Ronglet (2180m)

EGUNA: 2023/10/08

ABIAPUNTUA: Fond d'Iseye (856m)

ZAILTASUNA: Nahiko erraza (PD)

DENBORAK: 

• Igoera: Hiru ordu eta erdi
• Jaitsiera: Bi ordu

NOLA AILEGATU:

Nafarroa Beherea eta Zuberoako probintziak zeharkatu behar dira. Donibane Garazi, Lartzabale, Maule eta Atharratze herriak pasata, Montori herrian utziko ditugu Euskal Herriko lurrak. Lanne-en-Baretous herrira ailegatuko gara hurrena eta herri hau pasata eskuinetara Arette herrira doan bidegurutzea ikusiko dugu. Bertara joanen gara. Arettetetik Issor herrian barrena, Aspeko bailarara ailegatuko gara. Behin hemen, Zaragozako norabidea hartuko dugu eta aitzinera segituko dugu Bedous herriraino. Bedousetik Accousera joanen gara, eta ezken herri hau zeharkatu eta zirkuaren sakonera eramanen gaituen errepidetxoa hartuko dugu. Errepidea azken zatian pista bilakatzen da eta zubi baten ondoraino ailegatzen ahalko gara bertatik.

ARRASTOA:

Powered by Wikiloc

KRONIKA:

Aspe bailara nire kuttuna izanik, bertako xoko gehienak ezagutzen ditut jadanik. Hala ere, bazen inguru bat autoan pasan aunitzetan atentzioa deitua zidana eta oraindik ezagutzen ez nuena. Udan zein neguan Accous herrixkaren gibelean gelditzen den zirkuak nire begirada erakartzen zuen. Bergon, Marere eta Ronglet mendiek osatzen duten hirukotea benetan ikusgarri ikusten da errepidetik. Azken honetan izan gara oraingoan.

8:21 : Fond d'Iseye (856m)

Arimarik ez zebilen inguruan autoa utzi genuelarik. Egia erran egun osoan ez genuen inor ikusiko. Ez da ohikoa Pirinioetan igande eguzkitsu batean ibilaldi bat egin eta inor ez ikustea. Ikusi genuena eta autotik beretik Ronglet ikusgarria iza zen.

Autoa utzi, erreka zeharkatu eta pista segidan utziko genuen ezkerretara ateratzen den bidexka batetik.

Bidexka pagadi batean goiti igaten da malda handiko tarteekin.

Metroak irabazi ahala, oihana bakantzen hasi zen eta gaineko zatiaren ikuspegi hobea genuen. Puntu honetatik, adibidez, Ronglet eta Lapassako etxola ikusgai genituen.

Magal bat zeharkatu eta etxola ingurura ailegatuko ginen.

Etxolatik beretik ez ginen pasatuko, ez goitirakoan behinik behin. Hala ere, orografia eskaintzen duen atsedengunean geldialdia egin eta inguru eder honetaz gozatzeko baliatu genuen. Argazkian Ronglet eta Anchet mendiak ikusten dira, eta tartean ikusten den lepotik pasatu ginen beheitirakoan.

Etxola inguruak utzi eta marka horiei segituz Iseyeko lepo aldera igaten segitu genuen.

Rongleten ipar-paretaz gain, ekialdeko aurpegia ere ikusten hasi ginen. Puntu honetan zuzenean hego-ekialdeko norabidea hartu eta inguru karstikotik bidea laburtzeko aukera dago. Guk, ordea, itzuli luzeagoa emanez Iseyeko lepotik pasatzea erabaki genuen.

Iparraldera egiten du segituko genuen bideak.

Tarteka buelta eman eta Ronglet ikusgarriari bertze perspektiba batetik begiratzen genion.

Lepotik hurbil Escurets-eko etxolatik pasatu ginen. Hetsia zegoen.

Leporako azken metroak belardi polit eta leun batetik egiten dira.

10:02 : Col d'Iseye (1829m)

Lepoan eguzki goxoak hartu gintuen eta egia erran eskertu genuen itzaletan ez baitzen berorik. Bertze aldean iaz ibilitako Biteteko bailara polita ageri zen.

Biteteko isurialdera ez ginen pasatuko hala ere. Lepoa zeharkatu gabe eskuinetara zeharka ateratzen den bidexka hartuko genuen eta bertatik joanen ginen Liard-eko leporaino.

Bidexka altuera pixka bat galtzen du hasmentan...

...eta geroago inguru karstikoan sartuko ginen. 

Metro batetik bertzera orografia aunitz aldatzen da, belardi leunetatik harkaitz gris eta zorrotzezko kaosera.

Harkaitzezko zatia nahiko motza da dena den eta segidan berriz belardietara itzuliko ginen. Argazkiko zelaitxoa zeharkatu eta eskuinetara igaten hasiko ginen lepoaren bila.

Lepoaren azpiko zatian bidexka desagertu egiten da, baina ez dago galbiderik. Rongleten hegoaldeko aurpegiko tximiniak begien bistan genituen jadanik.

10:49 : Col de Liard (2118m)

Tximiniara ailegatu aitzin lepora aterako ginen.

Bertatik Lescungo zirkua parez pare genuen, ikuspegi ederra benetan.

Hegoaldera Bisaurin eta Belonce eta Baraleteko bailaratxoak ikusten ahal ziren. 

Beranduxeago itzuliko ginen lepora, baina aitzinetik kaskoari bisitatxo bat egin behar genion.

Bertara ailegatzeko II. graduko pausu bat duen tximinia erraza gainditu beharko genuen.

10:59 : Ronglet (2180m)

Hala ailegatu ginen nahiko ezezaguna den gailur eder honetara. Iparraldeko gailurraren lotzen duen gandor guzia ikusgai genuen.

Denbora aunitz pasatu genuen gailurrean inguruaz gozatzen. Argazki honetan Sesques aldea ageri da.

Iparraldean Bergon eta Marere... Noizbait egin beharko diegu bisita bat hauei ere.

Berriz ere tximinia jaitsi eta lepora itzuli ginen.

Lepotik eskuinetara biratuko ginen (mendebaldera), eta Anchet eta Ronglet mendien artean dagoen lepoaren bila abiatu ginen.

11:53 : Col de Ronglet (1839m)

Bidexka ez arras markatu batetik egin genuen leporainokoa. Bertatik eskuinetara biratu eta iparralderantz jaisten hasiko ginen.

Rongleteko lepotik Lapassako etxolara jaisten den magalean ez dago bidexkarik eta harri-mukuruak ere guti dira. Leku maldatsua da eta gehienean ahal zen bezala jaitsi ginen. Azpiko zati zati harritsuan eskuinetara bide markatuagoa harrapatuko genuen eta beheitiago gurutzatu beharreko basotxoaren hasmentan ere bai.

Jaitsierako bidetik Rongleten ipar-mendebaldeko korridorea ageri zen. Neguan alpinismoa praktikatzeko leku aproposa da.

Lehen aipatutako zati harritsua zeharkatzen...

Basotxoa ahal bezala zeharkatu eta Lapassako etxolara jaitsiko ginen.

12:37 : Cabane du Lapassa (1263m)

Etxola leku politean kokatua dago eta barnean mendizaleendako irekia uzten duen zati bat du arras egoera onean. Fitxatua gelditu zen noizbait gauren bat pasatzeko.

Etxolatik goizean igandako bidera atera ginen. Hortik autorako zatia lasterka pixka bat egiteko aprobetxatu genuen.

13:03 : Fond d'Iseye (856m)

Baso zatia ziztu bizian jaitsi eta aparkalekura ailegatu ginen. Aspe bailarako bertze xoko polit bat ezagutu izanaren pozarekin akitu genuen ibilaldia. Bide batez negurako ere bideren bat fitxatu genuen.