Lepoeder (1432m)

EGUNA: 2024/12/11

ABIAPUNTUA: Orreaga (944m)

ZAILTASUNA: S2

DENBORAK:

• Igoera: Ordu eta hiru laurden
• Jaitsiera: Ordu erdi

NOLA AILEGATU:

Ateraldi hau Nafarroako Orreaga herritik abiatzen da. Bertara hegoaldetik ailegatzeko Iruñeatik Zubiri aldera hartu behar da eta hemendik Erro eta Mezkiritz mendatetxoak zeharkatuta, Aurizberri eta Auritzera ailegatuko gara hurrenez hurren. Auritzetik kilometro pare batera dago Orreaga. Iparraldetik bertarainokoa Donibane Garazitik Ibañetan barrena pasatzen den errepidetik eginen dugu.

ARRASTOA:

Powered by Wikiloc

KRONIKA:

Pixka bat gehiago egon gara esperoan, baina ailegatu zaigu elurra gurera. Ausarki ekarri du lehen elurteak gainera, eta eski denboraldia etxetik hurbil hasteko aukera eman digu. Ez da guti! Orreagatik Astobizkar mendirako bidea ohikoa da eskiz egiteko eta hori egiteko asmoz abiatu ginen autotik. Azkenean, ordea, ordua eta lainoa tarteko Lepoederreraino ailegatu ginen.

14:02 : Orreaga (944m)

Zeruari elur pinporta batzuk eskapatzen zitzaizkiola ekin genion bideari. Monastegiaren ondotik abiatzen den pistatik hasi ginen.

Donejakue bidea eskuinetara utzi eta ipar-ekialderantz egin genuen pista batetik.

Arrañosingo errekaren bazterretik egin genituen kasik bi kilometro. Tarte honetan ia ez genuen altuerarik irabazi.

Iralepotik Arrañosingo errekara jaisten den bizkar ederra ikustean erreka ahal genuen lekutik zeharkatu eta malda zabal horren bila abiatu ginen. Berehala metroak irabazten hasi ginen. Hasmentan oraindik basotik...

Baina berehala aterako ginen terreno irekira.

Bizkarrean elurra haizetua eta gogor samar zegoenez, bizkarraren ezkerretik egin genuen Iraleporainoko bidea. Berez malda eder hauetatik jaitsiera egiteko asmoa genuen, baina basotik kanpora elurra kostra egoeran zegoela aipatu ziguten eta itzulia alderantziz egitea erabaki genuen.

Arbolen babesa bilatuz gainditu genuen Ortzanzurietara igaten den errepidera arteko malda. Zati batzuetan 35 bat graduko inklinazioa hartuko du.

Behin errepidera aterata, bertatik segituko genuen Lepoeder ondoraino.

Astobizkat mendiaren hego magala zeharkatzen du errepide elurtuak.

...berriz ere baso batean sartu arte. Lepoa ez genuen urrun puntu honetatik.

Basotik metro guti batzuk egin eta ezkerretara biratu ginen lepoaren bila.

15:43 : Lepoeder (1432m)

Lepoan igoera bertan akitzea erabaki genuen. Hasmentan erran bezala, asmoa Astobizkar mendira igatea zen, baina bertatik oraindik bizkar luzea gainditu behar zen eta ordua, eguraldia eta elur-baldintzak ikusita ez zuela merezi erabaki genuen.

Jaitsierarako prestatu eta beheiti abiatu ginen luze gabe.

Jaitsiera Donejakue bidetik egin genuen, baso artetik denbora guzian. Zati batzuetan zuhaitz arteko tartea zabalagoa da, eta bertze batzuetan estu eta teknikoagoa. Berez itzuli polit hau kontrako norabidean egitea hobe dela iruditzen zait, eskiatzeko hobea delako igan genuen malda. Hori bai, elur baldintzak onak direlarik!

16:23 : Orreaga (944m)

Kontent ailegatu ginen autora itzulia osatuta. Lehen kontaktua eskiekin, etxetik hurbil eta paraje ederrean, ezin gehiago eskatu. Beno bai, elur hobea izatea, baina bertze noizbait izan beharko!