Orriak

Harrigorri (1115m) etiketadun mezuak erakusten. Erakutsi mezu guztiak
Harrigorri (1115m) etiketadun mezuak erakusten. Erakutsi mezu guztiak

2025/07/13

Harrigorri (1115) eta Auza (1306m), A Jean-Pierre (5c,100m) bidea

EGUNA: 2025/07/11

ABIAPUNTUA: Harginen borda - Larreta auzoa (485m)

ZAILTASUNA: 5c , 100m

IRAUPENA:
  • Harginen borda - Eskalada bidearen hasmenta : Ordu eta erdi
  • A Jean-Pierre eskalatzea : Ordu eta erdi
  • Harrigorri - Auza : Ordu erdi
  • Auza - Harginen borda : Ordu eta erdi
NOLA AILEGATU:
Erratzu herritik Izpegiko mendaterantz igaten den errepidea hartu behar da. Herritik atera eta kilometro ingurura eskuinetara ateratzen den zementuzko bide bat ikusiko dugu. Bide hau igan behar dugu azken baserrian akitzen den den arte. Hasmentan zementuzkoa da eta gero asfaltozkoa. Azken baserrian errepidea akitzen den lekuan pista batek goiti segitzen du hegoalderantz. Hor utziko dugu autoa, pista bazterrean.

ARRASTOA:
Powered by Wikiloc


KRONIKA:
Ttipitatik Harrigorri kaskoan herdoildutako kablez egindako bilkura ikusi ahal izan dut. Lehen aldian  aitak kable hura paretatzar hura azpitik goitiraino eskalatzeko zela erran zidan. Zirrara berezia sortzen zidan ordutik harkaitz erraldoi hura eskalatzen ahal zela jakiteak. 

Urte aunitz geroago eskalatzen hasi nintzen eta noizbait bertako bideen informazioa eta krokisak bila aritu izan nintzen. Hasmentan ireki zituzten bi bide zaharren (Yoshi eta Gogol) informazioa bertzerik ez nuen harrapatu interneten. 

Iaz lagun batek talde bat bide berriak irekitzen ari zela aipatu zidan eta itxura ederra zutela bideek. Hala, pasaden azaroan paretaren azpira hurbildu ginen eta talde horrek egindako lan bikaina zuzenean ikusi ahal izan genuen. Hainbat bide zeudela ikusi genuen, bakoitza bere izenarekin eta bideen azpira ailegatzeko sokak eta bertzelakoak zeuden instalatuta. Bide haien graduzioei buruzko informazioa harrapatzea zen gakoa, ordea.

Kasualitatez abenduan berean Baionako Elkar dendan nintzela "Escalade autour de Bayonne" izeneko gida harrapatu nuen. Kuxkuxeatzen hasi eta bertze hainbat eskolaren tartean Harrigorriko bideen krokis eta azalpenak zeudela konturatu nintzen. Bi aldiz pentsatu gabe erosi eta kontent itzuli nintzen etxera bide haiek eskalatzeko momentuaren esperoan.

8:39 : Harginen borda (485m)
Autoa Kuarteleko kaskora eta Elorta aldera igaten den pistaren ondoan utzi, eta pista hau laburtzen duen bidexendatik egin genituen lehen metroak.


Goitiago pistara atera eta Olateko Ttutturruaren begiradapean goiti segitu genuen.


8:50 : Kuarteleko kaskoa (628m)
Kuarteleko kaskoan hartxintxarrezko pistak lurrezkoari uzten dio lekua eta Elortako parajerantz jotzen du.


Pago artetik igaten da pista hau...


Pistak erreka bat gurutzatu baino metro guti batzuk fiteago eskuinetara ateratzen den bertze pista bat hartuko genuen. Bide hau erreka ezkerrean utziz igaten da.


Eta etxola honetara ailegatzen da. Etxolaren gaineko belai ttipia zeharkatu metro batzuk galduta eta bertara Elorrietako lepotik ailegatzen den bidea hartuko genuen.


9:22 : Elorrietako lepoa (831m)
Etxolatik minutu gutian Elorrietako lepoan ginen. Berez puntu honetaraino autoz igateko aukera dago, Baigorri aldetik alfastatutako errepide ttipia ailegatzen baita. Hemendik kartelak Berderiz aldera markatzen digun GRT5 bidea hartuko genuen.


Tente igaten da bidexenda pagopean goiti...


Momentu batean pagopetik atera, eta eskalatuko genuen Harrigorriko harkaitza ikusi ahal izan genuen. Gure bidea ezproi nagusitik eskuinerago hasten da eta harkaitzaren punta baino eskuinerago ikusten den zuhaitzera ailegatzen da.


Bertze pago zati bat zeharkatu...


...eta harkaitzaren iparraldeko aldean beheiti sartzeko bidexka bilatzeko orduan arte segitzen ari ginena utzi genuen. Eskalada bideetara joateko bidexka harkaitzaren kontratik jaisten da eta mugarri bat du gainean markatzeko.


Beno, bidexka zerbait errateagatik! Belarrez eta sasiz zikinduta dago. Ageri da jende guti ibiltzen dela bertan eskalatzen.


Harrigorrin hiru sektore daude eta bide gehienak Gogol sektorean daude, gurea barne. Sektore honetara ailegatuko ginen lehendabizi. A Jean-Pierre bidea sektore honetatik Jonquilles eta Yoshi seltoreetara doan bidetik beretik hasten da. Hortaz Gogol sektoreko kartela utzi, soka baten laguntzaz harkaitz zati bat jaitsi eta ikusiko genuen lehen paraboltetik hasiko ginen eskalatzen. Dena den, lehen luzea saihesten ahal da harkaitz zati hau jaitsi gabe eta Gogol sektoreko gainerako bideetara joanez.


Hala bada, trasteak prestatu eta eskalatzen hasi ginen. Lau luze dituen A Jean-Pierre bidea hautatu genuen arestian erran bezala, denetatik errazena delako, eta harkaitza eta graduazioak ezagutzeko aproposena ere bai.
  • 1. luzea ( 3b , 15m ): Misterio handirik ez duen luze etzana da lehena, arestian erran bezala gainetik saihesten ahal dena. Belar arteko harkaitz zatiak igatean datza.
0 bilkuran

1. luzea akitzen

  • 2. luzea ( 4c , 25m ): 1. luzea akitzean bidearen izena duen harritxoa ikusiko dugu. Bertatik goiti zuzen eskalatzen hasiko gara, gero belarrezko kanal bat eskuinetara zeharkatu, bertze plakatxo bat eskalatu eta berriz belarrezko kanala ezkerretara zeharkatuta bilkura harrapatzeko. Puntu honetatik goitiraino kasu eman behar da gure eskuinetara ditugun Gogol eta Prises Surprises bideekin ez nahasteko.
Argazkian bilkura gaineko lehen plaka eskalatuta, eskuinetara pasatu eta ikusten den sapairaino eskalatu behar da gero berriz ezkerretara itzultzeko. Argazkiko zuhaitzaren gaineko aldean dago bigarren bilkura.

  • 3. luzea ( 5c , 25m ): Bideari gradua ematen dion luzea da. Mantendua eta bertikala. Politena ere bai. Bilkuratik goiti plaka bat eskalatzen da lehenik. Segidan tximinia bat eta hau akitzean eskuinetara biratu eta bertze plaka bat. Ezproi itxurako irtengune baten azpian dago bilkura, azken paraboltetik pixka bat ezkerretara eginez.
3. luzea akitzen

  • 4. luzea ( 5b , 30m ) : Bilkuratik eskuinetara egin behar da ezproitxoa inguratzeko eta segidan ezproiaren gaineko aldera igan ezkerretara biratuz. Behin ezproiaren gaineko aldean gaudela, zuzen segitu eta katez osatutako bilkura batera ailegatuko gara. Segidan bertze bideren bat egin nahi badugu puntu honetatik rapela egiteko aukera dago. Guk bertzerik egiteko asmorik ez genuenez goiti segitu genuen, pareta etzanetik ihartutako zuhaitz baten ezkerretara dagoen bilkuraraino.
Azken bilkura ihartutako arbolaren ondoan

13:03 : Harrigorri (1115m)
Trasteak bildu eta metro guti batzuk iganda, Harrigorriko harkaitzaren gainera atera ginen. Kaskoraino ailegatzen den bide bakarra Yoshi izeneko bide klasikoa da, baina horrek zailtasun aise handiagoa du.


Eskalada akituta Auzako kaskoraino joan-etorria egitea erabaki genuen.


Motxilak altxatu eta azken 200 metroei ekin genien ekialdeko malda tentetik.


Azken metroak gibelean Antxola eta Sakanako bizkarra genituela...


13:23 : Auza (1306m)
Gailurrean haize goxoa lagun zerbait jateko tarte luzea hartu genuen. Inor ez zebilen inguruan...


Iparla aldea tontorretik...


Egonaldiaren ondotik, motxiletara itzuli eta igoerako bide beretik egin genuen autorainokoa.


14:55 : Harginen borda (485m)
Betidanik bi amets nituen mendi kuttuna den Auza inguruan betetzekoak. Bata, bertan eskiatzea zen eta zorionez hainbat alditan egin ahal izan dut. Bigarrena, Harrigorriko bide bat eskalatzea zen. Oraingo ekipazio berriari esker amets hau ere bete ahal izan dut, eta espero dut ez dela azken aldia izanen badago eta zer egina konglomeratu gorrizko pareta horretan.

 

2023/01/31

Harrigorri (1115m)

EGUNA: 2023/01/28

ABIAPUNTUA: Elortako bidea (738m)

ZAILTASUNA: S2

DENBORAK:
  • Igoera: Ordu eta laurden
  • Jaitsiera: Ordu erdi
NOLA AILEGATU:
Erratzu herritik Izpegi aldera doan errepidea hartu behar da, baina kilometro bat inguru ibili ondoren eskuinetara ateratzen den zementuzko bide bat hartuko dugu. Bide hau zementuzkoa izatetik asfaltatua izatera pasatzen da segidan. Asfaltoa azken baserrian bukatzen da, beheitiko bidegurutzetik 2 kilometro ingurura. Bertan utzi behar da autoa (Arginen Borda, 495m.). 4x4 ibilgailua izanez gero eta elurrak utziz gero, Arginen Bordatik goiti segitzen duen pistatik segitu ahal dugu Kuarteleko Kaskoraino (627m.) eta pista okerrago batetik Elorta arte. Pista horrek erreka bat gurutzatzen duen puntua utziko dugu ibilgailua.

KRONIKA:
Elurrak astebete darama etxe bazterrean eta irudimen pixka batekin egun lainotuei zukua ateratzen saiatzen ari gara. Auzaren ekialdeko aurpegi ederra basoak estaltzen du 1100 metro ingururaino. Baso trinkoa da puntu batzuetan, baina badu pasabide ireki bat, eskiatzeko aproposa dena. Erratzuko Barlagne izenez bataiatua gelditu da. 

10:02 : Elortako bidea (738m)
Erreka zeharkatu gabe eskuinetara ateratzen den pista nabarmena hartu dugu. Elurra jarraia da hasmentatik, zaharra ongi gogortu baitute azken egunetako hotzek, eta gainetik 5 bat zentimetroko geruza freskoa du.



Metro batzuk iganda pago arteko pista argazkiko belai zaharraren ondora ateratzen da. Hemen basoa irekitzen da. Belaia eskuineko aldetik inguratu dugu.



Eroritako borda bat ezkerretara utzi dugu belaiaren gaineko larreak igaten genituen bitartean.



Lehen tarte irekia igan eta gero, bertze baso zati bat zeharkatu eta berriz ere zuhaitz arteko soilgune batera aterako ginen.



Pista zahar bat igaten da zati honetatik guzitik. Erreferentzia gisa erabili dugu, baina elur kantitate aproposa zegoen edozein lekutatik pasatzeko.



Hirugarren soilgunean lainoak inguratu gaitu. Hala ere, beti dago arbolen erreferentzia inguruan, bisibilitate gutiko egunetarako.



Azken soilgune honek Auzaren ekialdeko malda irekia uzten gaitu.



Lainoagatik gailurra alde batera utzi eta arbolen mugatik Harrigorri aldera zuzendu gara zeharkaldi luzea osatuz...



11:02 : Harrigorri (1115m)

Gailurrean lainopean, baina haizerik gabe nahiko ongi egoten zen.


 

12:05 : Elortako bidea (738m)

Jaitsiera igandako bide beretik egin genuen, basoaren soilguneak aprobetxatuz. Ea noizbait jaitsiera hau Auzako kaskotik beheitiraino egiten ahal dugun... 



2020/05/29

Olateko Ttutturru (926m), Olate (936m), Elhorriko Kaskoa (987m), Harrigorri (1115m)

EGUNA: 2020/05/27

ABIAPUNTUA: Erratzu (285m)

ZAILTASUNA:
Nahiko erraza (PD-). Olateko Ttutturrura igotzeko ertzean I-II arteko eskalada pausuak daude. Batzuk saihesten ahal dira, baina bertzeak ez. Olateko Ttutturrutik Olate alderako gandorrean ere eskalada errazak egin behar dira.

DENBORAK:
  • Erratzu - Olateko Ttutturru : 2 ordu
  • Olateko Ttutturru - Olate : 20 minutu
  • Olate - Elhorriko Kaskoa : 30 minutu
  • Elhorriko Kaskoa - Harrigorri : 45 minutu
  • Harrigorri - Erratzu : Ordu eta laurden
NOLA AILEGATU:
Erratzu herritik beretik abiatuko gara. Herri sarrerako pisuen inguruko aparkalekuetan uzten ahal da ibilgailua.

ARRASTOA:
Powered by Wikiloc

KRONIKA:
Erratzuko bertze mendien itzalean ezkutatuta dago Olateko Ttutturru mendia. Auzaren handitasunak, Iparlako gandorraren ikusgarritasunak eta Alkaxuri basatiak urtero ehunka mendizale erakartzen dituzten bitartean, Olateko Ttutturruan harkaitzetan putreek hartzen duten babes lasaitasun osoan. Gailurrean ez dago harri mukururik, ezta postontzirik ere. Baina herritik mendietara begiratzen jartzen bagara, oharkabean gure begirada bere punta zorrotzera zuzenduko da, tente altxatzen baita mendebaldetik begiratuta. Nik Txindokiren antza pixka bat hartzen diot, eta Txindoki Goierriko Cervino baldin bada, Olateko Ttutturru Erratzuko Cervino izendatu beharko dugu.

Erratzuko kasko guziak igotzeko falta zitzaizkigun azken gailurrak Ttutturrutik hasita eginen genituen, Elortako larre berde eta politen inguruan ibilita.


8:11 : Erratzu (285m)
Egun zoragarria lagun abiatu ginen herritik goizeko freskura goxoan. Herria utzi eta Iñarbil auzoko errepidetik goiti abiatu ginen.


Iñarbil osorik zeharkatuko genuen asfaltoa akitzen den lekuraino eta puntu honetan belar artean nekez ikusten den bidexka batetik segitu genuen.


Darteko zelaian pistara atera ginen eta lehen aldiz ikusi genuen Erratzuko Cervinoa.


Pistatik zatitxo bat eginda, iratze eta belar arteko bidexka honetatik errekara jaitsiko ginen igoera gogorrari ekin aitzinetik.


Oihan artean sartu ginen erreka ondoan. Berdea nagusi inguruan...


Erran bezala, errekatik goiti atsedenik gabeko igoera hasten da pagadi artetik Olateko Ttutturruren mendebaldeko ertzera atera arte.


Bidean harkaitz berezi hauen ondotik pasatuko ginen.


Harkaitzetako batean korrale bat egiteko aprobetxatu dute.


Pagaditik atera eta iratze artetik egin genituen ertzerako azken metroak.


Lepotxo honetan hartuko genuen Ttutturruren mendebaldeko ertza. Leku polita da arras!


Poliki-poliki ertzean goiti abiatu ginen, lehenik oinez eta inguruko ikuspegiaz gozatuz. Argazkian aitzineko ibilaldietan igo ditugun Erratzuko bertze gailurrak ageri dira: Aizpitza, Gorramendi, Gorramakil, Bardako Kaskoa, Alkaxuri, Iparla, Tutulia, Buztanzelai...


Ertzean tarteka harkaitz pasabide batzuk daude. Batzuk saihesten ahal dira, baina bertzeak ez.



Gozatzen...


Beherantz egin beharreko eskaladatxo hau da pausurik zailenetarikoa. Dena den, bazterretik saihets daiteke.


Gailurrera hurbiltzen...


Azken metroak...


9:48 : Olateko Ttutturru (926m)
Eguneko lehen gailurra sakelara...


Segidan irudian ikusten den gandorra zeharkatuko genuen Olateko gailur nagusiraino. Gailurrean zuhaitzak dituen hori da.


Bideak eskaladatxo gehiago. Pausu politak daude han-hemenka...


Gibelera begirada Olateko Ttutturruri. Ekialdetik ikusita ez da hain tentea.


Harkaitz arteko zatiak utzi eta gandorra zabaldu eta pago artean barneratzen da azken zatian.


10:01 : Olate (936m)
Hala ailegatu ginen eguneko bigarren tontorrera. Ez da erraza zein den jakitea, gandorrean hainbat kota baitaude eta gailurrean ez baitago inolako harri mukuru edo seinalerik. Guk tartetxo bat hartu eta harri mukuru txiki bat egin genuen gailurra zein den identifikatzeko.


Jarraian, gandorra utzi eta larre berde ederretatik Elortako eremuan barneratu ginen. Toki zoragarria da, eta garai honetan kolore biziekin dotore dago. Parean genituen ondotik igoko genituen bi gailurrak: ezkerretara Elhorriko Kaskoa eta eskuinetara Harrigorri.


10:07 : Nekaitzeko lepoa (815m)
Lepo honetara lasterka jaitsi eta alfonbra berdean goiti abiatu ginen Elhorriko Kaskora.


Azken metroak... Leku paregabea ibiltzeko, lasterka egiteko, etzanda egoteko...


10:20 : Elhorriko Kaskoa (987m)
Erratzuko gailur guziak igotzeko proiektutxoaren azken aitzineko mendian ginen! Helburua kasik lortuta!


Eta parean genuen azkena ere: Harrigorri. Auzara magalean altxatzen den harkaitz gorrixka ikusgarria. Elorrietako lepora jaitsi eta malda tente batetik eginen genituen bertarainokoak.


10:28 : Elorrietako lepoa (831m)
Lepoan, azken igoerari ekiteko prest...


Gure gibelean berriz lehentxeago igotako mendiak. Olateko Ttutturruk alde honetatik begiratuta itxura arras desberdina du.


Igoera tentea da Harrigorri aldera doana eta dagoeneko bero egiten zuen...


Eskertzen zen beraz pagadi arteko freskura...


10:51 : Harrigorri
Helburua lortuta! Erratzu inguratzen duten 21 mendi gailurrak igota, herritik beretik abiatutako lau ateralditan.


Olate Harrigorritik.


Eta Elhorriko Kaskoa... Hau berez Erratzuko mugetatik kanpo gelditzen da, baina hurbil dagoenez zerrendan sartu genuen.


Gora gu ta gutarrak!


Pixka bat egon ondotik gailurra utzi eta beherakoari ekin genioen. Akitzeko plan polita izanen zen Auza, herriko gailurrik altuena, igotzea baina ez genuen denborarik eta alde batera utzi genuen.


Elorrietako lepora itzuli eta herri aldera biderik zuzenetik jaisten hasi ginen, nahiz eta tartean igoeratxo bat egin.


A zer lekuan dagoen borda hau! Zoragarroa!


Pagadi artetik lasterka jaisten segitu genuen. Ondoren Larreta eta Iñarbilera doan pista hartuko genuen handik herrira itzultzeko.


Kuarteleko kaskoan geldialditxoa Olateko Ttutturruri azken begiradatxoa emateko.


11:55 : Erratzu (285m)
Eta ziztu bizian jaitsi ginen herriraino. Udaberriko proiektutxoa gauzatua!

1. sektorea (Auza hegoaldeko zirkua)
Soralar (827m)
Burga (872m)
Argañeta (1004m)
Ixtauz (1024m)
Antxola (1119m)
Auza (1306m)

2. sektorea (Gorramendiko mendigunea)
Aizpitza (959m)
Gorramendi (1071m)
Otanarte (1064m)
Gorramakil (1087m)
Bardako Kaskoa (949m)
Alkaxuri (967m)

3. sektorea (Iparlako gandorra)
Iparla (1044m)
Tutulia (987m)
Astate (1016m)
Buztanzelai (1029m)
Aintziaga (905m)

4. sektorea (Elorta ingurua)
Olateko Ttutturru (926m)
Olate (936m)
Elhorriko Kaskoa (987m)
Harrigorri (1115m)


BIDEOA: