2019/10/14

Jentilbaratza (465m)

EGUNA: 2019/10/13

ABIAPUNTUA: Ataun (240m)

ZAILTASUNA: (4c, 260m)
Bidearen krokisa, Eskalatzen blogetik hartua


DENBORAK:

  • Hurbiltzea: 10 minutu
  • Bidea: 2 ordu
  • Jaitsiera: 30 minutu
NOLA AILEGATU:
Donostia eta Gasteiz lotzen dituen N1 errepidetik joanen gara Beasain Ataungo irteera aurkitu arte. Seinaleei segituko diegu Ataungo San Martin auzoraino eta auzoa zeharkatuko dugu bukaeran ezkerretara errepidetxo bat hartzeko. Bertatik segituko dugu metro batzutan, Jentilbaratza bistan dugula, errepide bazterreko leku bakanetan autoa utzi arte.

KRONIKA:
Jentilbaratzako eskalada eskolak bide anitz izateaz gain, luze batzuetako eskaladarekin ertz polit eta erraza eskalatzeko aukera eskaintzen du. Haize gogorra iragarrita zegoenez, altuera gutxi hartzen duen eremu honetara jo genuen egun pasa egin bidenabar.


10:12 : Ataun (240m)
Autoa bide bazterrean utzi eta eskalatu beharreko ertza begibistan genuela errepidetik goiti metro batzuk egin genituen.



Eskalada beheitiko zuaitz horien ondoan hasten da eta irudiko pareta igotzen du goitiko puntaraino. Errepidea utzi, errekatxoa gurutzatu eta I+ graduko plaka etzan batzuk gaindituta bidearen azpiko aldean kokatu ginen.



  • 1. luzea (4c, 40m): Bide osoko luzerik zailena da eta V. gradua ere ematen diote hainbat deskribapenetan. Lehen zati bertikalago baina erraz batzuk gaindituta, plaka etzanetatik igotzen da teilatutxo baten azpiraino. Hori igotzean dago zailtasunik handiena.



  • 2. luzea (4a, 40m): Bileratik ezkerretara atera eta pareta gehiago etzaten da. Hortik aitzin pausu errazak egiten dira.



  • 3. luzea (3c, 45m): Metro batzuk oinez eginda 3. luzeari ekin genion. Kanaletxo batetik ekiten zaio eta gero plaka bat igotzen da, belarrezko terrazetatik 3. bilerara ailegatzeko.

  • 4. luzea (4b, 40m): Hasiera plaka etzanak zehartuz egiten da eta akitzeko diedro bertikal bat igo behar da. Bidearen bigarren pausurik zailena da honakoa.



  • 5. luzea (II, 50m): Azken luzea nahiko horizontala da. Paretatxo pare bat gainditu behar dira, baina ez dauka zailtasunik.





11:50 : Jentilbaratza (465m)
Bidea ordu eta erdi eskasean eskalatu genuen hego haizearen bolada gogorretatik behingoz urrudu nahian. Halako haizeak ez zigun eskaladaz nahi bertze gozatzen utzi, arras deserosoa suertatu baitzen. Gailurrean argazki batzuk eta ahal bezain fite beheiti abiatu ginen.


Agaotz mendi inguruak...


Ataun herria gailurretik...


Hegoalderantz baserriak...


Jaitsierarako ekialderantz soka finko batzuen laguntzaz lepotxo bateraino joan eta hortik eskuinetara irudiko kanale bertikala jaitsi genuen. Paretatxo batean soka finko bat du laguntzeko eta zuhaitz batean rapel bat ere muntatu daiteke.


12:30 : Ataun (240m)
Zuhaitz arteko bidexkatik errepidera itzuliko ginen, bertatik autoraino jaisteko.

2019/10/07

Pene Sarriere (1944m)

 EGUNA: 2019/10/05

ABIAPUNTUA: Gourette (1359m)

ZAILTASUNA: 4b/AD
Xabier Larretxearen Eskalatzen blogetik hartutako krokisa


DENBORAK:

  • Hurbiltzea: Ordubete
  • Bidea: Bi ordu
  • Jaitsiera: Ordubete
NOLA AILEGATU:
Erratzutik aterata Behe Nafarroara pasatu behar da Izpegitik. Baigorritik Garazira jo eta hemendik Donapaleu aldera. Donapaleutik Sauveterre de Bearn aldera doan bidea hartu behar da baina seinaleetan Oloron ikustean azken honetara joanen gara. Oloronetik Paue aldera hartu, baina hiria gibelean utzi eta gutxira Laruns eta Artouste alder bideratzen gaituzten seinaleak ikusiko ditugu. Larunsetik Aubisque mendate ezagunean goiti abiatuko gara Gourette eski estazioraino.

KRONIKA:
Eski estazioak mendian eragin dituen zaurien gainetik, Gourettek paraje ederrak eskaintzen ditu inguru mendi bertikalekin. Ger handia da inguruko erregea, baina Pene Medaa eta Pene Sarriere ere dotore zutitzen dira belardi berdeen gainetik. Preseski, azken honek eskaladarako bide ederrak ditu ekialdeko aurpegian eta guk egin dugun hegoaldeko ertz zorrotz eta ikusgarrian.

10:46 : Gourette (1359m)
Goizean egin genuen Gouretterainokoa, presa handiegirik gabe. Urrian goizak freskoak dira eta bezperako euriak bustitako arroka idortzen utzi nahi genion eguzkiari. Aparkalekutik beretik Medaa eta Sarriereko mendiak ikusgarri ageri ziren.


Gure helburua zena identifikatuta, haren eskuineko (mendebaldeko) aldetik igo behar genuela bagenekien eta horrela abiatu ginen eski pistetatik goiti.


Mendebaldeko pareta azpitik inguratuta, mendiaren hegoaldean dagoen lepotxora igo ginen. Hemendik ertza benetan mehatxati ageri zen. Lepotxoan materiala prestatu eta sokak lotuta genituela hurbildu ginen eskaladaren hasierako bilerara.



Hortik aitzin hasten da ertz zorrotza aldez alde zeharkatzen duen bide zirraragarria.


  • 1. luzea (3c, 35m):  Hau da bidearen luzerik ikusgarriena. Zatitxo bat igota ertzaren zatirik zorrotzena zeharkatu behar da. Arras estua da eta bi aldeetara amildegia du. Teknikoki ez da zaila, baina bai ikusgarria.

Lehen luzea hasten


Zatirik estuenean



  • 2. luzea (4a, 20m): Lehen metro erraz batzuen ondotik plaka bat igo behar da ezkerretara ertzetik akitzeko. Bigarren bilera segidan harrapatuko dugu.

Bigarren luzeko plakatxoan


  • 3. luzea (4a, 35m): Beherantz egiten den luzea. Metro batzuk eginda luzeari gradua ematen dion paretatxo jaitsi behar da. Errazagoa da lehenengo bezala, bigarren bezala baino. Guk ez genuen deskribapenetan aipatzen den soka aurkitu.

Hirugarren luzeko jaitsiera, 4a gradukoa



  • 4. luzea (4a, 15m): Bileraren gaineko zati desplomatua ekialdeko pareta ikusgarrira atera eta handik gainditzen da erraz. Hortik erlaitz batera atera eta ezkerretara pixka bat jaitsi behar da, segidan gora aterako gaituen tximinia erraz bat hartzeko. Erlaitzean behera jaitseko zatia hau ere bigarrenarendako zailagoa da.

4. luzearen hasierako bilgunean, gainean igo beharreko bigarren orratza duela



  • 5. luzea (II, 30m): Bigarren orratzaren gainetik hasi eta beherantz egiten den luze erraza. Oinez egiten ahal da.

  • 6. luzea (I, 80m): Oinez egiten den transizioko luzea.


Oinez egiten den zatia eta gibelean azken luzean igo beharreko orratza (4b)



  • 7. luzea (4b, 45m): Azken hau da bideari gradua ematen dio luzea. Metro erraz batzuk igota desplome txiki baten azpian dagoen erlaitzera aterako gara. Pausu hau gainditu eta diedro batek utziko gaitu bidearen bukaeran.

Azken orratzaren gainetik 6. bilera


14:23 : Pene Sarriere (1944m)
Ertzean lasai eta anitz gozatuz ibili eta gero, gailurrean ere tarte zabala hartu genuen. Ikusgarria da lekua, Latte de Bazen, Becottes, Pene Medaa eta Ger mendi ikusgarriak inguruan dituela.


Gailurra eta ertz ikusgarriaren azken zatia.


Egonaldi goxoaren ondotik mendiaren iparraldean dagoen bidexkatik jaitsiko ginen. Erraza da baina guk bustita aurkitu genuen eta harkaitz plaka batzuk arriskutsu samar zeuden.



15:44 : Gourette (1359m)
Eski estaziora bueltan, laino artean akitu genuen ertz polit honetara egindako ateraldi ikusgarria.


BIDEOA: