Montagnon d'Iseye (2173m) eta Montagnon de Besse (1797m)

EGUNA: 2025/10/19

ABIAPUNTUA: Goust (850m)

ZAILTASUNA: Erraza

IRAUPENA: 

• Igoera: Lau ordu eta erdi
• Jaitsiera: Hiru ordu

NOLA AILEGATU:

Baionatik A64 autopistan barrena Pau hirira joan eta hemen autopista utzi behar da Gourette eta Artousteko eski estazioen norabidea hartuz. Laruns herrian Pourtaleteko lepora igotzen den bidea hartuko dugu eta Eaux Chaudes herria pasatuta eskuinetara errepidetxo bat hartuko dugu Goust auzora ailegatzeko.

ARRASTOA:

Powered by Wikiloc

KRONIKA:

Azken urteetan ezaguna bilakatu den mendia da Montagnon d'Iseye. Duela zenbait urte jende gutik ezagutzen zuen, baina sare sozialek eragin handia dute guregan eta Montagnoneko lakura kaskotik dagoen ikuspegia argazki famatua da gaur egun. Lehen aldiz 2014 izan nintzen bertan, Besseko etxolan gaua pasatuta udazken goiz ederrean. Orduan ez genuen inor ere ikusi. Orduko bide bera egin dugu oraingoan ere, berez gailurrera ailegatzeko ohiko bidea ez dena, baina nire ustez politagoa dena.

9:18 : Goust (850m)

Bide bazterrean leku bakan batzuk bertzerik ez daude autoa uzteko, baina zorionez bide hau ez da hain ezaguna eta lekua harrapatu genuen. Bi belairen arteko pistatik hasi ginen ibiltzen, Ossau bailararen itzulia egiten duen bideari segituz.

Pista zati batek bidexkari uzten dio lekukoa fite. Lehen zatia arras tentea da eta Goust auzoa kokatua dagoen zelaitxoa fite gelditzen da beheitian.

Atsedenik gabe egiten du bideak goiti...

Lusqueko zelaitxoan dago lehen zati honetan harrapatuko dugun atsedengune bakarra. Metro lauago batzuk eta bidexka berriz ere tentetzen da.

Lusqueko zelaitxotik goiti pagopean barneratzen da bidea. Ordura arte gurutzatutako mendizale bakarrak honako hauek izan ziren. Bide arruntarekin elkartu arte bizpahiru pertsona bertzerik ez genituen ikusiko.

Altuera irabazi ahala pagoen koloreak gero eta ederragoak ziren. Urriaren 20 ingurua gorriz markatua izaten dugu egutegian udazken koloreez disfrutatzeko ateraldia egiteko Pirinioetan, eta aurtengoan ere ez digu hutsik egin egutegiak.

Lusqueko lepoa basoaren erdian dagoen lepo zabala da. Hortik aitzin beheranzko joera hartzen du bideak.

Besseko zirkuan barneratuko ginen eta basoak larreei lekua uzten hasiko ziren.

Inguru honetatik Escala mendia (eskuinean) ikusten da. Haren ezkerretik beheiti zuzenean eginen genuen jaitsiera ordu batzuk geroago.

10:36 : Cabane de Besse (1572m)

Zirkuan bihurgune zabal bat marraztuta norabidez aldatzen da bidea eta Besseko etxolaren ondotik pasatzen da. Bertan pasatu genuen gaua duela 11 urte Enekok eta biok. Orduan bezala, orain ere egoera onean dago: bi ohatze, lurreko sua, mahai bat...

Leku zinez ederra da, eta lasaia!

Etxolatik goiti bertze baso zati bat zeharkatu genuen.

Zoragarri zegoen hau ere!

Basotik aterata fite Besseko lepoan izanen ginen...

Gure gibelean bailarako erregea...

10:58 : Col de Besse (1711m)

Lepoan Ossauko itzulia egiten duen bidearen marka hori eta gorriak utzi eta ezkerretara biratuko ginen. Kaskoz kasko argazkian ikusten den Montagnon d'Iseye aldera eginen genuen.

11:06 : Montagnon de Besse (1797m)

Bizkar gaineko bidea gailurtxo honetatik pasatzen da eta pixka bat beheiti egiten du segidan.

Montagnoneko mendigunea gero eta hurbilago ikusten genuen.

Zati bat jaitsi eta berriz goiti egitean bizkar estua zabaldu egiten da. 

Bideak eskuinetara egiten du puntu honetan, eta Aspe bailaratik Montagnonera igaten den bide arruntarekin elkartzen da.

Behin bide arruntarekin elkartuta, harri xehezko malda tentea gainditu behar da lakura ailegatzeko.

Argazkian ageri den bizkar guzia zeharkatua genuen.

Laku inguruan akitzen da malda tentea.

Sobera gelditu gabe lakua inguratu eta gailurrerantz segitzen duen bide jarraitu genuen.

Azken malda tentea gainditu beharko genuen gandorrera ateratzeko.

Eta Mardas eta Montagnon d'Iseye arteko lepora aterata, eskuinetara biratu eta kaskorako azken metroak egin genituen.

12:01 : Montagnon d'Iseye (2173m)

Kaskoan haizeak eta Montagnon lakurako ikuspegi ezagunak eman ziguten ongi etorria.

Bakarrik ginen momentu horretan eta tartetxo bat hartu genuen ikuspegiaz gozatzeko.

Mendebaldean aspalditik agendan dauden Bergon eta Marere mendiak gelditzen dira.

Goitian haizea zela eta ezin izan ginen aunitz egon eta beheiti abiatu ginen luze gabe. Jaitsiera ez genuen igoerako bide beretik eginen. Lakuraino itzuli eta eskuin biratuta hegoalderantz egin genuen zelai berdeetatik. Argazkian ikusten den lakutxoaren ondoan ezkerretara biratu eta Escala mendiaren oinean dagoen lepotxo gisako batera zuzendu ginen.

Argazki honetan ikusten den lepotxora, hain zuzen ere. Hortik zuzenean Besseko zirkura jaitsiko ginen.

Bide argirik ez dago zati honetan. Goitiko partean puntu urdin batzuz markatutako bidexka gisako zerbait harrapatu genuen. Hari segituz lehen harresi bat jaitsi genuen.

Behin harresia jaitsita, haren azpitik eskuinetara jo genuen. Belar luzez estalitako malda tente deserosoak jaitsi behar izan genituen azken zatian berriz ere puntu urdinak harrapatu arte.

Behin zirkuaren sakonean hegoaldera jotzen duen bidexka batetik paretaren azpiko zeharkaldia egin...

...eta belardi leunetara ailegatuta zuzen jaitsiko ginen igoerako bidea harrapatu arte.

Hortik beheitiraino ordu batzuk lehenago ibilitako bidea jaistea bertzerik ez zitzaigun gelditzen.

14:07 : Goust (850m)

Udazken egun haizetsu eta goibela ederki aprobetxatu izanaren sentsazioarekin ailegatu ginen autora. Montagnonera igaten den bide honek duena izena baino izan handiagoa duela erakutsi zigun. Zoragarria!

 

Midi d'Ossauri itzulia

EGUNA: 2025/10/18

ABIAPUNTUA: Bious Oumette (1304m)

ZAILTASUNA: Erraza

IRAUPENA (oinez):

• Bious-Oumette - Lac de Bersau : Bi ordu eta erdi
• Lac de Bersau - Cabane de Cap de Pount : Ordu bat
• Cabane de Cap de Pount - Col de Peyreget : Bi ordu
• Col de Peyreget - Refuge de Pombie : 40 minutu
• Refuge de Pombie - Col de Suzon : Ordu erdi
• Col de Suzon - Bious Oumette : Ordu bat

NOLA AILEGATU:

Baionatik A64 autopistan barrena Pau hirira joan eta hemen autopista utzi behar da Gourette eta Artousteko eski estazioen norabidea hartuz. Laruns herrian Pourtaleteko lepora igotzen den bidea hartuko dugu eta hemendik segitu Gabas herriraino. Herri honen irteeran, eskuinetara, bidegurutze bat hartuko dugu Bious Artigueseko urtegira igotzen dena.  Aparkaleku hau betea delarik, kilometro bat beheitiago dagoen bertze batean utzi behar izaten da autoa; Bious Oumetteko aparkaleku handian.

ARRASTOA:

Powered by Wikiloc

KRONIKA:

Ossau bailarako erregea Midi handia da inolako zalantzarik gabe. Bertara igaten diren bideez gain, inguratzen duen ibilbideak ere fama badu eta mendizale dezente biltzen ditu. Guk oraindik egitekoa genuen itzuli ezagun hau eta udazkeneko egun ederra baliatuz bertara zuzendu gara. Midiren itzulia Ayouseko lakuen itzuliarekin lotu dugu ibilbide ederra osatuz. Lasterka ibiltzeko bidexka aproposak ditu, baita egonean edozein lakuren inguruan egoteko ere. Alderdi txar bakarra jende kopurua!

8:34 : Bious Oumette (1304m)

Aparkalekura goizean igan ginen gaua pasatzea debekatua baitago berez. Goitiko aparkalekura joateko azken zatia hetsia zegoela zioen kartel bati kasu eginez Bious Oumettekoan utzi genuen autoa eta bertatik abiatu ginen. 

Aparkalekuaren parean Bious Oumetteko etxola gelditzen da. Gaua ederrak pasatu izan ditugu neguan bertan. Itzuliko ote gara?

8:44 : Lac de Bious Artigues (1419m)

GR10aren markei segituz errepidea moztu eta segidan ailegatuko ginen gaineko aparkalekura. Azkenean errepidea irekia zegoela konturatu ginen eta goitiko aparkalekua autoz beteta zegoen.

Aparkalekua gibelean utzi eta lakua inguratzen duen pistatik goiti jo genuen. GRaren markei segituko genien lehen zati guzian, Ayouseko aterperaino.

Bazter ederrak dira hauek, eta zer erranik ez udazken koloreekin!

Laku bazterreko etxolatxoa...

Lehen zatian pista zelaia da, baina segidan hasten da altuera irabazten.

Malda tenteago bat iganda, Biouseko lautada zabalera ailegatu ginen. Puntu honetan pista utzi eta eskuinetara basotik igaten den bidexka hartuko genuen.

Fresko ari zuen zelai inguruan, baina Casterau eta Paradis mendiak eguzkitan ziren ordurako.

Gu kolore gorrixkaz margotutako baso politetik goiti igan ginen.

Lehen baso zati bat iganda Col Long d'Ayous etxolaren inguruan dagoen zelaitxo batera ateratzen da bidea. Bertatik Midi d'Ossaura ikuspegi ederra dago.

Bertze baso zatitxo bat eta pagoak agurtuko genituen.

Hortik goiti larre zabal eta lakuen besta hasten da, betiere Midiren begiradapean.

Lehen lakua Roumassot deitzen da. Puntu horretatik aitzin eguzki goxoa izanen genuen.

Pixka bat goitiago Mieyko lakua dago.

Eta bertze malda bat iganda, Ayouseko aterpea ikusten hasiko ginen.

Ayouseko lakua Gentau laku ezagunaren ertzean kokatua dago. Laku honetatik ateratakoa segur aski Midiren argazkirik ezagunena izanen da, baita Pirinioetako ezagunenetarikoa ere. Ongi merezia du bere fama, baina hasieran erran bezala zaila da bazter hauetan lasaitasuna harrapatzea. Jende aunitz ibiltzen den parajea da.

Postal bat...

10:04 : Refuge d'Ayous (1982m)

Ordu horretan jende guti zebilen jadanik hetsia zegoen aterpe inguruan eta zerbait jateko egonaldia egin genuen.

Segidan aterpea utzi eta goiti segitu genuen Bersauko lakurantz.

Eskuinetara Hourquette mendia utziko genuen. Iaz ibili ginen haren gailurrean.

10:25 : Lac de Bersau (2082m)

Ayouseko lakuetako azkenekoan akitu genuen eguneko lehen igoera. Lakuaren izkinan ikusten den lepotxotik jaisten hasiko ginen.

Casterau mendia parean genuela hasi ginen izen bereko lakurantz jaisten. Momentu horretan argazki kamerako txartelarekin arazo bat izan nuen eta argazki guziak gaizki atera zitzaizkidan. Hortaz azalpena telefonoarekin ateratako argazki apurrekin emanen dut.

Casterau lakua ezkerretan utzi eta beheiti segitu genuen jendearen ibiliaz harkaitzak leunduak dituen bidexkatik. Bidexka pista batera ateratzen da Hosseko etxolan, baina pistaren eskuinetik bidexka segitzeko aukera dago.

11:00 : Cabane de Cap de Pount (1640m)

Jaitsierako bidea Cap de Pounteko etxola ondoan utziko genuen. Puntu honetan eskuinetara igaten den bidexka bat hartuko genuen.

Bidea ekialderantz igaten da eta Peyregeteko etxolaren eta lakuaren ondotik pasatuta, Peyregeteko lepora (2304m) ailegatzen da. 650 bat metroko igoera jarraia da, Petit Midi d'Ossau mendiaren ikuspegi ederra eskaintzen duena. Lepotik bertze aldean Pombieko lakua ikusten da. Trostan nahiko fite jaitsiko ginen bertaraino.

12:27 : Refuge de Pombie (2032m)

Pombieko aterpe eta lakura ailegatuta geldialdi luzea egin genuen laku bazterrean. Geldialdiaren ondotik Midi d'Ossau mendiko bide arrunta hartuko genuen Suzon leporaino (2131m). Igoera etzana da, lehen zatian harkaitz blokezko zati bat zeharkatzen du eta gero belardiak. 

Suzon lepotik beheiti azken jaitsiera gelditzen zitzaigun. Berez lepoan pasatzea debekatua zegoen seinale bat ikusi genuen. Antza beheitiko basoan egiten ari ziren lan batzuengatik zegoen debekua. Guk autora itzultzeko ez genuen bertze aukerarik eta pasatu egin ginen. Suzon lepoaren iparraldera irekitzen den Magnabaigt bailaran beheiti jaitsiko ginen. Belardi leunetatik doan bidexka erosoa da eta ziztu bizian egin genuen zati hau. Bailararen azpiko aldean ezkerretarantz egiten du bideak eta Magnabaigteko lepoa zeharkatuta baso batean sartzean da Bious Artigueseraino jaisteko.

14:17 : Bious Oumette (1304m)

Bious Artiguesen zirkularra hetsita, aparkalekuraino jaistea bertzerik ez zitzaigun gelditzen. Gazies mendira egindako argazki honekin ohartu nintzen txartela gaizki sartua nuela eta ordura arteko argazki pila bat galduak nituela. Ikusitako paraje ederrak argazkitan ateratzeko itzultzeko aitzakia badugu jadanik.