2022/05/17

Trois Conseillers (3039m)

EGUNA: 2022/05/13-14

ABIAPUNTUA: Vallee de la Glere (1676m)

ZAILTASUNA: S3
.
DENBORAK:
  • Vallee de la Glere - Refuge de la Glere : Ordu eta erdi
  • Refuge de la Glere - Pic des Trois Conseillers : 3 ordu eta erdi
  • Pic des Trois Conseillers - Vallee de la Glere : Ordu eta erdi
NOLA AILEGATU:
Lourdes hiritik Gaveseko bailaran barneratuko gara Luz Saint Sauveur herri ezaguneraino. Hemendik Tourmalet mendateko errepidea hartuko dugu eta Bareges herria pasata, Tournaboupeko aprkalekura iritsi baino pixka bat lehenago, eskuinetara ateratzen den errepidetxo bat hartuko dugu Plateau de Lienz aldera. Lienzera ailegatzean, ostatu baten ondotik abiatzen den pista hartuko dugu. Pista honetatik Glereko bailaran barneratuko gara, 1676 metro inguruan autoa utzi arte.

ARRASTOA:
Powered by Wikiloc


KRONIKA:
Ez ohiko beroa ari du maitz honetan eta honenbertzez eskiari guti gelditzen zaio Pirinioetan. Asteburu honetan nire eski sehaska izan zen Glereko aterpean izan gara, Turon de Neouvielle eta Neouvielle eski klasikoen artean altxapean pasatzen den Trois Conseillers mendia igaten. Mendi bakartia da neguko baldintzak daudelarik, ezin baita gailurreraino eskiz ailegatu. Horrek originaltasuna eta lasaitasuna ematen dio, eta gainera Breche de Neouvielleko lepoaren azpian eguzkia mantso arte hartzen ez duten malda politak ditu.

2022/05/13
17:56 : Vallee de la Glere (1676m)
Oroitzapenak borborka hasten zaizkit Glere bailaran sartzen naizen aldioro. Etortzen zait nire lehen mendi eski eguna izan zen hura, etortzen zait Packeko paradisuan pasatutako asteburua edota Pic Longeko gandorrean iragandako zeharkaldi zirraragarria. Honakoa ere berezia izanen zen. Niretako hain gustuko dudan Neouvielleko sektoreko azken 3000ko gailur nagusia eta Lorearendako lehen 3000 metrotik goitiko gailurra eskiz.


Pixka bat porteatuta 1850 metro inguruan eskiak paratu ahal izan genituen, pistaren bazterrean zegoen elur lauso jarraian. Halere, pixka bat goitixeago berriz kendu beharko genituen zatitxo batean.


2000 metrotik goiti elur kantitatea handitzen zen eta pistatik kanpo maldetatik igan ahal izan ginen.


Pixka bat geroago aterpea bistaratu genuen...


19:18 : Refuge de la Glere (2153m)

Arimarik ez zebilen aterpe inguruan. Egun batzuk lehenago hetsi zuten eta parte librea zegoen irekita.



Hori bai, parte libra hori bikaina da Gleren. Jantoki zabala egurrezko estufa eta guzi, eta goitian bi gela irekita 10 bat lagunendako lekuarekin.


Tenperatura goxoa lagun, kanpoan afaldu genuen eta ilunabar ederrari begira egon ginen. Etxean gaudelarik gozatzen ez ditugun gauzak estimatzen dira horrelakoetan. Ez dago horrelako telebista kanalik!


Arratsaldeko hodeiak uxatu ziren eguneko azken eguzki izpiekin batera eta biharamuneko helburu zen Trois Conseillers ikusi eta aztertu ahal izan genuen.


Protagonismorik handiena Neouvielle handiak du halere. Tente altxatzen da bertze guzien gainetik...


2022/05/14

6:41 : Refuge de la Glere (2153m)

Bortz eta erdietan ernatu ginen eta gauzak prestatuta goiti abiatu. Gau garbiak elurrari pixka bat gogortzen lagundu zion eta goiti igateko baldintzak aski onak ziren.


Turon de Neouvielle aldera doan bidea segitu genuen aterpea utzi eta bizkarez bizkar. Packe aterperako bidea desbideratzen den inguruan, ordea, iparraldera doan bidea utzi eta ezkerretara biratzen hasi ginen Neouvielle mendia erreferentzia gisa hartuta. Bide hau egiten dute Gleretik mendi honetara doazenek eta hortaz arrasto ugari genituen galbiderik gabe segitzeko.


7:31 : Lac det Mail (2332m)

Laku zabal hau eskuinetara utzi genuen. Turonera doan bidea ere argazkiko magal leunetatik pasatzen da.


Metro batzuk galdu eta Espadeko gandorren azpiko zirku hetsian barneratu ginen. Bailaratxo honetatik segituko genuen goiti harresi baten azira ailegatu arte.


Aipatu harresia eskuinetara jota inguratzen da. Gibelean ikusten den lepotik joanen ginateke Neouvielle aldera.


Guk Neouvielleko bidea utzi eta eskuinetara egin genuen, izen bereko arrakala ezagunaren bila.


Puntu horretatik Trois Conseillerseko gailurrak nahiko hurbil ikusten ziren. Gu ezkerreko ertzetik altuena den ezkerreko gailurrera iganen ginen.


Maniporteteko lakuak kokatuak dauden lautadatxo zabal hau zeharkatu beharko genuen leporako azen maldari ekin aitzinetik. Garai batean inguru honetan jadanik desagertata dagoen Maniporteteko glaziarra zegoen.


Leporako azken malda pixka bat tentetzen da, baina elurra ez zegoen sobera gogorra eta kutxilak paratu gabe gainditu ahal izan genuen. Ezkerrean ikusten den lepoa genuen helburu.


Azken metroak lepora ailegatzeko...



9:16 : Breche de Neouvielle (2926m)
Neouvielle mendira igaten den Trois Conseillers ertz ezaguna bertatik hasten delako da ezagun lepotxo hau. Leku ikusgarria da neguan eta inor ere ez zebilen inguruan. Trois Conseillersera ez da jende aunitz hurbiltzen eskiekin eta zorionez bakarrik izanen ginen egun horretan.


Zorionez eta zoritxarrez... izan ere, ertzeko elur guri eta ustelduan arrasto sakna ireki behar izan genuen gailurrerako bidean.


Ertza nahiko zabala da punturen bat kenduta. Elur gogorra harrapatuz gero esposizio pixka bat izan dezake zatiren batean, baina oro har erraza da.


10:00 : Pic des Trois Conseillers (3039m)

Hiru ordu eta erdi inguru pasatu genituen gailurrera ailegatzeko. Esfortzuak bere saria izan zuen eta 3000ko polit hau guretako genuen oso-osorik... 

Niretako gailur berezia zen, honekin Neouvielleko sektoreko 3000ko nagusi guziak igan bainituen. Gainera, tontor honetatik sektore guziak ikusteko aukera dago.

Tartean, Neouvielle (2010ean, 2014an eta 2017an igana) eta Ramougn (2021ean)...


Estaragne (2013an),  Campbieil (2017an), Maou, Badet, Long eta Estibere Male (2020an) eta Bugarret eta Crabounouse (2017an).


Pic Long ikusgarriaren gibelean Gavarnieko mendiak ere ageriz ziren...


Eta nola ez Turon de Neouvielle, eskiz igan nuen lehen mendia izan zen 2010ean. Mendi berezia niretako... Gerora 2017an ere izan nintzen bertan.


Glereko aterpea tokitan ikusten zen...


Egonaldi luzea egin genuen goian, tenperatura eta ingurua lagun. Ondotik ertz elurtutik eskietara itzuli eta jaitsierari ekinen genion.



Jaitsieran goitiko partean elur ona harrapatu genuen, baina metroak jaitsi ahala, gero eta pisuago zegoen. Goiz abiatu ginen, bai, baina gailurreko egonaldia luzeegia izan zen eta beranduegi hasi ginen jaisten.


Jaitsiera zuzenean iparraldera eginen genuen, berriz Lac det Mail lakutik pasatu gabe. Horrela, Maniportet, Verts, Mourele eta Mounicoteko lakuak inguratu genituen. Laku aunitz jaitsiera ona izateko? Bada, nahiko ona da egia erran eta elur onarekin makilak ez lirateke kasik erabili ere egin beharko bulkatzeko.



12:08 : Lac de la Glere (2103m)

Glereko lakuan akitu genuen jaitsiera. Hortil metro batzuk igan beharko genituen aterpera itzultzeko, bertan utziak baikenituen zenbait gauza.


Lakua iparraldeko aldetik inguratu genuen...


12:33 : Refuge de la Glere (2153m)

..eta beti gogorra egiten den maldatxo motzetik berriz ere aterpean ginen.


 
14:08 : Vallee de la Glere (1676m)
Aterpetik gauzak bildu, kanpoko terrazan bazkaldu eta autorainoko bidea egin genuen. Denboraldiko azkena ote? Ikusiko dugu...


2022/05/10

Peña Roya (2578m), Mandilar (2211m)

EGUNA: 2022/05/07

ABIAPUNTUA: Petrosos - Panticosako eski estazioa (1922m)

ZAILTASUNA: S2 igoerako bidetik jaitsita, guk eskiatutako kanaletik S4

DENBORAK:

  • Igoera: 2 ordu
  • Jaitsiera (Mandilarretik pasatuta): Ordu eta erdi

NOLA AILEGATU:

Iruñeatik Jakara joan eta hemendik Sabiñanigorako bidea segituko dugu. Sabiñanigotik Biescasera eta Tenako bailaran barneratuko gara. Portaleteko mendatean goiti igotzen den errepideari segituko diogu eskuinetara Hoz de Jaca herrira doan errepidetxoa hartu arte. Herri honetatik goiti Panticosako eski pistetara igotzen den pista hartuko dugu. Luzea da eta zati batzuetan ez da arras egoera onean, baina ibilgailu normalarekin igaten ahal da. 

ARRASTOA:

Powered by Wikiloc


KRONIKA:

Maiatzean sartuta mendi eskiko aukerak murriztu egiten dira eta Neouvielle, Maladeta eta Gavarnie inguruetara jotzen dugu denboraldia luzatu nahi dugunok. Hauez gain bada bertze mendizerra bat elurra luzaroan gordetzen duena eta bidetik aktu igateko aukera ematen duena: Tendeñerako mendizerra. Iaz Sabocos ezagunean eskitu ondotik, mendebalderago dauden malda zabalek atentzioa eman zidaten. Malda horien goitiko aldean dago Peña Roya, eskiz igateko bertze mendi apropos bat. Ahizpa nagusia baino errazagoa da teknikoki eta inguru eder honetaz gozatzeko aukera eskaintzen du.


8:16 : Petrosos - Panticosako eski estazioa (1922m)
Gau haizetsuaren ondotik, eguna nahiko lasai ernatu zen. Pirinioen ipar isurialdean hodei orografikoak zeuden bitartean, Tendeñerako mendizerra nahiko eguzkitsu genuen. Maiz gertatzen da hori ipar haizea dagoelarik...



Autotik abiatu eta metro gutira eskien gainean ginen neguko denboraldia makinekin zapaltzen diren pistei esker.


Goiti egin ahala, Sabocosen ekialdean Riperako zirkuko gailur ikusgarriak ere ikusten hasi ginen. Bertara Panticosa herritik abiatzen den pista batetik igaten ahal da.


Gure eguneko helburua ere fite ikusi ahal izan genuen parez pare, azpiko aldeko malda aski elurtuak zituela...


8:51 : Ibon de los Asnos (2055m)
Lakuaren bazterrean desagertzen dira eski pistak. Itzuleran eskuineko aldean ikusten den Mandilarreko kaskotxotik pasatuko ginen jaitsiera zuzenagoa egiteko.



Tarte batez Sabocos mendiko igoera segitu behar da...


Lehen malda tente baina motz bat gainditu genuen pistatik goiti...



...segidan Sabocoseko bidea utzi eta eskuinetara biratzeko, hego-mendebaldeko norabidean.


Malda eztietatik eginen genuen hemendik aitzinerakoa, Peña Roya eta jaitsiko genituen malda eta kanala parean genituela.


Ezkerretara Sabocosera igaten den mendebaldeko magala genuen. Joan den urtean ibili ginen inguru hartan eta egun honetan ere jende gehiena harat zihoan. Gu, berriz, kasik bakarrik...


Harresi horizontalez hetsitako zirkutxo honetako elur malda politak... Geologiaren magia!


Harkaitzezko harresiaren izkinaraino ailegatu behar da, urrunetik ikusten ez den kanal erraz bat bistaratu arte.


Kanalean ahalik eta gehien igan ginen eskiak zangoetan genituela. Kaskoa baino 60 metro beheitiago edo...


...azken zatian aunitz estutzen da ordea eta eskiak bizkarrean genituela atera ginen kanaletik.


Inguru ikusgarria!


10:22 : Peña Roya (2578m)
Metro eskas batzuk eta tontorrean ginen, bakar-bakarrik... Ez ginen sobera egonen goitian. Haize fina ibilki zen eta goitirakoan fitxatu genuen maldatik jaisten hasiko ginen nahiko fite.


Tenako bailara berde jadanik maiatzean, baina gailurretako elurrak ez du joan nahi.


Vignemale handia. Oroitzapen andana... Azkenak iaz buelta osoa eman genion harenak...


Kasik gailurretik hasi ginen eskiatzen, mendiaren ekialdeko malda tentetik. Ordu horretarako elurrak ederki goxatuak zituen bertako elurrak eta esposizioa eta malda dezentea izanda ere, ziurtasunez jaitsi genuen. Gero handik argazkian erdi altxatua ikusten den kanal horretara jaitsi ginen, bertatik igoerako bidera ailegatzeko.


11:45 : Ibon de los Asnos (2055m)
Berez lakura itzulita eski pistetatik autoraino segitzen ahal genuen, baina igoeran Mandilar mendiaren iparreko aldean jaitsiera polit bat fitxatu eta bertatik joatea erabaki genuen. Fokak berriz paratu eta eski pistetatik igan ginen Mandilarrera.


Gibelean igan berria genuen Peña Roya eta Peña Blanca.


12:05 : Mandilar / Punta Narronal (2211m)
Minutu gutian ginen kaskoan. Elurra izanez gero, merezi du igoeratxo hori egitea, gero jaitsiera arras ona baita. Iparraldeko magal leuna zain genuen.


12:25 : Petrosos - Panticosako eski estazioa (1922m)
Autotik 100 metroko distantziaraino ailegatu ginen eskiak zangoetan genituela. Luxu bat maiatzerako... Ea bertze ateraldiren bat edo bertze egiten ahal dugun, elurra bada eta.


BIDEOA: