2018/06/26

Iguzkimendi (844m)

EGUNA: 2018/06/26

IRTEERA: Arruxia baserria (270m)

ZAILTASUNA: Erraza (F)

DENBORAK:
  • Arruxia - Iguzkimendi (Itsusiko Harrietatik pasata) : 3 ordu
  • Iguzkimendi - Arruxia (Aritzakundik pasata) : 2 ordu

NOLA AILEGATU:
Bertara ailegatzeko Nafarroa Beherako Bidarrai herrira jo behar dugu eta handik goiti ibilbidea abiatuko dugun baserrira doan errepidetxoa hartu. Hona hemen puntu zehatza. Baserriaren ondoan auto batzuk uzteko lekua dago.



ARRASTOA:

Powered by Wikiloc


KRONIKA:
Anitzetan kanpora jotzen dugu Pirinioetako mendietara etxe ondoan ditugun txoko ederrak ezagutu ere egin gabe. Hori gertatzen zait niri behintzat maiz.

Uda beteko egun zoragarria lagun, Baztango txokorik ederrenetarikoan izan naiz, Itsusiko Erreserba Naturalean hain zuzen ere. Merezi du paraje hauetan ibiltzea, bai horixe!

9:10 : Arruxia baserria (270m)
Bidarraitik pasatu ordez, Aritzakungo pistan barrena hurbildu naiz ibilbidearen hasmentara. Dena dela, onena edoizein eratako autoan joanda, Bidarraitik pasatzea da, funtsean Aritzakungo bidetik ezin delako bertakoa ez dena pasatu.

Leku malkartsuan dago baserria, abeltzaintza eta nekazaritzarako leku gogorra dudarik gabe. Hori dela eta, inguruko baserri anitz hustu dira azken hamarkadetan. Baserriaren azpiko aldean autoa utzi eta GR11 ibilbideko marka zuri-gorriak segituz hasi dut ibilbidea.


Metro batzuk irabazita segidan egun osoan lagun izanen dudan Alkaxuri mendi ikusgarria agertu zait begien parean.


Goiz beroa harrapatu dut eta lehen zati maldatsuan segidan hasi naiz izerditan. Argazkian autoa utzi dudan baserria ageri da.


Ibilbidetik Urritzate eta Aritzakungo erreken hasmentak ikusten dira, erdian Alkaxuri eta alde banatan Iparla eta Itsusiko Harriak dituztela. Eskuinean ikusten den punta  zen nire lehen helmuga, bertan hasten baita Itsusiko Harriak zeharkatzen dituen ibilbidea.


Espaltzako lepora ailegatu baino lehen, erne egon behar da ezkerretara ateratzen den bidexenda hartzeko. irudian ikusten dena da, sasoi honetan iratze artean nahiko gordea dagoena. Iturburuko malda zeharkatzen du bidexendak.


Iturburuko maldatik, igo dudan GR11ko ibilbidearen ikuspegia ikusgarria da. Dena den, teknikoki ez dauka inolako zailtasunik eta leku estuenetan kable batzuk daude, nahiz eta ez beharrezkoak izan.


10:00 : Martikoenea (640m)
Honela ailegatu naiz Itsusiko Harrietako lehen kotara, Martikoenea izena hartzen duenera. Bertatik, ibilbidearen hasmentako puntua arras beheitian ikusten da.


Argazkiaren eskuinetik etorri naiz eta ezkerretara doan bidexkatik segituko dut.


Ikuspegi ederra lehen puntatxo honetatik, Iparla, Auza, Alkaxuri eta Gorramakil ageri direla...


Ibilbidea segitu dut Martikoeneako puntari bertze begiradatxo bat emanda. Pirinioetako Chipeta Alto edo Bizkaiko Tologorri mendien nolabaiteko antza du.


Ibilbidetik Bidegorrieta baserria, Urritzateko errekaren beheitiko partean.


Alkaxuri ikusgarria, batzuen erranetan Euskal Herriko mendirik politena omen dena. Ez dakit hala den, baina zoragarria da.


Ibilbidean aitzinera segituta, Iguzkimendi  mendia ere agertu da. Puntu honetan pixka bat bidez nahastu eta Itsusiko Harria deitzen den kota pasatu egin dut. Bertara igotzeko asmoa nuen, baina ohartu naizenerako gibelean utzia nuen.


Amildegiaren ertzean doan bideak, oasi txiki batzuk ere baditu. Bordatxo hau dagoen lekua hain zuzen ere.


Amildegi gehiago...


Itsusiko Harrien zeharkaldi eder hau, Sistagorri deitzen den puntan akitu nuen. hemendik, gibelera ibilitako ibilbidearen ikuspegi bikaina dago. Zeharkaldia akituta, ondoko helburua Iguzkimendi mendia igotzea nuen eta bertara abiatu naiz.


11:00 : Bagaarreta (670m)
Amildegiak akitu eta larre berde eta zabalak hasten dira. Lepotxo honetatik aitzinean nuen Iguzkimendi.


Pista batetik egiten da zati bat eta azken zatian zuzenean igotzen da.


11:26 : Iguzkimendi (844m)
Erritmo bizian laster ailegatu nintzen Iguzkimendira. Iparraldeko lautaden ikuspegia irekitzen da bertatik, baita Larrun, Arranomendi eta Artzamendi mendietarako ere.


Gailurreko tripodea...



Hegoaldean Erratzuko "kolosoak"...


12:00 : Bagaarreta (670m)
Berriz Bagaarretara itzuli, eta ibilbide zirkularrarekin segitzeko eskuinetara ateratzen den pista hartu dut.


Metro batzuk bertzerik ez dira egin behar pista honetatik dena den eta segidan, harkaitz gorrixka kurioso bat inguratzen duen bidexenda hartu hartu behar da.

Bidexenda honetatik barneratu naiz Aritzakunen. Xendan aurkitu dudan lehen bidegurutzean berriz ere ezkerretara biratu eta iratze eta sasi artean ia galduta dagoen bidexkatik segitu behar da.


Matroak galdu ahala Itsusiko Harrien ikusgarritasuna gero eta handiagoa da.


12:30 : Itsusiko Borda (250m)
Sasi arteko bidexkan borrokan ibilita zibilizaziora atera naiz Itsusiko borda inguruan. Hemen, etxearen larrainetik bertatik ezkerretara hartu behar da Espaltzako erreka zeharkatu eta Arruxia aldera eramanen gaituen bidexenda.


Bidexenda berriz ere sasi eta iratze artean zailtzen da. Itsusiko Harrien azpitik zeharkaldi luzea egiten du.


Martikoteneko borda inguruan bidea nabarmen zabaltzen da eta autoa utzia nuen Arruxia baserria bistaratzen da.


13:35 : Arruxia (270m)
Honela, Bernateneko bordaren azpiko bidexkatik pasatu eta errepidetik goiti hasierako puntura ailegatu naiz.

Leku basatia, bakartia, ahaztua, miresgarria da Itsusi ingurua, etxe ondoko altxo handi bat.



BIDEOA:

2018/06/20

Taillon (3144m), Casco (3006)

EGUNA: 2018/06/19-20

IRTEERA: Col de Tentes (2207m)
Tenteseko lepotik ikuspegia
ZAILTASUNA:
  • Eski zailtasuna: S3 (Cascoren gaineko zatia eskiatuta S4)
  • Alpinismo zailtasuna: PD. Taillongo igoera erraza da eta ez du misterio handirik. Breche de Rollandetik Cascora pausu zailago batzuk daude. Lehena, Paso de los Sarrios deitzen dena, elur-baldintzen arabera konplikatu daiteke. Bigarrena, gailur aitzineko azken zatia, esposizio handia du eta aldapatsua da, elur gogorrarekin arras arriskutsua izaten ahal da. 
DENBORAK:
  • Col de Tentes - Breche de Rolland : Bi ordu eta erdi
  • Breche de Rolland - Taillon : Ordu eta laurden
  • Breche de Rolland - Casco : Ordu eta erdi
NOLA AILEGATU:
 Lourdes hiri ezagunetik hegoaldera autobide bat hartu behar da Argeles Gazost herriraino, hemendik Luz Saint Sauveur herrira joanen gara eta gero Gavarniera. Azken herri hau gurutzatu ondotik eski estaziora (Les Especieres) igoko gara eta hau ere atzean utzita errepidea bukatzen den lekuraino joanen gara: Col de Tentes (2208m).

KRONIKA:
Akitu dugu eski denboraldia, ateraldi ederrarekin akitu ere. Egia erran, gehienetan bezala gehiago egiteko gogoz gelditu naiz, eguraldi eskasagatik nahi baino guttiago ibili bainaiz. Baina ezin delarik ezin da, eta ondokoan izan beharko. Bukaera behintzat ona eman diogu, aspertzen ez duen Gavarnieko zirku inguruan.

2018/06/19
9:05 : Col de Tentes (2207m)
Bertze behin ere ikuspegi bikaina duen lepo honetara hurbildu ginen. Elur-maila goiti dagoenean eskiatzeko aukera ematen du. Trasteak prestatu eta Bujarueloko lepora doan lehengo errepide zaharra hartu genuen.


9:40 : Port de Boucharo / Bujaruelo (2271m)
Bujarueloko lepotik Tendeñerako mendizerrara ikuspegi ederra. Oraindik metro batzuk gehiago egin beharko genituen eskiak bizkarrean.


2300 metro inguruan jantziko genituen eskiak. Ez dago gaizki ekaina akabaila izateko. Hemendik aitzin Taillonen ipar aurpegi ikusgarriaren azpiko zeharkaldi luzeari ekinen genion.


Zeharkaldia akitzen den lekuan oraindik ia abiapuntuaren parean ginen. Hemendik hegoaldera biratu eta malda anitz tentetzen da.


Lehen malda tenteen ondotik Taillongo glaziarra dagoen ingurura ailegatu ginen. Oroitzapen politak zetorzkidan burura, Taillon izan baitzen duela bederatzi urte igo nuen lehen 3000tik goitiko mendia.


Bertze malda batek Sarradetseko lepoan utziko gintuen, izen bereko mendiaren azpian.


11:27 : Col des Sarradets (2589m)
Lepo honetara ailegatzean ikuskizuna hasten da.


Gavarnieko zirkua osatzen duten menditzarrak parez pare agertzen dira, eta nahiz eta hirugarren aldia izan hemen nintzela, liluragarria iruditu zitzaidan.

Zeharkalditxo batek, zahar-berritze lanetan dagoen aterpearen ondoan utziko gintuen. Arraroa da oraindik lanak ez akituak izatea, duela bi urte Arkaitzekin hemendik pasatu nintzelarik jadanik lanean hasiak baitziren. Aterpea hetsia egonen da 2018 osoan.


Aterpea gibelean utzi eta Breche de Roland aldera zuzendu ginen. Bertako vivac batean pasatuko genuen gaua.


Bikaina da Breche de Roland. Haren azpian jartzen zarelarik bakarrik ohartzen zara bere handitasunaz.

Puntu honetan Lore bere gauerako koltxoia bidean nonbait erori zitzaiola konturatu zen eta beheiti abiatu zen haren bila. Ben eta nik aitzinera segituko genuen, gaua pasatuko genuen lekuan gauza utzi eta Taillon mendia igotzeko asmoz.


12:31 : Breche de Roland (2804m)
Lepoaren hego zein iparraldean hainbat vivac daude eta guk hegoaldeko lehena hautatu genuen gaua pasatzeko. Gauzak han utzi, zerbait jan eta edan eta Taillon aldera abiatu ginen.


Harresiaren bazterretik segitu genuen, udako bidetik hain zuzen ere. Negukoa edo eskiekin egiten dena metro batzuk hegoalderago joaten da, Taillon hego aurpegitik igotzeko, baina guk metrorik ez galtzeagatik udakoa hartu genuen.


Doigt  edo Dedo (euskaraz behatza) deitzen den harkaitzaren inguruan eskiak bizkarrera pasatu genituen berriz, eta hala eginen genituen gailurrerakoak.


Gailurra begibistan...


14:06 : Taillon (3144m)
Tontorrera ailegatzeko azken metroak gogorrak egin ziren, niretako behinik behin. Altuera nabaritzen zen.

Behin puntan, ikuspegi ederra lau haizeetara. Argazkian, Gavarnieko zirkuko 3000koak.


Eta bertze aldean Garmo Negro, Picos del Infierno, Balaitous eta Vignemale ingurua, bertzeak bertze. Castillo d'Acher eta inguruak ere ikusten ziren tontorretik.


Gailurreko egonaldiaren ondotik, mendiaren hego aurpegia eskiatu genuen udaberriko elur goxoan.


14:10 : Breche de Roland (2804m)
Berriz lo eginen genuen lekura bueltan, Lorerekin elkartu eta bazkalduta, atseden hartzea tokatzen zen. Argazkiak hartzeko eta inguruaz gozatzeko orduak genituen, ez dago horrelako telebistarik.


Astazu mendiak Brechetik...


Iparraldeko vivac batetik ateratako argazkia, Sarradets mendia ageri dela.





Goxoan, egonean...


Breche de Roland erraldoia...


Gaua pasatuko genuen vivaca, biharamunean igotzeko intentzioa genuen Casco edo Casque mendiarekin. A zer ikuspegia gaua pasatzeko.


Eguneko azken argiak Midi de Bigorren.


Gozatzen...



Eguzkia sartu ondotik lo egitera, mila izarreko hotelean. Denak ez ginen lotara sartu ordea, Benek argazki sorta ederra egin zuen gauean zehar.




2018/06/20
8:31 : Breche de Roland (2804m)
Goizeko seiak pasatxoan iratzarri ginen lasai ederrean. Gosaldu, gauzak prestatu eta goiti abiatu ginen. Ben ez zen gailurrera etorriko, gaua argazkiak ateratzen pasata nekatuta baitzegoen.


Breche gibelean utzita, harresiaren ertzetik eguneko lehen puntu beroa zeharkatzeari ekin genion.


Argazkian ikusten den zeharkaldia da, Paso de los Sarrios deitzen dena. Bidea elurra eta harresiaren artetik doa. Kranpoiak autoan utzi genituen eta zalantza genuen pasatzea lortuko ote genuen edo ez. Elurra ez zegoen gogorregia eta arazorik gabe pasatu ginen ibilbide ikusgarrian.


Zeharkaldiaren azken zatian kate batzuk daude, negurako baino udarako baliagarriak direnak.


Pausua gibelean utzi genuen, baita Breche de Roland ere.


Eta bertze zeharkaldi bat hasi genuen Sarrios leporaino. Argazki hau Benek atera zigun vivacetik, ongi begiratuz gero zeharkaldian ageri gara.


Collado de los Sarrios lepotik goiti, iparraldera biratu eta Casco eta Torre arteko malda tenteak igotzeari ekin genion. Eskiak 2840 metro inguruan utzi genituen, Cascoko azken malda esposizio handia baitu, gehienbat azken zatian. Guk elurra bigun harrapatu genuen, baina hala ere arriskutsua iruditu zitzaigun, zer erranik ez beraz elur gogorrarekin.


10:00 : Casco / Casque (3006m)
Tentsio pixka bat pasata, gailur zoragarri honetara ailegatu ginen. Niri anitz gustatu zitzaidan. Gailurretik ikuspegi ederra genuen bezperan igotako Taillon mendira.


Baita inguruko bertze 3000ko gailurretara ere.


Kaskoan...


Igoerako zati arriskutsuena saihesteko asmoz, jaitsiera mendiaren hego-ekialdetik egin genuen. Zati maldatsuagoa zen, baina ewz hain arriskutsua. Lehen metroak gibelka jaitsi genituen maldaren eraginez.


Berriz eskietara bueltan eta eguneko zatirik zailenak pasata, gozatzeko momentua zen. Elur bikaina bezperan bezala. Argazkia, Benek Brechetik egina.


Jaitsiera Breche aldera. Behitiago jaitsiko ginen gehiago gozatzeko


2640 metro inguruan, berriz foka-larruak jarri eta Breche de Rolandera itzuliko ginen. Bertan trasteak bildu eta itzulerako bidea hartuko genuen.


Taillon azpiko zeharkaldiraino eskiatu genuen, 2350 metro ingururaino. Bidea zelaitzen denean eskiak bizkarrera eta oinez autora...


13:34 : Col de Tentes (2207m)
Eta horrela akitu zen denboraldi azken eski ateraldia. Marko zoragarrian, eguraldi eta elur bikainarekin eta mila izarreko hotelean gaua pasata, ezin gehiago eskatu.

BIDEOA: