Adishi - Ushguli

EGUNA: 2022/07/15

ABIAPUNTUA: Adishi (2128m)

ZAILTASUNA: Erraza

DENBORAK:

• Adishi - Chkhunderi Pass : 2 ordu eta erdi
• Chkhunderi Pass - Karetta Pass : 3 ordu
• Karetta Pass - Ushguli : 2 ordu eta erdi

ARRASTOA:

Powered by Wikiloc

KRONIKA:

Svanetiko zeharkaldiaren hirugarren etapan Mestia-Ushguli trekkingaren saihesbide bat eginen genuen, berezko bidea baino aise basagoa eta nire ustez interesgarriagoa ere bai. Khaldeko glaziarraren gainetik pasatuko ginen, eta Karettako lepotik Georgiako mendirik altuena den Shkhara handiaren azpira pasatuko ginen Ushgulira herriaren gaineko aldetik ailegatzeko.

6:56 : Adishi (2128m)

Aitzineko egunetan baino goizago ekin genion egunari, etaparik luzeena baikenuen aitzinetik. Guest Housean gosaria zrtziak arte ematen ez zutenez, pic-nic boltsa hartu eta gure kontu gosalduta abiatu ginen.

Herrian ordurako mugimendua hasia zen: behiak larrera igortzen, joan-etorriak lurrezko karriketan...

Gu Adishiko glaziarretik beheiti jaisten den errekak sortutako bailra politean goiti hasi ginen igaten.

Eguna zoragarria genuen, hiru egunetatik ederrena. Gibeleko aldean Ushba handia dotore ageri zen bertze guzien gainetik.

Eta gure ezkerretara inguruko bertze menditzar bat: Tetnuldi.

Igoera etzan baten ondotik irudiko lautadatxora jaitsiko ginen erreka zeharkatzeko.

Goizeko lehendabiziko orduetan erreka nahiko apal harrapatu genuen (argazkian ez da ageri). Baina egunak aitzinera egin ahala emaria igaten da eta zailtasunak izaten ahal dira gurutzatzeko. Goizeko hamarretatik aitzin Adishitik zaldiekin igaten dira 25 GELen truke jendea errekaren alde batetik bertzera pasatzeko. Nahiko garesti egia erran...

Erreka zeharkatuta landareria arteko bidexkak goiti egiten du Chkhunderiko lepoaren bila. Ur eta lohi aunitz duen bidexka da, zangoak busti-busti egiteko modukoa.

9:13 : Chkhunderi Pass (2722m)

Lore arteko bide politetik ailegatu ginen eguneko lehen lepora.

 

Inguruan loreak eta gibelean mendi eta glaziar ikusgarriak. Paisaia aldetik etaparik ikusgarriena izan zen hirugarren hau.

Lepotik Adishiko bailara eta Ushba inguruetara ikuspegi bikaina dago.

Bertze aldera Khaldeko bailara eta Lagemeko lepoa genituen. Lepo horretatik ere Ushguliko bailarara pasatzeko aukera dago. Ushgulirako bide arruntena, berriz, bailarara jaitsi eta Khalde herrixkatik barrena Ipralira joaten da.

Guk lepoan berean bide arruntena utzi eta ezkerretara biratuko ginen bizkarrez bizkar ibilaldi ikusgarria hasteko.

Bidexkarik ez dago bizkar berdean baina arazorik gabe egiten da bidea, inguruko guziak liluratuta.

Gainez gain zati bat eginda, lepotxo batera jaitsi eta eskuinetara bizkarra utziko genuen Khaldeko glaziarrera eramanen gintuen jaitsiera hasteko.

Hortik aitzinerako bidea intuizioz egitekoa da. Intuizioz eta GPSaren arrastoaren laguntzaz. Itxura batean belardi errazak zeharkatzea bertzerik ez da, Khaldeko glaziarra zeharkatu eta argazkian parean ikusten den Karettako lepora igateko. Belardiak, ordea, nahiko deserosoak dira, zati anitzetan landare luzeekin aitzinera egitea zailtzen dutenak.

Jaitsiera bizkarrak bilatuz egin genuen, landareak motzagoak baitziren bertan. Khaldeko glaziarraren morrenara ailegatu ginen honela eta bertatik zati bat igan genuen glaziarrera jaisteko puntu egokienaren bila. Eguneko harri-mukuru bakarrak inguru honetan harrapatu genituen.

Glaziarrera jaitsi eta hau estaltzen duten harrien gainetik zeharkatu genuen. Ez zuen iduri glaziar baten gainetik genbiltzanik.

Glaziarraren bukaeran berriz ere landareria artera pasatu ginen, eta belar eta arbolatxo artean bidea bilatuz egin genuen Karettarako igoera. Parean 5000 metrotik goitiko menditzarrak, Kaukasoko mendirik altuenak daude inguru honetan.

Belaun eta izterretara ailegatzen zen landareria trinko arteko igoera gogorra egin zitzaigun. Atsedenaldietan inguruko edertasunaz gozatzeko aukera genuen behintzat...

Altuera irabazi ahala landareria ez zen hain trinkoa eta horrek ibiltzea errazten zuen.

Karettako lepoa hurbil genuen jadanik...

12:44 : Karetta Pass (3022m)

Leporako azken metroak gogorrak egin zitzaizkigun altueragatik edo. Eguneko igoerak akituta, bazkaltzeko geldialdia egin genuen.

Geldialdiaren ondotik, Ushguli alderako jaitsieran ere landare trinkoak harrapatuko genituen.

Shkhara menditik beheiti jaisten den errekatxoaren ondotik egin genuen jaitsiera, belar gutien zuten zatiak bilatuz. Hala ere, zatiren batean bularrerainoko landareekin aritu behar izan genuen borrokan.

Noizbait ere Langemeko lepotik jaisten den bidexka harrapatu genuen eta hortik beheiti aise errazago eginen genuen bidea. Urrunean Ushguli zoragarria ikusten hasi ginen...

16:39 : Ushguli (2149m)

Shkharako glaziarrera doan pista zabaletik ailegatu ginen Ushguli ederrera. Bertan akitu zen gure zeharkaldia.

Bortz herrigunek osatzen dute Ushguli, Europako herririk altuena omen dena. Orain 70 bat familia bizi dira bertan.

Svanetiko bertze herriek bezala, XII. mende inguruko dorreak ditu, defentsarako eraiki zirenak. Gibelean Georgia mendirik altuena den Shkhara 5193 metrorekin.

Gaua bertan pasatuko genuen eta egunean zehar herri hau bisitatzen duten turistak joanda, bere benetako aurpegia erakutsi zigun Ushgulik.

Ilunabarra...

Biharamun goiza ere bertan pasatu genuen, herriaren txoko guziak ezagutuz.

Oraindik jende sobera ez dabilen herrialdea da Georgia, bere altxorrak gordetzen dituena. Bertze mendi batzuk ezagutzeko asmoz hurbildu ginen hara, baina mendien azpian bizi den herriak mendiek bezain bat harritu gaituzte.

BIDEOA:

Mestia - Adishi

EGUNA: 2022/07/14

ABIAPUNTUA: Mestia (1442m)

ZAILTASUNA: Erraza

DENBORAK:

• Mestia - Chvabiani : 4 ordu 
• Chvabiani - Adishi : 3 ordu

ARRASTOA:

Powered by Wikiloc

KRONIKA:

Gure zeharkaldiaren bigarren egunean Mestia eta Ushguli arteko trekking ezagunaren bidean sartuko ginen. Aitzineko erreportajean erran bezala, hau lau egunez egiten da normalean, baina gure intentzioa biz egitea zen. Gainera, Mestia eta Adishi artekoa izanen zen bide ofizialetik eginen genuen bakarra, biharamunean saihesbide bat hartzeko asmoa baikenuen.

8:53 : Mestia (1442m)

Guest Housea utzi, kafetegi batean gosaldu eta Svanetiko hiriburutik abiatu ginen. Inguru honetako ezaugarri diren defentsa dorre aunitz ditu Mestiak, nahiz eta ez herri ttipiagoen xarmarik izan.

Lehen metroak errepide batetik egiten dira eta geroago pista zabal batetik. Bizi-bizi egin genuen zati hau, etapa gehiena bezala, egia erran...

Mestia gibelean jadanik...

Pistak eskuinetara biratzen den bidexka bati uzten dio eta lekua; eta malda tente bat gainditu eta gero, bidexka etzan egiten da belardi politen artean barneratuz.

Egun honetan Ushbaren ikuspegirik ezagunena genuen parez pare. Bi puntak osatzen dute mendi hau eta nolabait Kataluniako Pedraforca mendiaren antza hartzen genion. Hori bai, bi mila metro gehiagorekin...

Arbolapeko bertze malda batek zelai eder honetan utzi gintuen. Eguneko lehen igoera zatia akitua genuen.

1906 metroko lepo zabal honetan akitzen da lehen igoera, Zabeshirako etapa arrunta egiten dutenendako igoera bakarra.

Hortik aitzin hainbat herrixka dituen bailara politean barneratu ginen poliki-poliki.

Murshkeli herritik pasatzen da bide arrunta, baina guk bailararen ezkerreko magaletik doan bidexka bat hartu genuen pista gutiago izateko.

Belardi arteko bidexka lasaia da.

Zhamushi herriraino eramanen gintuena...

Zhamushiko karrikak zeharkatu eta bide arruntarekin elkartu ginen berriz.

Eta baita Mestiarako bidean ezagutu eta bezperan afaria konpartitu genuen bikote bretoiarekin ere. Haiekin eginen genuen zati bat.

Majvdieri herritik pasatu ginen pistaz pista...

...eta pistak Mulkhra erreka zeharkatzen duelarik, hau utzi eta errekaren bazteretik doan bidexkari segitu genion. 

Zati batean igaten da bidea errekaren bazterretik hau zeharkatuko duen zubiaren bila.

Erreka utzi eta Chvabiani herria hurbil genuen. Bertan bereiziko ziren gure bideak. Haiek etapa arrunta eginen zuten eta beraz ondoko Zabeshi herrian geldituko ziren. Guk, aldiz, bi etapa elkartu eta Adishi herriaraino segituko genuen.

12:13 : Chvabiani (1626m)

Herrian geldialdia egin genuen zerbait jan eta bertako batzuk hurbildu zitzaizkigun. Svan hizkuntza eta georgiera dira haien hinkuntzak eta beraz ez da erraza komunikazioa...

Geldialdi luzearen ondotik goiti segitu genuen. Tetnuldiko eski estaziora 800 metroko igoera genuen.

Herriraren gaineko belardi politetatik lehenik...

...eta baso batetik gero. Betiere malda tentea gainditzen du bidexka eta atsedenerako tarte guti uzten du.

14:06 : Tetnuldi Ski Resort (2464m)

Bidexkatik eski estazioko pistetara atera ginen eta hauetatik segitu genuen igaten tarte batean. Hemen bi aukera daude: 2400 metro ingurura igatea edo 2700 metrora. Guk lehena hartu genuen, jadanik nahikoa igan baikenuen ordurako eta eski pistetatik ibiltzeak ez baitzigun plazer berezirik sortzen. 2464 metrora eskuinetara bidexka bat ateratzen da eta hari segituko genion. Seinalea badu, baina erne egoon behar da ikusteko.

Ordu horretarako hodei ilunak zerua estaltzen hasiak ziren ikuspegia pixka bat murriztuz.

Eski estaziotik Adishirako bidexka arras erosoa da, beheranzko joerarekin eta inguruan landareria oparoa duela.

15:24 : Adishi (2128m)

Eta bat-batean bihurgune bat hartu eta Adishi herria agertu zitzaigun parez pare. Bailara polit batean kokatua dago herri ttipi hau eta bertara pistaz bakarrik ailegatzen ahal da.

Herriko hilerria...

Urte osoan zehar bederatzi familia bizi omen dira bertan. Ez da erraza izanen negua inguru honetan eta ikusten da garai batean aise jende gehiago biziko zela, herriko etxe aunitz eroriak baitaude.

 

BIDEOA: