2013/12/15

Burcq (2105m)

EGUNA: 2013/12/15

IRTEERA: Parking de Labrenere (1112m)

ZAILTASUNA:
- Alpinismo zailtasuna: PD
- Eski zailtasuna: S3

DENBORA:
- Igoera: 3 ordu
- Jaitsiera: Ordu eta erdi

NOLA IRITSI: 
Labrenereko aparkalekua Lescun herritik gora dago. Lescunera iristeko, gure kasuan, Nafarroa Beherea eta Zuberoako probintziak zeharkatzea da lasterrena. Donibane Garazi, Lartzabale, Maule eta Atharratze herriak pasata, Montori herrian utziko ditugu Euskal Herriko lurrak. Lanne en Baretous herrira ailegatuko gara hurrena eta herri hau pasata eskuinetara Arette herrira doan bidegurutzea ikusiko dugu. Bertara joanen gara. Arettetetik Issor herrian barrena, Aspeko bailarara iritsiko gara. Behin hemen, Zaragozako norabidea hartuko dugu eta kilometro batzuz bailara sartu ondotik, eskuinetara Lescun herrira doan desbideratzea aurkituko dugu. Puntu honetara Pirinioen hegoaldetik ere irits daiteke, Jaca eta Somporteko tunelean barrena. Lescun herrira iritsi baino pixkat lehenago, Labrenereko aparkalekura gidatuko gaituzten seinaleei segiko diegu.

DESKRIBAPENA:
Abenduko etengabeko antizikloia aprobetxatzen segitu beharra zegoen, eguraldi txarreko asteburuetan on hauetaz ez oroitzeko. horretarako jadanik eskasten hasia den elurraren bila jo genuen Lescun aldera. Preseski, Acheritotik ekialdera doan mendi lerroko tontorren bat igotzea zen gure asmoa. Iparraldeko aurpegitik igoko ginen eta horrela elur gehiago harrapatzea zen asmoa.

8:46 : Parking de Labrenere (1112m).
Bezperan egin genuen aparkalekurainoko bidea eta afaldu ondotik, gau epel xamarra pasa genuen bertan. Inbertsio termikoa zela eta, tenperaturak ez ziren zeropertik jaitsi gau osoan. Zortziak inguruan ernatu, presarik gabe gosaldu eta gora abiatu ginen.


Eguzki izpiek gure helburu ziren tontorrak inguratzen zituzten jadanik.


Lehen metroak errekaren ezker aldetik egin genituen, elurtutako pista batetik metroak poliki irabaziz. Eguna epel zegoen, hego haizeari esker.


Itchaxeko zubitik erreka eskuin aldera zeharkatu eta zonalde honetan ohikoak diren elur-jauzietako bat zeharkatu genuen. Amildegia mendebaldetik ixten duten mendiak oso tenteak eta belartsuak dira eta beraz, elurra egin eta ondoko egunetan ohikoak dira tamaina handiko elur-jauziak inguru honetan.


9:54 : Cabanes d'Itchaxe (1450m).
Bailaratxoan gora, zuhaitzak utzi eta lehen lautadatxo batera ailegatu ginen. Hemn hainbat txabola daude, gehienak egoera txarrean.


Parean genuen jarraitu beharreko zatia. Momentu guztian errekaren eskuineko aldetik altuera irabaziaz. Ikusten denez, bailara ixten duten hego mendebaldeko orientazioko magalak elurrik gabe zeuden ia-ia. Parean genuen Laristeko lepoa ere oso justu ikusten zen, beraz gure hasierako helburua zena alde batera utzi genuen.


Altuera irabazten poliki-poliki errekaren eskuin aldetik.


10:25 : Cabanes de Bonaris (1700m).
Bapatean amildegitik irten eta mendiz inguratutako zirku polit batera iritsi ginen. Txabola batzuk ere bazeuden bertan. Hoietako dotoreenak zati libre bat dauka mahai eta aulki batzuekin. Lautada honetan bereizten dira Lariste eta Burcq mendietara doazen bideak. Lariste mendia eskuinetan , eguzkitan ageri dena, nahiko justu zegoenez, ezker aldera jo genuen, Burcq mendiaren bila.


Berriz ere mendien itzalean txabolak gibelean genituela.


Hegoaldeko norabidean segitu genuen eta gure helburua ikusi genuen aurrez aurre: Burcq mendia. Lehendabizi, irudian ikusten den Pauko lepora iritsi behar da eta gero bere ezkerretan dagoen mendira igo. Ez da zuzenean igotzen ordea. Lepora iritsita, mendia inguratzen hasi behar da bere hegoaldeko maldaren bila, bertatik igotzeko.


11:37 : Col de Pau/Puerto del Palo (1942m).
Lepora iritsita Ozako aldetik igotzen den bidea bistaratu genuen. Elur gutxi zonalde honetan, hori bai elurra dagoenerako aukera pila eskaintzen ditu. Atzean berriz, Alanoak eta aste bat lehenago igotako Acherito ikusgarria bertzeak bertze.


Lehen erran bezala, mendia inguratu behar da bere hegoaldeko maldaren bila.


11:50 : Col de Burcq (2063m).
Mendia inguratuz tontorraren hegoaldera gelditzen den lepotxo batera iritsi ginen. Hemendik arista zabal eta erraz batek tontorrera eramanen gintuen. Irudian lepotxoa eta atzean Collarada, Aspe; Bisaurin eta Castillo d'Acher mendiak bertzeak bertze.


Ipar mendebaldean berriz Gorreta de los Gabatxos, Chinebral de Gamueta, Acherito, Sobarcal, Petretxema, Hiru Erregeen Mahaia eta Auñamendi, ezkerretik eskuinera.


11:55 : Pic de Burcq (2105m).
Hego haizeak nahiko zakar egin zigun ongi etorria kaskoan. Hala ere, egun bikaina genuen eta ingurua ere halakoa.


Igo berri genuen lepora bista, atzean Lariste mendia duela. Urrunago berriz, lehen aipatutako mendiak Lescungo zirku ederra itxiz.


Lescun eta Aspeko bailara iparraldean.


Ipar ekialdean Sesques eta Midi d'Ossau nabarmentzen ziren bertzeen gainetik. Hurbilago berriz, Labigouer mendiko mendebaldeko malda bikainak erakartzen zuen gure begirada.


Tontorra...


Gailurraz pixkatean gozatuta beherakoari ekin genion. Elur ona harrapatu genuen, baina gutxi xamar tokika. Hala ere, ederki gozatu genuen lehen zatian.


Txaboletatik behera, elur goxoarekin eta Labigouer mendia zelatari genuela.


14:00 : Parking de Labrenere (1112m).
Hala azkeneko pista zatia ahal genuen bezala pasaz berriz aparkalekura ailegatu ginen. Paraje ederrean egun polita osatuz...


Zoragarri zegoen Lescungo zirkua arratsalde apaleko argitan.


Acherito, Sobarcal, Petretxema, Ansabereko Orratzak, Dec de Lhurs...


...liluratuta gelditu ginen inguruko edertasunarekin.


Honela ba, Lescun herria agurtu genuen. Mila aukera desberdineko paraje zoragarria!


Akitzeko, pasa genuen egun ederraren laburpenarekin bideotxo bat (klikatu ahalik eta kalitate handienean):



2013/12/08

Mallo d'Acherito (2378m)

EGUNA: 2013/12/08

IRTEERA: Refugio de Linza (1340m)

ZAILTASUNA: 
- Alpinismo zailtasuna: PD. Azken malda arriskutsua izan daiteke, 40 gradu inguruko inklinazioa hartzen baitu.
- Eski zailtasuna: S3

DENBORAK:
- Igoera: 3 ordu eta erdi
- Jaitsiera: 2 ordu

NOLA IRITSI:
Iruñeatik Jaca aldera doan autobidetik jarraituko dugu Irunberri herriko irteeraraino. Hemen aterako gara eta Irunberri herritik Nabaskoitze herrira doan errepideari segiko diogu. Behin Nabaskoitzera iritsita, Coronaseko lepoan barrena Erronkariko ibarrera pasako gara. Burgi, Erronkari, Urzainki eta Izaba herriak gibelean utzita, eskuinetara Zurizara doan errepidea hartu behar da. Hemendik Linzako aterperaino joango gara.

DESKRIBAPENA:
Larunbatean hainbat motibogatik Acherito mendia igotzeko ideiaz aldatu eta Chinebral de Gamueta igo ondotik, igandean goizago abiatu eta berriz saiatzea erabaki genuen. Bigarren saiakera Foyas del Ingeniero bezala ezagutzen den eremu ikusgarritik eginen genuen, elur gehiago harrapatuko genuelakoan eta eskiak bizkarrean beharrean hanketan eramateko intentzioarekin. Eta halaxe izan zen. Toki hotza da Foyas del Ingeniero. Neguan hilabete askoz eguzki izpiek ez dute ukitu ere egiten. Hortaz, bertan oraindik elur hautsa dago.

9:10 : Refugio de Linza (1340m).
Autoz betetako aparkalekuan aparkatu eta ipar-eskiko pistetatik ekialderuntz abiatu ginen.



Gure gibelean, bezperan bezala Txamantxoia ikusgarri zegoen goizeko eguzki izpi gorrixketan.


Pistak gibelean utzita pagadi batean sartu ginen.


Pagadia metro gutxi irabazita zeharkatzen da eta jarraian Foyas del Ingenieroko parajean barneratu ginen. Zulo antzekoak dira eta bi daude. Lehena, irudikoa, bi aldetatik gainditu ahal da. Eskuinetik, zeharkaldi espuesto xamarra eginda (kontuz elur jauzi arriskua badago) edota ezkerreko elur malda tentetik. Gure kasuan, gorakoan eskuineko zeharkaldia hautatu genuen eta jaitsierarako malda zabal eta tentea.


Zeharkaldian. Aitzinago pausu estuago bat du, ezkerretara erorketa dexentearekin.


Behin lehenengo Foya gaindituta bigarrenera iritsi ginen. Hemendik jadanik Acheritoko gailurra ikusten zen.


Bigarren Foya ere igoeran eskuinaldetik gainditzen da, baina askoz ere errazagoa da. Foyaren ondoan gelditzen den balkoi antzeko batetik joaten da bidea.


Erraza izateaz gain, ingurua zoragarria da. Benetan merezi du elurrarekin bertatik fokeatzeak, ia jaitsieran bezainbat disfrutatu nuen zonalde honetatik igotzean. Irudian, Petretxema, Sobarcal eta Acherito mendiak. Acherito mendiaren eskuinaldean, Foyas del Ingenierotik Collada del Huertoko lepora ateratzen den kanala ikusten da.


11:59 : Collada del Huerto d'Acherito (2173m).
Honela ba bigarren Foyatik kanalean gora igo eta tubo batzuk gaindituta, azken maldaren azpikaldera iritsi ginen. Puntu honetan jaso genituen lehen eguzki izpiak eta baita eskertu ere. Lepoaren bertze aldera ezin da pasa, amildegia baitago, baina ikuspegia paregabea da Castillo d'Acher, Bisaurin eta enparauekin.


Lepotik gora azken malda bertzerik ez zen gelditzen. Tente xamarra da eta oraindik gogor xamar zegoenez kutxilak jarri behar izan nituen.


Maldak arista uzten dio lekua. Puntu horretan utzi nituen eskiak eta azken metroak oinez egin nituen harri dexente baitzeuden agerian.


12:34 : Mallo d'Acherito (2378m).
Eta azkenean gailurra! Ikuspegi ederra genuen. Lehen planoan Sobarcal eta Petretxema, atzerago berriz, Hiru Erregeen Mahaia eta Auñamendi.


Bezperan igotako Chinebral de Gamuetaren ipar aurpegia eta kresta ederrak dira Acheritotik ikusita.


Eta behean Lescun eta bere zirku bikaina. Urrunean Sesques mendia ere ageri zen zuri-zuri.


Gozamena...


 Erdialdeko Pirinioa, beti bezala Midi d'Ossau nabarmenduz. Vignemale ere ikus zitekeen.


Zer bait jan eta gailurraz pixkatean disfrutatu ondotik, beherakoari ekin genion. Arista zabaletik, itzaletan, Foyas del Ingenieroko parajea ikus daiteke.


Maldaren goikaldean eskiak prestatu nituen eta beheiti! Elurra transformatzen hasia zen eta egoera onean zegoen eskiatzeko. Elur gogorrarekin arriskutsua izan daiteke, maldaren ekialdean amildegia baitago Oza aldera, baina egoera onean gozamen hutsa da. Gainera malda osoa niretzat bakarrik zegoen, ez baitzen eskiatzaile gehiagorik igo egun horretan.


Malda gibelean utzita itzaletan sartu ginen berriz eta bertan elur hauts goxoa aurkitu genuen. Irudian, eskuinetan jaitsitako tubo politetako bat.


Zoragarria da paraje hauetan bakarrik eskiatzea.


Pagadian arratsalde izpi gorriek inguratu gintuzten...


14:52 : Refugio de Linza (1340m).
Berriz, arratsalde apaleko  eguzkitan iritsi ginen autora, asteburu bikainari bukaera emanez. Aspaldian igo nahi nituen bi eskiko klasiko igota...


2013/12/07

Chinebral de Gamueta (2312m)

EGUNA: 2013/12/07

IRTEERA: Fuente de los Clerigos (1240m)

ZAILTASUNA:
- Alpinismo zailtasuna: PD
- Eski zailtasuna: S3

DENBORAK:
- Igoera: 3 ordu
- Jaitsiera: 2 ordu

NOLA IRITSI: 
Iruñeatik Jaca aldera doan autobidetik jarraituko dugu Irunberri herriko irteeraraino. Hemen aterako gara eta Irunberri herritik Nabaskoitze herrira doan errepideari segiko diogu. Behin Nabaskoitzera iritsita, Coronaseko lepoan barrena Erronkariko ibarrera pasako gara. Burgi, Erronkari, Urzainki eta Izaba herriak gibelean utzita, eskuinetara Zurizara doan errepidea hartu behar da. Zuriza eta Linza lotzen dituen pistan, Linzara iritsi baino lehenxeago dagoen zabalune batean utziko dugu autoa.

DESKRIBAPENA:
Astebururako iragarrita zegoen eguraldi zoragarria ezin pasatzen utzi eta Zurizako aterpera joan ginen bertatik mendiren bat edo bertze egiteko intentzioarekin. Ortziral gauean gaua pasa eta larunbatean eginen genuen lehen irteera (agian bakarra), printzipioz Acherito mendi aldera. Elur gehiena bertan zegoelako hautatu genuen Acherito eta intentzioa eskiatzea zenez...

Larunbatean goizeko 7etan ernatu ginen baina azken orduko arazotxoak tarteko, ezin izan ginen bederatzi eta erdiak baino lehen martxan jarri.

9:24 : Fuente de los Clerigos (1240m).
Gauzak prestatuta, Txamantxoia mendi argi izpi ederrek argitzen zutela, Linzako eta Fuente de los Clerigoseko bidea elkartzen diren pausuaren bila abiatu ginen.


Lehen zatitik elur biguina harrapatu genuen. Pagadietan oraindik aitzineko asteburuko elur hautsa zen nagusi. Fokeatzeko primerakoa, baina erraketarik gabe ibiltzeko ez hainbertze...


9:59 : Paso del Caballo (1429m).
Linzako aterpera joateko pasatu beharreko pausu ezaguna gure ezkerretara utzi genuen eta arrasto nabarmenetik goiti segitu.


Bertze pagadi zati batek ondoko mugarrira eramanen gintuen.


10:32 : Paso de l'Onso (1622m).
Ohianaren irteeran lepotxoa zeharkatu genuen Txamantxoia gibelean genuela.


Igo beharreko ondoko malda begibistan genuen, baina lehenik metro batzuk galdu behar genituen txapazko aterpe bateraino.


Malda tentetzen joan ahala, elurra gutxitzen hasi zen. Elurtean izandako haizeteek elur guztia leku babestuagoetara eraman zuten.


Beraz, malda igota eskiak bizkarrera. Aitzinean genuen Acherito mendia jadanik, baina bertze baterako uztea erabaki genuen eta hurbilago gelditzen zen Chinebral de Gamueta mendirantz abiatu ginen. Puntu honetatik gailurreraino eskiak bizkarrean eraman behar izan nituen. Nire esperantza bakarra mendiaren hego aurpegian elurra topatzea zen...


Bizkarrez bizkar sasigailurrera iritsi ginen eta benetako gailurra aitzinean agertu zitzaigun. Nire zorionerako hego aurpegia eskiatzeko moduan zegoen eta elurra ira gailurreraino iristen zen. Eskerrak!


Hiru Erregeen Mahaia eta Petretxema gailurrera iritsi aitzineko bretxatik. Puntu honetan utziko nituen eskiak eta hemendik behera elur jarraia topatu nuen kotxeraino hego aurpegian eta Gamuetako amildegian barrena.


12:51 : Chinebral de Gamueta (2312m).
Gailurrean, igoeran bezala primerako giroa zegoen, tenperatura goxoa eta haizerik batere ez. Lehen begirada erdialdeko Piriniora, dena zuri-zuri.


Iparraldean ezkerretik eskuinera Auñamendi, Hiru Erregeen Mahaia, Petretxema eta Acherito.


Mendebaldean duela gutti bisitatutako Castillo d'Acher mendia, gibelago Bisaurin duela.


Gailurreko argazkia!


Eta Iruñeako Anaitasuna mendi taldeak jarritako postontzia.




Ordubete inguruan gailurraz gozatzen egon ondotik, beherakoarik ekin genion. Bretxara jaitsi, eskiak prestatu eta lehen elur mingainetatik beheiti abiatu nintzen. Elurra primerakoa! Udaberriko elurra udazkenean.


Hegoaldeko aurpegiko elur mingainak aprobetxatuz Gamuetako amildegiaren beheko partera iritsi nintzen. Hemendik aitzin ere elur ona aurkituko nuen, kasu honetan hautsa.  Gibelean Gorreta de los Gabatxos eta Anzotiello mendiak beren pitzadurarekin.


Azken metroak elur hautsetik...


Ezkerretara utzi nuen Plana de Diegoko aterpea.


Abiapuntua ezin zen urrun egon.


15:30 : Fuente de los Clerigos (1240m).
Horrela, egunaren azken izpiek argitzen zutela, abiapuntura iritsi ginen berriro mendebaldeko Pirinioko klasiko batean disfrutatuta.


Akitzeko eguneko bideoa ikusgai. Jaitsierarik gabe dago, bateriarik gabe gelditu bainintzen.