Pic de la Touatere (2530m)

EGUNA: 2025/02/23

ABIAPUNTUA: Tournaboup (1450m)

ZAILTASUNA: S3

IRAUPENA: 

• Igoera: Hiru ordu
• Jaitsiera: Ordu bat

NOLA AILEGATU: 

Baionatik autopistaz joanen gara Tarbesen atera arte eta hemendik Lourdesera joko dugu. Lourdes hiritik hegoaldera joanda, Argeles Gazost eta Luz-Saint-Sauveur herrietara iritsiko gara, hurrenez hurren. Azken herri honetan Tourmalet mendate mitikorako bidea hartu behar da eta Tournaboupeko aparkalekura igan.

ARRASTOA:

Powered by Wikiloc

KRONIKA:

Tournaboupeko aparkalekutik abiatuta eski denboraldiaren zati gehienean aukera zabala izaten da. Baldintzen arabera hego nahiz ipar orientazioa bilatu behar delarik 1500 metroko altueran kokatzen gara eta hortik goiti normalean elurra harrapatzen dugu. Ipar orientaziodunen artean Madamete izanen da ziur aski inguruko mendirik ibiliena eskiz. Inguru hartan badira ibilbide motz eta bertikalagoak eskaintzen dituzten bertze mendiak ere: Lurtet, Crampettes eta Touatere, errate baterako. Azken honen mendebaldeko maldak eta iparraldeko kanalak ezagutzen ibili gara azken asteburuan.

8:38 : Tournaboup (1450m)

Autotik beretik eskiak zangoetan genituela abiatu ahal izan ginen Grand Tourmaleteko eski pistak lagun. Hegoalderantz jo genuen argazkian ikusten den Coubouseko kalearen azpira ailegatzen den bailaratxotik.

Tourmaletera igaten den antzinako errepideko Gaubieko zubi inguruan zati batean eskiak kendu behar izan genituen, eta bailaratxoan sartzen den pista hartuta ere ez genuen elurraren jarraikortasunik izanen azpiko metro horietan.

9:22 : Pontou (1740m)

1700 metro inguruan bailaratxoan ezkerretara biratzen delarik guk zuzenean malda tenteagoak igateari ekinen genion Coubouseko laku aldera. Puntu honetatik goiti elur gehiago eta jarraia harrapatuko genuen.

Metroak irabazi ahala, bezperako elurtetxoak utzitako elurra agertzen hasi zen.

Azpiko elur gogorragoa tapatzen zuten zentimetrotxo eskasek Coubouseko maldaren zatirik tenteenak aise igatea ahalbidetu ziguten.

10:00 : Lac dets Coubous (2041m)

Behin malda iganda, ezkerretara biratu eta urtegiaren pareta gainetik lakua inguratu genuen.

Gure gibelean itxura ona zuen Crampettes mendiaren ipar-ekialdeko kanal ikusgarria utzi genuen, ondoko baterako!

Hortik goiti Touatere mendiaren mendebaldeko maldak igaten hasi ginen. Izeiz zipriztindutako malda gero eta tenteagoa da, baina ipar-mendebaldeko bizkarra bilatuz arazo handirik gabe igaten da.

Inguru honetan elur freskoa 10 bat zentimetrokoa izanen zen eta kasko inguruan 15 arte ere ailegatuko zen.

Arrastoa irekitzea tokatu zitzaigun, eguneko lehenak izan baikinen mendi honetara igaten.

Altuera irabazi ahala, Neouvielle inguruak hasi ziren agertzen hegoaldean.

Puntu honetatik argazkian parean ikusten den bizkar eguzkitsura malda tente bat zeharkatu genuen aldez alde. Zati hau elur-jausi arriskuarekin delikatua izaten ahal da, baina guk zorionez ez genuen halako baldintzarik.

Behin zatirik tenteenak gaindituta, izeiak gibelean gelditzen dira eta azken zatia etzanagoa da.

Puntu honetatik gure ezkerretara gelditzen zen Touatere edo parean gelditzen zen Tracens igaten ahal dira. Gu lehenera iganen ginen.

Azken metroak bizkar errazetik egin genituen.

Neouvielle, Ramougn eta Campbieil kasko ingurutik...

11:39 : Pic de la Touatere (2530m)

Hiru ordu eskas behar izan genituen goiti ailegatzeko. Mendi egun zoragarria zegoen, haizerik ez eta hotzik ere ez! Hortaz, goitian tarte lasai hartu genuen inguruaz gozatzeko.

Ondotik eguneko lehen jaitsiera etorri zen. Kaskotik igan ginen zatitik jaitsi ordez, zuzenean mendebaldeko maldak hautatu genituen. Goitiko zatian elur zoragarria izan genuen, 15 bat zentimetroko hauts geruza. Jaitsi ahala geruza hori finduz joan zen, baina elur ona izan genuen.

2100 metro ingururaino jaitsi ginen, Yunco laku ondotsura. Beraz berriz fokak paratu eta iparralderantz diagonal bat eginda igoeran irekitako arrastoa harrapatu genuen. Bigarren igoera honetan Touatere mendiaren ipar-mendebaldeko bizkarrera iganen ginen handik beheiti abiatzen diren kanaletako bat eskiatzeko.

Eskiatuko genuen kanalak gehienez 40 bat gradu hartuko ditu tarteren batean eta nahiko zabala da. Iparralderantz zuzenean Aygues Cluseseko erreka bazterreraino jaisten da 400 bat metroko jaitsiera bikaina eskainiz.

Aunitz gustatu zitzaigun kanaleko jaitsiera eta bertze baterako ere fitxatuta gelditu zen. Azken begirada bat bota eta errekaren bazterretik igoerako bideraino itzuli eta handik auto aldera jaitsi ginen egunari amaiera emateko.

 

14:05 : Tournaboup (1450m)

Bertze egun polit bat pasatu genuen inguru honetan, azken bi urteetan aunitzetan egin dugun bezala. Hala ere, nahiz eta inguruko jaitsiera aunitz ezagutu, bada zer egina bazter hauetan...

Sanctus (2482m)

EGUNA: 2025/02/15

ABIAPUNTUA: Lac du Tech (1217m)

ZAILTASUNA: S4 kaskotik beretik eskiatuz gero, bertzenaz S3

IRAUPENA:

• Igoera : 4 ordu
• Jaitsiera : Ordu bat

NOLA AILEGATU:

Baionatik A64 autopistaz Tarbesera ailegatuko gara eta hemendik Lourdesera. Lourdes hiritik hegoaldera joanda, Argeles-Gazost herrira ailegatuko gara. Hemen Aubisque mendate ezagunera igotzen den bidea hartuta Val d'Azunen barneratuko gara. Arrens herrira ailegatzean Tech lakura zuzenduko gaituen errepidetxoa hartu behar da.

ARRASTOA:

Powered by Wikiloc

KRONIKA:

Sanctus mendia ezaguna da eskiatzaileen artean. Elurra duelarik, Gourettetik kaskora igaten den bidean nekeza izaten da bakardadea harrapatzea. Arrenseko bailarako Tech lakutik igaten den bidea aise bakartiagoa da, eta eskiatzeko ez dio aitzinekoari inbidia handirik. Boulesteko lepotik kaskorainoko 750 metroko malda bikaina da udaberriko elurra bilatu nahi dugunerako. Baina bakarra negu gorrian hasmentako puntura ailegatu baino 2 kilometro lehenago errepidea hetsia egoten ahal dela da. Horrek ibilbidea aunitz luzatzen du. Gure kasuan errepidea irekia zegoela bagenekien hara hurbildu ginelarik.

8:21 : Lac du Tech (1217m)

Laku bazterrean pasatu genuen gaua eta nahiko goiz ekin genion bideari. Sanctusen azken maldak hego-ekialdeko orientazioa du eta beraz iragarritako tenperatura altuarekin laster transformatuko zela bagenekien.

Lakutik goiti Hospitaleteko lepo aldera igaten den bidea hartu genuen. Lakuan berean berrehun bat metro iparralderago bertze bidexka bat igaten da Boulesteko etxola aldera (seinaleak handik markatzen du), baina orientazioz eguzkitsuagoa da bide hura eta beraz elur gutiago izaten du.

Pista erosotik zati bat igan eta ezkerretara biratzen den bihurgune hetsian irudiko seinalea ikusiko genuen. Puntu honetan utzi behar da Hospitalet lepora igaten den bide nagusia eta eskuineko bidexka hartu behar da. Bide hau Labaseko bailaran barneratzen da.

Bidegurutzetik metro gutira arbolapetik aterako ginen eta eskiak jantziko genituen. 1400 metro inguruan ginen eta 20 bat minutuz eraman genituen eskiak bizkarrean.

Dena dela, goitixeago metro batzuetan berriz kendu behar izan genituen eskiak, bertze baso zati bat zeharkatzeko.

1500 metrotan basotik atera eta Labaseko bailarako elurretan barneratu ginen. Bertatik tontorreraino 1000 metroko igoera eta jaitsiera genituen esperoan.

Poliki-poliki harantxoan sartu ginen, altuera aunitzik irabazi gabe. Hainbat aukera daude bailaran goitri egiteko: ezkerreko iparraldeko orientaziodun magaletatik, erditik edota eskuineko hegoaldeko orientaziodun maldetatik. Guk erdikoa hautatu genuen.

Bailaran goiti egin ahala Sanctus eta bere malda bikaina agertzen hasi zitzaizkigun begien aitzinean.

Gure ezkerretara, aldiz, Hautafulhe eta Fanlou gailur zorrotzak mehatxati ageri ziren.

9:45 : Cabane de Bouleste (1725m)

Etxola polit honetara ailegatzean utziko genuen bailatxoaren azpiko partea.

Eskuinetara biratu eta ordurako guritua zegoen malda tenteagoa igaten hasi ginen.

Lehen malda tentea iganda, berriz ere kaskorainoko magalak bistaratu genituen. Puntu horretatik bi aukera daude: ikusten den tontortxoaren ezkerretik edo eskuinetik joatea. Guk eskuinetik egin genuen goiti, malda polit bat iganez.

Grand Gabizos mendi aldera doazen magalen azpitik zeharkalditxoa egin eta iparralderantz segitu genuen Louesque menditik jaisten diren malda bertikalen azpiraino.

Bertan errekatxoa zeharkatu eta argazkian ezkerretara ikusten diren malda zabaletatik iganen ginen Sanctus mendiaren hegoaldeko ertzeraino.

Malda hauek etzanak dira hasmentan, baina pixkanaka tentetuz joaten dira.

Metroak irabazi ahala, ingurua gero eta ikusgarriagoa da. Gainera, altueran elur dezente zegoen eta inguruko mendiak arras erakargarri ageri ziren.

Malda tenteetan goiti...

Kaskotik beretik jaisten diren maldak dira tenteenak. Horiek gure eskuinetara utziz joan ginen eta errazagoak ziren magalak bilatuz.

Grand Gabizos gure gibelean...

Erran bezala, tontor nagusiaren hegoaldeko ertz zabalera aterako ginen IGN mapan 2425 metrora ageri den puntutik hurbil.

Ertza zabala da eta eskiak kendu gabe iganen ginen hortik tontorreraino. Gure gibelean Midi d'Ossau eta Geougue d'Arre mendiak ageri ziren.

Azken metroetan gibelean Soum d'Arre, Estibere eta Hautafulhe mendiek osatzen duten zirkua genuela...

11:35 : Sanctus (2482m)

Hala ailegatu ginen duela pare bat urte egon ginen kasko honetara. Orduko hartan argazkian ikusten den Gouretteko eski estaziotik igan ginen.

Baina Gourettekoa ez bezala, Arrenseko bidea bakartia da eta zazpi lagun bertzerik ez ginen igan egun horretan. Hori guti balitz, kaskoan bakarrik egoteko aukera izan genuen tarte ederrean.

Gailurreko egonaldiaren ondotik jaitsieraz gozatzeko momentua ailegatu zen. Kaskotik beretik malda tenteak eskiatu genituen goitiko partean eta beheiti egin ahala errazagoetatik segitu genuen. Udaberriko elurra egoera onean harrapatu genuen eta gozatu ederra hartu genuen.

Jaitsieraz eta parajeaz gozatzen...

Fite akitu zen gailurretik etxolarainoko malda ederra. Zoragarria da! Hortik beheiti Labaseko bailaran harkaitz dezente zeuden agerian eta kasu emanez eskiatu behar izan genuen.

13:31 : Lac du Tech (1217m)

1400 metro inguruan eskiak motxilan paratu eta paseotxo politarekin akitu genuen eski saioa. Egun bikaina izan zen, mendigune polit eta nahiko bakartian eta sekulako malda jaitsiz. Errepikatu beharrekoa!

 

BIDEOA:

Cotdoquy mendiari itzulia

EGUNA: 2025/02/02

ABIAPUNTUA: Labrenere (1112m)

ZAILTASUNA: S3

DENBORAK:

• Labrenere - Puerto del Palo : 3 ordu
• Puerto del Palo - Las Foyas : Ordu erdi
• Las Foyas - Col de Marmida : Ordu bat
• Col de Marmida - Labrenere : Ordu bat

NOLA AILEGATU:

Labrenereko aparkalekua Lescun herritik gora dago. Lescunera iristeko, gure kasuan, Nafarroa Beherea eta Zuberoako probintziak zeharkatzea da lasterrena. Donibane Garazi, Lartzabale, Maule eta Atharratze herriak pasatuta, Montori herrian utziko ditugu Euskal Herriko lurrak. Lanne-en-Baretous herrira ailegatuko gara hurrena eta herri hau pasata eskuinetara Arette herrira doan bidegurutzea ikusiko dugu. Bertara joanen gara. Arettetetik Issor herrian barrena, Aspeko bailarara ailegatuko gara. Behin hemen, Zaragozako norabidea hartuko dugu eta kilometro batzuz bailaran sartu ondotik, eskuinetara Lescun herrira doan desbideratzea aurkituko dugu. Puntu honetara Pirinioen hegoaldetik ere irits daiteke, Jaca eta Somporteko tunelean barrena. Lescun herrira ailegatu baino pixkat lehenago, Labrenereko aparkalekura gidatuko gaituzten seinaleei segituko diegu.

ARRASTOA:

Powered by Wikiloc

KRONIKA:

Iazko denboraldian ez genuen aukerarik izan Lescungo zirku zoragarrian eskiatzeko eta gogotsu itzuli gara bertara. Azken elurteek elurra kota apaletan utzi dute eta altueran aldiz elur-jausi arriskua. Hori dela eta, Labrenereko bailarara hurbildu gara. 2000 metrotik goiti igan gabe itzuli polita egiteko aukera izan dugu, arimarik ere ibiltzen ez den paraje ikusgarrian.

9:01 : Labrenere (1112m)

Aparkalekuan berean pasatu dugu gaua eta seiko kuadrilla elkartu gara itzuli hau burutzeko. Autotik beretik eskiak zangoetan ditugula abiatzeko aukera izan dugu.

Azpiko lautadatxoa zeharkatu eta hegoalderantz igaten den pistatik segitu dugu.

Pista hasmentan zabala da eta gotiago pixka bat estutzen da. Zubi bat zeharkatu eta pagadi polit bat zeharkatzen du.

1400 metrotik goiti zuhaitzak bakantzen hasten dira eta inguruko paretatzarrek hartzen dute protagonismoa.

Itchaxeko etxola erdi erorietatik goiti, terreno garbira atera gara.

Toki honetatik Bonariseko etxoletara ailegatzeko estugune batetik pasatu behar da. Zati hau arriskutsua izaten ahal da eskuinetara dauden hego orientazioko magal tenteetatik elur-jausiak erortzen ahal baitira. Gu pasatu garelarik magal hauek elur gutirekin zeuden eta beraz arriskua ttipia izan da.

Hala ere, elkarren artean distantzia utzi dugu.

Labigouer mendia gure eskuinetara...

Estugunetik 1700 metro inguruan ateratzen da. Parean Marmida eta Cotdoquy mendiak ikusi ditugu, baita bien arteko lepotik jaitsiera ederra ere. Berez zirkularra Burcq eta Laristeren ondoko lepoetatik egitea aurreikusten genuen, baina azken mendi honetan elur eskas zegoela ikusita plana aldatu dugu.

10:45 : Cabanes de Bonaris (1710m)

Etxola politaren ondotik pasatu eta ekialderantz jo dugu, Pau edo Palo izeneko lepoaren bila.

Itzaletan elur bikaina...

Gure gibelean Lariste mendia gelditzen da.

Inguruko elur baldintzak ikusita, lehen jaitsiera bat egitea erabaki dugu. Argazkian ikusten den Cotdoquy mendiaren iparraldeko lepotxora atera eta bertatik Bonariseko lautadara jaistea erabaki dugu.

Ahal izan dugun guzia eskiz igan...

...eta argazkian itzaletan ikusten den malda polita jaitsi dugu.

1870 metro inguruko bizkarretik 150 bat metroko jaitsieraz gozatu dugu. Elurra zoragarri zegoen, 10-15 zentimetroko hauts arina.

1720 metro inguruan berriz foka-larruak paratu eta pixka lehenago irekitako arrastotik goiti abiatu gara.

Paisaia ikusgarria alde guzietan...

Malda tenteago bat igan eta Palo edo Pau izeneko lepoa bistaratu dugu. Bere ezkerretara, berriz, Burcq mendia, Lescunen igan nuen lehena duela 11 urte.

Palo lepoa argazkian eskuinetan ikusten dena da, baina guk erdiko harkaitzen ezkerretik egin dugu igoera, elur baldintza hobeak baitzituen.

Azken zatian pixka bat tentetu arren, aski igoera erraza da.

12:17 : Puerto del Palo / Col de Pau (1944m)

Hala, erran bezala, lepoa baino pixka bat goitiago atera gara ipar eta hegoaldeko isurialdeen banaketara.

Burcq mendia igateko ideia baztertu eta 2000 metro ingurura mendi honen azpiko aldean kokatua dagoen bizkar batera igan gara. Bertatik egin dugu eguneko bigarren jaitsiera.

Mendebaldeko orientazioa duen jaitsieran ere elur ona harrapatu dugu. Minutu gutitan argazkian beheitian ikusten den lautada zabalean izanen ginen.

12:41 : Las Foyas (1713m)

300 bat metroko jaitsiera Las Foyas izeneko lautadatxoan akitu dugu, Ozako isurialdean.

Azken aldiz foka-larruak paratu eta iparralderantz igaten hasi gara, Marmida eta Cotdoquy mendien arteko lepora, gero handik igoera fitxatu ditugun malda politak eskiatzeko.

Ozako isurialdean ere elur baldintza onak daude.

Malda zabaletatik igo ondotik, bi harkaitzen arteko pasabide estuago honetatik pasatu eta Marmidako lepora ailegatuko ginen.

13:38 : Col IGN 1974m (1974m)

Berez Marmida eta Cotdoquy arteko lepo zabalak ez du izenik. Mapetan behintzat ez da ageri. Puntu honetatik azken jaitsierarako prestatu ginen. Bonariseko etxolara zuzen malda ederrak eskiatu ditugu lehendabizi.

Eta handik beheiti goizean igandako pistatik jaitsi gara, kasu gehiago emanez.

14:45 : Labrenere (1112m)

Gailurrik gabe, baina itzuli ederra burutuz eman diogu akabaila egunari. Bi urte geroago Lescungo bazterretan eskiatzeak kontent utzi gaitu.