2021/05/28

Peña Sabocos (2757m)

EGUNA: 2021/05/25

ABIAPUNTUA: Ibon de los Asnos (2055m)

ZAILTASUNA: S4 (goitiko kanalea eskiatu gabe S3)

DENBORAK:
  • Igoera: Bi  ordu eta erdi
  • Jaitsiera: 45 minutu
NOLA AILEGATU:
Iruñeatik JaKara joan eta hemendik Sabiñanigorako bidea segituko dugu. Sabiñanigotik Biescasera eta Tenako bailaran barneratuko gara. Portaleteko mendatean goiti igotzen den errepideari segituko diogu eskuinetara Hoz de Jaca herrira doan errepidetxoa hartu arte. Herri honetatik goiti Panticosako eski pistetara igotzen den pista hartuko dugu. Luzea da eta zati batzuetan ez da arras egoera onean, baina ibilgailu normalarekin igotzen ahal da. Elurrak mugatuko digu abiapuntua, gure kasuan pistaren hondarreraino ailegatu ahal izan ginen, Asnos lakuraino.

KRONIKA:
Elur eta eskiaren friki xamarrak garenok bi arazo izaten ditugu aunitzetan: lehena, Pirinioetan elur pizar bat gelditzen bada beti bertze eski ateraldi bat gehiago egiteko aukerak bilatzen aritzen garela; eta bigarrena, ateraldi hori gauzatzeko bertze friki bat bilatu behar izaten dugula. Herriko mendiak udako kolorez janzten eta kostaldeko hondartzak jendez betetzen hasten direlarik aurpegi arraroarekin begiratzen digu jendeak eskiatzera goazela erraten diegularik. "Bada elurra oraindik'" izaten da ohiko galdera. Bada bi oztopoak gainditu eta denboraldi akabailako santutegi horietako bat ezagutzeko aukera izan dugu oraingoan: Tendeñerako mendigunea. Bi mendik deitzen dituzte eskiatzaileak bailarak lorez estaltzen direlarik: Tendeñerak eta Sabocosek. Gu bigarren honetan ibili gara eta arras aho zapore onarekin utzi gaitu, mendi ikusgarria iruditu baitzaigu.


9:24 : Ibon de los Asnos (2055m)
Pista zakarra goitiraino igo eta eguzki goxotan igoerarako prestatu ginen. Inguruak marmota eta sarrioez gain, arimarik ere ez...


Autotik pistako metro batzuk eskiak bizkarrean genituela eginen genituen, baina elurra hurbil zegoen.


100 bat metroko altuera irabazi eta eskiak oinetara. Elurretan barneratzen ginen bitartean gibelean udako paisaiak ikusten genituen, laku urdin eta larre berdez apainduak.


Malda bat igo eta Escalar izenez ezagutzen den zuloan sartu ginen. Sabocos inguruko mendi eta gandor harritsuek hesten duten leku hau ikusgarria da eta txiki sentitzen ginen bertan barneratu ahala.


Laku elurturaino metro batzuk galdu eta hodi itxurako pasabide batean goiti abiatu ginen. Eguzkitan goxo zegoen, baina itzaletan tenperaturak beheiti egiten zuen eta elurra gogor zegoen. Kutxilak paratu eta kasu emanez igo ginen.


Berriz ere eguzkitara aterata elur goxo eta errazagoa harrapatu genuen igotzeko.


Metroak irabazi ahala paisaia gero eta ikusgarriagoa da. Lehendabiziko aldia genuen bertan eta aunitz gustatu zitzagun.


Hoditik atera eta Sabocoseko ertzaren mendebaldeko maldan goiti segitu genuen. Eskiekin zati batean, baina laster kenduko genituen irudian ikusten diren kanaletako batetik igotzeko.


Erran bezala, malda tentetzen delarik eskiak motxilara eta kranpoi eta pioletaren laguntzaz igoko genuen kanalea. 40-45 gradu inguruko malda hartuko du tarte batzuetan eta normalean oinez egiten da tarte hau.


Sabocos mendiaren ipar-mendebaldeko sorbaldara atera ginen horrela. Bertan eskiak utzi eta ertzetik segitu genuen gailur aldera.


I. graduko pausu misto erraz bat gainditu behar da, baina ertza aski erraza da.


Azken metroak...


Vignemale handia gailur ingurutik...


12:00 : Peña Sabocos (2757m)

Bi ordu pasatuxean mendi eder honen puntan ginen. Igoera zinez polita iruditu zitzaigun. Polita eta askotarikoa. Lehenik elur malda zabalak lakutik goiti, gero Escalarreko zirkuan barneratzen den hodia, segidan mendebaldeko kanale tentea eta akitzeko ertz panoramikoa. 


Hegoaldean hodei nagi batek ikusoegia murrizten zigun, baina iparraldera urdin eta garbi ageri ziren zeru ertzak. Garmo Negro eta Infierno inguruak parez pare genituen..


Gure oinetan Asnos eta Sabocos lakuak eta Panticosa herria...


Kaskoko egonaldiaren ondotik ertza jaitsi eta eskiak paratuta egin genuen mendebaldeko kanalean beheiti. Goitiko zatia ahal bezala jaitsi genuen, badaezpada pioleta eskuetan hartuko. Hortik beheiti udaberri erako elur goxoarekin bihurgune politak marraztu ahal izan genituen elur marroixkan.


Nahi baino lasterrago akitu zen elur tartea, gehienetan gertatzen den bezala...


13:31 : Ibon de los Asnos (2055m)

Eskiak bizkarrera eta paseotxo motzarekin akitu genuen ateraldi ederra. Azkena eskiekin? Segur aski bai.


 

2021/05/21

Saioa (1418m), Okolin (1360m)

EGUNA: 2021/05/20

ABIAPUNTUA: Berroeta (376m)

ZAILTASUNA: Erraza

DENBORAK (oinez):
  • Berroeta - Saioa : 3 ordu
  • Saioa - Okolin : Ordu erdi
  • Okolin - Berroeta : 3 ordu
NOLA AILEGATU:
Ateraldi honen abiapuntua Berroetako herrian berean dago. Irun eta Iruñea lotzen dituen N121A errepidetik hurbil dago, Belateko tunelen iparraldeko isurialdean. Herriko plazan aparkaleku txiki bat dago.

KRONIKA:
Zoragarria. Hitz bakar batean Berroeta-Saioa mendi lasterketak egiten duen ibilbidea definitu beharko banu hori izanen litzateke egokiena. Oinez zein lasterka egiteko ibilbide ederra da, Baztango mendirik altueneraino igotzeko bertze modu bat. Aise luzeagoa, baina Abartan eta Saioa lotzen dituen gandorrean bizkarrez bizkar egiten den bideak merezi du. Horrez gain, Okolindik beheiti pasatzen diren pagadi ederrek eta kanalaren gaineko ibilbideak ederki biribiltzen dute ateraldia.

15:46 : Berroeta (376m)
Arratsaldeko ordurik beroeneko eguzki sargoritan utzi nuen herria hegoalderantz abiatzen den zementuzko pistatik.


Pista lasterbideren batekin moztuta bidegurutze honetara ailegatu nintzen. Ezkerretik segituko nuen goiti eta beheitirakoa eskuinetik eginen nuen.


Metro batzuk gehiago eginen nituen pistatik, baina irudian ikusten den ezkerretarako bihurgunean definitiboki utzi eta zuzen segituko nuen. Parean irudika daitekeen leporantz segitzen du ibilbideak.


Hasierako metroak ez dira lauak, baina behin pista utzita bideak atsedenik gabe egiten du goiti Elortegiko bizkar ingururaino. Herria laster gelditzen da arras beheitian.


Momentu oro Abartan ezaguna gure ezkerretara utziko dugu. Igo ordez inguratu egiten da mendi hau hegoalderantz Saioarekin lotzen duen bizkar luzearen bila.


Puntu honetatik lehen aldiz ikusten da Saioa, eskuinetara urrun oraindik. Ezkerrean erran bezala Abartan borobildua uzten da eta bidea erdian ikusten den Elortegiko bizkarraren ondotik pasatzen da. Nik GPSari segituz Elortegi eskuinetik inguratu nuen, baina lasterketa muinoaren gainetik pasatzen omen da orain.


Abartan eta Saioan arteko bizkarrera hurbildu ahala malda tentetasuna galduz joaten da. Hemendik goiti zati aunitz daude lasterka eroso egiten ahal direnak eta oinez inguruaz gozatuz igotzeko ere bai, bistan da.


Abartan gibelean utzi nuen eta hegoaldeko norabidea hartu.


Saioarako (gibelean ikusten da) bidean Katiliko Harria, Gorospil eta Ekaitza mendiak inguratzen ditu ibilbideak, batean ezkerretara bertzean eskuinetara. Kaskoz kasko egitea ere aukera ona izaten ahal da gozatzeko lekua baita.


Ekaitza ekialdetik inguratzen da eta tarte batean larre berdeek pagadi politari uzten diote lekua.


Garai honetan altuerako pagadiak zoragarri egoten dira. Nire ustez urteko garai politena bazter hauetan ibiltzeko...


Ekaitzeko Lepora ailegatuta Saioako kaskorainoko azken malda gelditzen da. Alfonbra berdearen gainetik egiten da goitirainokoa, malda tentea delarik.


Saioaren iparraldeko sasigailurrera ateratzeko izerdiak bota behar dira. 200 bat metroko malda da, baina tentea eta ibilbidearen puntu honetan kosta egiten da. Gailur nagusira ailegatzeko paseotxo bat bertzerik ez zitzaidan gelditzen.


17:21 : Saioa (1418m)
Arraro eta guzi sentitzen nintzen Saioan elurrik gabe egotean. Uste dut txikitatik egotekoa nintzela eskiak oinetan izan gabe. 


Kaskotik mendebalderantz biratu eta irudian ikusten den Okolinera abiatuko nintzen.


100 bat metroko igoera dago bi mendien arteko lepotik Okolinera, baina Saioako ipar-malda baino etzanagoa da eta aise igotzen da.


17:36 : Okolin (1360m)
Okolinen akitzen dira goitirakoak. Hemendik bukaeraraino malda beheiti edo zelaia da, baina bide luzea gelditzen da.


Gartzaga aldera jaisten da bidea, segidan mendi hau eskuineko aldetik inguratzeko. Lasterka egiteko leku zoragarria da, ia harririk ez duen larre berde leuna.


Gartzagaren ekialdeko maldetan beheiti jaitsiera tentea burututa puntu honetan utziko nituen altuerako larre ederrak. Hemendik Berroetaraino itzala nagusi da eta egia erran eskertuko nuen, denbora dezente baineraman urik gabe.


Pagadiaaren hasierako zatia zoragarria zegoen, intentsitate handiko berdez margotuta.


Atsedenik gabeko jaitsiera bertikala egin nuen kanaleraino ailegatu arte. Puntu honetan lasterketaren bideak kanalea utzi eta beheitiagotik segitzen du, baina ni despistatu eta kanalearen gainetik zelakoan aitzinera joan nintzen.


Egia erran leku hau ezagutzeak merezi du eta bertze bidea nolakoa den jakin gabe, hemendik joatea aholkatzen dut. Ibilbide luzeagoa ateratzen da 6 kilometro inguru egiten baitira kanalearen gainetik, baina ibiltzeko edo lasterka egiteko leku zoragarria da.


Zatiren batean bidea kanalearen gainetik urruntzen da harkaitzezko harresi ikusgarriak gainditzeko.


Eta azken zatian kanalearen paretaren gainetik ibili behar da.



19:16 : Berroeta (376m)
Kanalearen gaineko ibilbidea zentral batean akitzen da eta hortik herrira pista batetik eta laburbideetatik jaitsi nintzen. Azkenean 24,5 kilometroko bidea atera zitzaidan, lasterketarena baino 3 kilometro inguru luzeagoa, baina lehen erran bezala erabat gomendagarria inguruko altxor txiki hauek ezagutzeko. 



 

2021/05/11

Auza (1306m), Soralar (827m)

EGUNA: 2021/05/08

ABIAPUNTUA: Erratzu (280m)

ZAILTASUNA: Erraza

DENBORAK (oinez):
  • Erratzu - Soralar : Ordu eta erdi
  • Soralar - Basagar : Ordu bat
  • Basagar - Auza : Bi ordu eta erdi
  • Auza - Erratzu : Ordu bat eta laurden
NOLA AILEGATU:
Ateraldi honen abiapuntua Erratzu herrian berean dago. Herri sarrerako pisuetan ibilgailua uzteko lekua egoten da.
 
ARRASTOA:
Powered by Wikiloc
 
 
 KRONIKA:
2020ko urriaren 3an euskal preso politikoen eskubideen alde egitekoa zen mendi kaskoetako argazkia gibelatu behar izan zen eguraldi txarraren ondorioz. Azkenean maiatzaren 8an egin ahal izan dira 650 gailurretako argazkiak. Gure kasuan herriko bi tontorretan genuen hitzordua, Auzan eta Buztanzelain. Ekimena aitzakia gisa hartuta Auzara bide luze baina polit honetatik igotzeko aprobetxatu nuen.

8:30 : Erratzu (280m)
Zortzi eta erdietarako zegoen paratua gailurretara Izpegitik joateko taldeen hitzordua eta ordu berean ekin nion nik ere nire bideari. Herriko karrikak Urdatxipiatik goiti zeharkatu eta hilerri aldera egin nuen lehen maldetan goiti hasteko. Egun zoragarri eta beroa nuen aitzinetik...

 
Herritik atera eta lasterrera eguneko lehendabiziko igoera akitzen den Soralarko gaina ikusten da. Kasik goitiraino pista zabalari segituko nion.


9:11 : Soralar (827m)
Pista Otxaskoko lepo inguruan utzi eta bi belagiren artetik doan bidexka berezitik egiten da Soralarrerainokoa.


Soralarretik Burga parez pare nuen. Bertara igo ordez eskuinetara inguratuko nuen Basagarrera doan pista batetik. Pistan egoera eskasean dago, eroritako zuhaitz aunitzekin, baina kaskotik pasatzea baino motzagoa da.


9:27 : Basagar (684m)
Herritik abiatu eta ordu eskasean Basagarren nintzen. Hemendik ekialdeko norabidea hartuko nuen marka zuri-berdeei segituz. Marka horiek segitu behar dira Urruska mendiaren oinean kokatu eta Pagozelaiko lepora doan bidexka hartu arte. 


Zati honetatik oraindik urrun ikusten da Auza...


Erran bezala, Urruskaren oinean ezkerretara pagadi zoragarri batetik doan bidea hartu behar da...


...eta Argañeta mendiaren magalean GRaren marka zuri-gorriak harrapatzen dira. Hortik aitzin horiei segituko nien Auzako kaskoaren azken maldaraino.


Helburua, gero eta hurbilago, baina urrun...


Argañeta mendia gainetik pasatu gabe inguratzen du GRak. Zati hau azkarra da, lasterka ibiltzeko aproposa...


Ixtauzeko lepo inguruan uzten dira azken pagoak gibelean. Parez pare nuen Antxola mendia, baina oraingoan bertara igo ordez GRari segituz inguratu eginen nuen. Hau da Erratzuko mendietako nire leku kuttunenetariko bat.


Ikusgarria da Sakana deitzen zaion bizkarrean barrena Auzara igotzen den bidea. Ikusgarria eta bertze aldeetatik baino zerbait etzanagoa. Eta hori gutxi balitz, lasaitasuna ziurtatua dago. Bi lagun bertzerik ez nituen gurutzatu...


10:35 : Auza (1306m)
Argazkirako Izpegitik igo zen taldea baino pixka bat lehenago ailegatu nintzen kaskora. Goitian egonaldi luzea belarretan tertulian, argazkia egin eta beheiti... Espero dezagun gisa honetako argazki aunitz gehiagorik ez atera behar izatea...


 Jaitsiera hego-mendebaldeko bizkarretik eginen nuen, herrira ailegatzeko bide zuzenenetik. Hortik Iñarbilera eta handik etxera...

 
12:06 : Erratzu (280m)
Hankak ederki kargatuta nituela ailegatu nintzen etxera, ibilbide ederra egiteak uzten duen sentsazio goxoarekin.