2020/01/12

Escalabor (2054m), Pene de Bassots (2012m)

EGUNA: 2020/01/11

ABIAPUNTUA: Bederet - Luz Ardiden (1680m)

ZAILTASUNA: S2

NOLA AILEGATU:
Lourdes hiritik hegoaldera joanda, Argeles eta Luz-Saint-Sauveur herrietara ailegatuko gara hurrenez hurren. Azken herri honetan Luz-Ardiden eski estaziora igotzen den errepidea hartu behar da eta estazioko aparkaleku nagusira ailegatu baino pixka bat lehenago eskuinetara Bedereteko sektorera igotzen den bidea hartuko dugu.

ARRASTOA:
Powered by Wikiloc


KRONIKA:
Aspaldiko partez elur pixka bat egin eta Baionako manifestazioan arratsaldean hitzordua izan arren, eskapadatxo labur bat egin nahi izan dugu elur-hautsaren zaporea nolakoa den oroitzeko. Elur baldintzak ikusita ongi hautatzea ez zen erraza. Alde batetik, egindako elurra gutxi izanda, lehendik elurtuta zeuden magalak bilatu behar, 1800 metrotik goiti beraz. Bertzetik, elur gehien Pirinioen ipar partean egin duenez, ahalik eta iparralderen joan nahi genuen. Gourette, Grand Tourmalet eta Luz Ardideneko eski estazioetan jarri genuen begia, inguru haietako mendiak bisitatzeko. Azkenean, ateraldia laburra izan behar zenez, Luzek irabazi zuen eta estazioaren iparraldeko mendietako sektorea ezagutu ahal izan genuen.

7:52 : Bederet (1680m)
Goizeko seietarako jarri genuen iratzargailua Luz-Saint Sauveurren utzi ziguten etxean. Arratsaldeko 15:00etan Baionan egon beharrak, goizean goiz mugitzera behartzen gintuen eta gainera, elur maldak zapaltzen lehenak izan nahi genuen. Hala, aparkaleku hutsean autoa utzi eta erdi ilunetan abiatu ginen Conqueseko etxolara eta Riouko lepora igotzen den pistatik.


Gure oinetan Luz-Saint-Sauveur inguruak oraindik iratzartzear...


Pistak altuera gutxi irabazten du Conqueseko etxola kokatua dagoen ingururaino, hortaz igotzeko aproposa izan arren, hobe da guk egin genuen lekutik jaistea. Etxola ingurutik hasmentako helburu ziren Arribans eta Pene Nere mendietan ia elurrik ez zegoela ikusita, planez aldatu eta Escalabor mendiaren ipar ekialdeko maldak hautatu genituen.


Pista utzi eta elur freskozko maldetan goiti igotzen ari ginela eguzkiak egun onak eman zizkigun.


Pereza ematen du goiz altxatzeak, baina inguru hauetan inor gabe ibiltzeak ematen duen plazerrak laster atzenduarazi zigun hori.


Gailurrera hurbiltzen...


Gandorrera aterata, mendebaldean Cauteretseko bailara eta Moun Ne handia agertu zitzaizkigun. Metro gutxi batzuk bertzerik ez ziren falta gailurrera ailegatzeko.


9:27 : Escalabor (2054m)
Autotik atera eta ordu eta erdi eskasean kaskoan ginen lehen aldiz. Bertatik ikuspegi aparta genuen Picos del Infierno, Balaitus edo duela gutxi igotako Gran Facha mendietara.


Eta nola ez Moun Nera. Pirinioetako malda ederrenetakoa bere hego-ekialdeko maldatzar hori da. Zoragarria! Ea noizbait bertara hurbiltzen garen eskiz...


Gauzak prestatu eta Escalabor mendiaren ipar-ekialdeko maldetan lehen jaitsiera bat egin genuen. Elurra primerakoa!


Berriz foka-larruak jarri eta goiti, Pene Nere mendiaren oinean...


Magal osoa guretako zen. Igoera eta jaitsierako arrasto bakarrak gureak...


Berriz gailurrera ailegatzen...


Escalaborren 2054 metrora dagoen kota utzi eta sasigailurrera segitu genuen bigarren jaitsiera bertatik egiteko.


10:29 : Escalabor (2048m)
Bigarren jaitsierarako prestatzen...


Bigarrena ere ederra izan zen. Elur gogorraren gainean zegoen 10 bat zentimetroko elur hauts geruza plazer hutsa zen eskiatzeko.


Azken igoera Pene de Bassots deitzen den tontorrera eginen genuen bertatik eski estaziora itzultzeko.


Pena ematen zigun jaitsiera gehiagp ez egiteak baina ez zegoen gehiagorako astirik. Irudian, ezkerretara Pene de Bassots eta eskuinetara Escalabor eta gure jaitsierako arrastoak.


Pene de Bassots metro batzuetara...


11:27 : Pene de Bassots (2012m)
Eguneko hirugarren igoera eta bigarren gailurra. Bertatik eginen genuen azken jaitsiera, hego magaletik eski pistetara sartuz eta handik autora.


Neouvielle eta Pic Long inguruak, eta beheitian Luz.


Troumouseko zirkua ere parez pare ikusten genuen, Munia eta gainerako 3000koekin.


11:50 : Bederet (1680m)
Azken jaitsiera autora eta presaka Baionara, euskal presoen eskubideak aldarrikatzera.

BIDEOA:

2020/01/08

Bony de la Redona (2628m)

EGUNA: 2020/01/06

ABIAPUNTUA: Boi-Taull eski estazioa (2040m)

ZAILTASUNA: S3

DENBORAK:
  • Igoera: Bi ordu
  • Jaitsiera: Ordu erdi
NOLA AILEGATU:
Euskal Herriko iparraldetik joanez gero, errazena A64 autopistatik joatea da. Bertatik Lleida/Bagneres de Luchon irteeraraino segitu eta irteera hau hartuta Lleidako norabideari jarraituko diogu une oro. Val d'Aranera ailegatuko gara horrela. Hemen Vielha zeharkatu eta tunela pasata N230 errepidetik segituko dugu gure ezkerretara Vall de Boi bailarara sartzen den errepidea hartu arte. Hemendik igoko gara, Barruera herria zeharkatu eta eskuinetara Boi-Taull eski estaziora igotzen den errepidea hartzeko.

ARRASTOA:
Powered by Wikiloc


KRONIKA:
Gure oporraldiko azken saiorako, Val d'Aran utzi eta ordubete eskasean Vall de Boin kokatu ginen. Hasmentako intentzioa Cavallerseko urtegitik goiti Monges mendiko hego magaletan eskiatzea zen, baina abiapuntura igo eta elurra arras goiti zegoela ikusita planez aldatu behar izan genuen. Cavallerseko aparkaleku inguruan bi iruindarrek Boi-Taull inguruan aukerak bazeudela aipatu eta bertara zuzendu ginen bi aldiz pentsatu gabe. 

11:07 : Estacio d'esqui de Boi-Taull (2140m)
Mantso hasi ginen ibiltzen. Uste dut inoiz ez naizela hain mantso hasi, baina mendiaren hego-mendebaldeko maldek astia beharko zuten transformatzeko eta beraz denbora sobera genuen.


Eski estaziotik iparraldera ateratzen den itxitako pista batetik egin genuen igoeraren zati handi bat. Vista Aran Collbirros da pistaren izena eta aparkalekuaren ezkerrean gelditzen dena da.


Collbirroseko amildegian barneratu eta itzaletatik aterata Bony de la Redona mendiaren magal eguzkitsuetan goiti segitu genuen, jadanik pistatik kanpo.


Hego-mendebaldeko malda zabaletatik igotzen ginen bitartean gibelean Vall de Boi guzia genuen ikusgai.


Azken metroak bizkarretik...


13:26 : Bony de la Redona (2628m)
Gailurrean, egote ederra izaki, egonaldi luzea egin genuen, zerbait jan eta elurrari transformatzeko astia emanez.


Iparraldera Contraix eta Colomers inguruak...


Mendebalderago Besiberri mendigunea, deskubritzeko falta zaidan azken 3000ko multzoa.


Eta Aneto erregea ere oraindik agendan dago...


Argazkiaren ezkerrean bertze zonalde ezezagun bat: Cotiellako mendigunea. Urrunean Monte Perdido, Cilindro eta abarrak ere ageri ziren.


Egonaldi luzearen ondotik hego-mendebaldera jaitsiera zuzena egin genuen irudian ikusten den maldatik. Di-da jaitsi genituen 600 metroak...


14:34 : Estacio d'esqui de Boi-Taull (2140m)
Mendi borobil honetan akitu genuen urteko lehen astean egindako mendi-eski egonaldia, inguru berriak ezagutuz eta mendi politak eskiatuz.


BIDEOA:

2020/01/07

Cap del Muntanyo d'Arreu (2627m)

EGUNA: 2020/01/05

ABIAPUNTUA: Port dera Bonaigua (2003m)

ZAILTASUNA: S3

DENBORAK:
  • Igoera: 2 ordu
  • Jaitsiera: Ordubete
NOLA AILEGATU:
Euskal Herriko iparraldetik joanez gero, errazena A64 autopistatik joatea da. Bertatik Lleida/Bagneres de Luchon irteeraraino segitu eta irteera hau hartuta Lleidako norabideari jarraituko diogu une oro. Val d'Aranera ailegatuko gara horrela. Hemen Vielha zeharkatu eta Bonaiguako lepora igotzen den errepidea hartuko dugu. Lepoa pasatu eta beheiti abiatuta, eski estazioko azken aparkalekura ailegatu baino lehen gure eskuinetara bide bazterrean dagoen aparkalekutxo batean utziko dugu autoa.

ARRASTOA:
Powered by Wikiloc


KRONIKA:
Bigarren eguna Vielhan egindako egonaldiaren barne eta aldi honetan Baqueira-Beret estazio erraldoiaren ekialdeko ertzera jo dugu. Hego aurpegi bila, udaberriko elurraz gozatzeko malda ederrak eskaintzen ditu mendi honek eta Beret inguruko mendietan ez bezala, lasaitasuna ziurtatua dago.

10:01 : Port dera Bonaigua (2003m)
Bonaiguatik ekialdera jaisten den errepidean kilometro inguru jaitsi eta bide bazterrean autoa utzita goiti abiatu ginen.


Ibilbidearen lehen zatia maldatsua da eta goizeko ordu horietan oraindik elur gogorrarekin zegoen. Gauzak honela, metro gutxiren buruan eskiak motxilan jarri eta kranpoi eta pioletaren laguntzaz egin genuen goiti.


Lehen zatia gaindituta, maldak aunitz etzaten dira eta pinu, sakongune eta bailaratxo arteko zati polit eta errazean barneratu ginen.


Boscas lakutxoa goititik inguratu genuen zeharkaldi bat eginez. Aitzineko egunetako eski arrastoak nabariak izan arren, guk egunean ez genuen inor ere ikusi.


Poliki-poliki goiti eremu errazetatik...


...eta aitzinean gure eguneko helburua ikusten hasi ginen. Urrunen ikusten den mendia da, bere malda zuriarekin.


Altuera gutxi irabaziz segituko genuen magaleraino eta behin azpian kokatuta zuzenean igoko ginen goiti.


Gibelean utzi genuen inguruko mendi klasiko bat: Tuc de la Cigalera. Zonalde ederra da benetan...


Hala, mendiaren azpian kokatuta, hegoaldeko malda tenteagoetatik goiti segitu genuen.


Azken zatian elur gutxi zegoenez, eskiak motxilara eta oinez segitu genuen.


Gailurraren hego lepora atera ginen, handik ertz erraza segituz goiti ailegatzeko.


12:51 : Cap del Muntanyo d'Arreu (2627m)
Tontorrean egote ederra zegoen, haizerik ez, jenderik ere ez... Luze egon ginen...


Mont-Roig, Certascan eta Pica d'Estats inguruak gailurretik...


Ondoan, Lança ikusgarria. Gailurrean jendea zegoen. Hortik hegoaldera ere jaitsiera ona dago, baina bertara ailegatzeko eski pistetatik pasatu behar da.


Hegoaldera gure jaitsiera. Nork erran du ez dagoela elurrik?


Aneto-Maladeta mendigunea...


... Baciver eta Marimanhako hego aurpegiak. Lehena mendi-eski klasiko bat zen, baina bere gailurreraino teleaulki bat igotzen da orain eta xarma guzia galdu du. Ez naiz eski estazioen aurkako kanpaina bat egiten hasiko, baina norbaitek jarri beharko lizkioke mugak haien gose mugagabeari.


Gailurreko egonaldi luzearen ondotik, udaberriko elur goxoaz gozatu ahal izan genuen beheitirakoan.


14:36 : Port dera Bonaigua (2003m)
Aho zapore goxoarekin akitu genuen bigarren eski ateraldia, leku ederra deskubrituz eta elur onean eskiatuz.


BIDEOA: