Madamete (2657m)

EGUNA: 2022/03/12

ABIAPUNTUA: Tournaboup aparkalekua (1450m)

ZAILTASUNA: S2

DENBORAK: 

• Igoera: Hiru ordu eta erdi
• Jaitsiera: Ordu bat

NOLA AILEGATU: 

Baionatik autopistaz joanen gara Tarbesen atera arte eta hemendik Lourdesera joko dugu. Lourdes hiritik hegoaldera joanda, Argeles eta Luz Saint Sauveur herrietara iritsiko gara, hurrenez hurren. Azken herri honetan Tourmalet mendate mitikorako bidea hartu behar da eta Tournaboupeko aparkalekura igo.

ARRASTOA:

Powered by Wikiloc

KRONIKA:

 

Sektore honetako bertze hainbat mendi bezala, Madameteko zirkularra eskiz egiteko bide klasiko bat da. Luzea da eta jaitsiera tente eta jarrairik gabea, baina inguruaren edertasunak eskiatzaile aunitz erakartzen ditu. Hamar urte geroago, bigarren aldiz izan dut aukera bide hau egiteko, honakoan arrats horretan berean botatako 20-30 zentimetroko elur geruzarekin.

9:16 : Tournaboup (1450m)

Autoa oraindik nahiko hutsik zegoen aparkaleku zabalean utzi eta elur maluta batzuk eskapatzen zitzaizkion zeru ilunpean abiatu ginen hegoaldeko norantza hartuta.

Pistetatik metro batzuk eginda, hauek utzi eta Coubouseko bailaratxoan barneratu ginen. Parean genuen Coubouseko pareta izenez ezagutzen den malda. Hortik jaitsiko ginen bueltan.

Mantso-mantso atertu eta mendi inguruetako lainoak saretzen hasi ziren. Eski egun zoragarria genuen aitzinetik.

9:58 : Pountou (1740m)

Zubia zeharkatu eta ezker biratuko ginen. Puntu honetan hetsiko genuen zirkulua ordu batzuk beranduago.

Coubousekoa utzi eta Aygues Cluseseko bailaran goiti segitu genuen. Eguna oraindik gris egonda ere, lekua zoragarria da eta gaueko elurrak Gabonetako postalak marratzen zituen inguru guzian.

Dena ez zen arrosa kolorekoa ordea. Hezetasuna zela eta, kasik ibilbidearen hasmentatik elurra foka-larruetan kolatzen hasi zitzaigun. Momentu aunitzetan zentimetro batzuetako geruza ere bagenuen eskien azpian eta horrek aunitz moteldu zuen gure erritmoa.

Bailaran goiti poliki igotzen da bidea, metroak mantso-mantso irabazten dira. Fokeatzeko leku perfektua da egia erran...

Goiti egin ahala, lainoa desagertu eta ostarte zabalak irekitzen hasi ziren zeruan.

GR10a ere inguru honetatik pasatzen da.

Bailararen zatirik estuena zeharkatuta, bat-batean paisaia aunitz zabaltzen da. Puntu honetan ekialdeko norabidea utzi eta berriz ere hegoalderantz biratuko ginen.

Crete de la Pegue ezaguna gibelean utziko genuen. Mendigune honen iparraldeko isurialdea ere eski klasiko bat da, bat gehiago Baregeseko sektore oparoan.

Gure ezkerretara Aygues Cluseseko aterpe berria utzi genuen. Leku liluragarrian iltzatuta, aurten irekiko omen ditu bere ateak.

Fokak pixka bat idortzeko intentzioz, geldialdi bat egin genuen inguru honetan. Zerbait jan, drone irudi batzuk grabatu... gozatzeko eguna genuen.

Geldialdiaren ondotik berriz ere goiti segitu genuen, Madameteko lakuen aldera.

Gibelean Aygues Cluseseko zirku zabala, eskiatzeko aukera aunitz eskaintzen dituena.

Leku ezaguna bada ere, bi talde bertzerik ez ginen igan hemendik goiti. Gure aitzineko bat eta gu. Haiek ireki zuten arrastoa 30 zentimetroko lodiera ere hartzen zuen elur geruzan.

Iparraldetik hodei batzuk sartu ziren momenturen batean, baina gero berriz ere garbituko zuen.

Madameteko lakuetako lautadatxotik, izen bereko gailurra ikusten hasi ginen. Laino artean erdi altxatuta zegoen momentu horretan.

Allemand eta Contade mendiak gure gibelean... Horien gibelean daude Grand Tourmaleteko eski pistak.

Erran bezala, igoera luzea da eta poliki irabazten da altuera momentu oro. Egun horretan 3ko elur-jausi arriskua genuen eta ingurua nahiko segurua da horrelakoetarako.

Aygues Cluseseko bailaratik jaitsiera eginen genuen Coubousekora pasatzeko zeharkatu beharko genuen lepoa hurbil genuen jadanik. Azken malda bat bertzerik ez zitzaigun falta. Lepo horretatik gailurrera 90 bat metro bertzerik ez daude.

Azken maldan lainoek zeruan jostatzen segitzen zuten bitartean...

Zatirik tenteena puntu honetatik leporainokoa da...

Azken metroak lepora ailegatzeko...

Izenik gabeko lepo honetatik ezkerretara biratu eta minutu gutian igaten da kaskora. Zati horretan normalean ez da elur aunitzik izaten eta oinez egin behar izaten da.

Gailurrerako bidean jadanik eskiak utzita...

13:42 : Madamete (2657m)

Azken metroetan guri tokatu zitzaigun elur sakon eta freskoan arrastoa irekitzea. Horrek badu bere saria ordea: han goitian bakarrik egotea.

Neouvielle eta Campbieil inguruak gainetik...

Gailurreko argazkia eta beheiti, bertzeak lepoan baikenituen zain.

Balaitous urrunean...

 

Lepotik beheiti hasi zen eski saioa. Elur berriak hezetasun pixka bat bazuen, baina aski goxo zegoen jaisteko. Gainera goitiko zatian ez zen inor pasatu gure aitzinetik eta malda zabalak guretako izan genituen oso-osorik. 

Tracens eta Blanc lakuak inguratuta, Coubouseko ailegatu ginen. Hainbertze lakurekinez da jaitsiera jarraia eta zelaitxo batzuk baditu.

15:11 : Pountou (1740m)

Goitiago ez bezala, Coubouseko malda arrastoz beteta zegoen, bertan elkartzen baitira Lurtet, Crampettes eta Touateretik jaisten diren bide guziak. Maldaren azpian ura hartu eta atsedenalditxoa egin genuen autora itzuli aitzinetik.

15:52 : Tournaboup (1450m)

Goitirakoan pixka bat sufritu ondotik, aho zapore onarekin utzi gintuen jaitsierak. Bide ederra, elur egin berriarekin postaletakoa iduri duena.

BIDEOA:

Madamete (2657m)

EGUNA: 2012/03/25

IRTEERA: Tournaboup aparkalekua (Bareges)

ZAILTASUNA: Nahiko errexa (PD). Nahiz eta elurrarekin izan, inolako zailtsunik ez duen ibilaldia da.

EGURALDIA: Eguzkitsua.

DENBORAK: 3 ordu eta 15 minutu (Igoera) / 1 ordu eta 30 minutu (Jaitsiera)

NOLA IRITSI: Lourdes hiritik hegoaldera joanda, Argeles eta Luz Saint Sauveur herrietara iritsiko gara hurrenez hurren. Azken herri honetan Tourmalet mendate mitikorako bidea hartu behar da eta Tournaboupeko aparkalekura igo.

SARRERA:

Baregeseko eski estaziotik Neouvielleko erreserba naturalerako sarrera den Madameteko  mendia toki aparta da mendi eskia praktikatzeko. Harantxo etzanak eta mendietako malda elurtuak klasiko batean bihurtu dute zonalde hau, nahiz eta ez bertze batzuk bezain ezaguna izan.

DESKRIBAPENA:

Azken elurteak aprobetxatzeko plan bila hasi ginen eta bertze behin Luz Saint Sauveur ingurura abiatu ginen. Izan ere, Aragoi eta Nafarroako Pirinioak elurrez eskas xamar dabiltza negu honetan eta Benasque ingurua urrun gelditzen zitzaigun. Honela autoa hartu eta larunbat arratsaldean Bareges eski estazioko Tournaboup aparkalekura igo ginen. Afaldu bitartean, biharamuneko ateraldia prestatu genuen mapa aintzinean genuela. Hego magalak dituzten mendien artean Barbe edota Midi de Bigorre ziren hautagaiak, baina azken egunetako tenperaturek justu utzi zituzten bertako malda, beraz hasieratik lehenengo aukera zen Madamete ingurura joanen ginen. Gorantz joan ahala erabakiko genuen zein mendi igo, nahiz eta ideia Madametera igotzea zen.

Ibilbidearen krokisa.

0h 00min: Tournaboupeko aparkalekua (1451m)
Goizeko zortzietan ernatu ginen, gosaldu, prestaketak egin eta bederatziak lauden gutxitan atera ginen aparkalekutik hegoalderuntz eski pistetan barrena.

Pista gibelean utzi eta Tourmalet mendatera igotzen den errepidea zeharkatuta, bailaratxoan gora egin genuen. Goiza ez zen oso hotza eta egun bikaina zetorren.

Igotzen ari ginen pista bailaran gora.

Azken egunetako tenperaturek elur mailari kalte nabaria egin diote eta harri asko zegoen bistan nahiz eta ipar magalak izan. Hemendik aurrera kota altuagoetara joan beharko da eskiatzera.

Hau bai dela freeride!!

0h 46min: Pountou (1741m)
Honela pare bat aldiz eskiak kenduta harriguneak zeharkatzeko eta bertzeren batean harri gainetik pasata zabalunetxo batera iritsi ginen. Hegoaldean edo aurrean Lac dets Coubousera igotzen den malda tentea genuen. Hortik jaitsiko ginen beherakoan. Igoerarako berriz, ezkerretara edo ekialdera irekitzen den Aigües-Cluseseko bailaratxoa hartu genuen. Horrela ibilbide zirkular ederra lotuko genuen.

Aygües-Cluseseko bailara ederra da benetan eta argazki pila atera genuen zati honetan.

Harri tartean bidexka bilatzen..

Bidea nahiko etzana une oro, altuera oso poliki irabazten genuen.

Eguzkiak poliki-poliki gure bidean gurutzatu zen eta tenperaturak nabarmen egin zuen gora, elurra hala ere baldintza onetan zegoen igotzeko.

Bailara ixten joaten da aurrera egin ahala.

Urtegitxo baten ondotik pasatuz...

...eta bapatean pinu artetik aterata paradisu eder honetara atera ginen.

Txomin bailararen zati estuenetik ateratzen.

Zabalunera aterata eskuinalderantz biratu eta hego norabidea hartu genuen, igoko ginen mendiaren erreferentziaren bila.

Bide zoragarria igotzen joateko.

Pic d'Estibere mendiaren punta agertzen hasi zen urrunean.

Inguruaz disfrutatuz...

Ekialdean Aygües-Cluseseko lepoa eta mendia, jaitsiera ederra zuten horiek ere.

Atzean berriz Cabane de la Pegue deitzen den etxolatxoa eta lautada. Udako bidea bertatik pasatzen da (GR10).

Guk baina, erran bezala, bidea laburtu eta zuzenago bat hartu genuen.

2h 23min: Lacs de Madamete (2299m)
Horrela lakuetako zabalune batera iritsi ginen eta Madameteko gailurra lehendabizikoz ikusi genuen. Gure zorionerako elurra zegoen goraino.

Zerbait jateko geldialdi motza egin ondotik gure helburuaren bila abiatu ginen lakuen gainetik.

Aygües-Cluses eta Quatre Termes mendiak atzean uzten. Horien bertze aldean La Mongieko eski estazioa dago.

Gailurraren aurreko lepotxora hurbiltzean malda pixka bat tentetzen da.

Azken metroak lepora ailegatzeko zig-zagean egin genituen.

Eta behin lepora ailegatuta azken maldari ekin genion. Bertan oraindik elur hautsa aurkitu genuen.

Azken maldatik lepora begirada...

Bapatean honako ezagun zahar hau agertu zen gure begien aintzinean: Neouvielle. Gailurrean geunden jadanik, Neouvielleko erreserbaren edertasuna aurrean genuela.

3h 15min: Pic de la Madamete (2657m)
Gailurreko panorama izugarria! Eguraldiak ere laguntzen zuen eta oso ongi egoten zen bertan. Jateko eta edateko tarte lasaia hartu genuen eta baita argazki batzuk ateratzeko ere.

Igotako bidea eta jaitsiko genuena. Pareko ertzaren eskuinetik igo ginen eta ezkerretik jaitsiko ginen. Denaren gainetik, iparraldean Midi de bigorre mendia ageri zen.

Baiona eta Azkainekoak ziren bi mendizalek atera ziguten gailurreko argazkia!!! Gora gu ta gutarrak!

Cambieileko malda tenteak zuri-zuri (Arkaitz hau zuretako!).

Eta Balaitous urrunean beti bezala ikusgarri!

Gailurrean bizitzera gelditzeko goga ematen bazen ere, jaisten hasi beharra zegoen elur ona aprobetxatuko bagenuen. Horrela ba, ordu erdi edo egon ondoren beherakoari ekin genion. Elurra era guztietakoa zegoen: lehen malda hautsa, gero udaberriko elurra, gogorxeagoa... orientazioaren arabera, baina ona zegoen oro har!

Atzera begirada gailurrerantz!

Eta beheeeera!

Lac de Tracens eta Lac Dets Coubous lakuetatik pasako ginen.

Lac de Tracensera jaisten...

4h 30min: Lac dets Coubous (2041m)
Lac de Tracenseko lautada atzean utzita malda gutxiko zatitik eta elur nahiko pisuan behera azken lakura iritsi ginen. Hau zeharkatuta 300 metroko desnibeleko malda tentea genuen Pountouraino (goizean ezker hartutako bidegurutzeraino) iristeko.

Lac dets Coubouseko ikuspegia Touatere, Tracens Madamete eta Coubous mendiekin.

5h 00min: Tournaboup aparkalekua (1451m)
Berriz pistetara bueltan erreka bat zeharkatuta kotxeraino itzuli ginen. Argazkian Lac dets Coubousetik jaitsitako malda ageri da.

Honela bukatu genuen egun bikain hau zonalde politean! Bertze bat arte!