Orriak

Infierno Occ. (3073m) etiketadun mezuak erakusten. Erakutsi mezu guztiak
Infierno Occ. (3073m) etiketadun mezuak erakusten. Erakutsi mezu guztiak

2021/07/30

Picos del Infierno (3082m, 3076m eta 3073m)

EGUNA: 2021/07/22

ABIAPUNTUA: Baños de Panticosa (1636m)

ZAILTASUNA:
Nahiko erraza (PD). Eskaladatxo errazak (II) egin behar dira ibilbidearen gaineko partean:
  • Mendebaldeko gailurrera ailegatzeko eskuinetara amildegia duen zeharkaldia egin behar da. Zirrara gehien eragiten duen zatia hau izan daiteke.
  • Mendebaldeko eta erdiko gailurrak elkartzen dituen gandorra ikusgarria da, baina erraza. Ez dira eskuak erabili ere egin behar kasik.
  • Pondielloseko lakuetara jaisten den aurpegia, jaitsierarako erabilitakoa, bertikala da eta azpiko zatian eskalada pausu erraz batzuk ditu. Zati honetan goititik eroritako harriak dira arriskutsuena.
DENBORAK:
  • Igoera (Ibones Azulesetik): 4 ordu eta erdi
  • Jaitsiera (Pondielloseko lepotik): Hiru ordu
NOLA AILEGATU:
Iruñetik Jakarako bidea hartuko dugu eta bertatik Sabiñanigo aldera Formigañ aldera doan errepidera desbidefratu arte. Bide honetatik segituko dugu Portaleteko mendatean goiti gure eskuinetara Panticosako bainuetxera igotzen den errepidea ikusi arte.

KRONIKA:
Azules lakuetatik Picos del Infierno mendietara igo eta hauek zeharkatzen dituen bidea Pirinioetan 3000ko mendietan egiten den ibilaldi ikusgarrienetarikoa da. Denetarik du: laku zoragarrien inguruko bide lasaia, ilargikoa iduri duen paisaia Tebarray inguruan, eskaladatxoak amildegi ertzean, gandor dotorea... Duela zazpi urte egin nuen ibilbidea berriz ere errepikatu dugu, behin eta berriz egitea merezi duen horietakoa.

8:11 : Baños de Panticosa (1636m)
Gaua Casa de Piedra aterpeko aparkalekuan pasatu genuen eta GR11aren marka zuri-gorriak segituz utzi genuen bainuetxea gibelean.


Hainbatean egin dudan bidea da hau. Lehen malda tenteagoaren ondotik bideak hegoaldeko norabidean segitzen du errekaren ondotik altuera handirik irabazi gabe.


Cuesta del Fraile izenez ezagutzen den maldaren azpian plantatu ginen hala. Jende dezente zebilen inguru honetan, baina goitiago nahiko bakarrik ibiltzeko zortea izanen genuen.


Cuesta del Frailen goiti...


9:30 : Embalse de Bachimaña Bajo (2180m)
Malda gaindituta, aterpea eskuinetara utzi eta Bachimañako urtegiak inguratzeari ekin genion. Lehenik azpikoa...


...eta segidan gainekoa.


Gainekoa inguratuta, Marcadauko lepora doan bidea eskuinetara utzi genuen GRari segituz. Piedrafitako gailur ikusgarria agertzen hasi zen parean.


Azules lakuetatik jaisten den errekatxoa gurutzatu eta igoera eztian segituko genuen. Ibiltzeko inguru polita da zati hau, lakuekin, errekatxoekin...


Puntu honetan bistaratu genituen lehendabiziko aldiz gailur inguruak beren marmol zuri eta harkaitz marrien arteko konbinazioarekin.


Bachimañako gaineko urtegia gibelean utzi genuen. Haren gainean ikusten dena Serrato mendia da.


Egun beroa genuen, udako beroenetarikoa, errekatxo hauetan freskatzeko gogoa ematen zuen...


Zati lauak malda motzekin tartekatzen ditu bideak...


10:06 : Ibon Azul Inferior (2362m)
Lehen lakura ailegatu ginen horrela. Inguru zoragarria da ispiluak iduri duten laku politekin.


10:18 : Ibon Azul Superior (2410m)
Azpikoa polita bada, gainekoa zer erranik ez... Ezagutzen ditudan Pirinioetako lakurik politenen artean sartuko nuke dudarik gabe.


Honaino hurbiltzea bakarrik merezi du...


Lakuak utzi eta parean ikusten den Infierno lepora zuzendu ginen.

Bertara ailegatzeko bidea tentetu egiten da Infierno mendiaren oinean kokatua zegoen antzinako glaziarraren morrenako harrien artean.


11:02 : Cuello del Infierno (2721m)
Lepoan zerbait jateko geldialdia egin genuen Tebarrayko laku eta mendiaren parean.


Segidan ezkerretara biratu eta irudiko malda igotzeari ekin genion. 


Metroak irabazi ahala Balaitous handia bistaratzen hasi ginen Tebarrayren gibelean.


Elur-lausoa duen lepotxoaren eskuineko lepora igoko ginen. Bertatik hasten da mendebaldeko tontorrera eramanen gintuen zati ikusgarria.


Lepotxora bidetik segitu ordez azoiko tximiniatik igoko ginen zuzenean eskalada zati erraz batzuk gaindituz (II).


Azken metroak lepora ailegatzeko...


Lepotxotik lehen gailurra bistan genuen. Bertara ailegatzeko harkaitz gris eta marroiaren mugatik doan bidea segitu behar da.


Tarteka eskaladatxo errazak eginez (I+)...


...eta tarteka bi harkaitzen arteko mugatik doan terrazatxotik.


Handik heldu ginen...


Zati hau guzia da bidearen zirraragarriena. Erraza da, baina amildegi handia du mendebaldera.


Azken zatia Garmo Negro eta Pondielloseko lakuak gibelean genituela.


12:12 : Pico del Infierno Occidental (3073m)
Autotik abiatu eta lau ordura ailegatu ginen lehendabiziko tontorrera. Parean genituen minutu batzuk geroago zapalduko genituen bertze biak...


Balaitous eta eta Frondella mendiak gailurretik...


Bertze gailurretara ailegatzeko mendi honen ezaugarri nagusia den Marmolera famatua pasatu behar da. Urrunetik ikusten den gandor zurixka da, pare bat metroko zabalera duena...


Bi aldeetara amildegia duen arren, zailtasunik ez duen zatia da eta oinez egiten da.


12:31 : Pico del Infierno Central (3082m)
Gandorrean gozatu ondotik, minutu gutxian hiru tontorretako handienean ginen.


Kasik gelditu gabe ekialdekora segitu genen. Azpiko lepotxora jaitsi eta eskaladatxo erraz batzuk gaindituta han izanen ginen.


12:41 : Pico den Infierno Oriental (3076m)
...eta hirugarrena ere sakelara! 


Azken gailurrean tartetxo bat pasatuta, jaitsierari ekin genion. Hegoaldeko korridore ezagunaren eskuinetatik jaisten da bidea. Goitiko zatia oinez egiten da...


...baina beheitiago deseskaladatxoak egin behar dira. Errazak, baina kasu eman beharrekoak...


Hegoaldeko aurpegia jaitsita, Saretaseko lepora zuzendu ginen, Pondiellos mendiaren oinean eta Garmo Negro parean genuela.


13:41 : Cuello de Pondiellos (2809m)
Saretaseko lepoa ez da zeharkatu behar, bai ordea Pondiellosekoa. 


Zeharkatu aitzinetik azken begiradatxoa Infierno mendiei eta beren hego-korridoreari. Elurraren ezkerreko paretatik jaisten da.


Lepoaren bertze aldean 1200 metroko jaitsiera bertikala genuen zain, bidexka zakarretik. Eskiz egiteko hobea da oinez baino egia erran...


Jaitsierak Garmo Negro eta Argualas azpiko Mallata Alta eta Baja deitzen diren belardietara eramanen gintuen hurrenez hurren, gero handik Panticosako bainuetxera itzultzeko.


14:59 : Baños de Panticosa (1636m)
Kasik zazpi orduko bidearen ondotik ibilbide zirkular ederra eginda ailegatu ginen abiapuntura.
 


BIDEOA:

2014/10/04

Picos del Infierno (3082m, 3076m, 3073m), Arnales (3006m)

EGUNA: 2014/10/03-04

IRTEERA: Baños de Panticosa (1636m)

ZAILTASUNA: Nahiko erraza (PD)
Oro har ez da ibilbide zaila baina trepadak ditu puntu batzutan. II mailakoak dira asko jota, baina patio handiarekin puntu batzutan. 
  • Infiernoko lepotik lehen gailurrera bitartean, momentu batez trepada oso aereoak egin behar dira marmoleraren gainetik. Niretzat hau da ibilbideko punturik ikusgarriena. 
  • Mendebaldeko eta erdiko gailurren artean, arista aereo baina erraz batetik ibili behar da. 
  • Erdiko tontorretik Pondielleseko lakuetara zati bertikala jaitsi behar da destrepe batzuk eginez. Harri asko erortzen dira zati honetan.
DENBORAK:
  • Baños de Panticosa - Refugio de los Ibones de Bachimaña : Ordu eta erdi
  • Refugio de los Ibones de Bachimaña - Infierno Central : Hiru ordu eta erdi
  • Infierno Central - Baños de Panticosa (Pondielloseko lepotik) : Hiru ordu
NOLA IRITSI:
Iruñeatik Jacako bidea hartu behar da Pirinioetako Autobidean barrena. Jaca zeharkatuta Sabiñanigo aldera jo behar da eta bertara ailegatu aitzinetik Formigal eski estaziora doan errepidea ikusiko dugu. Errepide horretan goiti segiko dugu, Tenako bailaran zehar, eskuinetara Panticosa herrira doan errepidea ikusi arte. Errepide horretatik igoko gara, herria gibelean utzi eta Balneario de Panticosara segituz.

DESKRIBAPENA:
Azkenean ailegatu zait hainbertze amestutako Picos del Infiernoren itzulia egiteko aukera. Dudarik gabe bortz izarreko ibilbidea, leku eder eta basatian.

Ortziral arratsaldean atera ginen lan egin ondotik Balneario de Panticosa aldera. Biharamunean egin beharreko bidea pixka bat xamurtzeko Bachimañako urtegiaren ondoan eraiki berri duten aterpe ederrean pasako genuen gaua. Horrela, ordu eta erdiko bidea eta ia 600 metroko desnibela kentzen genizkion igoerari.

2014/10/03
18:06 : Baños de Panticosa (1636m).
Motxilak bizkarrean hartu eta bixi-bixi abiatu ginen GR 11ko markak jarraituz. Berehala irabazten da altuera bainuetxeak beheitian gelditzen dira.



Arratsaldea nahasi xamar zegoen baina biharamunerako eguraldi ederra iragartzen zuten.


Ur-jauziak eta zelai berdeak gibelean utzita Cuesta del Fraile malda ezagunaren azpian plantatu ginen. Irudiko harresia ezkerretik inguratzen du malda honek, aterpera ailegatzeko.


Maldaren gainetik gibelera begirada...


Behin malda gaindituta aterpea begi bistan genuen jadanik.


19:34 : Refugio de los Ibones de Bachimaña (2200m).
Horrela arratsaldeko azken argi izpiek lagunduta aterpe eder honetara ailegatu ginen. Aterpea baino gehiago, hotela dirudi. Instalazio berriak, gela ttikiak, janari arras ona... Gainera, gelan bakarrik egotea tokatu zitzaigun eta gau ona pasa genuen, zurrunkarik entzun gabe. Aterpean, Donostiako Martin eta Luisekin elkartu ginen. Elkarrekin eginen genuen igoera biharamunean.


2014/10/04
7:44 : Refugio de los Ibones de Bachimaña (2200m).
Goizeko zazpietan gosaldu, zorrak kitatu eta goiti abiatu ginen. Lainorik ez zeruan, eguna eder zetorren.


Bachimañako lehen urtegia gure eskuinetara utzi eta GRko markei jarraitu genien. Leku ederrean dago aterpea.


7:58 : Embalse de Bachimaña Alto (2207m).
Segidan ailegatu ginen bigarren urtegira eta hau ere gure eskuinetan utziko genuen.


Marka zuri-gorriak bidaide... Beraiei jarraituko genien Infiernoko leporaino.


Eguzkia gailurrak argitzen hasia zen ordu horretarako.


Lehen metro hauetan metro gutxi irabazten dira eta ongi etorri zitzaigun gorputza berotzen hasteko.


8:40 : Ibon Azul Inferior (2362m).
Ingurune ederrean ibiliz eta lehen maldak gaindituz laku honetara ailegatu ginen. Gure helburua zen Picos del Infiernoko mendigunea aitzinean genuen ikusgarri.


8:55 : Ibon Azul Superior (2410m).
Lehen ñaku hau gure ezkerretara utzi, malda bat gainditu eta bigarren lakura ailegatu ginen. Hau ere zoragarria. Gaua pasatzeko leku aproposa...


Bigarren lakutik goiti, malda harritsu bat gainditu behar genuen leporaino. Eskiada ederra egin genuen malda honetan aitzineko udaberrian. Bidearen maldak, Infiernoseko ikuspegi ederrak leuntzen zituen. Aitzinean genuen Infiernoko glaziarra ere. Honi zoritxarrez ez zaio aunitzik gelditzen.


Gainditutako malda eta Vignemaleko mendigunea gibelean...


9:44 : Cuello del Infierno (2721m).
Aterpetik atera eta bi ordutara, erritmo lasai baina jarraiean lepora ailegatu ginen. Tarte bat hartu genuen zerbait jan eta inguruaz disfrutatzeko. Tebarraiko lakua eta mendia parean genituen.


Bertatik ezker (hegoalderantz) biratu eta malda harritsuan goiti abiatu ginen. Haize freskoa genuen lagun, nabari da negua hurbil dela. Urrunean Balaitous mendia bertzeak bertze.


Malda igota, makil bat duen bretxa bat bilatu behar da. Bertara ailegatzeko trepada erraz bat egin behar da. Bretxa hori aurkitzea garrantzitsua da ondoren zeharkatu behar den zonaldera ongi sartzeko.


Behin bretxara edo lepotxora ailegatu ikuspegia mendebalderantz zabaltzen da. Sallent de Gallego gure oinpean genuen, baita Formigal ere. Parean berriz Telera bertzeak bertze.


Argazkian, lepotxotik aitzin gainditu behar den zonaldea ikusten da, ipar-mendebaldeko aurpegia. Bidea harkaitz gris eta marroiaren mugatik pasatzen da, tartekako trepadatxoak ibiltzeko zatiekin tartekatuz. Ez dira pausu zailak, baina eskuinaldera dagoen patioak errespetua ematen du. Niretzat behintzat hau izan zen zirrara gehien eragiten zuen puntua.


Toki zabalenetariko bat pasatzen. Ibilbide zati honetan garrantzitsua da hitoei jarraitzea bide ona aurkitzeko.


Trepadatxo bat harri gris eta marroiaren mugak jarraituz.


Zeharkaldiraren azken zatian gibelera begirada. Argazki honetan gainditutako zati gehiena ikusten da, hasierakoa izan ezik.


Ipar-mendebaldera orientatutako aurpegi ikusgarria zeharkatuta lepotxo batera aigatu ginen. Garmo Negro eta Pondielloseko lakuak genituen parean, baita eguzkia ere aurpegi mospela gibelean utzita.


Lepotxo honetatik goiti, mendebaldeko arista errazean I graduko trepada batzuk egitea bertzerik ez zen gelditzen Infiernoetako mendebaldeko punta zapaltzeko.


Lehen tontorrera ailegatzen gibelean Midi d'Ossau genuela.


Eta aitzinean erdiko tontorrera eramango gintuen La Marmolerako pasabide ezaguna.


11:10 : Pico del Infierno Occidental (3073m).
Tentsio momentu batzuk pasata lehen tontorrera ailegatu ginen.


Argazkia atera eta La Marmolerako pasabidea zeharkatu genuen erdiko tontorrera heltzeko. Asko nuen irakurria eta entzuna pasabide honen inguruan. Egia da bi aldeetara patio handia duela, baina nahiko zabala da eta erraz zeharkatzen da. Lehen erran bezala, errespetu handiagoa sorrarazi zidan ipar-mendebaldeko aurpegia zehartzatzeak.


11:22 : Pico del Infierno Central (3082m).
Horrela ailgatu ginen Infiernoetako tontor nagusira.


Taldeko argazkia gailur eder honetan.


11:41 : Pico del Infierno Oriental (3076m).
Erdiko gailurrean zerbait jan eta aitzinera segitu genuen azken tontorraren bila. Lepo batera jaitsi eta bertze trepada erraz bat eginda iristen da bertara.


Ordu batzuk lehenago pasatako lakuak beheitian ikusten ziren.


Hirugarren tontorrean...


Eta horrela, beherakoari ekin genion. Gure asmoa ibilbide zirkularra egitea zenez, behera jaisteko Infiernoen hegoaldeko magala destrepatuko genuen Pondielleseko lakuen aldera. Horretara, Erdiko eta Ekialdeko tontorrean artean dagoen kanal gure ezkerretara utzita, hitoei jarraituko genien destrepeak ibiltzeko zatiak tartekatuz.


Gure ezkerraldean hurrengo helburua, Arnaleseko gailurra.


Behin Infiernoetako hegoaldeko magala jaitsita, berriro goiti abiatuko ginen. Malda harritsu bat igo, trepada batzuk egin eta Arnaleseko bi puntak lotzen dituen ertzera atera ginen. Ertz ederra da benetan.


Ertzaren bertze aldean ibilbidearen bukaera izanen zen Balneario de Panticosa ikusten zen 1400 metro beheitiago.


12:51 : Arnales (3006m).
Eguneko laugarren tontorra sakelera! Azkena izanen zen.


Berriz motxilak utzi genituen tokira itzuli eta jaitsiera luzeari ekin genion. Argazkian, Saretaseko lepora jaisten Pondiellos, Aguja de Pondiellos eta Garmo Negro mendiak eta Pondielloseko lakuak parean genituela.


13:13 : Cuello Saretas (2834m).
Lepo honetara iritsi eta zeharkatu gabe harri tarteko bidexkari jarraitu genion Pondielloseko lepora, izen bereko mendiaren magalak zeharkatuz..



13:24 : Cuello de Pondiellos (2809m).
Behin lepo honetara iritsita eguneko tontorrei azken begiratua bota eta poz-pozik Balneariora jaisten hasi ginen.


Pozak neke bihurtu ziren ordean 1200 metroko desnibela duen jaitsiera luzean. Hasieratik ikusten da helmuga baina badirudi inoiz ez dela ailegatzen.


Gibelean utzi genituen zonaldeko bertze klasiko batzuk ere: Argualas eta Garmo Negro.


15:09 : Mallata Baja (1900m).
Beheitirakoan inguru eder honek behintzat nekeaz atzentzen laguntzen zigun.


Mallata Baja de la Argualas.


15:30 : Baños de Panticosa (1636m).
Azkenean, eta ia zortzi orduko ibilaldia egin ondotik ibilbide bikain honen bukaerara ailegatu ginen. Dudarik gabe ezagutu beharreko mendia.


Bortz izarreko klasiko bat.


Akitzeko eguneko bideo-erreportaia: