Orriak

Antxola (1119m) etiketadun mezuak erakusten. Erakutsi mezu guztiak
Antxola (1119m) etiketadun mezuak erakusten. Erakutsi mezu guztiak

2021/03/29

Auza (1306m), Antxola (1119m)

EGUNA: 2021/03/28

ABIAPUNTUA: Otondoko borda  - Iñarbegi (600m)

ZAILTASUNA: Erraza

DENBORAK:

  • Igoera (Antxolatik) : Ordu eta erdi
  • Jaitsiera (Mazatik): Ordu bat
NOLA AILEGATU:
Erratzutik Baigorrira doan errepidea hartu behar da, baina herritik atera orduko eskuinetara Iñarbil auzora igotzen denari segituko diogu.Auzora ailegatzean lehen etxeak pasatuta eskuinetara ateratzen den errepide estu bat hartu behar da Iñarbegi auzoraino. Bertara ailegatzean, malda beheiti hasi orduko ezkerretara ateratzen den zementuzko bidea segituko dugu baserri baten ondoan akitzen den arte. 

ARRASTOA:
Powered by Wikiloc


KRONIKA:
Urtarrilean elurtutako gure mendietan gozatu handiak hartu ondotik, bazen ordua Auzari bertze bisitatxo bat emateko eta kasu honetan, elurrik izan ez arren ilargiak eta eguzkia ateratzen kaskotik ikusteak eman diote bere puntua ibilaldiari. Itzulia hegoaldeko zirkua inguratuz egin dugu, Sakanako bizkar zabaletik igoz eta Mazakotik jaitsiz.

6:06 : Otondoko borda (600m)
Ordu txikietan paratu dugu hitzordua eta autoz egin dugu Iñarbegirainokoa. Gau ilunean abiatu gara Otondoko bordatik...



Zorionez ilargi kasik betea lagun izan dugu bide osoan eta kopetako argirik gabe igo gara, basoko animalien soinuez gozatuz.


Berezia da ilargiaren argitan mendian ibiltzea. Gure izatearen oinarrietara jotzea bezalakoa... Pago artean ilargiak paisaia misteriotsuak utzi dizkigu.


Antxola mendiaren azken maldetan ostertzean argia ikusten hasi gara. Honako hauek gosaltzen harrapatu ditugu goiz izan arren.


7:06 : Antxola (1119m)
Urtarrilean Iñarbegi Ski Resort izenarekin bataiatu genuen igoera guzia gauez egin dugu eta ustekabean plantatu gara Antxola gainean. Auzaren itzala parez pare ikusi dugu hemendik.


Azken zatian haize izan dugu lagun (edo etsai) inguru honetan ohikoa den bezala. Azken metroetan jadanik egunaren lehen argiak nabariak ziren...


7:43 : Auza (1306m)
Gauez errazago irabazten dira metroak, edo sentsazioa hori da behintzat. Ilargia zeruan zegoen oraindik gailurra harrapatu dugularik.


Tarte batean egon gara eguzkia ateratzeko zain eta Garaziko ibarraren gibeletik egin du bere agerraldia.


Auzako oroigarri famatua eguzkiaren lehen argitan...


Egunsenti ederraren ondotik handik joateko momentua ailegatu da. Hotz ari zuen kaskoan. Beheiti Erratzu aldera jaisten den ipar-mendebaldeko bizkarretik hasi gara jaisten.


Gailur ondoko pasabide harritsua zeharkatu dugu...


...eta zeharkatu bezain fite bizkarra utzi eta ezkerretara biratu gara.


Mazako bizkar zabalera jaisten den ertza hartu dugu. Lehen zatian estu samarra eta harritsua da, baina ez du inolako zailtasunik. Aitzinago pareta bertikal bat ekialdetik inguratu behar da.


Irudian ikusten dena da inguratu behar den pareta. Hortik zuzenean jaisteko sokak beharko lirateke. Ez da bide arras markatu, baina erne ibilita ongi segitzen da harri mukuru batzuk lagun.


Zati bertikalena akituta Mazako bizkar zabaletik jaitsi gara. Larre ederra da Mazakoa. Behin zeharkatuta garai batean harriak ustiatzeko egin zuten pista zaharretik segitu dugu jaisten.


Pista pixka batean segituta arbola arteko malda tente honetatik zuzenean jaitsi gara Otondoko bordara.


9:02 : Otondoko borda - Iñarbegi (600m)
Hiru orduren buruan berriz ere hasmentako puntuan ginen, mendiak, ilargiak eta eguzkiak eskainitako ikuskizun ederraz gozatuta.



 

2021/01/05

Antxola (1119m)

EGUNA: 2021/01/03

ABIAPUNTUA: Otondoko Borda -Iñarbegi (600m)

ZAILTASUNA: S2, S3 hego-ekialdeko jaitsiera eginez gero

DENBORAK:
  • Igoera: Ordu eta erdi
  • Jaitsiera: 45 minutu
NOLA AILEGATU:
Erratzutik Baigorrira doan errepidea hartu behar da, baina herritik atera orduko eskuinetara Iñarbil auzora igotzen denari segituko diogu.Auzora ailegatzean lehen etxeak pasatuta eskuinetara ateratzen den errepide estu bat hartu behar da Iñarbegi auzoraino. Bertara ailegatzean, malda beheiti hasi orduko ezkerretara ateratzen den zementuzko bidea segituko dugu baserri baten ondoan akitzen den arte. 


KRONIKA:
Ez omen daude bi hiru gabe. Hori zioen Delirium Tremensen kantu batek eta gure kasuan halaxe izan da Iñarbegiko elur paradisu txiki honetan. Hilak bortz ditu gaur eta hirugarrenez izan gara bertan eskiak zangoetan genituela.

10:47 : Otondoko borda (600m)
Aitzineko egunetako gisan presa handirik gabe plantatu gara Iñarbegin. Gauzak prestatu eta jadanik aski ezaguna dugun 5-10 minutuko porteoari ekin diogu.


Behin porteoa akituta, atsedenik gabe goiti, gau honetan berriz zuritu den paisaia zoragarria lagun.


Ote eta iratzeak gainean elur zama ederra dutela daude. Ez dakit horrelakorik ezagutu dugun...


Basoak berriz liluragarri!


Gure Japonia txikia! Zertarako haraino joan?


Iñarbegi iratzelekuaren gaineko aldetik.


 Egun grisa genuen, baina mota honetako egunetarako inguru hau aproposa da, zuhaitzen artetik baitoa biderik gehiena.


Behin arbolak gibelean utzita eta GRaren bidean sartuta, Antxolaren hegoaldeko maldan goiti abiatu gara. Joan den igandean ez bezala, lainoak osorik ikusten utzi digu gaurkoan.


Malda igotzen...



Gailur ingurutik Banka eta Adartza mendi aldera ikuspegi ederra dago.


12:02 : Antxola (1119m)
Azken metroak... Auzara joateko aukera ere buruan genuen, baina laino artean ikusi eta utzi genuen.


Tontorrean hotza... Transizio azkarra eta beheiti!


Lehen ekinaldia hego-ekialdeko malda politetik egin dugu. Argazkian ongi ikusten ez bada ere, 300 metroko jaitsiera ederra du.


Berriz fokak paratu eta goiti, Ixtauzeko lepora igotzen den errepidetxo elurtutik.


Ixtauzeko lepoam eskuin biratu eta berriz Antxolara!


Malda zuri ederretik...


Iñarbegi auzoa gure oinetan genuela...


13:33 : Antxola (1119m)
Bigarrenez gailurrean...


Bigarren jaitsiera jadanik hego aurpegitik egin dugu.


Puntu honetaraino jaisten da. Fokak jarri ditugu Burdinkurutx deitzen den bizkarrera igo eta bertatik auto aldera jaisteko.


Baso zoragarri honetatik eta iratzelekutik jaitsiera dibertigarria eginez...


15:03 : Otondoko borda (600m)
...bertze goiz pasa ederra burutu dugu. 

 

2021/01/03

Antxola (1119m)

EGUNA: 2021/01/03

ABIAPUNTUA: Otondoko Borda -Iñarbegi (600m)

ZAILTASUNA: S2

DENBORAK:
  • Igoera: Ordu eta erdi
  • Jaitsiera: 45 minutu
NOLA AILEGATU:
Erratzutik Baigorrira doan errepidea hartu behar da, baina herritik atera orduko eskuinetara Iñarbil auzora igotzen denari segituko diogu.Auzora ailegatzean lehen etxeak pasatuta eskuinetara ateratzen den errepide estu bat hartu behar da Iñarbegi auzoraino. Bertara ailegatzean, malda beheiti hasi orduko ezkerretara ateratzen den zementuzko bidea segituko dugu baserri baten ondoan akitzen den arte. 

KRONIKA:
Azken urteetako elurterik handiena dugu herri inguruko mendietan. Horrelako zerbait izan genuen azken aldia 2015eko negua izan zen, duela sei urte. Orduan Auza eta Antxola mendiak eskiz igotzeko aukera izan nuen eta oraingoan ere kontrako ordenean izan bada ere, bietako maldetan eskiatu ahal izan dugu.

10:59 : Otondoko Borda (600m)
Bigarren egunez segidan Otondoko borda buruan plantatu gara eta bezperan bezala pista elurtutik ttipi-ttapa abiatu.


Bortz minuturen buruan iratze-lekuan eskiak oinetara eta goiti atsedenik gabe!



Atzo ez bezala, egun grisa izan dugu eta elur maluta batzuk lagun genituela egin dugu zati hau.


Gaurkoan ordea atzo ireki genuen arrastoa baliatu ahal izan dugu eta horrek igoera erraztu du.


Metroak irabazi ahala gero eta laino gehiago.


Antxolaren azken malda, hegoaldekoa, erabat lainopean egin dugu.


12:09 : Antxola (1119m)
Azken metroak gailurra bistan genuela. Fokak kendu eta hegoaldeko maldan elur goxoa harrapatu dugu.


Bizpahiru igoera eta jaitsieraren ondotik, igotako bide beretik egin dugu beheitirakoa paisaia zoragarria lagun.


14:47 : Otondoko borda (600m)
Hala akitu dugu inguruan egindako bigarren eski ateraldia. Segi dezala bestak!

2020/03/21

Soralar (827m), Burga (872m), Argañeta (1004m), Ixtauz (1024m), Antxola (1119m), Auza (1306m)

EGUNA: 2020/03/21

ABIAPUNTUA: Erratzu (280m)

ZAILTASUNA: Erraza

DENBORAK:
  • Erratzu - Soralar : Ordu eta erdi
  • Soralar - Burga : Ordu erdi
  • Burga - Basagar : Ordu erdi
  • Basagar - Argañeta : Ordu bat
  • Argañeta - Antxola : Ordu bat
  • Antxola - Auza : 45 minutu
  • Auza - Erratzu : Ordu bat eta laurden
NOLA AILEGATU:
Ateraldi honen abiapuntua Erratzu herrian berean dago. Herri sarrerako pisuetan ibilgailua uzteko lekua egoten da.

KRONIKA:
Auzaren hegoaldean dagoen Iñarbegi auzoa inguruz inguru mendiek hesten dute. Zirku itxurako mendigune hau ibilbide polit eta erraza eginez osorik zeharkatzen ahal da Auzako kaskoraino ailegatuz. Merezi duen ibilbidea dudarik gabe.

8:10 : Erratzu (280m)
Goizeko 8etan egin genuen hitzordua etxe azpian eta herria alderik alde zeharkatu ondotik, Gorostapolo auzora igotzen den errepidea hartu genuen. Herritik ateratzean jadanik bistan genuen Auzako mendia, ordu batzuk geroago ailegatuko ginena.



Errepidetik 500 metro inguru eginda, eskuinetara ateratzen den pista bat hartu behar da. Iñarbegira eramaten gaituen seinaleari eginen diogu kasu.


Irudian ikusten den ikuiluaren ondotik ateratzen da pista. Beheitiago herria ikusten ahal da.


Pista honetatik eginen genuen zati eder bat, belagi eta larre artean...


Eguneko lehendabiziko helburua Soralarko kaskoa zen, irudian zuhaitz batzuk gainean dituela ikusten den menditxo borobila. Erreferentzia baliagarria da pistaren bidegurutzeetan beti goiti segitzeko.


Azken zatian ezker eta eskuin bereizten diren bi pista utzi eta guk erditik doan bidexka bat hartu genuen.


Bi belagiren arteko bide politetik egiten dira azken metroak.


Ikuspegi ederra puntu honetatik...


9:09 : Soralar (827m)
Lehen gailurrean ia gelditu gabe aitzinera segitu genuen. Begibistan genuen hurrengo kaskoa, goraino pagadiz estalia. Bertara ailegatzeko metro batzuk galdu behar dira lepotxo batetara...


...eta behin pago artean sartuta, bidexka polit batetik igotzen da.


9:31 : Burga (872m)
Ez du gailurra denik ere ematen, asteon erran bezala zuhaitzez estalia baitago. Argazkitxo bat eta lasterka malda beheiti abiatu ginen Basagarko lepo aldera.


Antsoneko borda inguruan geldialdia arropa kendu eta ura edateko.


9:43 : Basagar (684m)
Lepo honetan pista bat gurutzatu eta zuzen goiti segitu genuen ekialdera doan mendilerroaren gainetik.


Urruska mendia gure eskuinetara utzi eta parean ikusten den Pagozelaiko lepora zuzenduko ginen.


Pagozelain, pagadiak momentu batez gibelean utzi eta larreetatik goiti eguneko hirugarren tontorrerantz igo ginen.


Tontor ingurutik Auzako mendia eta bertarako bidean igoko genituen Antxola eta Ixtauz oraindik urrun ikusten ziren.


Azken metroak Argañetaren bizkarretik...


10:07 : Argañeta (1004m)
Argañetatik Aldudeko ibarrera ikuspegi bikainaz gozatu ahal izan genuen.


Segidan bide argirik gabeko zati bat jaitsi eta GR ibilbidean sartu ginen. Marka zuri-gorriei segituko genien Auzaren magaleraino, Antxola eta Ixtauz mendiak igotzeko bakarrik utziz.


10:40 : Ixtauz (1024m)
Pagadi artean bizkarrez bizkar goiti eta beheiti ibili ondotik, arbolak utzi eta larre berdeetatik Ixtauzko lepoan goiti izen bereko mendian plantatu ginen.


Berriz Ixtauzko lepora itzuli eta argazkian ikusten den malda gaindituta Antxolan izanen ginen.


10:56 : Antxola (1119m)
Bigarren aldia mendi honetan, duela urte batzuk eskiz igo eta gero.


Bertatik Lezetako lepoa deitzen denera jaitsi eta eguneko gailur nagusirantz abiatuko ginen. Zati hau da agian ibilaldiko politena, ikusgarria da!


Lezetako lepotik eguneko azken igoera bertzerik ez zen falta.


Azken metroak gibelean Antxola mendia genuela...


11:18 : Auza (1306m)
Kasko honetan zerbait jatea eta geldialditxoa egitea aurreikusia genuen, baina haize fina zebilen eta oraindik ongi geundenez jaisten hastea erabaki genuen.


Gailurretik mendebaldeko norabidean metro batzuk egin...


...eta ipar-mendebaldeko bizkarretik lasterka zuzen jaitsiko ginen.


Erratzu begibistan. Jaitsiera zuzena eta azkarra da, gehienbat lasterka eginez gero.


Beheitiko zatian larreak utzi eta pistatik Xorroxin ur-jauzi aldera egin eta bertako bidetik herrira itzuli ginen.


12:19 : Erratzu (280m)
Herrian bertan hetsi genuen ibilbide zirkular eder hau. Primerakoa Auzaren hegoaldeko mendiak ezagutzeko.