Mallo de las Foyas (2132m)

EGUNA: 2023/03/04

ABIAPUNTUA: Pont de Masousa (959m)

ZAILTASUNA: S3

DENBORAK:

• Pont de Masousa - 2054 metroko bizkarra : 3 ordu
• 2054 metroko bizkarra - Ibon de Acherito : 20 minutu
• Ibon de Acherito - Mallo de las Foyas : 45 minutu
• Mallo de las Foyas - Pont de Masousa : Ordu bat eta erdi

NOLA AILEGATU:

Masousako aparkalekua Lescun herritik goiti dago. Lescunera iristeko, gure kasuan, Nafarroa Beherea eta Zuberoako probintziak zeharkatzea da lasterrena. Donibane Garazi, Lartzabale, Maule eta Atharratze herriak pasata, Montori herrian utziko ditugu Euskal Herriko lurrak. Lanne-en-Baretous herrira ailegatuko gara hurrena eta herri hau pasatuta eskuinetara Arette herrira doan bidegurutzea ikusiko dugu. Bertara joanen gara. Arettetetik Issor herrian barrena, Aspeko bailarara iritsiko gara. Behin hemen, Zaragozako norabidea hartuko dugu eta kilometro batzuz bailaran sartu ondotik, eskuinetara Lescun herrira doan desbideratzea aurkituko dugu. Puntu honetara Pirinioen hegoaldetik ere irits daiteke, Jaca eta Somporteko tunelean barrena. Lescun herrira iritsi baino pixkat lehenago, Masousako aparkalekura gidatuko gaituzten seinaleei segiko diegu.

ARRASTOA:

Powered by Wikiloc

KRONIKA:

Lescunera eski denboraldian gutienez behin agertu beharra dago. Eski denboraldian behin, udazkenean, eta noiz ez? Lehen egunean bidean goiti zirku honetara ailegatzean sentitu nuen zirrara bera sentitzen dut bertara joaten garen aldiro. Kasu honetan asteburu bikaina eman dugu Lescundik mugitu gabe. Lehen egunerako duela bederatzi urte udan egin nuen zirkular polita errepikatu dugu: Ansabereko orratzak, Acheritoko lakua hormatua eta akitzeko Lazerquetik beheiti jaitsiera bikaina.

8:52 : Pont de Masousa (959m)

Kuadrilla anitza bildu ginen Masousako aparkalekuan: gipuzkoarrak, lapurtar bat, Paueko bat eta gu bi Erratzutik. Gauzak prestatu eta Lamaryko zubira doan pista elurtuan goiti abiatu ginen.

Zerua lainotuta zegoen azpiko zatian, baina iragarpenek goiti eguraldi ona izanen genuela zioten.

Lamaryko udako aparkalekuraino pare bat kilometro pasatxo egin genituen. Puntu honetatik aitzin, lainoa harrotzen hasi zen eta inguruko mendiak ikuskizuna eskaintzen hasi ziren. Argazkian Poure Lamary eta Leurt mendiak ageri dira.

Zubia zeharkatu eta basoaren lehen soilgunera atera ginen. Puntu honetan hetsiko genuen ibilbide zirkularra ordu batzuk geroago.

Iaz otsaila partean ibili ginen inguru honetan, baina orain baino elur gutiago harraoatu genuen orduan.

Pagaditxo bat zeharkatu eta Ansabereko orratzen presentzia indarra hartzen zihoan.

Ansabereko lautadatxo politera ailegatu ginen hala, ordubete inguruz. 

Zer erran leku honi buruz... Liluragarria da, basoz inguratua eta parean Sobarcal, Ansabereko orratzak eta Mouscate mendiak dituela.

Lautadatxoa zeharkatu eta ezkerretara hartu genuen. Momentuz gure aitzinetik zihoazenen arrastoari segitzen ari ginen. Bertze baso zati bat zeharkatuko genuen Ansabereko etxoletara ailegatu aitzinetik.

Ilunetik argira pasatu ginen zuhaitzak utzi eta Ansabereko etxolak bistaratu genituelarik.

10:25 : Cabanes de Ansabere (1569m)

Etxolaren ondoan geldialditxoa taldea biltzeko. Parean ikusten zen Ansoko leporako bidea utzi eta hegoalderantz biratuko ginen puntu honetan.

Metro batzuk galdu eta parean ikusten den Chouriqueko mendien arteko bizkarrerantz segitu genuen. Muinotxoz osatuta daude zeharkatuko genituen magalak eta elur-jausi arriskuarekin plakak sortzen ahal dira. Guk bizkarrak bilatu genituen goitiraino.

Etxoletaraino ez bezala, hemendik goiti arrastoa irekitzea tokatu zitzaigun.

Bizkarra hurbilago...

Azken malda gainditu aitzinetik geldialditxoa...

Gure gibelean Ansabereko orratzak eta Hiru Erregeen Mahaia...

12:00 : IGN 2054m punta (2054m)

Azken maldatik Chourique eta Lac de Chourique mendien arteko bizkarrera atera ginen. IGN mapan 1991 metroko altuerara dagoen izenik gabeko lepora ailegatu ginen eta bizkarretik segitu genuen 2054 metrora dagoen kotara. Erran behar da azken metro hauek eskiak bizkarrean genituela elur gogorragatik.

 

Gailurtxotik Acheritoko lakura 200 bat metroko jaitsiera polita eginen genuen. Hego-ekialdeko orientazioa izanda ere, oraindik hauts zegoen elurra zati honetan.

12:15 : Ibon de Acherito (1869m)

Udan jendez gainezka egoten den laku eder honetan arimarik ez genuen topatu. Zerbait jateko geldialdia egin genuen berriz foka-larruak paratu eta bigarren igoerari ekin aitzin.

Lakutik ekialderantz Laraille eta Mallode las Foyas mendien arteko ertzera aterako ginen. Azken metroetan tentetzen den malda da, baina baldintza arras onetan aurkitu genuen guk eta eskiak zangoetan genituela gainditu ahal izan genuen.

13:38 : Mallo de las Foyas (2132m)

Ertzera aterata, eskuinetara biratu eta metro gutira dagoen gailurra zapaldu genuen.

Gailurrean ez ginen sobera luzatu. Eskietara itzuli eta Larailleko lepora ailegatzeko argazkiko malda eskiatu genuen.

13:59 : Col de Laraille (2007m)

Lepo honetan azaroan ibili ginen azken aldiz. Bertatik Lazerqueko bailarara sartuko ginen.

Lazerquen beheiti egin genuen jaitsiera oroitzeko modukoa izan zen. Paraje ikusgarrian elur hauts arina harrapatu genuen eta gozatu ederra hartu genuen.

Larailleko lepotik beheitiago bailara bitan zatitzen da eta guk Lazerquekoa hartu ordez ezkerrekotik segitu genuen, Poure Lamary eta Leurt mendiaen azpikotik. Bertatik Lamaryko zelaitxora ailegatuko ginen eta garagardo batzuk edateko geldialdia egin genuen.

15:19 : Pont de Masousa (959m)

Pista ziztu bizian jaitsi eta aparkalekuan akitu genuen itzuli eder hau. Paraje eta elur kalitate horrekin egun borobila izan genuela erraten ahal da.

Laraille (2147m), Mallo de las Foyas (2132m)

EGUNA: 2014/08/17

IRTEERA: Pont Lamary (1171m)

ZAILTASUNA: Erraza (F)

DENBORAK:

• Pont Lamary - Mallo de las Foyas (Ansaberetik) : 3 ordu
• Mallo de las Foyas - Pic de Laraille : 20 minutu
• Pic de Laraille - Pont Lamary (Col de Larailletik) : Ordu bat eta erdi

NOLA IRITSI: 

Masousako aparkalekua Lescun herritik gora dago. Lescunera iristeko, gure kasuan, Nafarroa Beherea eta Zuberoako probintziak zeharkatzea da lasterrena. Donibane Garazi, Lartzabale, Maule eta Atharratze herriak pasata, Montori herrian utziko ditugu Euskal Herriko lurrak. Lanne en Baretous herrira ailegatuko gara hurrena eta herri hau pasata eskuinetara Arette herrira doan bidegurutzea ikusiko dugu. Bertara joanen gara. Arettetetik Issor herrian barrena, Aspeko bailarara iritsiko gara. Behin hemen, Zaragozako norabidea hartuko dugu eta kilometro batzuz bailara sartu ondotik, eskuinetara Lescun herrira doan desbideratzea aurkituko dugu. Puntu honetara Pirinioen hegoaldetik ere irits daiteke, Jaca eta Somporteko tunelean barrena. Lescun herrira iritsi baino pixkat lehenago, Masousako aparkalekura gidatuko gaituzten seinaleei segiko diegu. Hemendik, asfaltoa utzi eta egoera nahiko onean dagoen pista bat jarraituko dugu Pont Lamaryko aparkalekuraino.

DESKRIBAPENA:

Mendiko ibilaldi gutxiko uda honetan, eskapada txiki bat egin genuen abuztu erdialdean. Arratsaldean lana izanik, ibilaldi luzeegirik ezin genuen egin eta urrunegi zegoenik ere ez. Hortaz, bertze behin ere, Lescun aldera jo genuen. Helburua Laraille mendian zirkular bat egitea zen. Larunbat arratseko bederatzietan abiatu ginen herritik eta Pont Lamaryko aparkalekuan pasa genuen gaua.

7:46 : Pont Lamary (1171m).

Goiza ikaragarrizko egunarekin ernatu zen. Zeruan urdin eta tenperatura fresko xamarra. Mendirako bikaina! Jadanik negu honetatik ezaguna nuen bidetik Ansabereko etxoletara abiatu ginen.

Segidan bistaratu genituen eguneko protagonistetako batzuk izanen zien Ansabereko orratzak.

Ikusgarriak dira benetan.

Oihan zati batetik zelai eder honetara atera ginen. Aitzinean genituen negu honetan igotako Sobarcal eta Acherito mendiak ere.

8:35 : Cabanes d'Ansabere (1570m).
Pista erosoan barrena eginiko ibilaldi politaren ondotik, Ansabereko etxolak kokatuta dauden eremu ederrera ailegatu genuen.

Aitzineko neguan bertan pasa genuen gaua, udan aldiz, artzaina egoten da. Hala ere, ondoan bertze etxola bat dago irekita gaua pasatzeko.

Etxolatik aitzin, Petragemeko lepora doan bide ezaguna alde batera utzi eta hegoaldera biratu ginen, Ansabereko laku aldera.

Gibelean Hiru Errege Mahaia ikusten hasi ginen.

Panorama ederra eskeintzen ziguten Acherito, Sobarcal, Petretxema eta Hiru Erregeen Mahaia mendiek.

Lescun eta Oza bereizten dituen lerroaren bila joan ginen malda tenteagoetatik.

Ansabereko laku txikiaren ondotik pasa ginen.

Momentu oro inguruaz gozatzeko aukera ematen du inguruak.

Horrela, izerdi batzuk botata IGNko mapan 2032 metroko altuera duen izenik gabe kota zapaldu genuen.

Haize hotzak eman zigun ongi-etorria, baita Acheritoko lakuaren ikuspegi ederrak ere. Bertara jaitsiko ginen jarraian...

9:53 : Ibon de Acherito (1875m).
Behin lakura iritsita atseden hartzeko tarte bat hartu genuen.

Eta bide batez, inguruaren edertasunaz gozatu genuen. Jarraian, eguzki izpiak tapatzen duen lepora igoko ginen, harriz betetako malda batetik.

Lakua inguratu eta beheitian utzi genuen.

Leporako azken metroak, erran bezala, malda handikoa dira baina zailtasunik gabeak. Hori bai, kontuz ibili behar da harri askeak bota gabe.

10:53 : Mallo de las Foyas (2132m).
Horrela, lepora ailegatu eta bortz minutu gehiagotan ondoan gelditzen den Mallo de las Foyas mendia zapaldu genuen.

Ikuspegi ederra oparitu zigun mendia Oza aldera eta baita erdialdeko Piriniora ere.

Bertan lagun batzuk aurkitu genituen eta elkarrekin egin genituen Larailleko gailurrerainoko metroak. Irudian parean ikusten dena da Laraille.

Punturen batean eskuekin lagunduz ertzera iritsi ginen eta eguneko bigarren gailurra egin genuen.

11:15 : Pic de Laraille (2147m).
Mendi nahiko ezezaguna baina benetan ederra da Laraille. Lescun aldera iksupegi polita eskeintzen duena.

Acheritoko lakua nehean eta Alanoak, Chipeta Alto, Chinebral, Acherito eta konpainia parean.

Gailurreko argazkia aurkitutako lagunekin!

11:39 : Col de Laraille (2011m).
Ez ginen denbora gehiegian egon gailurrean. Autoraino jaistea gelditzen zen eta gero etxerainoko buelta; eta nik presa pixka bat nuenez, lagunak agurtu eta Larailleko lepora jaitsi ginen. Jaitsiera erraza da baina destreperen bat egin behar da irudian ikusten den bezala.

Bertatik, iparraldera biratu eta lepoa ere gibelean utzi genuen bide harritsuan ibiliz.

Zonalde harritsuaren ondotik, berdea eta Lazerqueko oihana iritsi ziren. Plazerra izan zen bertatik jaistea. Hori bai, bide bakartia da eta adi egon behar da hitoei segitzeko. Guk momentu batean galdu genituen eta galdu egin ginen.

Aspe-Lescun eremuko bertze altxor bat gehiago: Lazerque.

Toki ikusgarri eta bakartia Pourtet Ouvert eta Pourtet Barrat mendien oinean.

Horrela baso eta belardi zatiak tartekatuz, autorainoko metroak jaitsi genituen. Hori bai, pare bat aldiz galduta.

Lazerqueko oihana...

13:30 : Pont Lamary (1171m).
Bortz ordu eta erdiko ibilbidearen ondotik, berriz ere Poure de Lamary mendiaren oinean itxi genuen ibilaldi eder hau. Bertze bat gehiago, Aspe-Lescun inguruan eta jadanik badira bortz hilabete gutxitan!

Akitzeko eguneko bideoa: