Cap de Labasset (2038m)

EGUNA: 2024/11/02

ABIAPUNTUA: Chiroulet (1062m)

ZAILTASUNA: Erraza

DENBORAK:

• Igoera (mendebaldetik): 2 ordu eta erdi
• Jaitsiera (ekialdetik): 2 ordu

NOLA AILEGATU:

Baionatik A64 autopista hartu eta Tarbeseraino joko dugu bertatik. Tarbeseko irteera hartuta, Bagneres de Bigorre herriko norabidean jarraituko dugu momentu oro. Herri honetara ailegatuta, Campan aldera joko dugu, baina bertara ailegatu aitzinetik, Beaudean herriaren irteeran eskuinetara atertazen den errepidetxo bat ikusiko dugu. Lesponne haranean goiti Chirouleteraino igaten den bidea da. Bide hau hartuko dugu akitzen den arte.

ARRASTOA:

Powered by Wikiloc

KRONIKA:

Azaroko lehendabiziko asteburuan Bigorre aldean izan gara. Mendi kaskoenak elur pixka batekin zuritzen hasiak dira, baina ez daude ez oinez ibiltzeko, ez eskirako. Horrelakoetan, altuera apalagoak bilatu behar dira eta oraindik ezagutu gabea nuen Peyreladeko laku ingurua bisitatzeko baliatu dugu. Chiroulet ingurua, bertze erreportaje batzuetan aipatu dudan bezala, Pirinioetan ezagutu nuen lehen lekua izan zen duela 31 urte. Gurasoekin eta anaiarekin izan ginen orduan, eta geroztik leku berezia izan da niretako. Oraingoan Peyreladeko laku bazterrak ezagutzeko eta Cap de Labasset mendia igateko bertatik abiatzen den zirkular hau prestatu dugu.

10:07 : Chiroulet (1062m)

Autoan aterpearen ondoko aparkalekuan utzi eta Lesponneko erreka zubi gainetik zeharkatuta, Lac Bleu lakura igaten den bidea hartu genuen.

Bide zabala segidan pagadian goiti igaten da azpiko zatian.

Altuera apaleko pagoak udazkeneko kolore gorrixkekin harrapatu genituen.

1250 metro inguruan ateratzen da bidea basotik. Parean Bleu lakuraino igaten den bailara estua ikusten da puntu honetatik.

Ur-putzu artifizial honen ondotik pasatuko ginen...

Belarrezko bidetik metroak irabazten...

Ezkerreko basoaren goitiko muga inguruan utziko genuen Bleu lakura igaten den bide markatua.

Puntu honetan ezkerretara mugarri handi samar batek markatzen duen bidexka hartu behar da bide nagusia utzita. Argazkian mugarria ikusten da eta Bleu lakura zuzentzen den bidea markatzen duen seinalea ere bai.

Hartu berri genuen bidea berriz ere basoan barneratzen da ekialderantz eginez. Bidexka ez da batere nabarmena, baina tarteka mugarriak ditu ez galtzen laguntzeko. Marka horiak ere badira. Hala ere, jende guti ibiltzen den bidea dela begien bistakoa da.

Metroak fite irabazi genituen eta basoa gibelean utzi genuen.

Behin zuhaitzak gibelean utzita, bidea aiseago segitzen da markatuagoa baitago.

Gibelean Bleu lakura igaten den bailara ikusten genuen geunden lekutik... Inguruko mendirik altuenetan elur arrastoak ere baziren.

Ekialdean Midi de Bigorre mendia ere ikusten hasi ginen...

Goiti egin ahala, ezkerretara iganen genuen Cap de Labasset mendi borobila ere ikusten hasi ginen.

Eroritako etxola honen ondotik pasatu ginen. Gibelean Bizourtere mendia ere ageri zen.

Cot Dera Cousterete izeneko bailaran barneratu ginen. Peyrelade lakua ez zegoen urrun...

Iparraldean Montaigu mendia...

Peyrelade lakura ailegatu baino lehen, bide nagusia utzi eta Cap de Labasset mendiaren hegoaldeko bizkarrera igan ginen biderik gabeko larreetatik.

Eta azken metroak bizkar errazetik egin genituen...

Gailurrera ailegatzen...

12:05 : Cap de Labasset (2038m)

Bi ordu inguru eman genituen kaskora ailegatzeko. Berez fama gutiko kaskoa da, baina Peyreladeko laku ezaguna bisitatu bidenabar merezi du bertara igatea.

Izan ere, Pene Blanque, Cremat, Esquio d'Asou eta Merlheu mendiek hesten duten zirku ikusgarrira primerako ikuspegia dago tontorretik.

Tarte luzea eman genuen kaskoan; azaroa izan arren, tenperatura goxoa eta eguzkia lagun baikenituen. Ondotik, kaskoaren hegoaldeko bizkarretik Peyreladeko lakura zuzendu ginen.

12:52 : Lac de Peyrelade (1928m)

Arestian aipatu mendiek osatutako zirkuaren sakonean dagoen laku polita da Peyreladekoa. Lehen aldia zen guretako han, eta udan ez bezala nahiko lasai harrapatu genuen bazterra.

Lakua eta igandako mendia utzi eta beheitirakoari ekin genion.

Jaitsiera Cap de Labasset mendiaren ekialdeko isurialdetik egin genuen zirkularra burutzeko. Hasteko, bide zabaletik Brouilheko aparkalekura jaitsiko ginen. Aparkaleku hau da Peyreladera igateko jende gehienak hautatzen duen abiapuntua.

Pinuz inguratutako zelaitxo polit batean dago aparkalekua.

13:47 : Parking de Brouilh (1307m)

Inguru honetatik Midi de Bigorre aldera ikuspegi polita dago eta negurako eskiatzeko aukera batzuk ere bai.

Aparkalekura ailegatzen den errepidetxotik beheiti segitu genuen gure bidea.

13:52 : Cabanes de l'Haya (1261m)

Errepidetik zatitxo labur bat egin eta etxola hauetara ailegatu ginen. Bertan seinale batek Chirouletera doan bidea markatzen du.

Etxolen ondotik beretik abiatzen den pista hau da Chirouletera eramanen gintuena.

Berriz pagadien artean barneratzen da bidea...

14:12 : Chiroulet (1062m)

...eta berriz ere ordu batzuk lehenago abiatu ginen puntura ailegatzen ginen pistatik. Leku berezi honetan pasatutako bertze egun polita aterpe kafetxoarekin borobildu genuen. Ea neguan itzultzen garen paraje hauetara.