Orriak

Malacara (2269m) etiketadun mezuak erakusten. Erakutsi mezu guztiak
Malacara (2269m) etiketadun mezuak erakusten. Erakutsi mezu guztiak

2019/12/04

Pico de Astun Occidental (2278m), Malacara (2269m)

EGUNA: 2019/12/03

ABIAPUNTUA: Astun (1730m)

ZAILTASUNA: S2

DENBORAK:
  • Astun - Col des Moines : Ordu eta erdi
  • Col des Moines - Cabane de la Glere : 45 minutu
  • Cabane de la Glere - Malacara : 2 ordu
  • Malacara - Astun : 45 minutu
NOLA AILEGATU:
Iruñeatik Jacara doan autobidea hartuko dugu. Behin Jacara iritsita Candanchu eta Astungo eski estazioetara igotzen den bidea hartuko dugu. Somporteko lepoan Astunera eskuin hartuko dugu.

ARRASTOA:
Powered by Wikiloc


KRONIKA:
Aste tarteko besta egunean iragarritako eguraldi ederra lagun, Astungo eski estaziora jo genuen bertako hego aurpegiren batean elur goxoa harrapatzeko intentzioarekin. Behin han eta oraindik asteburuko elur berriaren arrastoak ikusita plan aldaketa eta aspalditik buruan nuen ibilbidea egitea erabaki genuen.

10:05 : Astun (1730m)
Estazioko kalapita gibelean utzi eta Escalarreko amildegian goiti abiatu ginen.


Izen bereko lakura ailegatu baino lehen amildegiaren ezker aldetik igotzea komeni da. Bortz bat zentimetroko elur hauts geruzatxoak anitz errazten zuen igotzea, azpian elur gogorra izan arren.


11:01 : Ibon del Escalar (2078m)
Behin amildegia akituta, laku izoztua gainetik gurutzatu genuen Moineseko lepoaren bila.


Gure gibelean ezkerretara duela urte batzuk eskiatu genuen Belonseiche edo Escalar mendia utziko genuen. Paraje ederra da hau, estaziotik hurbil, baina zalapartatik babestua.


Azken metro errazak leporaino.


11:15 : Col des Moines (2168m)
Lepora ailegatuta Bioseko isuarialde zoragarria bistaratu genuen, Midi d'Ossau handiaren itzalean. Errekaraino eginen genuen ipar-ekialdeko orientazioko jaitsiera egiteko gure eskuinetara genuen  tontortxora igotzea hobe zela erabaki genuen. Honela, sasi-ordekak saihestuko genituen.


11:30 : Pico de Astun Occidental (2278m)
Astun mendiaren gandorrean dagoen kasko hau izanen zen gure lehen jaitsieraren abiapuntua. Gauzak prestatu eta beheiti!


Elur bikaina harrapatu genuen lehen jaitsiera honetan, azpiko geruza gogorraren gainean 5-10 zentimetroko elur-hauts arina.


Lehen elur malda jaitsita Paradis eta Caillabet de Rebec mendien arteko bailaratxoaren hego isurialdetik zeharkaldi luzea egin genuen.


Zeharkaldia akituta, bizkar batetik lehen jaitsiera akituko genuen Glereko etxolaren inguruak eta gero igo beharko genuen bailaratxoa bistaratu genituen.


12:20 : Cabane de la Glere (1721m)
Zelaitxo honetan egin genuen transizioa. Errekatxoa gurutzatu eta goiti abiatu ginen, Astungo lepoaren bila.


Gure gibelean Moines, Paradis, Casterau eta Ayous mendiak utzi genituen.


Amildegiaren ezkerretik poliki-poliki metroak irabazten...


Metro batzuk galdu eta Baigt de Houer izeneko parajean barneratu genuen. Astungo lepoa parez pare genuen.


Mantso-mantso egin genuen goiti malda etzanetatik. Isuarialde honek ere eskirako aukera bikaina eskaintzen du.


Lepoaren azpiko maldan...


14:02 : Collado de Astun (2189m)
Lepoan haize zitalak eman zigun ongi etorria. Hala ere ezkerretara igotzea erabaki genuen Malacarako gailurreraino.


Ertz erraza izan arren azken metroetan elur gogorra zegoen eta bi aldiz pentsatu gabe eskiak motxilak sartu genituen malda hau gainditzeko.


14:28 : Malacara (2269m)
Eguneko bigarren igoera akituta abiapuntura itzultzeko prest ginen.


Haize izoztutik ihesi gailurraren hegoaldera metro batzuk egin genituen transizioa lasaiagoa izateko. Ondotik elur gogor baina eskiagarritik itzuliko ginen eski pistetaraino handik estaziora jaisteko.


15:05 : Astun (1730m)
Hala akitu genuen ibilbide zirkular polita, negu eta udaberriaren zati handi batean egiten ahal dena 1700 metroko altueratik goiti egiten baita momentu oro.

BIDEOA:

2013/02/17

Malacara (2269m)

EGUNA: 2013/02/17

IRTEERA: Astun (1650m)

ZAILTASUNA: Errexa (F)

DENBORA: Bi ordu (Igoera)

NOLA IRITSI: Iruñeatik Jacara doan autobidea hartuko dugu. Behin Jacara iritsita Candanchu eta Astungo eski estazioetara igotzen den bidea hartuko dugu. Somporteko lepoan Astunera eskuin hartuko dugu.

DESKRIBAPENA:

10:00 : Astun (1650m).
Aurreko egunak Saint Lary aldean pasa ondotik, etxera bueltan zerbait egiteko intentzioarekin igandean Astunera hurbildu ginen. Elurrez lepo egonik eta eguraldi bikaina izanik, milaka lagun joan ziren eskiatzera bertako pistetara. Hori dela eta, autoa bide bazterrean utzi behar izan genuen Astun baino kilometro bat lehenago. Eskiak eta erraketak bizkarrean hartu eta goraka abiatu ginen. Astuneko eraikinetara iritsita pistetan sartu ginen jende uholde artean.


Pistetatik bixi-bixi igo ginen lehenbailehen ateratzeko asmoz. Aitzinean genuen jadanik eguneko helburua: Malacara mendia.


Pistak alde batera utzita lasaitasuna.


5-10 zentimetro elur hauts geruza goxoa harrapatu genuen ustekabean.


Gibelean Aspe eta Bisaurin bertzeak bertze. Pistak ere behean gelditzen ziren jadanik.


Iparraldetik erasoko genuen mendia, Astungo lepoan kornisa dexenteak baitzeuden.


Azken maldan gora...


Midi d'Ossau eta Peyreguet urrunean. Hurbilago berriz Astungo lepoa eta kornisak.


Gailurraren aitzineko lepotxoan eskiatzaile bilkura.


Eta sasigailurrean erraketeroak.


Atzera begirada lepotik igotako maldari. Etorriko zenarekin ametsetan jadanik. Urrunago Belonseiche eta Monjes mendiak.


Lepotxoan eskiak utzi eta gailurrerako azken metroak igo genituen.


Azken esfortzua...


12:13 : Malacara (2269m).
Astungo estaziotik ordu eta erdi inguru pasa genuen gailurra zapaldu arte.


Midi d'Ossau, Peyreguet, Palas eta Balaitous gailurretik.


Malacarako ertzak Canal Royarekin lotzen gaitu.


Aspe eta Bisauringo mendigunea. Azpian astungo eski estazioa.


Astungo lepoa eta mendia. Urrunago berriz Pico de Los Monjes.


Anayet eta Canal Royako bailara. Bailara honetatik lotu nahi omen dituzte Formigal eta Astungo eski estazioak. Garapena?


Gailurreko ikuspegiaz eta eguraldiaz ederki gozatu ondoren, hoberena gelditzen zen oraindik: jaitsiera!


Eguna errematatzeko elur goxo-goxoa aurkitu genuen!



13:45 : Astun (1650m).
Berriz estaziora bueltan tragoxka bat igoera ospatzeko eta etxera!