EGUNA: 2024/12/15
ABIAPUNTUA: Col de Bouesou (1009m)
ZAILTASUNA: S2
DENBORAK:
- Igoera: 3 ordu
- Jaitsiera: Ordu eta erdi
NOLA AILEGATU:
Nafarroa Beherea eta Zuberoako probintziak zeharkatu behar dira. Donibane Garazi, Lartzabale, Maule eta Atharratze herriak pasata, Montori herrian utziko ditugu Euskal Herriko lurrak. Lanne en Baretous herrira ailegatuko gara hurrena eta herri hau pasata eskuinetara Arette herrira doan bidegurutzea ikusiko dugu. Bertara joanen gara. Arettetetik Issor herrian barrena, Aspeko bailarara iritsiko gara. Behin hemen, Zaragozako norabidea hartuko dugu eta aitzinera segituko dugu haranean barneratuz. Osse en Aspeko irteeran utziko dugu errepide nagusia eta herri hau gurutzatuta Athas herrira joko dugu. Hemen San Martingo Harriko eski estaziora igotzen den bidea hartuko dugu Col de Bouesoura ailegatu arte. Bertze bi aukera ere badaude puntu honetara ailegatzeko. Aipatutakoa baino motzagoa guretako, Issor herria baino lehen Lourdios Ichere herrira jo eta hemendik igotzea. Osse en Aspe herritik zuzenean ere igotzen da bertze errepide bat. Dena den, bide txikiak dira denak eta elurra apal dagoenean posible da goraino ez ailegatzea. Kasu hauetarako onena egin genuen bidea erabiltzea da, goraino ez igota eskiekin igotzeko biderik motzena eta zuzenena baita.
ARRASTOA:
Powered by Wikiloc
KRONIKA:
Aretako eski estazioa eta Aspa (frantsesez Aspe) bailararen artean bada eremu bat Pirinioetako bertze bazterretan aurkituko ez duguna bezalakoa. Izeiz zipriztindutako magalek eta koloretako harresiek bertze kontinente bateko mendizerretan gaudela pentsarazten ahal digute, gehienbat elurrez estaliak daudelarik. Eskiz inguru honetako guziko ibilbiderik ezagunena Barlagnekoa da. Paraje polita izateaz gain, eskiatzeko ezin hobea baita. Hala ere, pixka bat ekialderago jende gutiago ibiltzen den Tourelles de Camplongeko ipar magalak inbidia guti dio paisaia aldetik. Bertan izan gara asteburu honetan.
10:25 : Col de Bouesou (1009m)
Presarik gabe ailegatu ginen abiapuntura eta halatsu ekin genion ibilbideari. Iragarpenek eguna argituz joanen zela zioten eta horri heldu gintzaizkion. Abiapuntutik Aspe bailaran argiago zegoela ikusten zen.
Etxolaren kanpoko aldean geldialdi motza egin genuen. Bidearen erditsua egina zegoen jadanik. Duela sei urte etxola honetan pasatutako gauaren oroitzapenak etorri zitzaizkidan. Aunitzetan oroitzen gara bertan pasatutako hotzak. Hala ere, erran behar da barnetik egoera onean dagoela eta luxu bat dela bertan gaua pasatzea.
Etxolaren ezkerreko aldetik (ekialdetik) basora sartzen den pasilo iduriko bat abiatzen da. Bertatik iganen ginen zati batean, basoa ez baita hain trinkoa.
Hortik soilgune bat zeharkatu eta berriz basoan barneratuko ginen. Elur aunitz zegoen eta zati batzuetan arrastoa irekitzeak lanak eman zizkigun.
Zatirik trinkoena gibelean utzita, malda berriz ere etzan egiten da momentu batez.
Hortik goiti eskiagarriagoak diren malda politak harrapatuko genituen goitiraino.
Pinuak eta harkaitz gorrixkak inguru honen ezaugarriak dira; sarreran erran bezala, bertze mendilerro batean gaudela ematen du.
Tourelles menditik iparraldera erortzen den ertzetik hurbil egin genuen igoera, lainoarekin ikusgarritasuna ez zen onegia eta erreferentziak bilatzen genituen izeietan.
Kaskotik 100 metro beheitiago dagoen bizkar batean geldialdia egin genuen eta goiti segitu edo ez zalantza izan genuen.
Azkenean pixka bat arindu eta azken metroak igan genituen.
14:06 : Tourelles de Camplong (2038m)
Eskien azpiko kalotxak eta ikusgarritasunagatik ez ginela ailegatuko pentsatu nuen momenturen batean, baina azkenean kaskoan ginen. Trantsizioa egin eta pixka bat arintzen ari zuela ikusita beheiti abiatu ginen. Pena izan zen gailur honek duen ikuspegi zoragarriaz ezin izan genuela disfrutatu.
Jaitsieran, ordea, bai disfrutatu genuen. Elurra goitiko zatian kalitate onekoa zen eta gainera zerua irekitzen hasia zen.
Mendiaren goitiko partean eskiatzeko malda politak daude.
Gabonetako postaletako parajeak...
Minutu gutitan zerua erabat garbitu zen. Bertze egun bat ematen zuen.
Igoerako bidetik egin genuen autorainokoa, tarteka inguruak eskaintzen zigun ikuskizunaz gozatzeko geldialdiak eginez.
15:40 : Col de Bouesou (1009m)
Jaitsieraren azken partean elur eskasa harrapatu genuen eta nola edo hala ailegatu ginen autora. Hala ere, egunaren balorazioa bikaina izan zen eta aldez aldeko irribarrearekin egin genuen etxerako bidea.
