Orriak

Otanarte (1064m) etiketadun mezuak erakusten. Erakutsi mezu guztiak
Otanarte (1064m) etiketadun mezuak erakusten. Erakutsi mezu guztiak

2026/03/30

Kaxtrail

EGUNA: 2026/03/17

ABIAPUNTUA: Erratzu (285m)

ZAILTASUNA: Erraza

IRAUPENA: 7-10 ordu artean

ARRASTOA:
Powered by Wikiloc


KRONIKA:
Heldu den urriaren 24an duela 10 urte hil zen Xabi Kaxtel lagunaren oroimenez mendi lasterketa bat izanen dugu Erratzun. Azken asteetan buru-belarri lasterketa horren antolaketa lanetan ari gara eta izen ematea irekia dago hilabete honen hasmentatik. Honakoa, berriz, ibilbideari buruzko kronika duzue, lasterketa egiten dutenek ikusiko dituzten paraje ederren argazkiak eta hari buruzko informazioa pixka bat. Ibilbide ofiziala grabatzeko itzuli osoa egin nuen egunekoa da.

7:46 : Erratzu (285m)
Lasterketa plazattik abiatuko da eta herria zeharkatuta Etxoria deitzen den etxetik goiti Azkarate auzora igaten den kaltzada zaharra hartuko du.


Kaltzada Errekaldeko bordaren inguruan akitzen da. Ikuspegi ederra dago hemendik jadanik.


Hemendik aitzin Azkarate auzoan goiti igaten da pista eta bidexka zatiak tartekatuz. Gehienean hariztietatik igaten da bidea lehen zati honetan.


Gibelera begiratuta ordu batzuk geroago igan beharko den Auza mendia ikusten da. Hobe horretan ez pentsatzea...


Zatitxo batean Azkarateko pistatik ibilita, zuzen jotzen du Aizpitza mendirantz. Argazkiko iratze-lekua zeharkatzen da eta borda batzuen ondotik pasatuta bertze iratze-leku bat.


Bigarren iratze-lekutik pagadi batean sar-atera bat egin eta argazkiko lepotxora ateratzen da.


Aizpitzako kaskoa hurbil dago puntu honetatik, eta lehen igoeraren zatirik gogorrena inguru honetan akitzen dela erraten ahal da. 


Aizpitza kaskoa ezkerretik inguratu eta parajea aldatu egiten da. Puntu honetaraino kasik 700 metro igaten dira 3 kilometro eskasetan. Hemendik aitzin, kaskoz kasko larre leunetatik goiti-beheiti batzuk egiten dira Gorramakileraino.


Aizpitzako antenak gibelean eta Baztan lainopean azpian...


Gorramakilera igaten den errepide zaharra gure eskuinetara izanen dugu zati honetan, baina bideak ez du kasik ukitu ere egiten. Inguru honetatik eskuinetara Pirinioak ikusten dira eta ezkerretara itsasoa.


Gorramendi eta Otanarte mendietatik pasatu eta azken igoera batek Gorramakileraino eramanen gaitu. Argazkian Otanarte mendia ikusten da Gorramakilgo azken maldatik.


9:11 : Gorramakil (1087m)
Lehen igoera puntu honetan akitzen da eta bertatik jaitsiera luzea dago Urritzateko errekaraino. Argazkian ikusten den Alkaxuri mendirako bidexendatik egiten da hasmenta, gero hura eskuinetik inguratu eta jaitsiera tenteari ekiteko.


Gorostiko lepotik eskuin hartuta hasten da Alkaxuri edo Irubelakaskoaren inguratzea. Ondotik argazkian ikusten den belai zahar horren ondotik beheiti sartzen da. Paraje hau Kattalintegi izenarekin ezagutzen da.


Unalarko bordaren ondotik pasatuko gara...


9:56 : Urritzateko erreka (331m)
Erratzutik goiti irabazitako altuera guzia galduta Urritzateko bailara misteriotsuan barneratuko gara. Zubitik erreka gurutzatu eta bide zaharra hartuta errekaren bazterretik pare bat kilometro zelai egin behar dira. Ondotik bigarren anoa-gunea egonen da eta bertan hasiko da eguneko bigarren igoera.


Bigarren igoera hau da, hain zuzen ere, eguneko igoerarik gogorrena. Urritzateko errekatik Iparlako lepora 600 metro baino gehiago igan beharko dira, gehienak bi kilometrotan. %30etik goitiko batez bertzeko malda dago beraz.


10:55 : Iparlako lepoa (1026m)
Iparlako lepora ateratzean hatsa hartzeko tartea izanen da. Mendikatearen bertze aldean Nafarroa Behereko lautadek eginen diete ongi etorria lasterkariei.


Ez gara alde hartara jaitsiko, ordea. Eskuinetara biratu eta GR10 bideari segituz gainez gain Izpegi aldera eginen dugu. Urrunean Auza ikusten da.


11:27 : Arietako lepoa (812m)
Gainez gain ibiltzeak ez du erran nahi bidea laua denik. Arietako lepora jaitsiko da eta gero hortik Astateko kaskoraino igan beharko da, pagadi batetik hasmentan eta larre zabaletatik geroago.


11:49 : Astate (1016m)
Gailur honetatik Izpegiko lepora arte beherantz egiten du bideak.


Astateko lepotik ezkerretara biratu eta Baigorriko isurialdetik pasatzen da Buztanzelaiko leporaino.


Eta ondotik Aintziagako lepoan barrena, berriz ere Baigorriko isurialdetik Izpegiraino joaten da. Erran bezala, zati honek guziak beheranzko joera du.


12:31 : Izpegiko lepoa (672m)
Izpegiko lepoa puntu garrantzitsua izanen da lasterketan. Ibilbidea bidenazka egiten dutenek bertan emanen diote erreleboa elkarri. Horrez gain, anoa-puntu bat ere bertan egonen da.


Izpegitik berriz ere gorantz eginen du bideak. Olatetik pasatzen den Auzako bide arrunta igan beharko dute parte hartzaileek.


Bide honek jaitsiera motz bat du Olatetik Nekaitzeko lepora, baina gainerako guzia goiti da.


Nekaitzeko lepotik Elhorrietako lepora eta handik maldatzarra Auzaraino.


Igoera ezagun hau pagopetik doa lehen zatian, eta Harrigorriko harkaitzak ezkerretara utzita azken malda tentea belardi leunetatik igaten da.


13:59 : Auza (1306m)
Auzako kaskoa da ibilbide guziko punturik altuena, Erratzuko ikur bat. Bidea grabatu nuen egunean elurtua zegoen gailurra.


Auzatik hegoalderantz eginen du bideak, Sakana deitzen den parajean Antxola mendia inguratu eta Ixtauzko lepoko anoa-gunera ailegatzeko


Auzaren hegoaldeko aurpegia...


Ixtauzko lepo inguruan berriz ere baso artean sartuko da bidean. Bizkarrez bizkar eginen du Argañeta inguratu eta Pagozelaiko leporaino.


Eta Pagozelaiko lepotik eskuin biratu eta bizkarrez bizkar segituko du Basagarreraino. Oro har, zati honek guziak beheranzko joera du.


15:17 : Basagarko lepoa (684m)
Basagarretik goiti eguneko azken igoerari ekinen diogu. 


Aitzineko kilometro guziak egin eta gero, Burgarako 200 metroko desnibela gogorra eginen da.


15:36 : Burga (872m)
Behin Burga iganda, erraten ahal da dena malda beheiti dela, nahiz eta tarteka igoera laburren bat baden.


Burgako oihan politetik Soralarko lepoko azken anoa-gunera ailegatuko gara.


Eta Soralar mendia inguratuta, Zubipuntako bordara jaitsiko gara. Larreetatik lehendabizi eta oihan tentetik zuzenean gero. Zubipuntako bordatik Gorostapoloko bidea hartuko dugu, hemendik Xorroxingo ur.jauzi aldera doan bidexka bat eta akitzeko herritik Xorroxinera doan bidea.


16:50 : Erratzu (285m)
44 kilometro eta 3000 metroko desnibela 10 ordu baino fiteago egiten dutenek merezitako saria izanen dute herrian, eta lasterketa eder hau burutu izanaren poza ere bai. Hiretako Kax!



 

2020/04/08

Aizpitza (959m), Gorramendi (1071m), Otanarte (1064m), Gorramakil (1087m), Barda (949m), Alkaxuri (967m)

EGUNA: 2020/04/08

ABIAPUNTUA: Erratzu (285m)

ZAILTASUNA: Erraza (F)

DENBORAK:

  • Erratzu - Aizpitza : Ordu eta erdi
  • Aizpitza - Gorramendi : 15 minutu
  • Gorramendi - Otanarte : 15 minutu
  • Otanarte - Gorramakil : 15 minutu
  • Gorramakil - Bardakomendi : 20 minutu
  • Bardakomendi - Alkaxuri/Irubelakaskoa : Ordu erdi
  • Alkaxuri/Irubelakaskoa - Urritzate : 45 minutu
  • Urritzate - Inzpideko lepoa : Bi ordu
  • Inzpideko lepoa - Erratzu : 45 minutu
NOLA AILEGATU:
Ibilbide honen hasiera puntua Erratzu herrian berean dago. Herri sarrerako pisuen inguruan uzten ahal da ibilgailua.

ARRASTOA:
Powered by Wikiloc


KRONIKA:
Udaberri honetarako herriko mugak inguratzen dituzten gailur guziak igotzeko helburua jarri diot nire buruari. Behe Nafarroarekin ditugun mugez gain, Arizkun, Amaiur eta Elizondoko lurrak mendiz bereizten dira Erratzukoetatik eta zerrenda osatuta haietaraino igotzeko lau ibilbide prestatu ditut. Lehenengoan Auza herriko mendi nagusi eta ezagunena igo genuen Arizkun eta Elizondotik bereizten gaituzten mendilerrotik hasi eta Behe Nafarroako mugetatik gailurreraino igoz. Bigarren honetan Gorramendiko sektoreari eman genion, Aizpitza eta Alkaxuri lotzen dituen lerroko sei gailurrak igo eta Urritzateko erreka basatitik ibilbide bikaina hetsiz.

6:02 : Erratzu (285m)
Goizean goiz egin genuen hitzordua. Erratzutik Etxoria deitzen den etxearen ondotik goiti abiatu, lehen bidegurutzean ezker hartu eta pista bati segika Azkarate auzoan goiti abiatu ginen.



Ilargi betearen argitan egin genuen lehen zatia, Baztango bailara osoa gibelean genuela. Azkarate auzora igotzen den errepidetxoa zeharkatu eta lehen gailurrerantz zuzen jo genuen.


7:13 : Aizpitza (959m)
Ordubete eskasean eta egunaren lehen argi izpiak lagun, eguneko lehen gailurrera ailegatu ginen. Bertatik Iparlako sektorea begibistan genuen parez pare.


Aizpitzako tontortxoa bere antenekin gibelean utzi eta aitzinera segitu genuen kaskoz kasko Alkaxuriraino eramanen gintuen bidetik.


7:25 : Gorramendi (1071m)
Di-da batean ailegatu ginen bigarren gailurrera. Lerroko altuena izan ez arren (Gorramakil da altuena), Gorramendi da sektore honetako mendirik ezagunena. Agian Baztango bailaratik ikusteb dena delako, bertzeak ezkutatuta gelditzen baitira.


Haize freskoak ez zuen gelditzera animatzen eta egun luzea genuen oraindik aitzinetik. Hurrengo helburua argazkian ikusten den Otanarte Gaina.


Malda bat jaitsi, bertze bat igo eta gailurrean ginen.


7:34 : Otanarte Gaina (1064m)
Hirugarrena sakelara eta ondokoa ere parez pare genuen: Gorramakil.


7:43 : Gorramakil (1087m)
Gorramakil bere garaian AEBetako soldaduek eraiki zuten errepide zaharretik harrapatu genuen. Goizeko ordu horietan, bakardadea inguruko behorrek bakarrik hausten zuten.


Tontorra eta errepide zaharra gibelean utzi eta belardi berdeetatik iparraldera segitu genuen Alkaxuriren punta lehen aldiz ikusiz. Bertan akituko ziren eguneko gailurrak, baina ez ibilaldia...


Alkaxuriren aitzinetik ordea, Bardako Kaskoa ere igoko genuen. Horretarako Gorramakilgo malda jaitsi eta aldapatxo bat igotzea bertzerik ez genuen egin behar.


8:03 : Bardako Kaskoa (949m)
Herritik atera eta bi ordu eskasean gailurreko apaingarri moduan joare polit bat duen tontor ezezagun honetan ginen. Gorramendi eta Alkaxuriren artean atzendua dago tontortxo hau, baina hain hurbil egonda merezi du igotzea.


Gorostiko lepora jaitsi eta azken tontorrerantz abiatu ginen.


Azken zatian ertza pixka bat zorroztu eta ikusgarritasunean irabazten du bideak. Leku bikaina da, lasaia.


8:28 : Alkaxuri / Irubelakaskoa (967m)
Batzuen ustez Euskal Herriko tontorrik ederrena omen den honetan bakar-bakarrik ginen. Argazki batzuk atera eta beherakoari ekinen genion...


Iguzkimendi eta Artzamendi Alkaxuritik...


Alkaxuriko ertzaren zatirik estuena jaitsi eta belardira ailegatuta Gorostiko lepora eramanen gintuen bide arrunta utzi eta ezkerretara biratu ginen Urritzateko errekara eramanen gintuen bidea harrapatzeko.


Irudian ikusten den bizkarretik doa bidea. Ederra!


Jaitsi bitartean inguruaz gozatzeko aukera ederra izan genuen, Urritzateko errekaz gain, igo berria genuen Gorramakil eta Auza ere begibistan genituelarik.


Unalarko bordaren ondotik pasatzen da xenda. Inguruko bertze zenbait ez bezala, zutik eta egoera onean irauten du borda polit honek.


Jaitsieraren azpiko zatian larreak utzi eta oihanean barneratu ginen. Urritzate udaberriko kolorez jantzita zegoen jadanik...


9:06 : Urritzateko erreka (335m)
Jaitsiera zuzen eta azkarraren ondotik atsedenaldi bat hartu genuen zubi honen ondoan.


Ondotik Urritzateko bide zaharrean goiti abiatu ginen...


Berezia da paraje hauetan ibiltzea, denbora gelditu izan balitz bezala...


Lasaitasuna eta bakea errekaren bazterretik poliki-poliki igotzen den bide politean.


Garai batean erreka bazterreko bordetan jendea bizi bazen ere, poliki-poliki husten joan da ingurua eta honakoa da orain jendea bizi den baserri apurretako bat.


Bideko bertze altxor bat zubi hau da. Harrizko artelan honek urteak eta urteak daramatza tente, berriagoak diren aunitz urak eraman dituen bitartean.


Zubitik metro batzuetara pista bat ailegatzen da, baina guk hori hartu ordez eskuinetara biratu, metro batzuk galdu eta errekaren bazterretik segitzen duen bide zahar bat hartu genuen.


Ia inor ibiltzen ez den bideak pagadi ederretan goiti eramanen gintuen Inzpideko leporaino.


Inzpideko etxolan akitu zen bidexka eta hemendik pista bat hartuko genuen, izen bereko lepora lehenik eta Erratzu aldera gero.


Urritzateko erreka eta Iparlako mendilerroa, hurrengo asteetarako helburua.


Eta hemen ordu batzuk lehenago ibilitako mendiak...


10:29 : Inzpideko lepoa (782m) 
Ordu eta erdi inguruko igoera puntu honetan akitu genuen. Honenbertzez, Erratzura jaistea bertzerik ez zen falta eguna akitzeko. Horretarako gure eskuinetara beheiti abiatzen zen pista hartu genuen...


Bidetik Izpegiko lepoa eta Pirinioetako mendi elurtuak ikusten ahal genituen...


Inzpideko lepotik Azkarate auzora jaisten den pista zabaletik, hankak kargatuxeak genituen ordurako.


Helmuga bistan, baina oraindik jaitsiera dezente falta zen.


Azken zatia pista utzi eta Erratzura zuzenean jaisten den bidexka honetatik eginen genuen.


10:57 : Erratzu (285m)
Eta kaltzada zahar honetatik sartuko ginen bortz ordu lehenago ateratako bide beretik. Ibilbide ederra!