Orriak

Astate (1016m) etiketadun mezuak erakusten. Erakutsi mezu guztiak
Astate (1016m) etiketadun mezuak erakusten. Erakutsi mezu guztiak

2026/03/30

Kaxtrail

EGUNA: 2026/03/17

ABIAPUNTUA: Erratzu (285m)

ZAILTASUNA: Erraza

IRAUPENA: 7-10 ordu artean

ARRASTOA:
Powered by Wikiloc


KRONIKA:
Heldu den urriaren 24an duela 10 urte hil zen Xabi Kaxtel lagunaren oroimenez mendi lasterketa bat izanen dugu Erratzun. Azken asteetan buru-belarri lasterketa horren antolaketa lanetan ari gara eta izen ematea irekia dago hilabete honen hasmentatik. Honakoa, berriz, ibilbideari buruzko kronika duzue, lasterketa egiten dutenek ikusiko dituzten paraje ederren argazkiak eta hari buruzko informazioa pixka bat. Ibilbide ofiziala grabatzeko itzuli osoa egin nuen egunekoa da.

7:46 : Erratzu (285m)
Lasterketa plazattik abiatuko da eta herria zeharkatuta Etxoria deitzen den etxetik goiti Azkarate auzora igaten den kaltzada zaharra hartuko du.


Kaltzada Errekaldeko bordaren inguruan akitzen da. Ikuspegi ederra dago hemendik jadanik.


Hemendik aitzin Azkarate auzoan goiti igaten da pista eta bidexka zatiak tartekatuz. Gehienean hariztietatik igaten da bidea lehen zati honetan.


Gibelera begiratuta ordu batzuk geroago igan beharko den Auza mendia ikusten da. Hobe horretan ez pentsatzea...


Zatitxo batean Azkarateko pistatik ibilita, zuzen jotzen du Aizpitza mendirantz. Argazkiko iratze-lekua zeharkatzen da eta borda batzuen ondotik pasatuta bertze iratze-leku bat.


Bigarren iratze-lekutik pagadi batean sar-atera bat egin eta argazkiko lepotxora ateratzen da.


Aizpitzako kaskoa hurbil dago puntu honetatik, eta lehen igoeraren zatirik gogorrena inguru honetan akitzen dela erraten ahal da. 


Aizpitza kaskoa ezkerretik inguratu eta parajea aldatu egiten da. Puntu honetaraino kasik 700 metro igaten dira 3 kilometro eskasetan. Hemendik aitzin, kaskoz kasko larre leunetatik goiti-beheiti batzuk egiten dira Gorramakileraino.


Aizpitzako antenak gibelean eta Baztan lainopean azpian...


Gorramakilera igaten den errepide zaharra gure eskuinetara izanen dugu zati honetan, baina bideak ez du kasik ukitu ere egiten. Inguru honetatik eskuinetara Pirinioak ikusten dira eta ezkerretara itsasoa.


Gorramendi eta Otanarte mendietatik pasatu eta azken igoera batek Gorramakileraino eramanen gaitu. Argazkian Otanarte mendia ikusten da Gorramakilgo azken maldatik.


9:11 : Gorramakil (1087m)
Lehen igoera puntu honetan akitzen da eta bertatik jaitsiera luzea dago Urritzateko errekaraino. Argazkian ikusten den Alkaxuri mendirako bidexendatik egiten da hasmenta, gero hura eskuinetik inguratu eta jaitsiera tenteari ekiteko.


Gorostiko lepotik eskuin hartuta hasten da Alkaxuri edo Irubelakaskoaren inguratzea. Ondotik argazkian ikusten den belai zahar horren ondotik beheiti sartzen da. Paraje hau Kattalintegi izenarekin ezagutzen da.


Unalarko bordaren ondotik pasatuko gara...


9:56 : Urritzateko erreka (331m)
Erratzutik goiti irabazitako altuera guzia galduta Urritzateko bailara misteriotsuan barneratuko gara. Zubitik erreka gurutzatu eta bide zaharra hartuta errekaren bazterretik pare bat kilometro zelai egin behar dira. Ondotik bigarren anoa-gunea egonen da eta bertan hasiko da eguneko bigarren igoera.


Bigarren igoera hau da, hain zuzen ere, eguneko igoerarik gogorrena. Urritzateko errekatik Iparlako lepora 600 metro baino gehiago igan beharko dira, gehienak bi kilometrotan. %30etik goitiko batez bertzeko malda dago beraz.


10:55 : Iparlako lepoa (1026m)
Iparlako lepora ateratzean hatsa hartzeko tartea izanen da. Mendikatearen bertze aldean Nafarroa Behereko lautadek eginen diete ongi etorria lasterkariei.


Ez gara alde hartara jaitsiko, ordea. Eskuinetara biratu eta GR10 bideari segituz gainez gain Izpegi aldera eginen dugu. Urrunean Auza ikusten da.


11:27 : Arietako lepoa (812m)
Gainez gain ibiltzeak ez du erran nahi bidea laua denik. Arietako lepora jaitsiko da eta gero hortik Astateko kaskoraino igan beharko da, pagadi batetik hasmentan eta larre zabaletatik geroago.


11:49 : Astate (1016m)
Gailur honetatik Izpegiko lepora arte beherantz egiten du bideak.


Astateko lepotik ezkerretara biratu eta Baigorriko isurialdetik pasatzen da Buztanzelaiko leporaino.


Eta ondotik Aintziagako lepoan barrena, berriz ere Baigorriko isurialdetik Izpegiraino joaten da. Erran bezala, zati honek guziak beheranzko joera du.


12:31 : Izpegiko lepoa (672m)
Izpegiko lepoa puntu garrantzitsua izanen da lasterketan. Ibilbidea bidenazka egiten dutenek bertan emanen diote erreleboa elkarri. Horrez gain, anoa-puntu bat ere bertan egonen da.


Izpegitik berriz ere gorantz eginen du bideak. Olatetik pasatzen den Auzako bide arrunta igan beharko dute parte hartzaileek.


Bide honek jaitsiera motz bat du Olatetik Nekaitzeko lepora, baina gainerako guzia goiti da.


Nekaitzeko lepotik Elhorrietako lepora eta handik maldatzarra Auzaraino.


Igoera ezagun hau pagopetik doa lehen zatian, eta Harrigorriko harkaitzak ezkerretara utzita azken malda tentea belardi leunetatik igaten da.


13:59 : Auza (1306m)
Auzako kaskoa da ibilbide guziko punturik altuena, Erratzuko ikur bat. Bidea grabatu nuen egunean elurtua zegoen gailurra.


Auzatik hegoalderantz eginen du bideak, Sakana deitzen den parajean Antxola mendia inguratu eta Ixtauzko lepoko anoa-gunera ailegatzeko


Auzaren hegoaldeko aurpegia...


Ixtauzko lepo inguruan berriz ere baso artean sartuko da bidean. Bizkarrez bizkar eginen du Argañeta inguratu eta Pagozelaiko leporaino.


Eta Pagozelaiko lepotik eskuin biratu eta bizkarrez bizkar segituko du Basagarreraino. Oro har, zati honek guziak beheranzko joera du.


15:17 : Basagarko lepoa (684m)
Basagarretik goiti eguneko azken igoerari ekinen diogu. 


Aitzineko kilometro guziak egin eta gero, Burgarako 200 metroko desnibela gogorra eginen da.


15:36 : Burga (872m)
Behin Burga iganda, erraten ahal da dena malda beheiti dela, nahiz eta tarteka igoera laburren bat baden.


Burgako oihan politetik Soralarko lepoko azken anoa-gunera ailegatuko gara.


Eta Soralar mendia inguratuta, Zubipuntako bordara jaitsiko gara. Larreetatik lehendabizi eta oihan tentetik zuzenean gero. Zubipuntako bordatik Gorostapoloko bidea hartuko dugu, hemendik Xorroxingo ur.jauzi aldera doan bidexka bat eta akitzeko herritik Xorroxinera doan bidea.


16:50 : Erratzu (285m)
44 kilometro eta 3000 metroko desnibela 10 ordu baino fiteago egiten dutenek merezitako saria izanen dute herrian, eta lasterketa eder hau burutu izanaren poza ere bai. Hiretako Kax!



 

2020/05/06

Iparla (1044m), Tutulia (987m), Astate (1016m), Buztanzelai (1029m), Aintziaga (905m)

EGUNA: 2020/05/03

ABIAPUNTUA: Erratzu (285m)

ZAILTASUNA: Erraza

DENBORAK:
  • Erratzu - Iparla : 3 ordu eta erdi
  • Iparla - Aintziaga : 2 ordu
  • Aintziaga - Erratzu : 2 ordu
NOLA AILEGATU:
Erratzu herritik bertatik abiatzen da ibilaldia. Sarrerako pisuetako aparkalekuetan uzten ahal da ibilgailua.

ARRASTOA:
Powered by Wikiloc

KRONIKA:
Erratzuko mendi tontor guziak herritik beretik aterata igotzeko udaberri honetan jarri dudan helburuaren hirugarren ateraldia. Kasu honetan Iparlako gandorretan ibili gara, amildegiaren ertzean. Normalean Izpegitik abiatuta igotzen den mendia da, baina Erratzutik abiatuta paraje gehiago eta ezberdinagoak bisitatzeko aukera ematen du; hori bai ibilaldi aise luzegoa eginda.

8:10 : Erratzu (285m)
Egun ederra lagun eman genituen lehen pausuak herria gibelean utziz.


Herritik atera eta Landabehereako bordara doan zementuzko bidea hartu genuen.


Idaborroa eta gibelean herria, goizeko lehen orduetako lasaitasunean.


Idaborroaren paretik pasatu eta segidan eskuinetara ateratzen den bidexka bat hartu genuen. Hortik ailegatuko ginen Landabehereara eta handik Epelemendira doan bidea hartu genuen.


Bidean Kastoneko bordaren ondotik pasatu ginen.


Baita Maistrueneko bordatik ere...


Altuera gehiegirik irabazi gabe zuhaitz artean doan bidexka da. Bueltatxo bat emateko polita.

Bidexka Epelemendin akitzen da eta hemendik Okinen bordara doan pista hartu genuen.


Pistan beheiti Okinen borda aldera...


Xoko bakartian dago Okinen borda eta bertan jendea bizi da oraindik. Erratzuko azken mohikanoa!


Bordaren ondotik apsatu eta azpiko aldean dagoen zubi honetatik erreka gurutzatuta Mehakako leporantz abiatu ginen.


Hasmentan bidetik abiatu ginen baina berehala galdu eta ote eta iratze artetik egin genuen zati bat.


Ondoren belagi honetara sartu gineneta bertatik egin genuen zati bat, kasik leporaino.



9:20 : Mehaka (717m)
Behin lepoan Ubedo aldera doan pista erosoa hartu genuen.


Otsameakako lepotik pasatu ginen...



Baita Lizarlepotik ere, Auza alderako ikuspegi bikainaz gozatu bitartean...


Ibiltzeko zati erosoa da, altuera gutxi hartzen du bideak eta ingurua ederra da.


Pagadiak berde-berde...


Lizarlepo inguruko pagadiak gibelean utzi eta Ubedotik hurbil larre zabaletara atera ginen. Parean genituen geroago igoko genituen Astate eta Buztanzelai mendiak.


Aitzineko ibilaldian zeharkatutako kaskoak ere parean genituen: Gorramendi, Gorramakil, Alkaxuri...


9:58 : Ubedo (845m)
Bidegurutze honetara ailegatuta, Izpegi aldera jaisten den bidea eskuinetara utzi eta ezkerretara hartu genuen Arieta aldera.


Orain artekoa ederra bazen, zati hau zer erranik ez... Nahiko laua den bidexka da, baso zatiak eta larreak tartekatzen dituena Astateko gandorrak inguratuz.


Lasterka pixka bat egiteko aprobetxatu genuen zati hau.


Alfonbra berdean...


Pagadi zoragarriak!


Arietako lepo inguruan dagoen iturri honetan ura hartu genuen, oraindik bide luzea baikenuen aitzinetik eta ura hartzeko aukera gutxikoa.


10:14 : Arietako lepoa (813m)
Lepo honetan GR10 bidea hartuko genuen Iparla aldera...


Basoak utzi eta Tutulia mendia inguratuz Iparlako amildegi ederrak begibistan genituen jadanik. 


Bide harritsua, baina ederra...


Gandor luzearen gainetik ibilita eguneko lehen kaskoa izanen zen Iparla hurbil genuen.


11:02 : Iparla (1044m)
Gailur ezagun honen gainean atsedenalditxoa hartu genuen zerbait jan eta eguraldi bikainaz gozatzeko.


Azkeneko ibilaldian igotako Alkaxuri mendia Urritzateko errekaren bertze aldean. Urrunean aldiz, Larrun, Aiako Harriak eta Donibane Lohizuneko badia ederra. A zer ikuspegia!


Iguzkimendi eta Artzamendi... Urrunean Landetako hondartzak...


Hegoalderantz jarraian ibiliko ginen gandorra... Dotorea!


Gailurreko argazkia aitzinera segitu baino lehen...


...eta itzulerari ekin genion.


11:28 : Tutulia (987m)
Iparlara joaterakoan gailur hau beheitiagotik inguratu genuen baina itzulera GR10aren markak segituz egin genuen, gailur guziak igoz.


Panoramika ederra...


Marka zuri-gorriei segika...


11:35 : Arietako lepoa (813m)
Berriz Arietara bueltan, bertara ailegatzeko goizean ibilitako bidea eskuinetara utzi eta GRari segitu genion Astate aldera.


Lehen zatia aldapatsua da, baina pago arteko freskuratik egiten da.



Pagaditik aterata Iparla eta Tutulia inguruak utzi genituen gibelean...


Aitzinean berriz Ubedoko larreak Astate eta Buztanzelai mendiekin... Harat gindoazen!


Zati hau ere aproposa da lasterka egiteko...


11:58 : Astate (1016m)
Eguneko hirugarren gailurrean gelditu ere ez ginen egin.


Astateko lepora jaitsi ginen eta bertatik Buztanzelai salto batera genuen.


12:08 : Buztanzelai (1029m)
Honetan bai egin genuen geldialdia. Lau ordu generamatzan gutxi geldituz eta nekea nabaritzen hasiak ginen.


Zerbait jan ondotik eta indarrak berrituta Buztanzelaiko leporantz jaitsi ginen lasterka.


12:23 : Buztanzelaiko lepoa (845m)
Lepo honetan utzi genuen GR10a. Honenbertzez azken gailurrera igotzea bertzerik ez zen gelditzen.


Aintziagako kaskora igotzen gibelean Buztanzelai eta Astateko gailur ikusgarriak genituela.


12:31 : Aintziaga (905m)
Ez da gailur ezaguna Aintziagakoa eta jende gutxi igotzen da bertara. Hala ere, ikuspegiak merezi du. Argazkian Baztango bailara...


...eta lehenago igotako gailur guziak. Gandor ikusgarria da Iparlakoa!


Eguneko azken gailurra utzi eta izen bereko lepora jaitsi ginen Izpegiko lepoa eta Auza parez pare genituela.


12:43 : Aintziagako lepoa (777m)
Lepo eder honetan parean ikusten den Izpegirako bidea utzi eta eskuinetara ikusten den belagia inguratuz eskuinetara biratu ginen.


Bertatik bide zahar hau hartu eta beheiti segitu genuen.


Segidan atera ginen Soropilera jaisten den pistara. Pago artetik lasterka gustura ibili ginen zati honetan.


Soropiletik beheiti Untxide auzoan errepidetik metro batzuk egin genituen.


Auza eta Olateko Ttutturrua Untxidetik. 


Berriz bidexketatik...


Araneako errekara jaitsita, berriz goraka zati bat egin genuen Epelemendiko pistatik Etxegaineko bordaraino.


Eta bertatik herrira doan bidexka hartu genuen.


13:41 : Erratzu (285m)
Bortz ordu eta erdi pasatxoren ondotik abiatutako lekuan ginen berriz ibilbide ikusgarria burututa. Ateraldi bat bertzerik ez da falta gailur guzien proiektutxo hau hesteko!