2022/12/31

Punta Ruego (2589m), Liena (2604m)

EGUNA: 2022/12/31

ABIAPUNTUA: Petramula (1920m)

ZAILTASUNA: S2

DENBORAK:
  • Petramula - Punta Ruego : 2 ordu
  • Punta Ruego - Liena : 45 minutu
  • Liena - Petramula : 45 minutu
NOLA AILEGATU:
Iruñeatik Jacara joan behar da eta hemen  Formigal eski estazioko norabidea hartu. Biescas herrian eskuinetara bidegurutze bat dago Ordesako Parke Nazionalera. Errepide horretatik Cotefablon barrena Brotoko haranera ailegatuo gara eta errepide bera segituz Ainsara. Ainsatik Bielsako norabidea hartu eta herri hau atzean utzita, Parzanen ezkerretara Chisagües herrixkara igotzen den bidea ikusiko dugu. Herrixkatik gora, errepidea pista bihurtzen da. Pista honetatik igoko gara, bihurgune itxi baten ondoan aparkatu arte.

ARRASTOA:
Powered by Wikiloc

KRONIKA:
Aurten bezala elurra eskasten hasten delarik goiti joan behar izaten da haren bila eta Lienako mendizerrak ederki altxatzen du ber magal eztietan. Petramulako aparkalekutik abiatuta pistari segituz malda zabal hauetara fite ailegatzen da eta udan belardi leunak direnak, eskialeku paregabea bilakatzen dira. Duela hiru urte deskubritu nuen paraje hau eskiz eta oraingo elur baldintzek bertara bulkatu gintuzten Benasquetik bueltan. 

10:14 : Petramula (1920m)
Gaua Borda Brunedeko aparkalekuan pasatu genuen eta goizean igan genuen Petramularako zati traketsa. Kasik udako aparkalekua deneraino ailegatu ahal izan ginen. Materiala prestatu eta autotik berttatik eski gainean abiatu ahal izan ginen.



Bihurgune hetsi bat egin eta pista eskuinetara biratzen da. Hego orientaziodun malda batzuk zeharkatzen ditu aldez alde, baina pistan berean elurrak gehiago irauten du. Bi zati txikitan bertzerik ez genituen kendu behar izan.


Inguru honetan izan ginen aitzineko aldian bezala, Barbietoseko etxola ingurutik goiti pistatik kanpo zatiak ere zuri ageri ziren. Hego-mendebaldeko malda etzanak dira honakoak eta negu eguzki apalak nekez urtzen du elurra bertan.


Horrez gain, zorua ez da batere harritsua eta elur guti izanda ere eskiagarria da.


Hori guzia guti balitz, ingurua zoragarria da, Monte Perdido eta Muniako mendiguneetara ikuspegi bikainarekin.


Magal zabaletan ezkerren gelditzen den Punta Ruego mendira zuzendu ginen lehendabizi. 


Espluca Ruego eta Robiñera mendiak eskuinetara utziz...


Lienako elur dunak gibelean, eski paradisua.


11:50 : Punta Ruego (2589m)
Lehen igoera Barrosako bailararen gainean altxatzen den Ruego gailurrean akitu genuen.


Lehen jaitsiera Punta Ruegotik hegoalderantz zuzen egin genuen, udaberriko elur goxoa bilatuz. Irudian ikusten den Ruegoko etxola ingururaino ailegatu ginen.


Berriz ere larruak paratu eta bigarren igoerari ekin genion. Kasu honetan Ruegoren eskuinetara gelditzen den Liena mendia genuen jomugan, sektoreari izena ematen diona.


13:16 : Liena (2604m)
Bigarren tontorrera ailegatu orduko haizea bizitzen hasia zen. Luzatu gabe transizioa burutu eta Lienaren hego-mendebaldeko orientaziodun maldatik 100 bat metyro galdu genituen. Segidan mendebalderantz zeharkaldi bat egin eta berriz Ruego mendiaren azpian kokatzeko.


Aitzineko aldian bigarren jaitsiera autoraino egin genuen, baina hobe da oraingoan egin genuen bezala egitea. Ruegoren azpira eskiatu, berriz fokak paratu (hirugarrenez) eta gailurrera itzuli. Bertatik aparkalekura eski malda zuzenagoak daude.


13:50 : Punta Ruego (2589m)
Bigarren aldiz itzuli ginen Ruegoren gainera eta bertatik egin genuen azken jaitsiera. Aitzinekoak bezala udaberriko elur ona harrapatuko genuen nahiko mantso izanda ere.

 

14:34 : Petramula (1920m)
Autoraino eskiatuz aldez aldeko irribarrearekin akitu genuen urtea! Elur gordeleku ederra da Lienakoa!

2022/12/29

Sacroux (2676m)

EGUNA: 2022/12/30

ABIAPUNTUA: Llanos del Hospital (1785m)

ZAILTASUNA: S3 (S4 gailurretik eskiatuz gero)

DENBORAK:
  • Igoera: 3 ordu
  • Jaitsiera: Ordu bat
NOLA AILEGATU:
Iruñetik Pirinioetako Autobidea hartu behar da Jaca aldera. Jacatik Sabiñanigora jo behar da eta herri hau gibelean utzita Ainsara doan errepidea hartuko dugu. Ainsatik Campora eta hemendik Benasquera. Benasquetik goiti Llanos del Hospitalera igo behar da.

ARRASTOA:
Powered by Wikiloc


KRONIKA:
Nahi izatea ahal izatea dela dioen erranairua bada, eta batzuetan behintzat hala izaten da. Abendu hondarra izateko elur falta handia dago, baina hara eta hona bila ibilita eski saio pare bat egin ahal izan dugu. Lehena Luchon eta Benasque bereizten dituen mendilerroan izan da, Sacroux mendian hain zuzen ere. Gorguteseko zirku hetsiak elurteak ongi hartu eta gordetzen ditu, eta Llanos del Hospitaletik goiti eskiatzeko malda politak ditu.

10:29 : Llanos del Hospital (1785m)
Hospital de Benasque aldera sartu gabe, errepidea akitzen den lekuraino segitu eta bertatik abiatu ginen goiti. Glerako leporako bidea erakusten duten markei eta seinaleei segituko genien bidexka deserosotik.


Metroak irabazi ahala Llanos del Hospitaleko eski pistetarako ikuspegi polita genuen.


Erran bezala, bidea nahiko zakarra da, harritsua.


2050 metro inguruan paratu ahal izan genituen eskiak, Gorguteseko errekara ailegatuta. Gure gibelean Aneto-Maladeta mendizerra ikusgarri ageri zen. Elur gutiegirekin hori bai.


Iragarpenek eguraldia hobetzen joanen zela errana zuten, baina tarteren batean euri tanta batzuk ere izan genituen. Hala ere, eskiatzeko gogoa eta goiti egiteko borondatea handiak ziren eta aitzinera egin genuen.


Montañeta mendiaren azpiko aldera igan ginen lehen maldak gaindituta eta bertan ezkerretara biratu ginen zati lauagoan barrena. Aitzinean Mall Pintrat eta Estauas mendiak genituen. Horiek baino eskuinerago dago gure helburua zen Sacroux mendia.


Inguru horretan elur aunitz harrapatu genuen, uste baino gehiago.


Haizetik babestutako hodi zabal batetik igan ginen.


Gorguteseko laku aldera pasatzeko bizkar batera aterako ginen...


...eta laku hormatua gure ezkerretara utzi zeharkaldi bat egin genuen Glerako lepo aldera. Metro batzuk galdu behar dira zati honetan.


Glerako lepoa gure eskuinetara utzi eta malda ezti eta politetatik goiti segitu genuen.


Sacroux mendia begien bistan genuen jadanik. Eskuinetara ageri den puntatxoa da. Bertara ailegatzeko argazkiaren erdian ikusten den kanaletik igan behar da, gero eskuinetara biratu eta ertz erraza zeharkatzeko.


Bezperan elur pixka bat bota zuen eta horrek fokeatzeko baldintza onak utzi zizkigun. Kanalaren hasmentara erraz ailegatu ginen.


Handik goiti, malda gehiago tentetzen da eta eskiak motxilan paratu genituen azken metroak igateko. 40 gradu inguruko malda du azken zati honek tarteren batean.


Gailurreko ertzera aterata, eskiak utzi eta azken metro errazak igan genituen.


Ertzaren bertze aldean Bagneres-de-Luchon herria ikusten da, eta inguruko mendiak elurrik gabe.


13:07 : Sacroux (2676m)
Beheititik goitiraino mendia guretako bakarrik izan genuen, eta gailurrean ere ez zebilen inor. Tarte luzea eman genuen inguruaz gozatzen. Boum, Maupas, Lezat eta Grand Quayrat mendiak mendebaldean...


Hegoaldera berriz Maladetako mendizerra ikusgarria. Argazkiaren azpian jaitsiko genituen maldak ere ageri dira, ongi elurtuak...


Mina, Salvaguardia eta urrunean Forcanada, mendi ikusgarriak hirurak. Kaskoan ginela, hezetasunarekin behelainoa igaten hasi zen mantso-mantso.


Eskietara itzuli eta jaitsierari ekin genion. Uste baino elur hobea harrapatu genuen, batik bat mendiaren goitiko aldean. Beheitiago, berriz, lainopean ibili behar izan ginen.


16:00 : Llanos del Hospital (1785m)
Eskiak paratu genituen leku bertsuan kendu behar izan genituen eta ttipi-ttapa egin genituen azken metroak. Kontent, eskiatu paraje ederrak deskubritu eta eskiatu izanagatik.

 

Soralar (827m), Zarkindegi (862m), Hargibel (991m), Albako Harria (1074m)

EGUNA: 2022/12/24

ABIAPUNTUA: Erratzu (285m)

ZAILTASUNA: Erraza

ARRASTOA:


KRONIKA:
Erratzu eta Elizondo mendiz lotzeko hainbat aukera daude, baina politenetakoa Albako Harrira doan bizkar luzea gainez gain pasatzen duena da. Berez bizkar hori bera Erdiz eta Saioa aldera luzatzen da eta mendi garbi eta ederrean ibiltzeko aukera ematen du, bidenabar hainbat gailur zapalduz.

9:28 : Erratzu (285m)
Kafe bana hartu eta Gorostapoloko errepidea segituz utzi genuen herria. Errepidetik 500 bat metro eginda eskuinetara ateratzen den zementuzko bidea hartuko genuen.


Zementuzko bidea behitegi baten ondoan akitzen da eta pista bati uzten dio lekua. Soralar aldera igaten den pista horretatik iganen ginen tarte batean.


Pista hainbat belagiren artetik pasatzen da. Belagiak akitzen direlarik eskuinetara iratze-leku batetik doan bidexka hartuko genuen.


Buztanzelai inguruak bidetik...


Gure gibelean Gorostapolo eta Erratzu, Gorramendiren oinean...


Iratze-lekutik barrena bertze pista bat zeharkatu eta Otxaskoren ipar bizkarrera aterako ginen irudiko arbola bakartiaren ondotik. Bizkarretik beretik doan bidexendatik argazkiaren ezkerretara ageri den Otxaskoko gailurrera aterako ginen.


10:12 : Otxasko (719m)
Gailur honetatik parez pare ikusten da Soralarkoa. Bien arteko lepora jaitsi eta Soralarko luberriaren ezkerretik doan bidexkak utziko gintuen kaskoan.


10:25 : Soralar (827m)
Azken metroak bi belagiren arteko bide berezitik egiten dira.


Gailurrean haizeak bizi jotzen zuen, beraz luze gabe Burga eta Soralar azpiko leporantz zuzendu ginen.


Pagadi ederrak Burga inguruan...


10:46 : Basagar (684m)
Burgatik ez ginen pasatuko ordea. Horren ordez iparraldetik inguratzen duen pistati Basagarko lepora agertuko ginen. Lepoan Beartzun eta Iñarbegi lotzen dituen pista zeharkatu eta eskuinetara GRaren marka zurigorriak segituko genituen. 


Markak segituz lepo zabal batera atera eta GRa utzita, ezkerrerago doan bertze xenda bat hartuko genuen. Berderizeko Lepora eramanen gintuen bide honek.


Urruxka baserriaren gaineko aldetik pasatuz...


Berderizeko Lepora ailegatzen...


11:17 : Berderizeko lepoa (688m)
Basagar eta Berderiz artean ez altuerarik irabazten distantzia egin arren. Bidegurutze garrantzitsua den lepo honetatik Argibelera markatutako bidea hartuko genuen.


Bizkarrez bizkar doa Argibelera bidea, paraje garbi eta ederretatik...


11:34 : Zarkindegi (862m)
Malda pare bat igan eta Zarkindegiko kaskotik pasatu ginen.


11:47 : Belaungo lepoa (759m)
Pagadi arteko jaitsiera laburra eta Belaungo lepotik pasatu ginen.


Paraje ederrak pago eta larre arteko hauek. Neguan bereziki garbi-garbi egoten dira.


Eihartzeko gain polita inguratu eta izen bereko lepotik malda tentetu egiten da.


Argibelgo haitzak ez genituen urrun...


12:15 : Argibel (991m)
Marka horiei segika mendiaren ekialdeko harresiaren puntu ahula bilatu eta gailurrera atera ginen. Haize gutxiago ibilki zenez, zerbait jateko geldialdi egin genuen tontorrean. Azken gailurra hurbil genuen jadanik.


Bizkar zabal batetik egiten da Argibel eta Albaren arteko bidea.


12:49 : Albako Harria (1074m)
Herritik atera eta hiru ordu pasatan eguneko azken kaskoan ginen. Elizondorako jaitsiera gelditzen zitzaigun ibilbidea akitzeko.


Mendiaren iparraldera jaitsi eta Urballoko lepoan GR11aren bidea hartuko genuen Elizondorako.


14:09 : Elizondo (195m)
Abenduaren 24a izanda ere, bero ederra "lagun" ailegatu ginen Elizondora. Ondoko egunetako otorduak irabazita...