Soum Couy (2315m)

EGUNA: 2023/03/05

ABIAPUNTUA: Refuge de l'Aberouat (1450m)

ZAILTASUNA: S2

DENBORAK:

• Refuge de l'Aberouat - Soum Couy : 3 ordu eta erdi
• Soum Couy - Rocher de l'Osqueren azpiko aldea : Ordu erdi
• Rocher de l'Osque - Pas d'Azuns : Ordu erdi
• Pas d'Azuns - Refuge de l'Aberouat : Ordu eta erdi

NOLA AILEGATU:

L'Aberouateko aparkalekua Lescun herritik gora dago. Lescunera iristeko, gure kasuan, Nafarroa Beherea eta Zuberoako probintziak zeharkatzea da lasterrena. Donibane Garazi, Lartzabale, Maule eta Atharratze herriak pasata, Montori herrian utziko ditugu Euskal Herriko lurrak. Lanne en Baretous herrira ailegatuko gara hurrena eta herri hau pasata eskuinetara Arette herrira doan bidegurutzea ikusiko dugu. Bertara joanen gara. Arettetetik Issor herrian barrena, Aspeko bailarara iritsiko gara. Behin hemen, Zaragozako norabidea hartuko dugu eta kilometro batzuz bailara sartu ondotik, eskuinetara Lescun herrira doan desbideratzea aurkituko dugu. Puntu honetara Pirinioen hegoaldetik ere irits daiteke, Jaca eta Somporteko tunelean barrena. Lescun herrira ailegatzean, aparkalekura eramanen gaituzten seinaleei segituko diegu.

ARRASTOA: 

Powered by Wikiloc

KRONIKA:

Mendi ezaguna da Soum Couy mendi eskiatzaileendako. La Pierre-Saint martin eski estaziotik pistak segituz mendira igatea ohikoa da, batez ere denboraldi hasmentan edo akabailan. Dena den, igoera hori misterio handirik gabea dela erraten ahala da, aipatu bezala pistetatik igaten baita gehienean. Erreportaje honetan mendi horretara eskiz egindako bide originalagoa ageri da, Aberouat aterpetik hasi eta Camplong etxola aldera paraje ederretan eskiatzeko aukera ematen duena.

9:14 : Refuge de l'Aberouat (1450m)

Larunbatean Aberouateko aparkalekuan pasatu genuen gaua. Begiratoki bikaina da eta Lescungo zirkurako ikuspegi bikaina du. Egunsentia latza izan zen, eguzkiak gorriz margotu zituen Billare eta Auñamendi aldeak.

Lasai-lasai prestatu eta GR10aren bideari segituz abiatu ginen.

Anayeko bailara lehen metroetatik...

Bidearen lehen zatia nahiko horizontala da. Goiti-beheiti batzuk baditu, baina ez du altuera handirik irabazten. Arrasto estutik erritmo bizian pasatu ginen bertatik, jaitsieretan eskapada bat edo bertze eginez.

1500 metro inguruan atera ginen basotik paraje irekira. Parean eguneko helburua zen Soum Couy bistaratu genuen bertatik. Itzuli osoa emanen genion mendiari.

10:26 : Cabane de la Cap de la Baitch (1689m)

Ardineteko etxolatik Cap de la Baitchekora ere altuera guti irabazten da. Hortik ezkerretara biratuko ginen Countenderen ipar magaletan goiti egiteko.

Leku nahiko ezaguna da eta arrastoa irekia harrapatu genuen.

Lehen malda bat gaindituta eskuinetara ikusten den lepotxo iduriko horretatik pasatuko ginen. Hortik aitzin bidea berriz ere aunitz etzaten da.

Auñamendiren gailurra ikusten hasi ginen puntu horretatik goiti, baina guk bertara zuzentzen zen bidea utzi eta mendebalderantz eginen genuen.

11:22 : Col des Anies (2084m)

Paisaia karstikoan barneratu eta Anieseko lepo zabalera ailegatu ginen. Lepoaren bertze aldean La Pierre-Saint-Martin eski estazioa kokatua dagoen isurialdea dago.

Guk altuera galtzen hasi baino lehen, eskuinetara biratu eta Soum Couy mendiaren ipar magalean utziko gintuen malda tentea igateari ekin genion.

Azken metroetan 40 bat graduko malda izanen zuen malda horrek eta eskiak bizkarrean genituela akitu genuen badaezpada.

Argazki honetan ongi nabaritzen da maldaren inklinazioa.

Auñamendi beti presente...

Malda tenteena gaidituta Soum Couyren ipar magal ospelean barneratu ginen. Bertan elur hauts arina harrapatu genuen eta arrastoa egitearen plazera.

Baldintza bikainak lagun kaskoraino eskiak zangoetan genituela ailegatu ahal izan ginen. Hirugarren aldia zen niretako mendi honetan, eta bertara eskiz ailegatu gabea nintzen. Goitiko partea arras haizetua egon ohi da.

12:45 : Soum Couy (2315m)

Gailurreaan gutaz aparte laukote madrildar bat bertzerik ez genuen harrapatu eta tarte zabala hartu genuen han egoteko.

Lehen jaitsiera tontorretik beretik abiatu genuen. Eski pisten goitiko parte aldera zuzendu ginen, baina hauetara ailegatu aitzin eskuin biratu eta Camplongeko etxola aldera eskiatzen segitu genuen. Pinu eta harkaitz gorrixkak zipriztindutako malda hauek bertze leku bateran egonen bagina bezala sentiarazi gintuzten. Rocky Mountains piriniarra!

14:00 : Rocher de l'Osqueren beheitiko aldea (1764m)

Berez Camplongeko etxolaraino jaisteko asmoa genuen, baina elurra azpiko partean ez zegoen hain ona eta goitixeago gelditu ginen. Berriz fokak paratu eta Rocher de l'Osque eta Tourelleseko harkaitzen arteko bailara ederrean sartu ginen.

Eskuinetara ikusten den lepo aldera segitu genuen malda eztietatik. Lekua zoragarria da, ipuin batekoa iduri du.

Lepo aldera gozatzen...

Azken metroak Soum Couy mendiaren azpiko aldean dagoen lepora ailegatzeko...

14:27 : Pas d'Azuns (1873m)

Lepotik berriz ere Lesucngo isurialdera pasatu ginen. Jaitsieraren lehen zatia Ardineteko etxola aldera egin genuen, segidan berriz ere basoan sartzeko.

Leku eder honek berriz ere aho zapore gozoa utzi zigun...

15:48 : Refuge de l'Aberouat (1450m)

Eskiak bizkarrean egin genuen basoaren zeharkaldi gehiena; elurra izanda ere, goiti-beheiti batzuk baititu. Eta hala akitu genuen oroitzeko moduko asteburu eder hau!

 

Soum Couy (2315m)

EGUNA: 2020/10/17

ABIAPUNTUA: Arette-La Pierre Saint Martin eski estazioa (1656m)

ZAILTASUNA:

• Eski zailtasuna: S2

DENBORAK:

• Igoera: 2 ordu
• Jaitsiera: Ordu erdi

NOLA AILEGATU:

Gure kasuan Izpegiko lepoa zeharkatu eta Behe Nafarroa eta Zuberoan barrena egiten dugun Aretteko eski estaziorainokoa. Garazitik Larzabalerako bidea hartu eta hemendik Atharratze aldera doan bidea hartuko dugu. Atharratze gurutzatu eta eskuinetara Santa Grazira doan bideari segituko diogu. Santa Grazitik goiti Soudeteko lepotik ailegatuko gara Arette-La Pierre Saint Martingo eski estaziora.

KRONIKA:

Udazken hasmenta arraro honetako hirugarren elurteari ezin genion pasatzen utzi. Lehendabiziko bietan gure eski grinak alde batera utzi bagenituen ere, hirugarren honetan altxor zuriaren gainean lerratzeko beharra asetzera joan ginen Aretteko eski estaziora.

8:58 : Arette - La Pierre Saint Martin (1656m)

Goizean goiz jarri genuen hitzordua Erratzun berean eta bi ordu eskasean abiapuntuan ginen. Gogotsu eskiak paratu eta goiti abiatu ginen eski pista elurtuetatik.

Oraindik urri erdialdea izan arren negu beteko itxurarekin aurkitu genuen mendia: hotza, pinuak aitzineko egunetan botatako elurrarekin apainduak eta mendiak zuri-zuri... 

Arlas mendia gure eskuinetara utzi genuen, bere ekialdeko maldetan bezperan ibilitako eski arrastoak zituela.

Lehen zatia eski pistak utzita egin genuen Pescamou lepoaren azpiko aldetik.

Segidan ezkerretara biratu eta Boulevard des Pyrenees deitzen den eski pistatik segitu genuen Auñamendi dotorea parez pare genuela.

Azken elurteek itxura eder honekin utzi dute Arette ingurua.

2122 metroko altueran dagoen Soum Couyko teleaulkiaren goitiko puntuan utzi genituen eski pista eta Soum Couy mendiaren ipar magaletik segitu genuen.

Baldintza onean aurkitu genuen ipar magal hau eta arazorik gabe igo ginen sasi-gailurreraino.

Sasi-gailurrean eskiak utzi eta kranpoiak jarri genituen azken metroak igotzeko. 70 bat metroko altuera gaindittzen da malda honetatik eta normalean elurra gogor egoten da bertan.

Gandorrera aterata ikuspegi bikainaz gozatuz egin genituen azken metroak.

11:15 : Soum Couy (2315m)

Tenperatura goxoa lagun egonalditxoa egin genuen gailurrean Lescun eta Auñamendi inguruaz gozatuz.

Sasi-gailurrean eskietara bueltan otordutxoa egin ondotik, jaitsiera zuzena egin genuen eski pistetatik Asterseko teleaulkiaren beheitiko punturaino (1522m). Bertan berriz foka-larruak jarri eta eski estaziora itzuliko ginen.

13:28 : Arette - La Pierre Saint Martin (1656m)

Goiz pasa polita egin genuen elurrarekin aspaldiko partez lehen kontaktua izateko. Ea laster dugun bertze bat egiteko aukera...
 

BIDEOA:

Soum Couy (2315m), Arlas (2044m)

EGUNA: 2010/12/28

IRTEERA: Arette-La Pierre Saint Martin eski estazioa

ZAILTASUNA: Errexa (F). Berez mendi hauek elurrik gabe igotzeak ez dauka aparteko zailtasunik. Guk ordea elur oso gogorrarekin igo genituen eta Soum Couyko azken zatian larri ibili ginen, kranpoiak kotxean utzi genituelako.

EGURALDIA: Eguzkitsua.

DENBORAK:

- Arette-Soum Couy: 1 ordu eta 45 minutu

- Arette-Arlas: 45 minutu

NOLA IRITSI: Iruñeatik Izabaraino joan eta hemendik iparraldera doan errepidea hartu San Martingo Harriko leporaino. Lepoaren bertze aldera kilometro gutxi batzuk jaitsi eta eski estazioa ikusiko dugu. Lepoko errepidea itxita balego, Arette herritik gora igotzen den errepidea hartu behar da, Baretous bailaran barrena.

DESKRIBAPENA:

Gabonetako oporretan, jadanik Saioara hiru bat igoera eginda genituelarik, Pirinioetara irteera txiki bat egitea pentsatu genuen, elur gehixeago harrapatzeko. Hasiera batean Lakora mendia ginen igotzekoak.

Hala ba, plana egin eta abenduaren 28 goizean goiz abiatu ginen Izaba aldera. Izabatik gora errepidean igotzen hasita, ohartu ginen mendien hego aurpegiak ez zeudela eskiatzeko moduan. Kaka zaharra! Beraz, San Martingo Harriko leporaino igo eta iparraldean probatzea erabaki genuen.

Ipar aurpegian ere afera beltz, txuri baino gehiago. Hala ere, han egonik, behintzat eski pistetatik gora bueltatxo bat ematea bururatu zitzaigun

Autoa eski estazioko aparkaleku erraldoiean utzi eta gauzak prestatuta goraka abiatu ginen estazioko eraikuntzak atzean utzita.

0h 00min: Arette-La Pierre Saint Martin eski estazioa (1628m)

Les Sapins pistatik gora igotzen hasi ginen eta hau bukatzean Boulevard des Pyrenees pista urdin luzea hartu genuen. Intentzioa, hemendik bukaeraraino igotzea zen, Soum Couy menditik hurbil bukatzen baita, eta han erabakitzea mendia igo edo ez. Igoera historia askorik gabea, gu goraka tontoak bezala eta bertze guztiak a toda letxe beheraka. Arlas mendia gure eskuinean utzi genuen.

Eta aurrean gure helburua ikusten hasi ginen. Bere eskuinean, beti bezain eder, Auñamendi edo Anie.

1h 05min: Soum Couy teleahulkiaren bukaera (2153m)
Hala, ttipi-ttapa pistaren bukaerara iritsi ginen. Gailurrak ez zirudien urruti, baina elurra ere ez zegoen nahi bezainbertze. Hala ere, gora igotzea erabaki genuen. Jende uholdeak atzean utzi eta elur malda izoztuetan gora abiatu ginen. Malda tente bat ahal genuen bezala igo eta sasigailur batera ailegatu ginen. Malda igotzen argazkian...

Sasigailurrean jadanik bakarrik, bista ederretaz gozatzen hasi ginen. Midi d'Ossau ahalguztiduna tartean.

Hala ere, dena ez zen ona, eta igoerako azken zatiak itxura hau erakusten zuen... Elur gutxi benetan.

Beraz, eskiak kendu eta oinez egin genuen gora. Elurra gogor zegoen, eta materiala faltan botatzen hasi ginen. Hala ere, gailurra hurbil zegoen eta arriskutsuegia ere ez denez tokia, goraka segitu genuen. Ertzera ailegatzean Auñamendi agertu zitzaigun begien aurrean.

Ertz polit hau zeharkatzea baino ez zen gelditzen gailurrerako..

1h 45min: Soum Couy (2315m)
Eski estazioaren ingurua eta Arlas mendia gailurretik.

Arlas eta Larra gailurretik, elur gutxi mendian.

Auñamendiko tontorra, gainean jendea dagoela.

Gailurrean gutxi egon ginen eta berriro sasigailurrera bueltatu ginen. Beherakoan kontu handiz jaitsi ginen. Nahiko gaizki zegoen egia erran eta eskiko botekin ibiltzea ez da oso erosoa. Sasigailurrean, foka-larruak kendu eta BEHERA!

Hasieran menditik eta gero eski pistetatik segidan jaitsi ginen eski estazioraino. Autoan lasai bazkaldu eta arratsaldea pasatzeko jendeari forfaitak eskatzea erabaki genuen. Hala ere, goiz zen oraindik eta jendea ez zihoan etxera. Beraz, digestioa egiteko berriro fokak jarri eta Arlasera abiatu ginen Gypaete pista gorrian barrena.

0h 45min (Eski estaziotik): Arlas (2044m)
Eta horrela eguneko bigarren gailurra egin genuen. Hau ere Auñamendiren itzaletan.

Eguna azken orduetan...

Ixidro eta Txomin gailurrera ailegatzen.

Puntu honetan eski pistara bueltatu ginen. Noski azken zatia eskirik gabe egin behar izan genuen. Arlasetik jaitsi eta gero, forfait batzuk lortu genituen eta ordubete inguruan pistetan bueltaka ibili ginen egune bukatzeko.