Pene Blanque (2743m)

EGUNA: 2024/01/26

ABIAPUNTUA: Tourmaleteko errepidea (1540m)

ZAILTASUNA: S3

DENBORAK:

• Igoera: Hiru ordu eta erdi
• Jaitsiera: Ordu bat

NOLA AILEGATU:

Lourdes hiritik hegoaldera joanda, Argeles eta Luz-Saint-Sauveur herrietara ailegatuko gara hurrenez hurren. Azken herri honetan Tourmalet mendate ezagunerako bidea hartu behar da eta Tournaboupeko aparkalekura igan. Elurrik ez badago Tournaboupetik goiti bertze kilometro inguru gehiago igaten ahal dira errepidetik.

ARRASTOA:

Powered by Wikiloc

KRONIKA:

Aspaldiko negurik eskasena daramagu elurrari dagokionez eta eskiatzeko aukerak ez dira edozein lekutan harrapatzen. Bilatuta badago elurra ordea, gehienbat 2000 metrotik goiti. Denboraldi honetan bosgarrenez hurbildu gara Bareges aldera eta bere hego isurialde emankorrean eski saio polita egin dugu. Onceteko bailara da sektore honetan elurra luzaroen gordetzen duena eta bertatik Pene Blanque zorrotzerako ateraldia klasiko bat da.

9:23 : Tourmaleteko errepidea (1540m)

Ingurura begiratu eta elur eskasia nabarmena zen autoa utzi genuen lekutik. Harritzen gintuen deus ez zen, ordea; ongi baikenekien zein zen errealitatea. Pistei esker 10 minutu eskasean soilik eraman behar izan genituen eskiak eskutan, Tourmaleteko errepidean goiti.

Fite paratuko genituen eskiak elurtutako errepidean eta bertatik segituko genuen Super Baregeseko sektoreraino.

9:58 : Super Bareges (1734m)

Super Baregeseko teleaulkien ingurura ailegatzean errepidea utzi eta ezkerretara biratu ginen. Argazkian ikusten den Toueko pistatik iganen ginen. Ikusten den bezala, elurrez eskas zegoen pista eta bizpahiru egunen buruan ez da eskiagarri egonen.

Pistak 1900 metrotik goiti utziko gintuen eta elurra belarrari terrenoa irabazten hasten zen altuera horretan.

Ipar isurialdeak hegoak baino elur gutiagorekin daude altuera honetatik goiti. Haizearen eragina.

Eski pista hetsia utzi eta parean elurtua ikusten den kanaltxotik goiti eginen genuen. Zati horretan ere elurra justu harrapatu genuen, baina eskiak kendu gabe igan eta jaitsi ahal izan ginen. Horri ere ez zaion aunitzik gelditzen eskiagarria izaten segitzeko.

Behin pasabide estua gaindituta elur baldintzak aunitz hobetzen dira Onceteko bailaran. Elurra luzaroan altxatzen duen ingurua da hau, sektoreko aproposena elur guti dagoen garaietarako.

Malda etzanetatik goiti eginen genuen Onceteko lakuraino. Gibelean Neouvielle ingurua...

Igoerako zati honetatik Midi de Bigorre mendiaren hego maldak parez pare ikusten genituen. Oraindik eskiatzeko moduan zegoen inguru hori ere, baina gu ezkerrerago gindoazen.

Bailara hesten den puntuan Onceteko lakua dago. Guziz hormatua zegoen urtarrileko tenperaturak epelak izan arren. Lakua bazterretik inguratu eta ezkerretara biratuta Onceteko lepora igaten den malda tenteagoa igateari ekin genion.

30º inguruko maldak dira lakutik lepora doazenak, hego-ekialdeko orientazioarekin eskiatzeko arras aproposak.

Altuera fite irabazten da...

Azken metroak dira tenteenak, baina arazorik gabe iganen ginen eskiak zangoetan genituela.

11:48 : Col d'Oncet (2544m)

Lepora ateratzea kornisa batek zaildu ohi du normalean. Guk ere hantxe harrapatu genuen, baina jendea pasatzearen ondorioz eskailera gisakoa egina zuen igaten laguntzeko. Behin lepoan kutxilak paratu eta Pene Blanqueko malda ederra iganen genuen.

Pene Blanqueko malda 35º ingurura tentetzen da eta zerua erdi lainotuta zegoen elurra nahiko gogor harrapatu genuen bertan. Hala ere, arazo handirik gabe iganen genuen.

Zatiren batean malda pixka bat etzaten da eta bertze tarteren batean 40 gradu ere harrapatzen ditu. Azken metroetaraino eskiak zangoetan genituela igan ginen, baina bukaeran kendu behar izan genituen.

12.32 : Pene Blanque (2743m)

Gailur nagusia ertz zorrotzak defenditzen du eta eskiekin honaino ailegatzen da jendea. 6-8 metro gutiago izanen ditu punta honek.

Iparraldera amildegia irekitzen da kaskotik. Tarbes inguruko lautadak, Montaigu mendia eta Peyrelue lakua ikusgai genituen.

Ikuspegiaz gozatzen eguraldi goxoa lagun...

Eskirako transizioa 30 bat metro beheitiagoko erlaitz eroso batean egin genuen. Gailurretik beretik eskiatzea posible da, baina elurra oraindik pixka bat gogor zegoen eta ez zuen akatsetarako tarte aunitzik uzten.

Erlaitzetik beheiti malda tentea eskiatu eta Onceteko lepotik laku aldera jaitsiko ginen igoerako bidetik beheiti. Elurra egoera onean harrapatu genuen, pixka bat transformatua maldetan eta gogorxeago lautadetan haiek ziztu bizian zeharkatzeko.

 

14:10 : Tourmaleteko errepidea (1540m)

Kontent akitu genuen ateraldia jaitsiera ederra eta gero. Mendi ikusgarria iruditu zitzaigun, ikuspegi ederrarekin eta eskiatzeko arras aproposa.

Gaztarrigaina (1733m)

EGUNA: 2024/01/13

ABIAPUNTUA: Lazako lepoa (1129m)

ZAILTASUNA: S3

DENBORAK:

• Igoera : 3 ordu
• Jaitsiera : Ordu eta erdi

NOLA AILEGATU:

Iruñetik Jaka aldera doan autobide berria hartuko dugu Irunberriraino. Irunberriko irteera hartu ondotik, herrian berean, Nabaskoitze aldera joanen gara. Nabaskoitzetik goiti Zaraitzuko bailaran barneratuko gara eta osorik zeharkatuko dugu iparraldera Izaba aldera doan errepidea hartzeko. Errepide honetatik ailegatuko gara Lazako lepora.

ARRASTOA:

Powered by Wikiloc

KRONIKA:

Euskal Herriko Pirinioetan segitzen dugu, Nafarroa eta Zuberoa artean zehazki. Asteburuko bigarren egun honetan hegoaldetik abiatu dugu ateraldia, Erronkari eta Zaraitzuko bailarak bereizten dituen Lazako portutik. Abodira neguan igaten garelarik eskuinetara ikusten ditugun elur malda politetara sarbide ona dugu alde honetatik.

9:47 : Lazako lepoa (1129m)

Autoa lepoan utzi eta bertatik iparraldera abiatzen den pista hartuko genuen.

Pista bizkarrez bizkar joaten da, igoera eta jaitsierak tartekatuz eta gehienean pinuz inguratuta.

Tarte batzuetako soilguneek Orhi hurbila ikusten utziko ziguten.

Gazteluzarrako tontorra inguratzen du pistak eta segidan altuera galtzen hasten da. Puntu honetatik Gaztarrigaina ikusi genuen lehen aldiz, eta baita bertara igateko segituko genuen bidea ere. Argazkiaren ezkerretik eskuinera igaten den bizkarretik iganen ginen.

Gazteluzarra inguratuta altuera galtzen hasten da pista erran bezala, eta 1100 metro ingururaino jaitsiko ginen berriz ere.

Hiru kilometro eginda eguneko punturik baxuenera ailegatu ginen. Abiapuntua bera baino beheitiago dago puntu hau eta erraten ahal da bertatik hasten dela benetako igoera. Pinuen arteko pasilo moduko batetik parean ikusten diren maldetara ailegatuko ginen.

Bertaraino eraman gintuen pista utzi eta altuera irabazten hasi ginen malda politetatik.

Goitiago malda zabalak akitzen dira eta argazkiko bizkarretik iganen ginen. Elur soberakinik ez zegoen hego aurpegia izanik, baina nahikoa eskiatuz igan eta jaisteko. Aipatu paraje hau nahiko fite gelditzen dela elurrik gabe, beraz igoera hau egin nahi baduzue komeni da elurra egin berritan joatea.

Bizkarretik altuera irabazten hasi ginen, inolako zailtasunik ez zuten maldak gaindituz. Argazkian ikusten den bezala, elurra beheitiko haranetaraino ailegatzen zen; baina mendietan haizeak aunitz kendua zuen eta beheitian baino gutiago zegoen,

Bizkarraren zatirik maldatsuena iganda, elur guti zuen zati lauago batetik segitu genuen.

Puntu honetan diagonalean igaten den bizkarra akitzen da eta eskuinetara ateratzen den bertze zabalago bat segitu behar da; argazkikoa, hain zuzen ere.

1600 metro ingururaino aterako ginen bigarren bizkar honetatik. Puntu honetan elur guti zuen bertze zati bat zeharkatu behar izan genuen.

GR12 bidea ere bertatik pasatzen da... Kaskoa hurbil genuen jadanik, azken maldatxoa bertzerik ez zitzaigun falta bertara ailegatzeko.

Azken malda elur aise gehiagorekin topatu genuen. 1100 metrotan pista uzten den puntutik goiti igoera jarraia da eta elur gehiago dagoelarik jaitsiera bikaina izanen du.

11:55 : Gaztarrigaina (1733m)

Bi ordu pasatuxean kaskoan ginen, erritmo bizian egindako igoera eta gero. Bertatik Otsogorrigaina nahiko hurbil ikusten da; eta beraz bide aproposa da hegoaldetik Otsogorrigainara eskiz igateko, Aboditik abiatzen dena baino aise aproposagoa.

Kaskoan haize bizia zebilen eta beraz ez ginen aunitzik luzatu. Transizioa burutu eta iparraldera eginen genuen lehen jaitsiera Mulidoiko harantxoan beheiti. Gure asmoa bezperan hemendik ez urrun harrapatutako elur hautsetan eskiatzea zen, baina haizeak eta tenperatura epelak elurraren kalitatea okertua zuten.

12:39 : Mulidoiako harana (1455m)

300 metro inguru jaitsi genituen iparraldera eta harantxoko malda gututzen hasten den puntuan gelditu ginen. Berriz ere foka-larruak paratu eta tontorrera itzultzeko momentua ailegatua zen.

Elhürosoko lepo ingurutik pasatu ginen tontorrerako bidea. Gibelean uzten ari ginena Otsogorrittipia zen.

13:15 : Gaztarrigaina (1733m)

Hala bigarren aldiz gailurrera ailegatu ginen. Haize babesean foka-larruak kendu eta hegoaldera jaisten hasiko ginen.

Udaberriko elurra aurkituko genuen bigarren jaitsiera honetan, goxoa goitian eta pisuagoa beheitian.

Berriz 1100 metrora dagoen punturaino jaitsi ginen. Bertan foka-larruak azkenengoz paratu eta autora itzuliko ginen. Nire ustez, ez du merezi zati honetan fokak paratu eta kentzen gehiago ibiltzea, ez baitago jaitsiera luzerik.

14:58 : Lazako lepoa (1129m)

Aspalditik fitxatuta nuen bertze leku bat ezagutzeko aukera izan genuen honenbestez. Eskiatzeko malda politak eskaintzen ditu eta bakardadea ziurtatua dago, baina ordainsari eskiatzeko moduko maldetara ailegatzeko hiru kilometroko pista zatia zeharkatu beharko dugula da. Hala ere, itzultzeko modukoa izan da!

 

Binbaleta (1758m), Ezkantola (1511m) eta Izeito (1464m)

EGUNA: 2024/01/12

ABIAPUNTUA: Santa Grazi - Urdatx auzoa (854m)

ZAILTASUNA: S2

DENBORAK:

• Urdatx - Binbaleta : 3 ordu eta erdi
• Binbaleta - Ezkantola : Ordu bat
• Ezkantola - Izeito : Ordu eta erdi
• Izeito - Urdatx : Ordu erdi

NOLA AILEGATU:

Gure kasuan Izpegiko lepoa zeharkatu eta Behe Nafarroa eta Zuberoan barrena egiten dugun Lojibarrerainokoa. Garazitik Larzabalerako bidea hartu eta hemendik Atharratze aldera doan bidea hartuko dugu. Atharratze gurutzatu eta eskuinetara Santa Grazi eta Larrainera doan bideari segituko diogu. Bi herrietarako bideak bereizten direlarik Santa Graziko bidea hartuko dugu. Santa Graziko lehen auzora ailegatzean eskuinetara asfaltatutako bide batetik Urdatx auzora iganen gara. Hortik goiti igaten den bidean bidegurutze aunitz daudenez, hasmentako puntuaren kokapena duzue azpian. 

ARRASTOA:

Powered by Wikiloc

KRONIKA:

Mapa eta pantailei ordu luzez begira diseinatutako ibilbideak praktikara eraman eta arrakastatsuak izateak ikaragarrizko poza ematen du. Halako zerbait gertatu zitzaigun ortziralean. Zuberoako mendietan eskiatzeko malda politak mapetan bilatuak nituen, eta baita haiek lotuz bidea pentsatua ere. Baina gero errealitatean ez dakizu zer harrapatzen ahal duzun. Kasu honetan bidea ongi hautatua zela baieztatu ahal izan genuen elur baldintza bikainak lagun.

9:27 : Santa Grazi - Urdatx auzoa (856m)

Asfaltoa akitzen den tokitik beretik Anhauko lepora igaten den pista abiatzen da eta elur pixka bat izanda ere, pista horren zati bat autoz igan ahal izan genuen. Ibilgailua bide bazterrean utzi eta puntu beretik eskiak zangoetan genituela abiatu ahal izan ginen.

Pistatik egin genuen lehen bihurgune hetsia hau utzi arte. Bideak egiten dituen Z batzuk larre elurtuetatik moztuko genituen. GR10 bidearen markak harrapatu genituen zati honetan.

Goitiago berriz ere pista hartuko genuen eta mantsoago iganen genuen Izeito mendiaren hego-aurpegia bertatik zeharkatu genuen.

Erran bezala, pista Izeitoren hego aurpegi tentea zeharkatzen du. Aitzineko asteburuko elurteen ondorioz elur-jausiak erori ziren aurpegi honetan beheiti. Zati arriskutsua da beraz elurra egin berritan eta hobe da halakoetan gailurretik pasatzea pista honetatik baino.

Hego aurpegiko zeharkaldia akituta, Izeixiloako etxola inguruan baso ttipi batean sartzen da pista.

Guk hemen berriz ere Z zabal bat zuzenean iganez moztuko genuen.

Altuera irabazten...

Berriz ere pista nagusira atera eta Anhauko leporako azken metroak egin genituen. Eskuinetara metro gutira utziko genuen Izeitoko gailur borobila.

Gure gibelean Anhauko etxolak eta Auñamendi...

10:54 : Anhauko Khürütxea (1381m)

Pistak lepoa zeharkatu eta bertze aldean Zuberoako tontorrik altuenak ikusarazi zizkigun: Xardekagaina, Orhi...

Paraje ederrak...

Lepotik hegoaldera biratu eta aitzinera segitzen du pistak.

IGN mapetako 1408 metrora dagoen bizkarra pasatu eta metroak galtzen hasten da pista Zakiko erreka zeharkatu arte. Puntu honetatik Binbaleta mendia parean genuen eta bertara ailegatzeko malda etzanak identifikatu genituen.

Eskuinetara Sakiako etxola utziko genuen.

Pista Ezkantolako etxola inguruan akitzen da, izen bereko gailurraren azpian. Geroago iganen ginen horra ere.

Arestian erran bezala, Binbaletara iparraldetik igaten diren maldak etzanak eta zabalak dira. Haietatik segituko genuen leporaino eta gero kaskora.

12:00 : Binbaletako lepoa (1677m)

Lepotik Erronkariko bailararako ikuspegia irekitzen da. Kartxela mendia gibelean utzita gailurrerako azken metroak iganen genituen. 

12:12 : Binbaleta (1758m)

Eskiak zangoetan genituela ailegatu ginen gailur errazera.

Egun osoan bezala, gailurrean ere bakar-bakarrik ginen, eguraldi ederra, elur hauts arina gure zain... Ezin gehiago eskatu...

Gailurrean egonalditxoa eginda, zuzenean ipar-mendebaldeko maldetatik jaisten hasi ginen. Elur bikaina harrapatu genuen lehen metroetatik eta hala izanen zen egun osoan.

Malda osoak guretako bakarrik...

Lehen malda jaitsita, gibelera begiratu eta gure arrastoak ageri ziren desertu zurian...

13:05 : Ezkantolako Olha (1422m)

300 bat metroko altuera jaitsita Ezkantolako etxola ingurura itzuli ginen. Hemendik pixka bat gehiago jaisten segitzen ahal da Anhauko lepo aldera itzultzen den pista igan baino lehen. Hala ere, jaitsieraz gehiago gozatzeko hobe da pistatik itzuli ordez Ezkantolako gainera igatea.

Hala egin genuen guk. Foka-larruak paratu eta gailurrerako metro urriak igaten hasi ginen. Bizkarretik iganen ginen eta argazkian ikusten den irtengunea eskuineko aldetik inguratuko genuen.

Inguratzea hego-ekialdeko malda tenteetatik egiten da eta elur baldintza onak behar dira malda hau segurtasunez zeharkatzeko.

13:19 : Ezkantola (1511m)

Hala plantatu ginen eguneko bigarren kaskoan. Transizioa egiteko geldialditxoa egin eta iparraldera bigarren jaitsiera eginen genuen.

Bigarren jaitsiera oraindik lehena baino hobea izan zen. Elur hautsezko malda leunetatik Anhauko etxolara egine genuen jaitsiera ez dugu aise atzenduko.

13:43 : Anhauko Olha (1279m)

Etxola irekia bisitatu, foka-larruak paratu eta Anhauko Khürütxera igaten den pista hartuko genuen berriz. Berez nahi izanez gero pistaz pista beheiti egiteko aukera genuen goizean igandako bidetik, baina jaitsieraz gehiago gozatzeko Izeito mendiaren ipar aurpegia eskiatu nahi genuen.

Berriz goiti arrastoa irekitzen...

14:18 : Anhauko Khürütxea (1381m)

Ordu batzuk lehenago egondako lepora itzuli eta eskuinetara biratuta Izeitorako azken metroak igan genituen.

Kaskora ailegatzen...

14:44 : Izeito (1464m)

Lepotik 80 metro eskas bertzerik ez dira ign behar gailurrera ailegatzeko. Honenbertzez, eguneko igoerak akituak genituen eta azken jaitsieraz gozatzeko ordua ailegatua zen.

Gailurretik ipar-ekialderantz jaitsi ginen basoen arteko bizkar politetik eski-saio zuzena eginez autoa utzitako lekuraino bereraino.

15:18 : Santa Grazi - Urdatx auzoa (856m)

Aldez aldeko irribarrearekin akitu genuen leku bakarti honetan egindako ibilbide ederra. Aurreikusitakoak aise gainditu zituen egunak.