hodei guztien gainetik...

2026/08/28

Pic de Ger (2613m) - Les Chemins du Dharma (V+, 400m)

EGUNA: 2026/08/28

ABIAPUNTUA: Gourette (1359m)

ZAILTASUNA: V+, 400m

IRAUPENA:

Hurbiltzea: Bi ordu
Eskalada: Lau ordu
Jaitsiera: Bi ordu eta erdi

NOLA AILEGATU:

Erratzutik aterata Behe Nafarroara pasatu behar da Izpegitik. Baigorritik Garazira jo eta hemendik Donapaleu aldera. Donapaleutik Sauveterre-de-Bearn aldera doan bidea hartu behar da baina seinaleetan Oloron ikustean azken honetara joanen gara. Oloronetik Paue aldera hartu, baina hiria gibelean utzi eta gutxira Laruns eta Artouste alder bideratzen gaituzten seinaleak ikusiko ditugu. Larunsetik Aubisque mendate ezagunean goiti abiatuko gara Gourette eski estazioraino.

ARRASTOA:

KRONIKA:

Gailurretaraino igaten diren eskalada bide ekipatuak preziatuak izaten dira normalean. Guretako are gehiago mendi hori ezaguna eta inoiz igan gabea baldin bada. Konbinazio hori ematen da Ger mendiko Chemins du Dharma bidearekin. Kareharrizko pareta ikusgarriek babesten duten mendi honetara, pareta horietatik beretik eskalatzeko aukera ematen dute.

7:59 : Gourette (1359m)

Inguru honetan eskalatzen nuen laugarren aldia zen. Estazioko aparkalekuan gaua pasatu eta lehen orduan paratu ginen martxan. Abiapuntutik beretik jadanik eguzkitan zegoen Ger ikusten genuen.

Igoeraren zati handiena eski pistetatik eginen genuen. Rhododendrons pistatik hasi, eta argazkiko Pene Medaa eta Ger mendien artean kokatua dagoen Pene Blanque sektorean goiti egin genuen.

Hurbilketa eroso eta azkarra da... Beno azkarra duen desnibela kontuan izanda, zeren eta bi ordu inguru pasatzen baitira bidearen azpiko aldera ailegatu orduko.

Eskuinetara Coutchets mendia eta haren paretako eskalada bideak utziko genituen. Hor ere eskalatu beharko dugu egunen batean...

Eta metroak irabazten segitu genuen Ger mendiaren ekialdeko pareta eguzkitsuari so.

2070 metro inguruan Plaa Segoune izeneko zelaira ailegatuko ginen. Puntu honetan hegoalderako norabidea utzi eta eskuinetara biratuko ginen paretaren oinera ailegatzeko.

Bizkar gisako batetik eginen genuen hurbilketaren azken zati hau. Bidea paretan ikusten den betile formako zuloaren ondoan hasten da. Erreferentzia interesgarria da honako hau beraz.

Belarrezko maldak utzi eta azken metroak harritza batetik egiten dira. Gu egon ginelarik, harritzan bi kolorezko makila zeuden: urdina azpian eta gorria goitiago. Gu gorriraino joan ginen, baina berez makila urdinaren parean hasten da bidea. Hala ere, ekipatu gabeko IV. graduko lehen luzea saihestea zen gure asmoa eta hori makila gorriaren ondotik zeharkaldia eginda lortzen da.

Kobazulo ttipi honen azpitik ezkerretara terrazatxo batetik ailegatuko ginen lehen luzearen gaineko aldeko bilkurara. Hala ere, kasu eman behar da makila gorriaren ondotik goiti hasten diren paraboltetaik eskalatzen hasi gabe, hori ireki berri duten bertze bide bat baita. Gu pixka bat nahasi gintuzten parabolt horiek.

Azkenean terrazatik ezkerretara egin eta lehen bilkura erosora ailegatu ginen. Lehen luzea saihestuta beraz, handik hasiko zen gure eskalada:

1. luzea (IV+, 52m): Bilkuratik goiti plaka etzanetatik eskalatzen hasten da. Zailtasun handirik ez du, baina aseguruen artean distantzia dago. Bide osoaren ezaugarria izanen zen hori.

2. luzea (V, 55m): Hau ere nahikoa etzana da hasmentan, baina azken zatian duen diedro ireki batean pixka bat tentetzen da. Hor dago luzeari zailtasuna ematen dion pasabidea.

3. luzea (V-, 58m): Ezkerretara hasten da diedro etzan batetik eta gero ere ezkerretarako joerarekin segitzen du. Txapen arteko distantziagatik, fin ibili beharreko pausoren bat badu.

4. luzea (V-, 55m): Zeharkaldia akituta, zuzen goiti egiten du. Luze erraza da, zati etzan eta bertikalagoak tartekatuz.

5. luzea (V+, 60m): Pareta bertikalago paratzen da eta bide osoari gradua ematen dion luzea hauxe da. Polita, eta zati zailagoetan ongi babestua dagoena.

6. luzea (IV, 25m): Trantsizio luzea belarrezko zati bakarrarekin. Erne ibili behar da bilkura huts egin gabe, ondoko luzean ensanblean atera nahi ez badugu. Bilkura parabolt eta iltze banaz osatua dago, baina azken hau ez da aise ikusten.

7. luzea (IV+, 55m): Hasmentan kanaltxoak dituen plaka handi eta nahiko etzana eskalatu behar da. Aseguruen arteko distantzia handia da, bortz bertzerik ez baititu. Eta ezin da deus ere sartu harkaitz trinkoa delako.

8. luzea (V-, 53m): Z bat marrazten du luzeak. Lehenik pixka bat ezkerretara, gero eskuinetara eta akitzeko berriz ezkerretara.

9. luzea (V, 45m): Ezproi gisako batetik goiti egiten da makurtutako diedro batera ailegatzeko. Diedro honetatik ezkerretara egin behar da zati batean, eskuinetara ertzean dagoen bilgune deserosora ailegatu arte.

10. luzea (IV, 45m): Azken luzea erraza da, baina harkaitzaren kalitatea arras eskasa da eta kasu eman beharrekoa da.

Ger mendiaren tontorretik metro gutira akitzen da eskalada bidea. Lau pauso eman eta kaskora igan ginen.

14:33 : Pic de Ger (2613m)

Gailurrean bakar-bakarrik egon ginen eta ikuspegi ederraz gozatzeko aukera izan genuen. Uda beroaren azken egunetan ipar-haize freskoa eskertuko genuen.

Laruns herritik zenbatetan ikusi izan dugun mendi hau... Oraingoan kontrako ikuspegia genuen: gailurretik herria.

Kaskoko argazkia beheiti abiatu aitzinetik...

...eta jaitsierari ekin genion... Jaitsiera mendiaren bide arruntetik eginen genuen. Hasteko hegoaldeko maldatik ezkerretara egin genuen Plaa Segouneko lepoaren bila.