Erroibide (837m), Txurrumurru (828m), Irumugarrieta (811m), Muganix (758m)

EGUNA: 2020/07/08

IRTEERA: Arritxulo Aterpea (420m)

ZAILTASUNA: 

• Basurdeen Begiratokia II : 5b graduko eskalada
• Aiako Harrien zeharkaldia: II graduko eskaladatxo bat du Txurrumurru eta Erroilbideko kaskoen artean. Horrz gain, eskaladatxo gehiago ditu han eta hemen.

Xabier Larretxearen Eskalatzen blogetik hartutako krokisa

DENBORAK:

• Arritxulo - Basurdeen Begiratokia II bidearen hasiera: 20 minutu
• Basurdeen Begiratokia II : Ordu eta erdi
• Basurdeen Begiratokia II bidearen akabaila - Erroilbide : Ordu erdi
• Erroilbide - Muganix (gailurren zeharkaldia) : Ordu bat
• Muganix - Elurretxe : Ordu erdi
• Elurretxe - Arritxulo : Ordu eta erdi

NOLA AILEGATU:

Nire kasuan, Baztan aldetik joanda Lesakara joan eta handik Oiartzungo bidea (NA-4000) hartu behar da, Aritxulegiko leporaino. Lepoko tunela zeharkatu eta ezkerretara Arritxulo aterperako bidea hartu behar da bertan autoa uzteko. Oiartzun aldetik berriz, Lesaka aldera abiatu eta leku berera ailegatuko gara.

KRONIKA:

Euskal Herriko mendirik ederrenetarikoak diren Aiako Harrietan izan gara berriz ere, bertako bideetako bat eskalatu eta gailurren zeharkaldia egiten. Etxetik nahiko hurbil dugun paraje honek eskaladarako bide erraza eta anitzak eskaintzen ditu, ingurune zoragarrian gainera.

10:35 : Arritxulo Aterpea (420m)

Nahiko mantso abiatu ginen aterpearen ondoan autoa utzita. Hasmentan asmoa Basurdeen Begiratokia II bidea eskalatu, Erroilbideraino oinez igo eta bueltan etortzea zen, presa handirik ez genuen beraz.

Tontorretara igotzen den bidea artu eta laster begiztatu genuen eskalatuko genuen ingurua. Pareko harkaitz mailakatu horietan kokatua dago bidea.

Behin sabaidun harkaitzera ailegatuta, bide nagusia utzi eta eskuin biratu behar da.

Metro gutxi batzuetara dago gure bidearen hasmenta, harkaitz honetan hain zuzen ere. Zalantza batzuk izan genituen bidea zein zen jakiterakoan. Xabier Larretxearen Eskalatzen blogean ezkerreko lerroa dela erraten du, baina Gipuzkoako Mendi Federazioaren web orrialdean ezkerreko bi bideak Basurdearen Begiratokia II izenarekin bataiatzen dira. Gu ezkerretik hasita bigarren bidetik igoko ginen, argazkian ikusten den bi koloreko sabaitxo horren ertzetik doanetik.

• 1. luzea (4c, 30m) : Lehen metro bertikalak gaindituta, pareta etzaten da eta erraz egiten da lehen luzea helduleku paregabeak baititu bai hankentzat bai eskuentzat. Lehen bilera terraza zabal batean dago.

• 2. luzea (5b, 20m) : Lehen bilgunetik 5 bat metro ezkerrerago hasten da bigarren luzea. Gradua ematen dion zailtasuna irudian ikusten den sabaitxoa da, gure eskalada mailarako bere puntua zuena. Behin hori gaindituta erraza da. Xabier Larretxearen blogean 5a maila ematen zaio luzeari eta Gipuzkoako Mendi Federazioaren orrialdean 5b. Guk egin genuen azken luzeak 5a zuela ikusita eta hau zailagoa iruditu zitzaigunez, 5b jarri diot nik ere.

• 3. luzea (4a, 20m) : Plaka etzan batetik igotzen den luze erraza.

• 4. luzea (5a, 20 m) : Hirugarren bileratik oinez pixka bat ibili eta irudiko harkaitzera ailegatu ginen. Hemen erratu eta Basurdeen Begiratokia II bidearen azken luzea eskalatu ordez, Basurdeen Atsedenlekua izeneko bidea egin genuen. Irudiko sabaiaren ezkerretara dagoen diedrotik hasten da eta lehen txapa pasatuta eskuineko plakara pasatzen da. Lehen zati horretan daude zailtasunik handienak. Arras polita iruditu zitzaidan luze hau.

Behin eskalada zatia akituta, trasteak bildu...

...eta aurreikusia genuen bezala Erroilbidera abiatu ginen. Eskalada zatiak nahiko goiti uzten gaitu, beraz aukera ona da gailurrera igotzeko.

Inguru honetatik Donostialdeko ikuspegi ederra genuen.

Pinudia zeharkatzen...

Zelaitxo hau gurutzatuta, bideak metro batzuk galtzen ditu Erroilbide mendebaldetik inguratzen eta azken igoerari ekiteko.

Tarteka eskuak erabiliko beharreko pausu errazak...

... eta azken zatian maiz heze egoten den plakatxo etzan bat gainditu behar da.

13:14 : Erroibide (837m)
Gailurrean egun bikaina lagun, tontorren zeharkaldia burutzea erabaki genuen, gero Elurretxetik Aritxulegira PRtik itzultzeko. Bide hau bera duela bi urte eginda nuen kontrako norabidean, Muganixeko Erlaitz bidea eskalatu ondotik.

Hala abiatu ginen geldialdi luzeegia egin gabe.

Tontorren zeharkaldiak hainbat pausu ditu eta bide errazena harrapatzeko puntu gorriz markatua dago.

Txurrumurru aldera...

Bertze pausu erraz bat...

...eta berriz oinez gandorretik.

Txurrumurrura hurbildu ahala zati polit honetatik pasatzen da bidea, tximiniatxo bat jaitsi behar delarik.

Larrun ingurua Txurrumurruko azken igoerari ekin baino lehen.

Zeharkaldiaren pausurik zailenak Txurrumurrura igotzeko zati honetan daude. Hasteko irudian ikusten den Uztaiaren Pausua (II) deitzen dena. Diagonalean egiten den zeharkalditxo bat da eta justu punturik zailenean uztai bat du gainditzen laguntzeko.

Zailtasunak ordea ez dira Uztaiaren Pausuarekin akitzen. Jarraian plaka hauetatik (II) eskalatzen segitu behar da zati nahiko bertikalean.

13:32 : Txurrumurru (828m)
Eguneko bigarren gailurrera ailegatzean akitu ziren zailtasunik handienak.

Hortik aitzinera irudiko malda jaisti eta pasabide kurioso batetik pasatu ginen.

Bertze irtengune bat gainditu eta bidexka errazetik egiten da hirugarren tontorrerainoko bidea.

13:41 : Irumugarrieta (811m)
Kasko honetatik gainditu genuen zati guziaren ikuspegi bikaina dago.

Baita Txingudiko badirarena ere.

Azken gailurrerako bidea tarteka buelta eman eta inguru zoragarri honi begiratzeko geldialdiak egiten genituen.

A zer parajeak!

13:54 : Muganix (758m)
Belardi berdeen artetik ailegatu ginen azken tontorrera. Duela bi urte hau izan zen lehen gailurra, Erlaitz bidea eskalatu eta gero.

Bertatik belardi arteko bidexkatik Elurretxe aldera jaitsi ginen.

14:15 : Elurretxe (502m)
Elurretxen PRaren marka horiei segituko genien Aritxulegi aldera, Aiako Harriak mendebaldetik inguratuz.

Baso artetik egiten da bide gehiena eta eskerrak, ordu horretarako ederki berotzen baitzuen eguzkiak. Hala ere, tarteka zuhaitz artetik Aiako Harrien paretatzarrak ikusteko aukera genuen.

 15:25 : Arritxulo Aterpea (420m)
Egunaren lehen zatian eskalatutako harkaitzak begiratuz akitu genuen ibilaldia. Laugarren aldia bi urtez inguru honetan eta dauden aukera guziak ikusita berriz ere bueltatu beharko...

Erroibide (837m), Txurrumurru (828m), Irumugarrieta (811m), Muganix (758m)

EGUNA: 2018/10/13

IRTEERA: Elurretxe (502m)

ZAILTASUNA:

• Erlaitz I Bidea: 4b graduko eskalada.
• Aiako Harrien zeharkaldia: II graduko eskaladatxo bat du Txurrumurru eta Erroilbideko kaskoen artean. Horrz gain, eskaladatxo gehiago ditu han eta hemen.

DENBORAK:

• Elurretxe - Erlaitz Bidearen hasiera : Ordu bat
• Erlaitz Bidea eskalatzea : Ordu bat eta erdi
• Muganix - Erroilbide (gailurren zeharkaldia) : Ordu bat
• Erroilbide - Elurretxe (GRtik itzulia eginez) : Ordu eta erdi

NOLA AILEGATU:

Elurretxera joateko Irunera hurbildu behar da. Bertan, Olaberria auzora joko dugu eta hemen seinaleen bidez ongi markatua dagoen bidea segituko dugu Elurretxeraino.

ARRASTOA:

Powered by Wikiloc

KRONIKA:
Txikitan amatxiren etxean egoten ginelarik atentzioa deitzen zidaten bi mendik. Bata Larrun zen, baina bertzea ezezaguna nuen. Punta anitz zituen mendigunea ikusgarri ageri zen (eta da) Lapurdiko kostatik. Aiako Harriak ziren.

Aurtengo uztailean hurbildu nintzen lehendabiziko aldiz ingurura, gailurren zeharkaldia egiteko asmoz. Orduko aldian, lainoak Erroilbiden buelta hartzera behartu ninduen. Hiru hilabete geroago mendi ikusgarri hauetara itzuli eta orduko arantzatxoa atera dut, Aiako Harrietara Erlaitz I deitzen den bidea eskalatuz igota.

10:18 : Elurretxe (502m)
Etxetik presarik gabe atera eta Elurretxeko aparkaleku betean lekua bilatuta, prestatu eta lepotik bertatik Aritxulegiko aterpe aldera doan bidea hartu genuen marka zuri, gorri eta horiak segituz.

Bide hau laster utzi behar da ordea Muganixeko espoloiaren azpiko aldera joateko, gurutze hau markatuta duen zuhaitz honen ondoan hain zuzen ere. Justu ateka bat baino metro batzuk lehenago dago zuhaitz hau.

Bidexkan goiti, laster bistaratu genuen Muganix, igoko genuen lehen gailurra, eta baita bere hego-mendebaldeko espoloia ere, eskalatuko genuena.

Aipatu bidexka ez dela batere nabaria eta zaila dela segitzeko momentu anitzetan. Basotxo honetan adibidez galdu egin genuen, eta GPSari esker aurkitu genuen berriz.

Basotik aterata, Donostia aldea ikusten hasi ginen. Ikaragarria da mendi hauen edertasuna eta zer erranik ez kosaldera dituen bistak.

Txingudi aldea ere begi bistan...

Hala, ttirriki-ttarraka, hainbatetan GPSa begiratuz, eskalatuko genuen bidearen azpira ailegatu ginen.

Gauzak prestatu eta eskaldari ekin genion. Hona hemen luzeen xehetasunak:

• 1. luzea (4b, 25 metro): Luzearen hasieran dago pausurik zailena, baina erraz pasatzen da eta seguru anitz ditu. Ondore, pareta pixka bat etzaten da. Lehen bilera balkoitxo eroso batean dago kokatua.

• 2. luzea (4a, 25 metro): Lehen luzearen antzeko zailtasuna du. Zati bertikal baina helduleku anitz dituen batekin hasten da, gero pareta etzaten da eta azken zatian berriz pixka bat tentetzen da.

Bigarren bileran, 4. graduko bi luzeak akituta

Mendizaleak eskaladaren ingurutik paisaiaz gozatzen

• 3. luzea (3b, 30 metro): Luze erraza, ia oinez egiteko modukoa. Eskalatzeko paretatxo bat bertzerik ez du gorosti baten ondoan.

Eskalada laburra egin zitzaigun eta jadanik irakurria nuen bezala, gehiago egiteko gogoz gelditu ginen. Muganixetik metro gutxi batzuetara akitzen da, Txingudiko badiarako begiratoki bikainean. Trasteak bildu eta gailurren zeharkaldiari ekinen genion.

12:56 : Muganix (758m)
Aiako Harrietako lehen gailurra zapaldu genuen minutu gutxian. Ia gelditu gabe aitzinera segituko genuen...

Bidexka nabarmena da momentu guzian. Jende anitz ibiltzen diren mendiak dira. Normala. Guk ere mendizale anitz harrapatu genuen hego haize goxoaz disfrutatzen.

Bidetik eskalatutako pareta begiratzen gelditu ginen momentu batean.

Bertze aldean, ondotik igoko genituen tontorrak. Ikusgarria!

13:12 : Irumugarrieta (811m)
Oinez ailegatu ginen eguneko bigarren tontorrera eta hemen bai, gailurreko argazkia egiteko behintzat geldialditxoa egin genuen.

Irumugarrietatik aitzin hasten dira gailurren zeharkaldiko zailtasunak. I. graduko eskaladatxoak daude Txurrumurruko bidean...

Jaitsi beharreko paretatxo bat...

13:27 : Txurrumurru (828m)
Zailtasun handirik gabe harrapatu genuen hirugarrena ere...

Txurrumurru eta Erroilbide artean dago zeharkaldiko zatirik zailena. Lehenik, plaka batzuk jaitsi behar dira...

...eta jarraian Uztaiaren Pausua deitzen den zatia pasatu behar da. II. graduko pausua, zeharka gainditzen den pareta bat da, eta uztai bat dago jarrita punturik kritikoena gainditzen laguntzeko.

Pausua gaindituta Erroilbiderako genuen zatia begiratzen.

Bertze eskaladatxo batzuk egin behar dira, baina hauek aise errazagoak dira.

Txurrumurruko tontor ikusgarria gibelean utzi genuen. Hor daude kokatuta ibilbideko punturik zailenak.

Zoragarria Txurrumurruko koadroa, itsasertza gibelean duela... Ez dago urrun joan beharrik leku politak ezagutzeko.

Azken maldatxo batetik Aiako Harrietako tontorrik altuenera ailegatu ginen.

13:53 : Erroilbide (837m)
Hiru hilabete geroago berriz ere gailur honetan nintzen, baina oraingoan lainorik gabe eta ibilbide ikusgarria burututa. Poza handia zen beraz. Geldialdia egin genuen zerbait jan eta inguruaz gozatzeko.

Ondoren Aritxulegi aldera jaisten hasi ginen, uztailean igo nuen bidetik. Pasatutako tontor guziak begibistan genituen. Jaitsierako lehen zatian bidexka heze eta irristakorra pasatu behar da eta hor hartu genituen ipurdikorik handienak.

Ondoren bidexenda erosoagoa da. Erroilbide gibelean dotore!

Pinudi bat zeharkatzen...

Aiako Harrietara bista ederrak jaitsieran...

Hemen gailurrak zoomarekin. Ezker-ezkerrekoa da igo genuen pareta.

Bidegurutze honetan, Aritxulegira doan bidea utzi eta Elurretxera eramanen gintuen GRa hartu genuen, marka zuri, gorri eta horiak jarraituz.

15:39 : Elurretxe (502m)
GRak Aiako Harrien azpitik zeharkaldia egiten du eta zati hau luze samar egin zitzaidan trastez betetako motxila pisuaren ondorioz. Hala ere, kontent ailegatu ginen etxera, jarduera bikaina egin izanaren sentsazio goxoarekin!

BIDEOA: