Orriak

Auñamendi (2504m) etiketadun mezuak erakusten. Erakutsi mezu guztiak
Auñamendi (2504m) etiketadun mezuak erakusten. Erakutsi mezu guztiak

2026/03/31

Auñamendi (2504m)

EGUNA: 2026/03/21

ABIAPUNTUA: Refuge de l'Aberouat (1450m)

ZAILTASUNA: S3, S4 azken zatian

DENBORAK:
  • Igoera: 3 ordu eta erdi
  • Jaitsiera: 2 ordu
NOLA AILEGATU:
L'Aberouateko aparkalekua Lescun herritik gora dago. Lescunera ailegatzeko, gure kasuan, Nafarroa Beherea eta Zuberoako probintziak zeharkatzea da lasterrena. Donibane Garazi, Lartzabale, Maule eta Atharratze herriak pasata, Montori herrian utziko ditugu Euskal Herriko lurrak. Lanne-en-Baretous herrira ailegatuko gara hurrena eta herri hau pasata eskuinetara Arette herrira doan bidegurutzea ikusiko dugu. Bertara joanen gara. Arettetetik Issor herrian barrena, Aspeko bailarara ailegatuko gara. Behin hemen, Zaragozako norabidea hartuko dugu eta kilometro batzuz bailara sartu ondotik, eskuinetara Lescun herrira doan desbideratzea aurkituko dugu. Puntu honetara Pirinioen hegoaldetik ere irits daiteke, Jaka eta Somporteko tunelean barrena. Lescun herrira ailegatzean, aparkalekura eramanen gaituzten seinaleei segituko diegu.
 
ARRASTOA:
Powered by Wikiloc
 
KRONIKA:
Bigarren eski ateraldia Lescungo zirku zoragarrian. Bezperan Hiru Erregeen Mahaian ibilita, egun honetan zirkuko bertze mendi ezagun batera zuzenduko ginen, punturik altuena den Auñamendira. Hasmentako basoko porteoa gaindituta, kalitatezko maldak eta paraje eder eta anitza eskaintzen duen ateraldia da. Noizean behin errepikatu beharreko horietakoa.

9:02 : Refuge de l'Aberouat (1450m)
Aterpearen ondoko aparkalekuan autoa utzi eta GR10aren bidetik abiatu ginen.


Hasmentatik beretik helburu genuen Auñamendi mendiaren tontorra ikusten da.


Ezkerretara Billare ikusten genuen, erdian bezperan ibilitako Anayeko bailara eta eskuinetara Auñamendiko gailurra zuri-zuri.


Bidea Braca d'Azuns basoan sartzen da eta altuera handirik irabazi gabe zeharkatzen du alderik alde. Zati honetan eskiak bizkarrean eraman behar izaten dira normalean, eta elurra dagoelarik ere ez da sobera eskiagarria, goiti-beheiti batzuk baititu.


Basotik ateratzen eskiak segidan paratuko genituen.


1540 metro inguruan bailarattoaren sarrera dago eta bertan elur jarraia harrapatuko genuen.


Eskiak paratu eta ez genituen kaskora arte kenduko.


Gibelean Midi d'Ossau mendia ageri zen urrunean puntu honetatik.


Guk oraindik GR10aren bidetik eta Soum Couy mendia parean genuela bailaratxoan goiti egin genuen.


GRa Cap de la Baitch etxolaren ondoan utziko genuen. Bideak eskuinetara Pas d'Azun lepo aldera egiten du.


Guk, aldiz, ezkerretara biratu eta errekaren bideari segituko genion.


Malda tenteago eta politetatik hegoalderantz eginen genuen, Countende mendiaren zangoan kokatu arte.


Bertan bailarak bertze 90º-ko bira bat marrazten du eta mendebalderantz egiten du Anieseko lepo aldera. Aitzinean Auñamendiko tontorra hurbilago ikusten hasiko ginen puntu horretatik aitzin.


Gibelean, aldiz, Orgues de Camplong deitzen den mendilerro luze eta berezia genuen.


Anieseko lepora ailegatu gabe ezkerretara malda zabal eta ederretatik altuera hartzen hasiko ginen.


Eskiatzeko paraje ederra da honakoa, batez ere aurten adina elur dagoelarik.


Countende mendia orain gure ezkerretara genuela Auñamendiko azken piramidearen oinera joanen ginen.


Soum Couy mendia gibelean utziz...


Piramidearen azpiko aldean zati zelai bat dago. Bertatik gailurrera ailegatzeko egin beharko genuen bidea ikusten genuen. Kaskoaren ezkerreko maldetatik iganen ginen mendiaren hegoaldeko ertzean dagoen lepotxo batera.


Zelaitxoa zeharkatu eta azken maldari ekinen genion.


Countende mendia begiradapean...


Azken zatia dezente tentetzen da eta beharrezkoa da elur baldintza egonkorrak izatea bertatik igateko. Gure kasuan arrastoa egina zegoen eta zailtasunik gabe aterako ginen kaskoraino.


Zati arras fotogenikoa da honakoa, altuera hartu ahala gero eta ederragoa dena. Inguruko mendirik altuena izateak ikuspegi ederra ematen dio.


Ekialdeko malda tenteagoak iganda, aurpegia hegoalderantz inguratzen da ertzera atera baino lehen. Puntu honetan Anayeko bailararen gainean "zintzilik" dauden maldak gainditzen dira. Malda eguzkitsuak dira eta beraz eguzkiak fite transformatzen ditu, baina elur gogorra edo horma harrapatuz gero esposizio pixka bat izaten ahal dute.


Gure kasuan baldintzak arras onak ziren.


Argazkian ikusten den bizkartxoaren ondoko lepotxotik atera ginen ertzera. Ertzetik goiti iparralderantz egin eta hego-mendebaldeko maldara aterako ginen kaskoraino eskiz ailegatzeko.


12:24 : Auñamendi (2504m)
Hiru ordu eta erdi inguruko igoeraren ondotik gainean ginen. Niretako bortzgarren aldia zen mendi honetan. Hain zuzen ere, blog honetako lehen mendia Auñamendi bera da, 2009ko maiatzean egin genuen ateraldia.


Kasko ezaguna da eta jende dezente ibilki zen. Batzuk eskiekin eta bertzeak oinez. Bezperan igandako Hiru Erregeen Mahaiarako bidea parez pare ikusten genuen tontorretik.


Gailurreko egonaldiaren ondotik jaisteko momentua ailegatu zen. Jaitsiera ez genuen igandako bidetik eginen. San Martingo Harritik igaten den bidearen azken zatia eskiatuko genuen, hego-mendebaldeko malda. Gero iparraldeko paretaren azpitik zeharkaldi luzea egin eta Anieseko lepoaren gaineko aldean berriz ere igoerako bidearekin elkartuko ginen.


Eski ikuspegitik zeharkaldi hori ez da igoerako maldak bezain ona, baina mendiari itzuli osoa emateko aukera ematen du. Behin igoerako bidearekin elkartuta, Cap de la Baitcheko etxola aldera jaisten diren malda ederretatik eskiatzen segituko genuen.


Cap de la Baitch etxola ezkerretara utzi...


...eta Ardineteko etxolaren azpiko alderaino eskiatuko genuen; igoeran eskiak paratu genituen puntu bereraino, alegia.


Oihaneko paseo lasaia gelditzen zitzaigun akitzeko!


14:25 : Refuge de l'Aberouat
Hala akitu genuen ateraldi eder hau. Eski denboraldiak aitzinera egin eta bazter hauetan elurra joan aitzinetik, bi eski saio on eginda agurtu genuen Lescun kuttuna!

 

2024/11/30

Auñamendi (2504m) eta Añelarra (2357m)

EGUNA: 2024/11/30

ABIAPUNTUA: Plateau de Sanchese (1081m)

ZAILTASUNA: Erraza

DENBORAK:
  • Igoera: Lau ordu eta erdi
  • Jaitsietra: Bi ordu eta erdi
NOLA AILEGATU:
Plateau de Sanchese Lescun herritik goiti dago. Lescunera ailegatzeko, gure kasuan, Nafarroa Beherea eta Zuberoako probintziak zeharkatzea da lasterrena. Donibane Garazi, Lartzabale, Maule eta Atharratze herriak pasatuta, Montori herrian utziko ditugu Euskal Herriko lurrak. Lanne-en-Baretous herrira ailegatuko gara hurrena eta herri hau pasata eskuinetara Arette herrira doan bidegurutzea ikusiko dugu. Bertara joanen gara. Arettetetik Issor herrian barrena, Aspeko bailarara iritsiko gara. Behin hemen, Zaragozako norabidea hartuko dugu eta kilometro batzuz bailara sartu ondotik, eskuinetara Lescun herrira doan desbideratzea aurkituko dugu. Puntu honetara Pirinioen hegoaldetik ere irits daiteke, Jaca eta Somporteko tunelean barrena. 

Lescun herrira iritsi baino pixkat lehenago, Plateau de Sanchesera gidatuko gaituzten seinaleei segiko diegu. Herria zeharkatu eta lehenik errepidetxo batetik eta gero pista batetik aparkalekura ailegatuko gara.

ARRASTOA:
Powered by Wikiloc


KRONIKA:
Lehen elurteen atarian, Lescun inguruan bertze ateraldi bat egiteko probestu dugu. Kasu honetan, Sancheseko zelaitik Auñamendiko kaskora igan gara, mendia hegoaldetik iparraldera zeharkatuz. Lescungo zirkuko tontorrik altuena den honetara igateko L'Aberouat aterpetik igaten den bidea baino luzeagoa da, baina zeharkatzen dituen paisaia anitzek arras gomendagarri egiten dute.

8:23 : Plateau de Sanchese (1081m)
Gaua zelai polit honen inguruan pasatu genuen, bertan autiz sartzea debekatua baitago. Gosaldu, gauzak prestatu eta goiti abiatu ginen. Brecqueko mendi ikusgarriaren hegoaldetik goiti Anayeko bailaran barneratzen den bidea hartuko genuen hasteko.


Bide horretara ailegatzeko zelai ia osorik zeharkatu beharko genuen.


Gure ezkerretara Anayeko errekako ur-jauzi hau utzi genuen.


Parean, aldiz, Orgues de Camplong izeneko mendizerra berezia genuen, eguneko lehen izpi gorrixkaz margotua.


Zelaia utzi eta bidea pagadi batean memtroak irabazten hasten da.


Momenturen batean harkaitzean zizelkatuta dagoen bideak inguru malkartsua gainditzen du.


Zatirik aldapatsuena gibelean utzi eta Anayeko bailaran barneratzen da mantso-mantso...


Pagadi eder bat zeharkatuz...


Azken pagoak gibelean utzi eta Billare mendiaren iparraldeko oinera atera ginen. Anayeko etxolak hurbil genituen puntu honetatik.


10:17 : Cayolars d'Anaye (1534m)
Bide nagusitik pixka bat desbideratuta, etxola nagusia bisitatu genuen. Mendizaleendako zati irekia du, egoera onean: aulkiak, mahaia, koltxoiak... Estufa edo lurreko sua da falta duen bakarra.


Etxola utzi eta mugaz gaindiko GR-aren markei segituko genien leporaino.


Bideak altuera mantso irabazten du bailara etzanean goiti.


Bailararen azken zatian Marmitou deitzen den parajea agertzen da bat-batean. Inguru honetan paisaia pixka bat aldatu egiten da, eta ordura arteko larre leunak harkaitz eta izeiz zipriztintzen dira.


Paraje honen hegoaldean Pene Blanque eta Hiru Erregeen Mahaia mendiak elur pixka batekin ageri ziren. Guk bidegurutze batean azken honetara doan bidea utzi GR-ari segituko genion Anayeko leporaino.


Bideak goitibeheiti batzuen ondotik azken malda gainditzen du lepora ailegatzeko.


10:24 : Insoleko lepoa / Col d'Anaye (2011m)
Lepotik Nafarroako lurretan barneratu ginen, eremu karstikoan.


Iganen genuen Añelarra mendiaren hegoaldeko harresia mesfidatu ageri zen gure eskuinean. Hala ere, bideak punturik ahulenak baliatuz zailtasunik ez du kaskora ailegatzeko.


Anayeko lepotik oraindik zati batean GRa segitu genuen eta seinale honen inguruan utziko genuen. Bertan iparraldeko norabidea hartuko genuen.


Bidexenda ez hain nabarmen batek hartxingadi bat zeharkatzen du Añelarrako hegoaldeko harresiaren bila.


Eta kanaltxoz osatutako irtenguneak saihesten ditu ezker eta eskuin eginez.


Gibelean Hiru Erregeen Mahaia nabarmentzen zen bertzeen gainetik.


Hala, giltzarri den pasabide honetara ailegatu ginen. Eskuinetara kanal bat hartu genuen eta honek katuka igan beharreko tximinia labur batera eramanen gintuen.


Zailtasunik gabeko (I+) tximinia gainditu eta harresiaren goitiko "solairura" iganen ginen.


Hortik goiti eskuak gutitan erabili beharko genituen, mugarriek eremu errazenetik eramaten baikaituzte.


Gailurra ikusten hasi ginen goiti egin ahala...


Azken zatian malda dago, baina zailtasunik ez!


Añelarraren mendebaldeko gailur inguru atera ginen.


Eskuinetara biratu eta tontor nagusira ailegatzeko azken metroei ekin genien.


11:27 : Añelarra (2357m)
Hiru ordu eman genituen autotik Añelarrako gainera. Niretako bigarren aldia zen Euskal Herriko hirugarren mendirik altuena den honetan.


Luze gabe, lehen kaskoa utzi eta eguneko helburu nagusia zen Auñamendirantz abiatu ginen. Añelarratik hurbil dagoela ematen du, baina terreno karstikoan deus ez da iduri duena.


Añelarratik ahalik eta altuera gutien galduta, Pene Castetne izeneko menditxoa iparraldeko magaletik inguratu genuen. Horra arte zailtasun aunitz ez genuen harrapatu, baina gogor zeuden elur-lauso batzuk inguratu behar izan genituen.


Castetnetik Auñamendiko bide arrunta hartu arte, ordea, paraje karstikoko zuloak eta elurra saihesten lan handiagoa izan genuen. Ailegatzen ari ginela iduri zuelarik, beti agertzen zen inguratu beharreko zuloren bat. Elurrik ez dagoelarik zati hau aise errazagoa izanen dela iruditzen zait dena den.


Behin Auñamendiren hego-mendebaldeko aurpegitik igaten den bide arruntera ailegatuta, atsedenaldi motz bat hartu eta azken maldari ekin genion.


Zati honetan ere elur-lausoren bat zeharkatu behar izan genuen, baina eguzkitan zeudenez aise guriago zeuden.


Bidexenda zabaletik mendiaren hegoaldeko ertzera atera eta bertatik egin genituen azken metroak...


Ailegatzen...


12:42 : Auñamendi (2504m)
Kaskoan argazki bat atera eta zerbait jateko egonaldi luzea egin genuen. Azaroaren azken eguna izanda ere, tenperatura epela lagun genuen.


Gailurra utzi eta jaitsiera luzeari ekin genion. Beheitirakoan L'Aberouat aterpetik igaten den bidea hartuko genuen. Hego-mendebaldeko malda jaitsi eta Auamendi iparraldetik inguratzen du bide honek.


Eta iparraldeko itzaletan berriz ere elur-lausoak harrapatu genituen. Tarteren batean malda dago eta inguratu behar izan genituen.


Itzaletan fresko zegoen...


Behin elurrak gibelean utzita mendiari azken begiratua eman eta bidexenda erosoan beheiti segitu genuen.


Poliki-poliki harkaitzak gibelean utzi eta Cap de la Baigt bailarako larre horixketan barneratu ginen.


Countende mendia gibelean...


...eta bailara aitzinean.


14:57 : Cabane de Cap de la Baigt (1689m)
Behin bailararen sakonean sartuta, Soum Couy mendiaren azpian dagoen etxolatxoan geldialdi motza egin genun.


Aitzineko aldietan hemen izan nintzenean etxola hau egoera onean eta irekita harrapatu izan dut, baina oraingoan hetsia zegoen zatirik nagusiena.


Etxola utzi eta GR10-aren bidetik beheiti segitu genuen.


Basoan sartzen da GRa eta bertatik ailegatzen da L'Aberouat aterperaino.


...baina laster utziko genuen, puntu honetan eskuinetara Sancheseko zelaira doan bertze bide bat hartzeko. Bidexka hauMoulineko eskalada eskolaren ondotik pasatzen da eta errekara jaisten da.


Errekan zubi hau ez da zeharkatu behar. Horren ordez ezkerretara errekaren bazterretik segitzen duen bidexkari jarraitu behar zaio. Guk zubia zeharkatu eta bide nabarmenago bat hartu genuen zati batean, baina buelta hartu behar izan genuen.


Aipatu bezala, bidexka ona erreka zeharkatu gabe haren ondotik doana da. Ez da sobera nabarmena, ezta markatua ere; baina garbia da momenturo pagadi artetik baitoa.


1200 metro inguruan bidexka pista izatera pasatzen da eta bertatik Sancheseko zelairako azken metroak eginen genituen.


Azken zatian mugaz gaindiko GR T13 bidea harrapatuko genuen berriz...


16:23 : Plateau de Sanchese (1081m)
...eta zelai ederrean zortzi orduko ibilaldi ikusgarria akitutzat emanen genuen. Auñamendi mendi ederra bisitatzeko bertze modu bat!