Balneario de Panticosa - Tercera Via del Nano (6a,100m) eta Espolon Rebollon (5c,105m)

EGUNA: 2023/11/18

ABIAPUNTUA: Balneario de Panticosa (1636m)

ZAILTASUNA: 6a , 205m

Xabier Larretxearen blogeko krokisak

DENBORAK:

• Hurbiltzea: 5 minutu
• Eskalada: Bi ordu eta erdi
• Jaitsiera: Ordu erdi

NOLA AILEGATU:

Iruñetik Jakarako bidea hartuko dugu eta bertatik Sabiñanigo aldera Formigañ aldera doan errepidera desbidefratu arte. Bide honetatik segituko dugu Portaleteko mendatean goiti gure eskuinetara Panticosako bainuetxera igotzen den errepidea ikusi arte.

KRONIKA:

Balneario de Panticosa inguruko eskalada sektoreetan nahi adina aukera daude. Iaz Arista Mowgli bide erraza eskalatu genuen eta oraingoan Balneariotik berean dauden paretak eskalatuz Tercera Via del Nano eta Espolon Rebollon bideak lotu ditugu. Urtero bisitatxoa egiteko adina bide ditugu ezagutzeko...

Hurbiltzea:

Casa de Piedra aterpearen gibeleko aldetik ezkerretara jo eta ikusiko dugun lehen paretatik hasiko gara eskalatzen. Pareta honetan momentuz hiru bide daude irekita eta guk eskuineren dagoena eskalatuko genuen, Tercera Via del Nano izenekoa.

• 1. luzea (5c , 30m): Hotzean harrapatzen zaituen pareta bertikala eskalatuz hasten da luzea (eta bidea). Paretatik ateratzean dago pausurik zailena, pixka bat makurtua. Hortik aitzin etzan egiten da eta erdi oinez ailegatuko gara bilgunera.

Azken metroak etzanak dira

• 2. luzea (5b , 25m): Lehendabizikoaren gisako luzea da. Pausurik zailena lehen pareta bertikalean dago eta gero etzan egiten da. Berez pausu honi lehen luzekoa baino gradu apalagoa ematen diote, baina guri gogorragoa iruditu zitzaigun, gibelera botatzen baitu. Azken zatian kasu eman behar da goiti segitu gabe eta eskuinetara erlaitz horizontal bat hartu behar da

Bilgunea kokatuta dagoen erlaitzera ailegatzen

• 3. luzea (6a , 25m): Bidearen luzerik zailena eta politena da. Plaka bat eskalatu behar da, gero eta txikiagoak diren heldulekuen laguntzaz.

Zatirik zailena pasatuta

• 4. luzea (3c , 20m): Misterio handirik gabe luze etzana da, ezproi itxurako batetik doana.

Azken bilgunean zuhaitzean

Tercera Via del Nano akituta, goitiko paretara zuzendu ginen. Harri-mukuruei segituz 10 bat minututan bertan izanen ginen.

 Pareta honetan ere hiru aukera daude eta guk erdikoa hautatu genuen: Espolon Rebollon.

• 1. luzea (4a , 25m): Zailtasun handirik gabeko plaka etzan bat eskalatzen hasten da eta goitiko partean ezkerretara egiten da bilgunea harrapatzeko. Nik zuhaitz batean egin nuen, baina pixka bat ezkerrerago dago pareta batean.

• 2. luzea (4c , 30m): Plaka bat eskalatzen da lehendabizi, diedro bat gero eta ezproi bat akitzeko. Zailtasunean nahiko konstantea da eta gustatu zitzaigun.

• 3. luzea (5c , 25m): Lehen bidean bezala, bigarren honetan ere zailtasun handienak hirugarren luzean daude. Pareta bertikala eskalatu behar da, zailtasuna nahiko mantendua duena.

• 4. luzea (5a ,  25m): Bilgunetik atera eta pausu fin bat eginez hasten da luzea. Hortik aitzin pareta etzan egiten da eta aise ailegatzen da bidearen akabailara.

Jaitsiera:

Bidea akituta eskuinetara mugarriz markatutako bidexka hartu behar da. Bidexka honetatik GR-ra aterako gara eta bertatik berriz abiapunturaino jaitsi.