Zagua (1153m)

EGUNA: 2023/01/29

ABIAPUNTUA: Pitzamar (800m)

ZAILTASUNA: S1

DENBORAK:

• Igoera: Ordu eta laurden
• Jaitsiera: 30 minutu

NOLA AILEGATU:

Abiapuntura ailegatzeko Iruritatik Eugi doan NA-1740 errepidea hartu behar da. Lepora ailegatu baino 2,5 kilometro beheitiago, 13. puntu kilometrikoaren ondoan utzi behar da autoa.

ARRASTOA:

Powered by Wikiloc

KRONIKA:

Saioa ingurua jendez beteta edo lainoz inguratuta dagoen egunetan Erdiz ingurura joatea soluzio ona izaten da. Eskiatzeko maldak hain onak ez izanda ere, nahiko aproposak dira eta lasaitasuna ziurtatua dago. Hori guzia guti balitz, inguruaren edertasunak inbidia guti dio auzokidearenari. 

13:30 : Pitzamar (800m)

Goiz bazkaldu eta Artesiagara bidean jarri nintzen. Bide bazterrean autoa utzi eta Konfesionarioko lepora igaten den pistatik goiti abiatu nintzen.

Arrasto batzuk izanda ere, pistan elur kalitate ona harrapatu nuen. Bide osoko onena egia erran...

Baso zati bat zeharkatu eta paraje irekira ateratzen da pista. Bertatik Konfesionarioko lepoa ikusten da, eta haraino pista marratzen duen malda ere bai. Ni pista utzi eta eskuinetara ikusten den elur maldatik Gurutxemeakako lepora aterako nintzen.

13:58 : Gurutxemeakako lepoa (1026m)

Lepotik parez pare ikusten da Okoro mendia. Bertara joateko Erdizagako errekara jaitsi behar da hego isurialdeko maldetatik eta nire eguneko esperantza malda horietan haizeak eramandako elurra pilatuta egotea zen. Ez zen halakorik han ordea. Elur guti eta kalitate txarrekoa...

Hala bada, eskuinetara biratu eta Zagua aldera segitu nuen kaskoz kasko joaten den pistatik.

Parean nuen Zagua eta bertara joaten den pista. Metro batzuk galdu behar dira azken malda igan aitzinetik.

13:27 : Zagua (1153m)

Ordubete eskasean gailur zabalean nintzen. Pista utzi eta malda etzan batetik egiten dira azken metroak. Bazen elurra bazterretan, baina haizeak lan handia egina zuen eta hautsaren arrasto handirik ez zen. Hori ikusita, bide beretik autora itzultzea erabaki nuen.

Lehen jaitsiera pistaren azpiko puntura egin nuen. Okoro eder ageri zen parez pare...

Berriz fokak paratuko nituen 50 bat metro igateko. Hortik azken jaitsiera autoraino...

 

Harrigorri (1115m)

EGUNA: 2023/01/28

ABIAPUNTUA: Elortako bidea (738m)

ZAILTASUNA: S2

DENBORAK:

• Igoera: Ordu eta laurden
• Jaitsiera: Ordu erdi

NOLA AILEGATU:

Erratzu herritik Izpegi aldera doan errepidea hartu behar da, baina kilometro bat inguru ibili ondoren eskuinetara ateratzen den zementuzko bide bat hartuko dugu. Bide hau zementuzkoa izatetik asfaltatua izatera pasatzen da segidan. Asfaltoa azken baserrian bukatzen da, beheitiko bidegurutzetik 2 kilometro ingurura. Bertan utzi behar da autoa (Arginen Borda, 495m.). 4x4 ibilgailua izanez gero eta elurrak utziz gero, Arginen Bordatik goiti segitzen duen pistatik segitu ahal dugu Kuarteleko Kaskoraino (627m.) eta pista okerrago batetik Elorta arte. Pista horrek erreka bat gurutzatzen duen puntua utziko dugu ibilgailua.

KRONIKA:

Elurrak astebete darama etxe bazterrean eta irudimen pixka batekin egun lainotuei zukua ateratzen saiatzen ari gara. Auzaren ekialdeko aurpegi ederra basoak estaltzen du 1100 metro ingururaino. Baso trinkoa da puntu batzuetan, baina badu pasabide ireki bat, eskiatzeko aproposa dena. Erratzuko Barlagne izenez bataiatua gelditu da. 

10:02 : Elortako bidea (738m)

Erreka zeharkatu gabe eskuinetara ateratzen den pista nabarmena hartu dugu. Elurra jarraia da hasmentatik, zaharra ongi gogortu baitute azken egunetako hotzek, eta gainetik 5 bat zentimetroko geruza freskoa du.

Metro batzuk iganda pago arteko pista argazkiko belai zaharraren ondora ateratzen da. Hemen basoa irekitzen da. Belaia eskuineko aldetik inguratu dugu.

Eroritako borda bat ezkerretara utzi dugu belaiaren gaineko larreak igaten genituen bitartean.

Lehen tarte irekia igan eta gero, bertze baso zati bat zeharkatu eta berriz ere zuhaitz arteko soilgune batera aterako ginen.

Pista zahar bat igaten da zati honetatik guzitik. Erreferentzia gisa erabili dugu, baina elur kantitate aproposa zegoen edozein lekutatik pasatzeko.

Hirugarren soilgunean lainoak inguratu gaitu. Hala ere, beti dago arbolen erreferentzia inguruan, bisibilitate gutiko egunetarako.

Azken soilgune honek Auzaren ekialdeko malda irekia uzten gaitu.

Lainoagatik gailurra alde batera utzi eta arbolen mugatik Harrigorri aldera zuzendu gara zeharkaldi luzea osatuz...

11:02 : Harrigorri (1115m)

Gailurrean lainopean, baina haizerik gabe nahiko ongi egoten zen.

 

12:05 : Elortako bidea (738m)

Jaitsiera igandako bide beretik egin genuen, basoaren soilguneak aprobetxatuz. Ea noizbait jaitsiera hau Auzako kaskotik beheitiraino egiten ahal dugun... 

Xuriain (1410m)

EGUNA: 2023/01/27

ABIAPUNTUA: NA-1740 errepidea / Km 18 (814m)

ZAILTASUNA: S2 (malda eztiak, baina baso artean)

DENBORAK:

• Igoera: 2 ordu
• Jaitsiera: 45 minutu

NOLA AILEGATU:

Abiapuntura ailegatzeko Iruritatik Eugi doan NA-1740 errepidea hartu behar da. Iruñetik pasatuz gero, Eugira joan eta Urkiagako errepidetik ailegatuko gara bide honetara. Artesiaga mendatearen hegoaldeko isurialdera bi kilometro jaitsita utziko dugu autoa, bide bazterrean ahal den lekuan. Elur aunitz dagoelarik (edo auto aunitz), zaila izaten ahal da aparkatzea.

KRONIKA:

Euskal Herrian elurra kota baxuetan botatzen duelarik, aunitzetan kosta egiten zaio eguraldiari garbitzea. Lainoa, haizea eta hotza dugun egunetan, elurraz gozatu nahi badugu basoen keriza bilatu behar izaten dugu. Xuriain mendiak horretarako aukera ematen digu, kasik gailurreraino arbolaz babestutako igateko modua eskaintzen baitu. Basoa irekia izanik, nahiko eskiagarria da.

13:30 : NA-1740 errepidea / Km 18 (814m)

Lanetik eguerdian atera eta denborarik galdu gabe azken elurtetxoa dastatzera zuzendu gara. Artesiaga mendatea gurutzatu eta kilometro pare bat jaitsita bide bazterrean eskuinetara ateratzen den pista izanen genuen abiapuntu. Pistaren sarreran berean utzi dugu autoa eta gauzak prestatuta goiti abiatu gara.

Zatitxo bat pistatik iganda, etxola baten parean laburbidea hartzeko aukera dago. Bertatik egin dugu goiti, elur eta lainoak ikutu misteriotsua maten zioten pagaditik.

Laburbideak pistaren bihurgune luze bat mozten du. Berriz ere pistatik ibili gara zati batean...

...eta oistak eskuinetara egiten duen bihurgune hetsi batean hura utzi eta basoan barneratu gara.

Zetume izeneko basoan goiti egin dugu, momentu oro mendebaldeko norabidea segituz, zuhaitz bakanen artetik.

Lainoak inguratzen gaitunerako inguru aproposa da. Igateko erraza eta jaiisteko zuhaitzen artean lekua duena...

Basoak tarteka soilgune batzuk ditu, jaitsieran eskertzen direnak.

Berriz ere basora sartzen...

Zati trinkoago bat zeharkatu eta goitiko partean arbolak bakantzen hasten dira berriz ere.

Elur geruza lodia harrapatu dugu, gehienbat goitiko partean.

Basotik atera eta azken zatian larre irekietatik egin behar da. Ez da luzea, baina gaurkoa bezalako egunetan aski luze egiten ahal da. Haizek gogor jotzen zuen, tenperatura hotza zegoen eta laino nahiko hetsia. 

15:05 : Xuriain (1410m)

Iberpixeko mapetan 1369 metrora ageri den bizkarrera atera gara eta handik gainez gain abiatu gara hurbil genuen kaskora. Lautada zabala du gailurrak gainean eta haize eta lainoak desorientazioa sortzen ziguten. Gailurretik metro guti batzuetara haize gogorrak buelta hartzera derrigortu gaitu. 20 bat metro falta genituen.

Gaineko lautadatxoko infernutik ahal bezain fite eskapatu gara, foka-larruak kendu gabe. Pagoen babesera bueltatu eta han egin dugu transizioa, basoaren "epelean".

Handik beheiti baso artetik jaitsiera politaz disfrutatu ahal izan dugu, elur goxoa lagun.

Gozatzen...

16:05 : NA-1740 errepidea / Km 18 (814m)

Ezin izan ditugu Xurianen mendebaldeko magalak bisitatu, baina ikusitakoak ikusita kontent egin dugunarekin. Inguruko basoak esploratzera itzuli behar gara... 

Entre Les Ports (2476m), Saint Andre (2608m)

EGUNA: 2023/01/14

ABIAPUNTUA: Gavarnie-Gedre eski estazioa (1840m)

ZAILTASUNA: S2

DENBORAK:

• Gavarnieko eski estazioa - Pic Entre les Ports : 2 ordu
• Pic Entre les Ports - Lac des Especieres : 20 minutu
• Lac des Especieres - Pic de Saint Andre : Ordu eta laurden
• Pic de Saint Andre - Gavarnieko eski estazioa : 45 minutu

NOLA AILEGATU:

Lourdes hiritik hegoaldera autobide bat hartu behar da Argeles Gazost herriraino, hemendik Luz Saint Sauveur herrira joanen gara eta gero Gavarniera. Azken herri hau gurutzatu ondotik eski estaziora (Les Especieres) igoko gara. Bertatik hasiko da ibilaldia.

ARRASTOA:

Powered by Wikiloc

KRONIKA:

Eski estazioak alinoa egiten dutenendako ez ezik, mendi eskia egiten dugunondako ere irtenbide bilakatzen dira aunitzetan. Alde batetik, haietara ailegatzeko errepideak garbitu egiten dituzte eta bertzetik, elur guti dagoen garaietan pistetatik altuera irabazten laguntzen digute. Hori dela eta, estazioen inguruan aunitzetan mendi eskiko klasikoak diren  gailurrak egoten dira. Gavarnieko estazioko klasikoenak Entre les Ports eta Saint Andre dira, dudarik gabe. Bertako baldintzak onak baliatuz bi mendi hauek lotu ditugu asteburu honetan.

9:23 : Station de Gavarnie - Les Especieres (1840m)

Gaua aparkalekuan pasatu genuen eta presarik gabe paratu ginen martxan. Gosaltzen ari ginen bitartean aparkalekua eskiatzaile eta mendizalez betetzen hasi zen eta abiatu ginenerako dozenaka lagunek hartua zuten gurte norabide bera. Elur guti dago bazterretan eta Gavarnie Pirinioen ipar isurialdean elur gehienetakoa duen lekua da.

Estazioko eraikinak gibelean utzi eta Tentesera igaten den errepidetik abiatu ginen. Azpiko zatian elur guti duelako edo estazioak hetsia egoten segitzen du. Erran beharrik ez da egin genuen ateraldi hau estazioa hetsia dagoen garaietarako dela aproposagoa irekia dagoenetarako baino.

Gauetik aitzin haizea zakartzen hasi zen eta eguraldi ona izanda ere, haize pixka bat ibilki zen tarteka. Hego-mendebalderantz egin genuen pistetan barrena helburu jakinik gabe. Azkenean jende aunitz Saint Andrera zihoala ikusita argazkian eskuinetara ikusten den Especiereseko lepora zuzendu ginen.

Taillon eta Gabieto mendien ipar aurpegiak beti bezala ikusgarri ageri ziren inguru honetatik. Hamaika aldiz ikusiak ditugu, baina beti gelditzen gara zozotuta haiei begira.

Pistak utzi eta mendebaldertantz segitu genuen. Entre les Ports mendiaren ipar-ekialdeko aurpegiak itxura polita zuen, baina momentuz gure intentzioa Soum Blanc des Especieres aldera joatea zen. Hala ere, azkenean malda horretatik jaisten akituko genuen.

Especiereseko laku elurtua ezkerretara utzi eta argazkiko malda markatu iganen genuen arrasto erosotik.

10:50 : Col des Especieres / Puerto Viejo (2334m)

Especiereseko lepoan haize biziak eman zigun ongi etorria eta Soum Blanc mendiaren hego aurpegia elurrez justu samar ikusita planez aldatu genuen: Entre les Ports mendira zuzentzea erabaki genuen. Mendiaren ipar aurpegi ospela aldez aldez zeharkatu eta mendebaldeko ertzetik iganen ginen.

Urrunean Tendeñera eta Otal inguruak...

Soum Blanc des Especieres mendia eta bere hego aurpegia gibelean utziko genituen. Ikusten den bezala, aurpegia elurrez justu samar zegoen.

Ipar aurpegitik ekialdeko ertza harrapatu genuen eta elur gogorra zegoenez azken metroak oinez egitea erabaki genuen.

11:41 : Pic Entre les Ports (2476m)

Ez ginen aunitzik egon kaskoan. Haize zakarrak argazkiak ateratzea bera ere zailtzen zuen.

Mendiaren ipar-ekialdeko malda eskiatzeko sasigailurreraino joan behar genuen, beraz gandor erraz eta panoramikoa zeharkatzeari ekin genion.

Sasigailurra baino beheitixeago egin genuen transizioa, haize gerizan. Horren ondotik Especiereseko lakuraino 250 bat metroko desnibela duen malda eskiatu genuen. Elur aldakorra harrapatu genuen: haizeak landutako hauts sakona gehienbat.

12:49 : Lac des Especieres (2192m)

Laku bazterrean eguzkitan berriz ere foka-larruak paratu genituen eta Saint Andre aldera igatea erabaki genuen, gero handik estaziora itzultzeko.

Saint Andreren hegoaldeko malda zabaletatik goiti abiatu ginen. 

Goitiago estaziotik gailurrera igaten den bide arruntarekin elkartu ginen, malda konstanteetatik iganez.

Ordu horretarako Saint Andreko maldek eski estazio bateko pistak ematen zuten, goizean jende aunitz ibili baitzen bertan.

Honela, mantso-mantso Saint Andreko leporainoko 400 metroak gainditu genituen. 

Lepotik Soum Blanc des Especieres mendiaren bertze ikuspegi bat ikusten ahal da. Puntu honetatik gandorrez gandor mendi honetara joaten ahal da.

Eskiak lepoan utzi eta oinez eginen genuen gailurrerainokoa. 40 metro inguruko desnibela bertzerik ez da, ertz erraz batetik...

14:12 : Pic de Saint Andre (2608m)

Eguneko bigarren tontorrean...

Gavarnieko zirkurako ikuspegi bikaina eskaintzen du Saint Andre mendiak. Astazuetatik Gabieto mendietara 13 hirumilako biltzen ditu zirku bikain honek.

Astazuak, Marbore, Cascada gailurrak...

Taillon eta Gabieto mendiak...

Bertze aldean Vignemaleko mendigunea, bertze ezagun zahar bat...

Eguneko bigarren jaitsiera autorainokoa izanen zen, orientazioaren araberako elur aldakor baina eskiagarrian.

15:58 : Station de Gavarnie - Les Especieres (1840m)

Bidean eski bat galduta, bila ordubete inguru galdu ondotik uste baino mantsoago ailegatu ginen autora. Kontent egindako eski saioarekin eta heldu diren elurteen zain etxeko lanak eginda.