Ezkaurre (2045m) - Esminu (6b, 180m) eta ekialdeko ertza (IV+)

EGUNA: 2025/09/05

ABIAPUNTUA: Argibielako lepoa (1297m)

ZAILTASUNA: 

• Esminu: 6b, 180m

• Ekialdeko ertza: IV+

IRAUPENA:

• Argibielako lepoa - Esminu hasmeta : 45 minutu
• Esminu eskalatzea : Bi ordu eta erdi
• Ekialdeko ertza : Bi ordu eta erdi
• Ezkaurre - Argibielako lepoa : Ordu eta laurden

NOLA AILEGATU:

Erronkari ibarrera joateko Iruñetik Pirinioetako Autobidea hartu eta Irunberrira joan behar da. Hemendik Zaraitzuko bailarara doan errepidea hartu behar da Nabaskoize herrian utzi eta eta Burgi aldera jo arte. Coronaseko lepoa zeharkatu, Erronkarin sartu eta bailara igotzeari ekinen diogu. Izabatik goiti, Belaguan barneratuko gara eta adi egon beharko dugu kilometro gutxira eskuinetara Zurizara doan errepidetxoa hartzeko. Errepide honek utziko gaitu abiapuntutzat izanen dugun Argibielako lepoan.

ARRASTOA:

Powered by Wikiloc

KRONIKA:

Esminu Ezkaurreko ekialdeko ertzaren hego paretan kokatua dagoen eskalada bide polita da. Harkaitz ederra, ekipamendu ona eta tximiniak gailentzen diren eskalada eskaintzen ditu. Gainera, bidea akituta ekialdeko ertzari segituta kaskora ailegatzeko aukera ematen du mendi egun polita borobiltzeko. 

8:16 : Argibielako lepoa (1297m)

Eguzkitsu eta fresko ernatu zen eguna Argibielako lepoan. Jadanik gibelean uzten ari garen uda

Lepotik errepidez metro batzuk galdu eta GR11-aren saihesbideari segituko genion. Bide hau alde honetatik Ezkaurreko kaskora igaten den arrunta da.

Arbolapean ibiliko ginen hasmenta honetan.

Soilgune batetik Ezkaurre bistaratu arte... 

Toki horretatik ez da Esminu bidea igaten den pareta ikusten, baina bai ekialdeko ertza.

Bertze zati bat bide nagusitik egin eta argazkian ikusten den mugarria bilatu beharko dugu ezkerretara jotzen duen bidexka ez hain nabarmen bat hartzeko.

Bidexka horretatik zeharka-zeharka ekialdeko ertzaren azpira ailegatuko ginen.

Eta hau gibelean utzita hegoaldeko pareta inguratuz segituko genuen gure bidearen bila.

Pixka bat kostatu zitzaigun bidea harrapatzea. Uste genuen pareta honetan bi bide zeudela: Estel eta Esminu. Baina bien artean bertze bide batzuk daude eta horrek nahastu gintuen. Pareta bukaeraraino segitu behar da, Torre de Ezkaurre izenekoak mozten duen arte. Hor hasten da Esminu eta argazkian ikusten diren tximinietatik igaten da 

Hala bada eskaladari ekimen genion. Berez zazpi luze ditu bideak, baina lehena eta seigarrena trantsizio luze motzak direnez normalean hortzetan eskalatzen da:

• 1. luzea (6a+, 45m) : Erran bezala lehen luzean bi luze elkartu genituen. Hasmentan eskuinetara landarez estalitalitako terraza gisakoa igan behar da. Hortik goiti agian bide osoko zatirik politena eskalatuko dugu. Tximinia estu batetik hasten da eta azken zatian eskuinetara ateraz harlauz ikusgarriaren izkinetik eskalatu behar da

• 2. luzea (6a+, 15m) : Luze motz, baina ikusgarria. Bilgunean gaineko aldean dugun sapaia arrakala batetik eskalatuz inguratu behar da. Hasmentan bavaresa moduan eskalatzen da eta akitzeko plakatik pausu finagoak eginez.

• 3. luzea (4c, 40m) : Hirugarrena trantsizio luzea da. Terraza batetik eskuinetara egin behar da kobazulo batean bilkura muntatu arte. Oinez ia denean, bilkurara ailegatzeko egin behar da gradua ematen dion pausoa.

• 4. luzea (6b, 15m) : Kobazulotik goiti eskalatu eta tximinia estu batetik goiti egitean datza. Azken pausoak dira zailenak, tximiniatik ateratzeko. Gorputzaren posizioekin jokatzeko da, polita. Motxilak traba egiten du zenbait momentutan.

• 5. luzea (5b, 40m): Luze honetan tximinia izanen dugu goitiraino. Trabatutako harkaitz bat gainditzeko egin behar dira lehen pausoak. Gero bilgune batetik pasatu eta gorputza ongi kokatu beharreko zati bat gainditu behar da. Azken zatian ez sobera argi gelditzen nondik segitu. Tximiniaren eskuineko aldean dagoen parabolt batetik pasatuta, ezkerretara egin behar da aise goitiago dagoen parabolt batera ailegatu eta tximiniatik ateratzeko. Distantzia handia dago parabolten artean guk friendsak erabili genituen luze honetan.

Eskalada bidea Ezkaurreren ekialdeko ertzean berean akitzen da. Hemen hiru aukera ditugu: ertzetik beheiti jaistea, ertzaren ezkerreko aldetik igaten den Esminu Directa (5a) bidetik segitzea edo ertz klasikoa segitzea. Guk azken aukera hartuko genuen kaskora joan nahi genuelako, baino sobera luzatu gabe.

Soka zati bat gorputzean inguratu eta elkarri lotuta segituko genuen eskalada pauso batzuk eginez tarteka (IV-).

Zati honetan tarteka harrapatuko genituen paraboltetatik express-zintak pasatuko genituen.

Momentu batean luzeak egitea erabaki genuen berriz, segurtasun handiagoz eskalatu beharreko zatira ailegatuta:

• 1. luzea (4b, 30m) : Plaka etzanak eskalatu genituen, itsaskortasuna bilatu beharrekoak.

• 2. luzea (4c, 30m) : Hau ere plaka etzanetatik hasten da, iltze batetik pasatu eta ezkerretara egiteko. Arrakala baten laguntzaz zati leun bat eskalatu eta eskuinetara ateratzen da bertze iltze batetik. Arrakalan friend bat ere sartu genuen guk.

Mendebaldeko ertzaren zatirik teknikoena eskalatuta, soka bildu eta oinez segitu genuen goiti.

Hortik kaskorainokoak ez du zailtasun handirik (II+), baina luze samarra egiten da. Guzira lau puntatxo zeharkatu behar dira Ezkaurrekoa harrapatu baino lehen.

Lehen puntaren jaitsiera arrakala polit baten artetik pasatuko ginen.

Bigarren puntatxo batera igateko eta bertatik berriz pixka bat jaisteko... Tarteka harrapatzen diren zailtasunak beti eskuineko aldetik inguratzen ahalko dira, iparraldeko aldetik.

Hirugarren puntan 30 bat metroko rapel bat egiten da lepo sakon batera jaisteko.

Handik ertza zabalago bilakatzen da. Belardi tente bat igan eta ezkerreren gelditzen den tximiniatik goiti segitu genuen guk, ertzetik ahalik eta hurbilen.

Gibelean ertzean zeharkatutako bi punta ikusten dira.

Hala ertzeko laugarren eta azken puntatxora ailegatu ginen. Azken jaitsiera bat eta gailurrera eramanen gintuen azken maldari ekin genion.

Jaitsiera bertikala da. Hasmentan belardi batetik eta gero harkaitzetatik.

Azken igoerari ekin genion segidan. Harkaitzen arteko belarditik iganen ginen eta goitian ikusten den puntattoaren eskuinetik azken zatian sartuko ginen.

Zeharkaldi bat goranzko joerarekin eta kaskora atera ginen.

15:20 : Ezkaurre (2045m)

Gauza bat eta bertze, zazpi ordu kostatu zitzaigun kaskora ailegatzea. Eskalatzean denbora fite joaten da. Gailur zabalean haizeak eman zigun ongi etorria. Zerbait jan, argazki batzuk eta beheiti abiatuko ginen.

Orhi gailurretik...

...eta Lakora ingurua.

Beheitirako GR11.4 bidea segituz eginen genuen. Gailurretik iparraldera pixka bat jaitsi eta bide honen marka zurigorriak harrapatu genituen. Gero hauei segituz malda tentea jaitsiko genuen iparraldera lehen erdian, eta Abizondoko lepotik aitzin basoko bidexka erosoagoa bigarrenean.

 

16:26 : Argibielako lepoa (1297m)

Zorionez jaitsiera igoera baino aise azkarragoa izan zen. Ordubete eskasean autoan ginen berriz, Nafarroako Pirinioetan eskalada eta mendi itzuli ederra burututa.