Storgalten (1219m)

EGUNA: 2024/03/31

ABIAPUNTUA: Lenangsstraumen (16m)

ZAILTASUNA: S3

DENBORAK: 

• Igoera: 3 ordu eta erdi
• Jaitsiera: Ordu eta erdi

ARRASTOA:

Powered by Wikiloc

KRONIKA:

Igandea. Hirugarren eguna Norvegian. Eguraldi ona iragarrita zegoenez, bezperakoa baino mendi ateraldi luzeagoa egiteko asmotan utzi genuen etxea. Penintsularen iparraldera joko genuen, Storgalten ezaguna igatera. 1200 metrotik goitiko desnibela duen mendiak eskiatzeko malda ederrak ditu eta ez da zaila, horregatik da ezagun.

11:55 : Lenangsstraumen (16m)

Autotik goiti arrasto nabarmena segitzen hasi ginen. Hasmentatik, arrasto kopurua zela eta, garbi ikusten zen Storgalten mendi ezaguna zela.

Eski pista bat iduri zuen lehen zatiak...

Azpiko zatian eguneroko urki basoa zeharkatu behar izan genuen, aitzineko egunetakoa baino bakanagoa.

Eta urkiak gibelean utzita bailaratxo batean goiti egin genuen. Puntu honetatik gailurrerainoko bide osoa begien bistan genuen.

Malda erraz eta zabaletatik gailurraren iparraldean kokatuta dagoen leporantz zuzendu ginen. Igan ahala, zeru oskarbiarekin hasitako eguna hodeiez estaltzen hasia zen eta hotza nabaria zen.

Malda konstantea taldearen goitiko partean pixka bat tentetzen den irtenguneak hausten du. 35 bat gradutara iganen da malda puntu horretan, baina esposiziorik ez du eta zailtasunik berezirik ere ez.

Lepora ailegatzean eskuinetara biratu eta aipatutako malda iganen genuen. Zati hormaturen bat bazuen ere, arrasto markatutik arazorik gabe gainditu genuen zatirik tenteena.

Hortik goiti malda berriz ere etzan egiten da eta zailtasunik gabe ailegatuko ginen gailurreraino. Hodeiek zerua kasik estalia zuten ordurako, baina ikuspena ez zuten aunitzik trabatzen. Gainera, beheitiago genuen haize fina ez zen nabaritu ere egiten eta hotza aiseago jasaten zen.

14:32 : Storgalten (1219m)

Gailurrera ailegatuta berriz ere zerua garbitzen hasi zen eta inguruaz gozatzeko aukera izan genuen.

Hegoaldera Gamvikblaisen izeneko glaziarrera ikuspegi zoragarria zuen. Hau izan zen Norvegiako egonaldian ikusten genuen lehena.

Jaitsieran elurrik onena gaineko maldan eta lepotik beheitiko lehendabizikoan harrapatu genuen. Hortik aitzin aldakorrago zegoen elurra eta ez zen hain gozagarria.

Azpiko zatian Galtdalen errekaren bertze aldetik eskiatu genuen, arrasto gutiago zuten zatiak bilatuz. Argazki honetan inguru horretatik gailurrera genuen ikuspegia ikusten da. Agerikoa da eskiatzeko mendi bikaina dela.

15:48 : Lenangsstraumen (16m)

Hasi bezala, zeru oskarbiarekin akitu genuen eguna, bidaiko lehen mila metrotik goitiko mendia eskiatuta. Zati zelairik gabeko 1200 metroko jaitsiera aski ongi emana diote mendiari duen fama.

 

Rundfjellet (768m)

EGUNA: 2024/03/30

ABIAPUNTUA: Sor-Lenangen (13m)

ZAILTASUNA: S2

DENBORAK:

• Igoera: 2 ordu
• Jaitsiera: 45 minutu

ARRASTOA:

Powered by Wikiloc

KRONIKA:

Bezperan Norvegiako astea eguraldi eta elur-baldintza bikainekin estreinatu ondotik, bigarren egunerako iragarpena ez zen batere ona. Hala bada, iratzargailurik gabe iratzarri ginen Lyngeneko penintsulan. Leihotik begiratu eta hodei sareen artetik eguzkia ikusten zela konturatu ginen. Ez zegoen denborarik galtzerik! Liburutik etxetik hurbil zegoen zerbait motza hautatu eta gosaldu ondotik segidan abiatu ginen.

10:34 : Sor-Lenangen (13m)

Autoa utzi eta belai batzuetatik goiti abiatu ginen. Eguraldiak ez zuen itxura txarrik eta eguzkia hodeien artetik agertzen zen.

Urkien arteko pasilo honetatik eginen geuen lehen zatia. Parean sartuko ginen zirkutxoa ikusten zen eta horren ezkerretara iganen genuen mendia: Rundfjellet.

Igan ahala ohiko bilakatuko zen irudia: itsasoa malda elurtuen azpiko aldean. Egia erran aspertzen ez zuen ikuspegia zen.

Urki basoa gibelean utzi eta zirkutxora bailaratxo gisako batetik sartu ginen.

Behin zirkutxoan ezkerretara jo genuen, han baitzegoen Rundfjellet mendia. Gibelean pixka bat altuagoa eta interesgarriagoa den Istinden utziko genuen. Eguraldiak okerrera eginen zuela zegoen iragarrita eta zerbait motza egitea zen gure asmoa.

Bidea etzana da kaskoraino, zailtasunik gabekoa.

Rindfjelleten bizkarrera atera ginen eta haizea gogor jotzen hasi zen. Gure aitzinekoek hor hartu zuten buelta, baina gu burugogor goitiraino joanen ginen.

Azken metroak alimaleko haize boladen artean egin genituen. Argazkian ez nabaritzen, baina ez zen giro kasko inguruan!

12:18 : Rundfjellet (768m)

Denborarik galdu gabe gailur zabalean trantsizioa egin eta handik eskapatu ginen.

Jaitsieraren lehen zatia igandako bizkarretik egin ordez, ekialderantz jaitsiko ginen haize babes bila.

Metro batzuk jaitsi eta haizea segidan baretu zen. Hortik beheiti eski baldintza onez gozatu ahal izan genuen.

Itsasoraino eskiatzen...

13:04 : Sor-Lenangen (13m)

Hala bada, eguraldi iragarpenek ez zuten asmatu eta goizeko plan polita burutu ahal izan genuen. Haize finetik ihes egin eta etxeko goxotasunean pasatuko genuen arratsaldea. Biharamunean gehiago!

 

Fagerfjellet (907m)

EGUNA: 2024/03/29

ABIAPUNTUA: Fagernes (83m)

ZAILTASUNA: S2

DENBORAK:

• Igoera: Hiru ordu
• Jaitsiera: Ordu bat

ARRASTOA:

Powered by Wikiloc

KRONIKA:

Lehendabiziko eguna Norvegian. Hegazkinetik atera, alokairuko autoa hartu eta traste guziak kargatuta ezinegonez abiatu ginen eskiatzeko mendi baten bila. Hasmentan gainean urik eta janaririk ez generamala konturatu ere ez eginen egin. Azkenean zerbait jan, ura erosi eta Lyngeneko Alpeetara eramanen gintuen bidean zerbait motza eginen genuela erabaki genuen.

13:29 : Fagernes (83m)

Pirinioetan ordu horretan autotik abiatzea bururatu ere ez litzaiguke eginen, baina Norvegian fite ikasi genuen goiz edo berandu joan elur-baldintzak berdintsu mantentzen direla. Hala bada etxetxo batzuen ondoko aparkalekuan eski paketeak desegin, prestatu eta goiti abiatu ginen.

Lehen maldatxo bat igan eta eskuinetara urkien arteko pasilo antzeko bat hartu genuen.

Igoeraren lehen zatia (gainerako mendi kasik guzietan bezala) arbola artetik eginen genuen. Berez buelta gehiago ematen dituen pista bat igaten den baso horretatik, baina goitirakoan pista moztu eginen genuen eta beheitirakoan pistatik jaitsiko ginen baso trinkoan eskiatzea erraztuko zigulako.

Metroak irabazi ahala, urkiak eta pinuak trinkotasuna galduz joaten dira. Puntu honetatik jadanik ikusgai genituen mendiaren goitiko parteko malda ederrak.

Zuhaitzak 350 metroko altueraraino ailegatzen dira. Hortik aitzin mendiaren iparraldeko malda zabal eta errazetan barneratuko ginen.

Metroak irabazi ahala eta arbolen "trabarik" gabe, gibelean genuen ikuspegia ikaragarria zen.

Ikusten den bezala, maldak nahik etzanak dira eta elur-jausi arriskuarekin ere aproposa izan daitekeen mendia da Fagerfjellet. Azken malda bat igan eta mendiaren iparraldeko puntara ailegatuko ginen.

Guk iparraldeko tontorra (871m) ezkerretara utzi eta pixka bat altuagoa den erdikoraino segotu genuen. Altuena berez hegoaldekoa da (957m), baina eskiatzeko zati lauegia du hasmentan, behintzat iparralderantz jaitsi nahi izanez gero.

15:03 : Fagerfjellet (907m)

Hala bada, mendiaren tontor ertainean (eta erdikoan) igoera akitutzat eman genuen. Ekialdera Stortinden eta Hamperokken mendietara ikuspegi ikusgarria genuen.

Oraindik astia genuenez eta mendebaldeko maldetan arrastorik ikusten ez zenez, lehen jaitsiera alde hartara egitea erabaki genuen. 350 bat metro jaitsi genituen ametsetako elurrarekin. Hura zen hura elurraren kalitatea! Hasieratik listoia altuegi utziko zuela elur hark pentsatu genuen!

650 metro inguruan berriz ere foka-larruak paratu eta jaitsitako maldak igateari ekin genion.

Mendi honetan jende dezente ibiltzen dela ematen zuen, baina mendebaldeko maldak ukitu gabe zeuden.

Hala ere, halako kalitateko elurretan arrastoa irekitzea plazer hutsa zen.

16:19 : Fagerfjellet (871m)

Bigarren igoera iparraldeko gailurrean akitu genuen, handik autorantz jaitsiera zuzenagoa baikenuen. 

Hala bada, iparraldeko maldetatik beheiti egin genuen bigarren jaitsiera. Lehenaren gisa, elur arras ona harrapatu genuen, nahiz eta inguruan arrasto gehiago egon.

17:09 : Fagernes (83m)

Hiru ordu eta erdi inguruko ateraldi azkarra eginda, kontent akitu genuen Norvegiako lehen eski saioa. Autoa hartu eta Lyngeneko penintsulara zuzenduko ginen segidan han pasatuko baikenituen ondoko egunak.

 

Cristallereko basoa

EGUNA: 2024/03/03

ABIAPUNTUA: Central Electrique du Baralet (703m)

ZAILTASUNA: S3

DENBORAK:

• Igoera: 3 ordu
• Jaitsiera: Ordubete

NOLA AILEGATU:

Nafarroa Beherea eta Zuberoako probintziak zeharkatu behar dira. Donibane Garazi, Lartzabale, Maule eta Atharratze herriak pasata, Montori herrian utziko ditugu Euskal Herriko lurrak. Lanne en Baretous herrira ailegatuko gara hurrena eta herri hau pasata eskuinetara Arette herrira doan bidegurutzea ikusiko dugu. Bertara joanen gara. Arettetetik Issor herrian barrena, Aspeko bailarara iritsiko gara. Behin hemen, Zaragozako norabidea hartuko dugu eta aitzinera segituko dugu Somporteko tunelera iritsi arte. Urdos herrira ailegatu baino lehen, eskuinetara, Baraleteko zentral elektrikora doan errepidetxoa hartu behar da. Guk puntu honetan elurra harrapatu genuen jadanik eta bertan utzi genuen autoa.

ARRASTOA:

Powered by Wikiloc

KRONIKA:

Hirugarren eguna Aspeko bailaran eta bezperan bezala eguraldi eskasa genuen. Gauez harana beheitiraino zuritu zuen elurrak, eta goizean oraindik hodeitsu eta prezipitazio aunitzekin argitu zen eguna. Eskiatzeko aukera bakarra basoak bilatzea zen beraz eta Baraleteko zentral elektrikotik goiti duela urte batzuk deskubritu genuen Cristallereko oihanera zuzendu ginen.

9:50 : Central Electrique du Baralet (703m)

Elurra zela eta, ezin izan ginen Baraleteko zentrala baino goitiago igan. Han berean prestatu eta errepidetik goiti abiatu ginen. Lehen bidegurutzean Aubise auzora igaten den bidea zuzen utzi eta ezkerretara hartu genuen Berat du Bas auzora doanetik.

Metro guti batzuk gehiago errepide elurtutik egin eta eskuinetara mendian goiti abiatu ginen. Zentral elektrikora ura eramaten duen hodiaren ondotik goiti iganen ginen, hau gure ezkerretara utzita. Hodiaren ezkerretik ere igaten ahal da, baina elur aunitz zegoen eta malda garbiagoak izanda, saihestea hobe zela pentsatu genuen.

Arbolen arteko malda tentetik igan ginen lehen zatian. Arestaian erran bezala, elur aunitz bota zuen gauen eta kosta egiten zen arrastoa irekitzea. Zorionez, gure gibeletik heldu zen talde batek aitzineratu gintuen eta haiek ireki zuten goitiraino.

1000 metroko altueratik goiti malda pixka bat etzan egiten da eta bizkar gisako batetik segitu genuen goiti, hego-mendebaldeko norabidean.

Pagadi trinkoagoak malda irekiekin tartekatzen dira igoeraren zati honetan, baina oro har arras eskiagarria da eta zuhaitzek haizetik eta eguraldi txarretik ongi babesten dute.

Tarteka pagadien arteko pasilo politetatik...

Elurra mara-mara bota zuen kasik igoera guzian zehar...

Azken zati irekian basoan sartu baino lehen...

Goitiko baso zatia da trinkoena eta jaitsieran eskiatzeko teknikoena dena. Hala ere, eskiagarria da.

12:15 : Cristallereko basoaren bukaera (1834m)

Basotik atera eta goitixeago dauden pinuetara igan ginen. Hauek dira azken arbolak eta nahiz eta gailurra 50 metro eskasera egon, igoera bertan akitzea erabaki genuen.

Trantsizioa burutu eta beheiti abiatu ginen. Elur fresxko geruza arras lodia zen eta malda tenteenetan izan ezik, kosta egiten zen jaisteko adinako abiadura hartzea. Inoiz ez nuen hain elur sakonean eskiatu. Sobera zegoela eta guzi erraten ahal da.

Mendiaren azpiko zatian ez zegoen behar adina elur eta beraz eskiak bizkarrean genituela akitu genuen ibilaldia. Eguraldi eskaseko egunetan etxean ez gelditzeko aitzakia bat gehiago eskaintzen du Cristallerek.