malda erraza bertzerik ez zen gelditzen, baina hautsi berria zen haize plaka bat zegoen bertan eta badaezpada ez igatea erabaki genuen. Aipatu argazkian ikusten den lepoa ez dela Contade, ondoan dagoen Quatre Termes mendia baizik.

Hortaz, foka-larruak kendu eta pistetarainoko malda ederra eskiatu genuen. Ondoren, Pourteilh izeneko pista hartu eta bertatik estazioraino jaitsiko ginen.

16:15 : La Mongie (1740m)

Hasmentako plana ez eginda ere, aho-zapore nahiko onarekin akitu genuen eta Contadeko lepora igaten den malda ezagutzeko aukera izan genuen. Bertze baterako fitxatua gelditu zen, itzuli politak egiteko aukera eskaintzen baitu inguruak eski pistak hesten direnetik denboraldia akitu arteko garaian.

2025/04/16

Tendeñera (2845m)

EGUNA: 2025/04/06

ABIAPUNTUA: Merendero Les Paules (1229m)

ZAILTASUNA: S3

IRAUPENA:

Les Paules - Rincon del Verde (bizikletaz) : Ordu eta laurden
Rincon del Verde - Tendeñera (eskiz) : Hiru ordu eta erdi
Tendeñera - Rincon del Verde (eskiz) : Ordubete
Rincon del Verde - Les Paules (bizikletaz) : Ordu erdi

NOLA AILEGATU:

Iruñetik Jakarako bidea hartuko dugu eta bertatik Sabiñanigo aldera Formigañ aldera doan errepidera desbidefratu arte. Bide honetatik segituko dugu Portaleteko mendatean goiti gure eskuinetara Panticosara igaten den errepidea ikusi arte. Panticosa herria gibelean utzi eta metro batzuk goitiago eskuinetara Les Pauleseko aparkalekura joaten den zementuzko bidea hartuko dugu. Aparkalekutik goiti Riperako bailaran sartzen den pista hesi batek mozten du. Hesi hau irekitzeko giltza Panticosako udaletxean uzten dute astetartez, baina asteburuetan ezin da giltza hori lortu. Hortaz, gure kasuan bezala, bizikletaz hurbiltzea da aproposena.

ARRASTOA:

KRONIKA:

Tendeñerako mendigunea paraje zoragarria da eta eski denboraldiaren akabailan ateraldiak egiteko aukerak eskaintzen ditu. Inguru honetan Sabocos eta Peña Roya mendietan eskiatu izan dugu azken urteetan, eta oraingoan mendiguneko punturik altuena den Tendeñera ederrean izan gara. Bertar ailegatzea ez da ahuntzaren gauerdiko eztula. Riperako pista luzea hetsia egoten denez, bizikletaz egin genuen hurbiltzea eta hortik goiti paisaia dolomitikoaz, bakardadeaz eta elur-baldintza bikainez gozatu ahal izan genuen.

8:15 : Merendero Les Paules (1229m)

Aparkalekuan berean pasatu genuen gaua. Zazpietan ernatu, gosaldu, traste guziak prestatu eta hesia zeharkatuta pistan goiti abiatu ginen.

Pistak galtzerik ez du, bidegurutze apurretan biderik zabalena hartzea bertzerik ez baita egin behar.

Hasmentako zatian bihurgune hetsiak ditu eta malda dezente ere bai. Ondotik, Riperako bailaran sartu ahala, etzanagoa da.

Ripera eta Iconako aterpetxoak gure ezkerretara utzi eta zirkuaren sakoneraino segitu genuen bizikletaz. Zazpi kilometro inguruko bidea egin genuen eta pisua bizkarrean genuela kontuan hartuz, bere gogortasuna baduela erraten ahal da.

9:37 : Rincon del Verde (1646m)

Pista elurretan desagertu baino metro batzuk beheitiago, zelaitxo honetan harkaitz handi baten kotra utzi genituen bizikletak.

Gure ezkerretara Salto de Tendeñera deitzen den ur-jauzitxoa genuen. Igoerako bidexka justu haren gainetik zeharkaldia eginez pasatzen da.

Pistatik bortz minutu gehiago oinez egin eta ezkerretara ateratzen den bidexka hartuko genuen. Parean Peña Forato ikusgarriak zirkuaren hegoaldeko muga markatzen du. Lekua zirraragarria da eta bakardadea ziurtatua dago.

Bidexkak altuera poliki-poliki irabazten du Salto de Tendeñera ur-jauziaren gainera atera arte. Azken metroak elurtuta badaude arriskutsuak dira, esposizio handia baitute. Gure kasuan, elur pixka bat bazuetn ere, aise saihesten ahal zen.

Zirkua gure gibelean utzi genuen.

Behin ur-jauziaren goitiko aldea harrapatuta, Tendeñerako lepora igaten den bailara bat irekitzen da gure eskuinetara. Bailara horretan jadanik elurra zapaltzen hasi ginen, baina oinez segitu genuen pixka batean.

10:44 : Cabaña de Tendeñera (1934m)

Etxola honetara ailegatuta, errekan ura hartu eta eskiak paratuko genituen.

Segidan erreka zeharkatu eta iparraldeko orientaziodun maldetatik Liana deitzen den parajera pasatzeko pasabidea igan genuen.

Gure gibelean Tendeñerako lepora doan bidea utzi genuen. Handik ere joaten ahal da gailur aldera.

Tendeñerako amildegitik atera eta Liana izeneko parajean elur malda infinituen eman ziguten ongi etorria.

Paraje eder honetan elurrak luze irauten omen du eta beraz denboraldi akabailan eskiatzeko aproposa da.

Ezkerretara (hego-ekialdera) zeharkaldi luzea marraztuz Liana aldez alde zeharkatuko genuen malda errazetatik.

Unibertso zurian...

Tenako bailara gure gibelean utziz...

Gailurra begien bistan eramaten da ibilbidearen zati handi batean eta orientatzeko balio du. Hala ere, bertara igateko iparraldetik inguratu eta ekialdeko maldak bilatu beharko genituen.

Ibon de Tendeñera elurtua gure eskuinetara utzi...

...eta mendiaren goitiko partera igaten utziko zigun ipar-ekialdeko maldara ailegatu ginen. Malda hau aitzinekoak baino tenteagoa da eta 35 bat gradura ailegatuko da. Udaberrian eguzkia ikusten du, ordea, eta beraz eskiz gainditzeko moduan egoten omen da normalean. Gure kasuan arazo handirik gabe ireki genuen arrastoa bezperan botatako elur freskoan.

Vignemale inguruak ikusten hasi ginen inguru honetatik...

Malda tenteagoa gaindituta, zelaitxo batera atera ginen eta gailurrerako azken metroak ikusi genituen parez pare. Eskiz iganen genuen pareko maldaren zati bat eta gero kranpoiak jantzita saiatuko ginen kaskora ailegatzen.

Ekialdean Otal mendia eta Gavarnieko 3000koak hurbil ikusten genituen.

2775 metro ingurura arte ailegatu ginen eskiekin, gailurretik 70 metro eskasera. Kranpoiak paratu eta goiti segitu genuen, argazkian ikusten den sasigailurrerantz.

13:21 : Tendeñera (2845m)

Sasigailurrera edo aitzingailurrera ailegatu baino lehen, ertza zorrozten hasten da eta bertara ailegatzean pasabide estu batera iritsi ginen. Benetako gailurra parean genuen 7-8 metro goitiago, baina 5 bat metroko ertz estua zeharkatzeak arriskuak hartzea zekarren eta bertan gelditzea erabaki genuen. Pasabide hau elur gutiago dagoelarik nahiko aise zeharkatzen omen da.

Eskietara itzuli, Gavarnieko mendiei begira zerbait jan eta jaitsiera ederrari ekin genion. Igoeran zeharkatutako Liana parajetik jaitsiko ginen, kalitate arras oneko elurra harrapatuz goitiko partean.

Bezperan botatako elur fresko geruza fina egoera onean mantendu zen 2300 metrotik goiti.

14:16 : Izenik gabeko lepotxoa (2247m)

Lianak mendebalderantz zeharkatuta, Iberpix mapetan 2247 metrora ageri den lepora jo genuen beheiti segitu ordez. Lepo honetatik Rincon del Verdeko zirkuaren sakonera eskiatzen segitzeko aukera dago. Gainetik kornisa handiak zituela ikusi arren, hauek hautsita lepoaren azpiko kanal tentera sartzea lortu genuen eta handik beheiti eskiatzen segitu genuen.