Canal Roya (2347m)

EGUNA: 2024/02/17

ABIAPUNTUA: Cabane de l'Araille (1725m)

ZAILTASUNA: S3

DENBORAK:

• Cabane de l'Araille - Canal Roya : 2 ordu
• Canal Roya - Baigt de Houer : 30 minutu
• Baigt de Houer - Col d'Aneou : Ordubete
• Col d'Aneou - Cabane de l'Araille : 30 minutu

NOLA AILEGATU:

Erratzutik aterata Behe Nafarroara pasatu behar da Izpegitik. Baigorritik Garazira jo eta hemendik Donapaleu aldera. Donapaleutik Sauveterre de Bearn aldera doan bidea hartu behar da, baina seinaleetan Oloron ikustean azken honetara joanen gara. Oloronetik Paue aldera hartu, baina hiria gibelean utzi eta gutxira Laruns eta Artouste aldera bideratzen gaituzten seinaleak ikusiko ditugu. Laruns gibelean utzi eta Portaleteko mendatea igotzeari ekinen diogu. Goiti ailegatu baino kilometro inguru lehenago dago gure abiapuntua.

ARRASTOA:

Powered by Wikiloc

KRONIKA:

Larunbat eguzkitsu bat elurtetxo baten gibeletik eta Portalet ez dira konbinazio onegia mendian ez badugu jende aunitz harrapatu nahi. Alabaina, aukeratzeko leku sobera ez daudenetan dagoenarekin konformau behar da eta hala inguru honetara hurbildu ginen pasaden asteburuan. Canal Roya eta Peña Blanca mendien ipar magalek eskiatzeko adina elur gordetzen zuten eta Biouseko bailararekin konbinatuz zirkular polita egin ahal izan genuen.

9:10 : Cabane de l'Araille (1725m)

Aparkalekura ailegatu ginelarik bertako jendetzarekin harrituta gelditu ginen. Bagenekien ez ginela bakarrik ibiliko, baina hainbertze jende ere... Gauzak prestatu eta goiti abiatu ginen laino nagi batzuen azpitik.

Mendebaldeko norabidea hartu genuen arrastorik markatuenetik. Bezperako elurretan bederatzietarako eski pista baten neurriko arrastoa zegoen eginda.

Lainoen gainetik egun zoragarria izanen genuen, eguzkitsua eta haizerik gabe.

Peña Blanca eta Pene de la Glere mendien iparraldeko maldetan goiti eskiatzaile andana zihoan...

...eta harritzekoa bazen ere Canal Roya aldera ez zihoan kasik inor. Mendi ezaguna da, baina mantsoago iganen zen jendea alde honetara. 

Bailararen sakonetik egiten da azken malda tenteagora arteko bidea. Pirinioetan eskiz igateko egonen den gailurrik errazenetarikoa izanen da Canal Roya. Ikusten den bezala, elur dezente zuen ipar magalean.

Peyreget mendiaren hegoaldeko magalak elurrez justuago zeuden. Bertze plan posiblea hara zuzentzea zen hasmentan, baina ikusitakoak ikusita asmatu genuelakoan nago.

Azken zatian gure aitzinetik zihoan eskiatzailea aitzinatu eta arrastoa irekitzea tokatu zitzaigun. Ez genuen horrelakorik espero, ez baikinen goizegi abiatu... Argazkian eskuinetara ageri den Houerreko lepora iganen ginen eta hortik ezkerretara hartuta kaskora.

Gurekin batera behelainoa ere igaten hasi zen momentu batean. Urrunean Midi d'Ossau...

Lepora ailegatu aitzineko metroak pixka bat tenteagoak dira, baina arras errazak...

10:28 : Col de Houer (2285m)

Erran bezala, lepotik ezkerretara biratu behar da gailurrera ailegatzeko.

Azken metroak...

10:40 : Canal Roya (2347m)

Lehenak ailegatu ginen gailurrera eta minutu batzuz bakar-bakarrik egon ginen bertan. Ez da ohikoa hoir mendi honetan. Jendea fite hasi zen ailegatzen eta guk trantsizioa eginda beherakoari ekin genion.

Ingurua ikusita goitirakoan bide beretik itzuliko ginela pentsatzen genuen. Gailurretik Biouseko bailara aldera elur dezente zegoela ikusten zen, ordea; eta probatzea erabaki genuen. Zuzenean Houerreko lepoa gure eskuinetara utzita bailaran beheiti eskiatzen hasi ginen. Elurra zati aunitzetan arras egoeran onean zegoen, uste baino aise hobe egia erran.

Zuzen eskiatu genuen argazkian ikusten den bailararaino.

11:41 : Baigt de Houer (1857m)

Inguru honetan duela urte batzuk ibilia nintzen Astundik abiatuta zirkularra egin genuelarik. Leku arras polita da eta eskiatzeko aukera aunitz ditu. Berriz foka-larruak paratu eta Portaletera Aneouko lepotik itzuliko ginela erabaki genuen.

Erreka gurutzatu eta malda eztietatik argazkian ikusten den leporantz jo genuen. 200 metro inguruko igoera zen eguneko bigarren hau.

Gibelean Larry eta Ayous inguruak utziko genituen, elurtuta zein elurrik gabe paradisu txiki bat!

12:28 : Col de Aneou (2083m)

Hala lepoan azken jaitsierarako prestatu ginen. Bagenekien orientazioagatik jaitsiera honetan elurra justu samar harrapatuko genuela, baina azpian belarra izanik arazo handirik gabe jaitsi ahal izan ginen.

Aneouko lautadara egindako zatia polita izan zen jaisteko; hortik aitzin, berriz, maldatxo bat igan eta Canal Royako bidera aterako ginen arrasto zapatuari autoraino segitzeko.

 

13:30 : Cabane de l'Araille (1725m)

Gustura akitu genuen itzulia, egindakoarekin kontent. Zegoen elurrari zukua atera genion!

Suberpene - MJC (6a,100m)

EGUNA: 2024/02/04

ABIAPUNTUA: Barriere de Suberpene (720m)

ZAILTASUNA: 6a , 100m

DENBORAK:

• Hurbiltzea: 20 minutu
• Eskalada: 2 ordu
• Jaitsiera: Ordubete (rapelak bidean eta gero oinez)
  

NOLA AILEGATU:

Aure bailarako Heches eta Rebouc herrien artean dago abiapuntua. Heches herria goiti gurutzatu eta herritik goiti lehen bidegfurutzean eskuin hartu behar da. Errepidetxotik metro eskas batzuk egin eta zubi bat azpitik zeharkatu baino lehen ezkerretara ateratzen den pista segituko dugu. Pista hori segitu behar da hesi batek bidea mozten digun arte.

KRONIKA:

Heches herriko Suberpene sektorean hainbat eskalada bide aurki ditzakegu. Bide luzeen artean gradu aldetik errazenetarikoa eta beraz ezaguneterikoa MJC izenekoa da. Lau luzez osatua, 100 metro inguruko eskalada eskaintzen, Pirinioetatik etxera itzuli aitzineko goizean egiteko aproposa.

Hurbiltzea:

Autoa hesiaren ondoan utzi eta pista beretik segituta ailegatu gara eskalada eremura. Suberpenek hiru sektore ditu. Gurea bidean segitu ahala, topatuko dugun bigarrena da, Jardin izenekoa. Pistatik eskuinetara aterako gara zuhaitz arteko bidexkarik segituz eta minutu pare bat gehiagotan bidearen azpian egonen gara. Izena harkaitzean margotua dago.

Bideak pareta hori igaten du, goitiko puntaraino

 

Eskalada:

70 metroko sokarekin eskalatu genuenez luzeren bat edo bertze elkartzen ahal genituen, baina luze guziak bere horretan eskalatzea erabaki genuen.

• 1. luzea (5b+ , 35m): Helduleku arras onak dituen luzea da, bertikala baina erraz eskalatzekoa. Harkaitza ere primerakoa da, bide osoan bezala. Arras polita iruditu zitzaigun.
  

• 2. luzea (4c , 20m): Plaka etzanetatik igaten den trantsizio luze erraza da.
  

• 3. luzea (6a , 20m): Hau da bidearen luzerik teknikoena. Eskuendako heldulekuak nahiko onak dira, baina hauek hartzeko hankak igan behar dira. Azken zatian hoditxo batzuez osatutako plaka bat gainditu behar da zertxobait eskuinetara eginez.
  

• 4. luzea (5b , 25m): Luze etzana ezproi itxurako batetik harkaitzaren amaierara igaten da. Azken zatian sabaitxo bat igan behar da eta horrek ematen dio zailtasuna.
  

Jaitsiera:

Bidea rapelatuz jaitsi behar da. Guk lau luzeak rapelatu behar izan genituen, baina 60ko bi sokarekin bi rapel egitea nahikoa da. Ondoren pistatik oinez itzuliko ginen autora.

 

Arete de Lentilla (2882m)

EGUNA: 2024/02/03

ABIAPUNTUA: Piau Engaly (1853m)

ZAILTASUNA: S4

DENBORAK:

• Igoera: Hiru ordu et erdi
• Jaitsiera: Ordu bat

NOLA AILEGATU:

Euskal Herriko ipar partetik joanez gero, azkarrena Baionan A64 autopista hartu eta bertatik joatea Saint-Lary-Soulango irteera hartu arte. Behin autopistatik aterata, aipatutako herriraino iritsi beharko dugu. Saint Lary gurutzatu eta Aragnouet-Bielsa tunelera doan bidea segituko dugu. Bidean goazela, eskuinetara Piau Engaly eski estaziora igotzen den bidea hartu beharko dugu. Estazioaren goiko partean dauden aparkalekuetako batean utziko dugu autoa.

Euskal Herriko hegoaldetik joan nahi badugu ordea, hobe da Iruñeatik Jakara doan autobidea hartzea. Jakatik Huescara jarraitzen duen errepidea segituko dugu, baina segidan Fiscal herri aldera desbideratuko gara. Fiscaletik Ainsara segiko dugu eta hemen iparraldera biratuko gara lehen aipatutako tuneleraino igoz Cinca ibaiaren ertzetik. Tunela zeharkatuta pixka bat jaitsi (6 km) eta Piau Engalyko bidea hartuko dugu.

ARRASTOA:

Powered by Wikiloc

KRONIKA:

Elur eskasia handia da. Eskitzen dudanetik ez dut buruan aurtengoa bezain denboraldi tristerik elurrari dagokionez, eta etorkizunean ez du aferak hobera eginen. Eski ateraldiak egiteko buruari buelta batzuk emn behar zaizkio. Iparretan elurra beheitigo hasten da, baina otsaila hasmenta izanik ez dute eguzkirik ikusten eta elurra eskiatzeko gogor dago. Hegoetan, aldiz, elurra urtzen ari da. Gravaris korridoreak eskiatzeko gelditzen diren hego-aurpegiettik aukera onenetarikoa eskaintzen du. Piau Engaly estaziotik altuera hartuta abiatzeko aukera dago eta korridoreak 1000 metroko jaitsiera zuzena du, momentu honetan Pirinioetan dagoen onena segur aski.

8:21 : Piau Engaly (1853m)

Furgonetan ernatu eta leihotik begiratu genuelarik, panorama hau ikusi ahl izan genuen. Azpiko partean elurra justu zegoen, baina Gravaris korridorea eta azpiko maldak elur dezenterekin ikusten ziren. Prestatu eta eski pista batetik metro batzuk galduta, abiatu ginen.

Badet izeneko pista segidan utzi genuen udako bidetik izen bereko erreka zeharkatu eta Moune etxolatik goiti altuera irabazten hasteko. Azpiko zati hau elurrez justu samar zegoen eta behin baino gehiagotan belar zatiak zeharkatu behar izan genituen. Hala ere, beheitirakoan ez ginen leku beretik pasatuko, goitiago dagoen zubi batetik baizik.

Lehen zatia gaindituta Campbieil mendiaren harresi erraldoiaren azpiko maldak elurrez oparoago harrapatu genituen.

Malda eztiak iganez mendebalderantz egin genuen poliki-poliki.

Jaitsierako Gravaris korridorea eta bere azpiko maldak gure eskuinetara utziko genituen. Posible da bertatik zuzenean igatea, baina gure asmoa zirkularra egitea zen Lenquo de Capoko lepotik pasatuta.

Harkaitz erraldoien arteko zati bat gainditu eta goi-bailaratxo batean barneratu ginen. Hau gora segituko genuen Lenquo de Capoko lepo aldera.

Gure gibelean Gela inguruak... Elur baldintzak hobeak direlarik mendi horretara ere igaten ahal da Piautik.

Puntu honetatik Lenquo de Capo eta bere iparraldeko lepoa begien bistan genituen. Berez Piautik egiten den ateraldi ezaguna da Lenquorakoa, erraza eta elurra izaten duena.

Malda etzanak dira zatirik gehienean, zailtasun gutikoak.

Guk, ordea, bertze plan bat genuen. Lenquoko lepoa utzi eta eskuinetara altuera hartzen hasi ginen malda tenteagoetatik argazkian ikusten den kanal elurtura zuzenduz.

Kanalaren barneraino eskiak zangoetan genituela ailegatu ahal izan ginen. Bertan maldak 40 graduraino tentetzen dira, baina hego-ekialdeko orientazioa izanik eguzkiak fite gozatzen du bertako elurra.

Azken zatian eskiak bizkarrera eraman eta Lentilla ertz zabaletik segitu genuen. 

11:38 : Arete de Lentilla (2882m)

Harkaitz eta elur zatiak oinez gainditu eta aparteko zailtasunik gabe harrapatu genuen Lentilla ertzaren 2882 metrora dagoen puntatxoa. Bertatik sartuko ginen Gravaris korridorera, beraz igan beharrekoak iganak genituen. Hurbil zegoen Campbieil eta bere hego-mendebaldeko korridore ikusgarria, baina bertze baterako gelditu zen.

Urrunxego Badet eta Pic Long ezagun zaharrak...

Gavarnieko 3000koak...

...eta Vignemalekoak...

Jaitsierarako prestatu eta Gravaris korridorean beheiti sartu ginen. Puntualki 40 gradu inguruko malda duen korridore honek Badeteko errekaraino 1000 metroko jaitsiera zuzena eskainiko zigun. Bere orientazioagatik eguzki egunetan aise transformatzen da elurra eta nahikoa zabalera du birak modu erosoan egiteko.

Korridorea eskiatu eta azpiko malda zabalagoetara pasatu ginen. Hauek baldintza arras onetan zeuden, elur goxo-goxoarekin.

Gozatzen...

13:21 : Piau Engaly (1853m)

Eskiak zangoetan ailegatu ginen aparkaleku ondoraino (azken metroak malda goiti dira eta oinez egin behar izan genituen). Kontent akitu genuen beraz ateraldia, dauden baldintzak ikusita urrea aurkitu izanaren sentsazioarekin.