Taillon (3144m)

EGUNA: 2024/05/25

ABIAPUNTUA: Col de Tentes (2207m)

ZAILTASUNA: S3

DENBORAK:

• Igoera: 3 ordu eta erdi
• Jaitsiera: Ordu eta erdi

NOLA AILEGATU:
 Lourdes hiri ezagunetik hegoaldera autobide bat hartu behar da Argeles Gazost herriraino, hemendik Luz Saint Sauveur herrira joanen gara eta gero Gavarniera. Azken herri hau gurutzatu ondotik eski estaziora (Les Especieres) igoko gara eta hau ere atzean utzita errepidea bukatzen den lekuraino joanen gara: Col de Tentes (2208m).

ARRASTOA:

Powered by Wikiloc

KRONIKA:

Azken txanpa du eski denboraldiak eta ohiko helburuak ditugu begien bistan. Tenteseko lepora igaten den errepidea garbitzen dutelarik, Gavarnieko 3000koak eskiatzeko aukera ona izaten dira eta horietatik eskiagarriena Taillon da. Ibilbide polit eta anitzak, eta eski malda ederrek fite atzenarazten dute ipar aurpegiaren azpitik egin behar den zeharkaldi laua.

Astazu eta Marbore ilunabarrean

Taillon eta Gabietous ilunabarrean

7:24 : Col de Tentes (2207m)

Gaua aprkalekuan pasatu eta lehen orduan abiatu ginen Bujaruelo edo Boucharoko lepora doan errepide zaharretik. Tentes irekita egonda, ez nuen inoiz hainbertze elurrik ikusi inguruan. Entre les Ports mendia eskiagarri zegoen eta Bujaruelo eta Tenteseko lepoen artean ere elur pixka bat gelditzen zen. Jaitsiera autotik 10 minutura arte eskiatu genuen elur mingainetatik.

Gure ezkerretara eguneko helburua. Niretako borzgarren aldia izanen zen mendi honetan, baina aspertzen ez nauen horietakoa da Taillon.

Erran bezala, Bujarueloko lepora ailegatu baino lehen elurra harrapatu genuen. Goitirakoan ez genituen eskiak paratu, baina beheitirakoan zati hau guzia eskiatuko genuen.

7:44 : Puerto de Bujaruelo / Col de Boucharo (2270m)

Lepo hau zeharkatu gabe ezkerretara hartu eta segidan paratu genituen eskiak zangoetan.

Hortik Taillonen ipar aurpegiaren azpitik egiten den zeharkaldi luzeari ekinen genion.

Elur ona harrapatu genuen, gogortua, eta nahiko fite egin genuen zati hau. Dena den, jaitsieran izaten da zeharkaldi honen makurrena, elur gurituarekin eta aldaparik gabe kosta egiten baita aitzinera egitea. Baina hori bertze kontu bat izanen zen...

Tailllonen ipar aurpegia gibelean utzita zeharkaldiak pixka bat segitu egiten du Taillongo glaziarretik beheiti heldu den errekara ailegatu arte. Hain zuzen ere, erreka ingurura ailegatu arteko azken metroak diren malda gehiena dutenak eta elur gogortua harrapatuz gero kasu eman beharrekoak.

Behin glaziarraren azpiko maldetan kokatuta, goiti egiten hasi ginen. Bezperan botatako elur pizar bat harrapatu genuen eta normalean baino aiseago gainditu genituen malda hauek.

Zatirik tenteena gaindituta, Taillongo glaziarra kokatua dagoen zirkutxora atera ginen. Argazkian ikusten den bezala, hona jaisteko aukera ematen duen ekialdeko aurpegia baldintza onean zegoen.

Glaziarra alde batera utzi eta Sarradetseko leporako metro apurrak gainditu genituen.

Izen bereko mendiaren azpitik pasatuko ginen...

Lepoan...

Eta lepotik zeharkaldi motz batek aterpean utziko gintuen.

9:06 : Refuge des Sarradets / Breche de Roland (2587m)

Aterpera ailegatzean atentzioa eman zigun zati berriaren egoera penagarriak. Oraindik akitu gabe zegoela zirudien, fatxadako plaka batzuk falta baitzituen. Horrelako leku zoragarrian hain aterpe itsusia egitea marka da gero! Lehenagokoa aski polita zen baina...

Aterpea gibelean utzi eta Brecharako azken malda igateari ekin genion.

Inguru eder honetan...

Breche de Roland beti bezain ikusgarri!

Gibelean Sarradets mendia utzi genuen...

Azken metroak Brechara ailegatzeko...

9:49: Breche de Roland (2807m)

Altueran zegoen elur kantitatea handia zen eta lehen aldiz Brecha bera eskiz zeharkatzeko aukera eman zidan. Hegoaldeko isurialdera pasatuta, udako bidetik harresien kontratik segitu ordez metro batzuk galdu eta mendebalderantz igaten den bailaratxo errazetik iganen ginen Taillon aldera.

Hegoaldean ere elur kantitatea handia zen...

Bailaratxo errazetik Taillonen hegoaldeko aurpegia inguratzen da eta hego-mendebaldeko ertzetik harrapatzen da kaskoa.

Zati erraza da, zailtasunik gabea; eta gainera bezperan botatako elur geruza finari esker, baldintza arras onak zeuden.

Azken zatian metro tenteagoren bat gainditu behar da...

11:01 : Taillon (3144m)

...baina aparteko zailtasunik gabe eskiak zangoetan genituela ailegatuko ginen kaskora.

Jaitsiera igoerako bide beretik eginen genuen. Goitiko partean bailaratxoan elur bikaina izan genuen hauts eta guzi, eta Brechatik beheiti ere transformatzen hasia zen udaberriko elur ona.

13:04 : Col de Tentes (2207m)

Jaitsieran luze egiten den ipar-aupegiaren azpiko zeharkaldia ahal zen bezala pasatu, eta Tentes eta Bujarueloko lepoen arteko punturik apaleneraino eskiatu ahal izan genun. Oinez 10 minutuko paseotxo bat bertzerik ez zitzaigun gelditzen denboraldiko azkena izanen zen eski ibilaldia akitzeko.

BIDEOA:

 

Vertice de Anayet (2559m), Arroyeras (2556m) eta Espelunciecha (2399m)

EGUNA: 2024/05/10

ABIAPUNTUA: Formigal - Portalet aparkalekua (1750m)

ZAILTASUNA: S3

DENBORAK:

• Portalet - Espelunciecha : 2 ordu
• Espelunciecha - Vertice de Anayet : Ordu eta erdi
• Vertice de Anayet - Arroyeras : Ordu eta erdi
• Arroyeras - Espelunciecha : Ordu bat
• Espelunciecha - Portalet : Ordu erdi

NOLA AILEGATU:

Iruñetik Jakara joan eta hemendik Formigal eski estaziora joango gara. Formigal eta Portaleteko lepoaren artean, justu lepo hau zeharkatu baino metro batzuk lehenago Portalet deitzen den aparkalekua dago. Hor utzi behar da autoa.

ARRASTOA:

Powered by Wikiloc

KRONIKA:

Negua ez zen elur aldetik oparoegia izan, baina udaberria berde doa eta elurra noiznahi botatzen du 2000 metrotik goiti. Horrek ahalbidetu digu honako itzuli hau maiatzean egitea. Formigal eski estazioko pista zapatuek elurra luzaroago mantendu dute eta Canal Royako lepora bertatik iganda, elurraren unibertsoan barneratu gara. Eguneko plana Anayeteko lakuetako eski trilogia; hau da, lakuaren inguruan dauden hiru mendi eskiagarrienak egunean egitea (Anayet da laku inguruko bertze mendia, baina hau ez da eskiagarria).

7:44 : Formigal - Portalet aparkalekua (1750m)

Gaua aparkalekuan pasatu eta lehen orduan abiatu ginen. Egun beroa genuen aitzinetik eta elurra ahalik eta baldintza hoberenetan harrapatu nahi genuen. Estaziotik Canal Roya aldera igaten den eski-pista hartuko genuen.

20 bat minutuz eraman genituen eskiak bizkarrean, baina argazkian bigarren ikusten den elur-lausoan jadanik paratzen ahal ziren. Guk badaezpada pixka bat gehiago egin genuen oinez.

Eta 1900 metrotik goiti elurrak terrenoa irabazten zion belarrari. Berriz ere altuera horretara jaitsi arte eskiak kasik ez genituen kendu ere eginen.

Eski pistak laburtuz egin genuen Canal Royarako azken zatia.

8:39 : Puerto de Canal Roya (2143m)

Berez lepoa baino hegoalderagoko puntu batean atera ginen bizkarrera. Parez pare genuen Vertice eta Anayet ingurua, eta gure zorionerako eskiatzeko elurra ausarki zegoela ziurtatu ahal izan genuen. Bertara ezinen ginen zuzenean joan ordea. Ezkerretara biratu eta eski pistetatik Espelunciecha mendiaren iparraldeko aurpegiaren oinera joanen ginen, gero bertatik Anayeteko lautadara pasatzeko.

Espelunciechara igateko argazkian ikusten den iparraldeko korridorea gainditu behar genuen. 40 gradutik goitiko malda izanen du punturen batean, baina ez du esposiziorik eta erraza da.

Gure kasuan eguzkiak elurra ederki guritua zuen pasatu ginenerako eta eskiak zangoetan genituela igan hala izan genuen malda.

9:22 : Espelunciecharen iparraldeko bizkarra (2335m)

Bizkar honetara aterata, eguneko lehen trantsizioa eginen genuen. Gailurra hurbil genuen, baina itzulerarako utzi genuen.

Hala eguneko lehen jaitsiera motza egin genuen Espelunciechatik Anayeteko laku hormatuetaraino. Argazkian ongi ikusten da segitu genuen bidea, gailurraren ezkerreko bizkarretik eskuinera diagonalean egiten duen elur lerrotik.

9:37 : Ibon de Anayet (2225m)

Behin laku ondoan, ura hartu, trantsizioa burutu eta goiti segitzeko prest ginen.

Bigarren igoera lakutik Vertice de Anayet mendi kaskora eginen genuen. Malda gutiko zatia zeharkatu eta gailurra eskuineko ertzetik harrapatuko genuen, bertara ailegatzeko ikusten den elur zati diagonala igan beharko genuelarik. Jaitsiera, aldiz, mendiaren ezkerreko aldeko malda zabaletik eginen genuen.

Gure eskuinetara Anayet inguru erregea utziko genuen. Mendi hau ez da eskiagarria, beraz ez zen gure agendan sartzen. Iaz bertako paretetan egindako eskalada ederra gogora ekarri genuen.

Poliki-poliki hartzen da altuera paraje honetan, malda handirik gabe.

Gure gibelean Balaitus, Palas eta enparauak elurrez lepo ageri ziren.

Anayeteko lepoa ere eskuinetara utzi genuen, arestian erran bezala ez baikinen bertatik iganen. Udako bidea bai, handik pasatzen da.

Behin mendiaren azpiko aldean kokatuta, malda tentetu egiten da eta kaskoaren iparraldeko ertzera elurrezko diagonal batetik atera ginen. Zati hau elurra gogor badago esposizio pixka batekoa da, baina gure kasuan guri-guri zegoen.

Ertzaren mendebaldeko aurpegitik metro batzuk gehiago eskiz egin eta azken metroetan eskiak bizkarrera eraman behar izan genituen. Berez mendebaldeko aurpegitik elurrik ez zuten zatian inguratzen ahal ziren, baina azkarragoa zen oinez zuzenean egitea.

Azken metroak ertz gorrixka errazetik...

10:55 : Vertice de Anayet (2559m)

Autotik abiatu eta hiru ordu pasatxoan eguneko lehen gailurrean ginen. Eguraldi bikaina eta inor ez zebilen inguruan, ezin gehiago eskatu!

Ez ginen luze egonen tontorrean. Ekialdeko ertzetik metro batzuk galdu eta iparraldeko aurpegitik beheiti eskiatu genuen. Eguzkiak sobera eman ez zuen maldetan elur ona harrapatu genuen. Zati bat jaitsita gure eskuinetara zeharkaldia egin genuen ondoko helburua zen Arroyeras mendira ahal bezain bertze hurbiltzeko.

2300 metro ingururaino jaitsi ginen. Bertatik parean eta nahiko hurbil genuen Arroyeraseko kaskoa. Berriz ere fokak paratu eta goiti abiatu ginen. Misterio handirik gabe, malda errazetatik gailurraren eskuineko lepora iganen ginen lehendabizi...

11:57 : Collado de Arroyetas (2440m)

Lepotik goiti elurrik ez zegoenez, eskiak utzi eta azken metroak oinez eginen nituen.

12:09 : Arroyeras (2556m)

Belar eta harrizko malda gainditu eta segidan plantatu nintzen gailurrean. Argazki batzuk eta lepora itzuliko nintzen, Lorean han bainuen zain.

Sabocos ingurua, oraindik eskiatzeko aukera anitzekin...

Ekialdean Balaitus eta Frondella mendiak 3000 metrotik goiti... Azpiko aldean Formigal estazioko Anayet aparkalekua ere ageri da.

Peña Telerako mendigunea...

Punta Escarra ikusgarria...

Lepora bueltan zerbait jan eta eguneko hirugarren jaitsiera egin genuen Arroyeraseko iparraldeko maldak bilatuz. Kasu honetan ere elur nahiko ona harrapatu genuen.

12:49 : Ibon de Anayet (2225m)

Berriz lakura bueltan laugarren eta azken igoerarako prestatu ginen.

Anayeteko zirkua gibelean utzi eta Espelunciecharako metro apurrak igateari ekin genion.

Hegoaldeko bizkarrean eskiak motxilan paratu eta gailurrerako azken metroak oinez eginen genituen.

13:29 : Espelunciecha (2399m)

Kasko honetan akitu genituen eguneko igoerak eta Portaleteko aparkalekura jaistea bertzerik ez zitzaigun gelditzen.

Hegoaldeko bizkarretik metro batzuk gibelera egin eta iparraldeko aurpegira sarbidea harrapatu genuen. Bertatik zuzenean jaitsiko ginen eski pistetaraino malda ederretatik.

1900 metro arte elur jarraia harrapatu genuen, baina lausoz lauso kasik beheitiraino eskiatu ahal izan genuen.

14:15 : Formigal - Portalet aparkalekua (1750m)

Normalean denboraldi akabailan ohikoa ez den sektore honetan eskiatuta kontent ailegatu ginen autora. Ea bertzeren bat egiteko aukera dugun!