Orriak

Pedraforca (2506m) etiketadun mezuak erakusten. Erakutsi mezu guztiak
Pedraforca (2506m) etiketadun mezuak erakusten. Erakutsi mezu guztiak

2021/07/25

Pedraforca (2506m), Calderer (2493m)

EGUNA: 2021/07/09

ABIAPUNTUA: Mirador de Gresolet (1570m)

ZAILTASUNA:
Nahiko erraza (PD). Calderer tontorrera ailegatzeko azken zatian gainditu behar diren bi tximiniek ematen diote zailtasun maila ibilbideari. Bietan kateak daude, baina bereziki azkena estua eta helduleku gutxiduna da. Pedraforcaren gailur nagusiraini bakarrik joanez gero zailtasuna ez da F+ mailatik pasatzen.

DENBORAK:
  • Igoera: 2 ordu eta erdi Pedraforcaraino eta ordu gehiago Calderer mendira
  • Jaitsiera: Ordu eta hiru laurden
NOLA AILEGATU:
Bartzelonatik iparraldera jo behar da Berga herrira eta errepide beretik segitu ezkerretara Pedraforcako mendigunea iragartzen diguten trafiko seinaleak ikusi arte. Errepide horretatik Saldes herrira ailegatuko gara eta bertan Gresoleteko begiratokira igotzen den errepidetxoa hartuko dugu.

ARRASTOA:
Powered by Wikiloc


KRONIKA:
Uztaileko bigarren mendi ateraldia, kasu honetan Kataluniako mendizaleendako ikur den Pedraforca ederrera. Pirinioetako mendirik altuenek osatzen duten lerrotik hegoalderago dago Pedrafoca, Cadi mendigunearen inguruan, eta bere itxura bereziak mendizale guzien  arreta pizten du. Kasu honetan mendigunearen puntarik altuena eta bertatik hurbil dagoen Calderer punta bisitatu ditugu.




8:13 : Mirador de Gresolet (1570m)
Gaua Saldes inguruan pasatuta, goizeko lehen orduan abiatu ginen jadanik mugitua zegoen aparkalekutik. Goizik ibili ezean, inguru honetan zaila da lasaitasuna eta bakardadea harrapatzea.


8:23 : Refugi Lluis Estasen (1668m)
Bide markatu batetik minutu gutxian ailegatuko ginen pinu basoaren soilgune batean dagoen Estasen aterpera. Puntu honetatik hasiko genuen Pedraforcari itzulia emanen zion ibilbide zirkularra, Verdet lepotik igo eta Enforcaduratik jaitsiz.


Hala bada Verdet leporako bidea erakusten ziguten seinaleei kasu eginez mendiaren iparraldeko pareta erraldoien azpitik zeharkaldia hasi genuen.


Estasen aterpea segidan utzi genuen gibelean altuera gutxu irabazten duen bidetik.


Pinuak, belarditxoak eta harkaitz grisa dira inguru honetako protagonistak. Antzekotasun gutxi du Pirinioetako bertze zonaldeetako mendiekin.


Bidexka politetik goiti, goizik hasteak oparitu zigun bakardadean...


Esloveniako Alpeen iduria hartzen diot inguruari.


Paretak azpitik inguratuta, bidexka tentetu eta Verdeteko leporantz igotzen da.


9:23 : Coll del Verdet (2248m)
Verdeteko lepoan ipar haize finak eman zigun ongi etorria. Arropa jantzi eta ezkerretara biratzen den bideari segitu genion, harkaitzetan murgiltzeko gogoz.


Pixka bat gehiago ibili ondotik iparraldeko sasigailurrera eramanen gintuen tximinia eskalatu genuen. Erraza da (I) eta inolako arazorik gabe igoko genuen.


Azken zatian pixka bat gehiago tentetzen da eta soka bat dago paratua igotzen laguntzeko. 


9:43 : Cim Nord (2428m)
Hala ailegatu ginen mendiguneko iparraldeko tontorrera. Gosol herrixka bistan genuen bertze aldean, mendi honetara igotzeko bertze abiapuntu posible bat.


Gailur nagusira ailegatzeko oraindik tarteko bertze kota pare bat gainditu behar da. 


Jaitsieratxo bat eta berriz eskaladatxo errazak eginez bigarren kotan ginen...


Eta bertze horrenbertze eginez hirugarrenean... Gailur nagusia gero eta hurbilago genuen.


Bertara ailegatzeko azken jaitsieratxo bat eta tximinia tenteago bat gainditu behar izan genituen.


10:03 : Pedraforca / Pollego Superior (2506m)
Autotik atera eta bi ordu baino lehenago zapaldu genuen Pedraforcako punturik altuena. Hantxe ginen, Kataluniako mendi ezagun hartan bakar-bakarrik arraroa bazirudien ere. Aitzinean genituen mendiguneko bertze bi gailur famatu: Calderer, ezkerrean, eta Pollego Inferior, eskuinean. Gu lehenengoraino joanen ginen.


Horretarako gailur nagusitik metro batzuk galdu eta gandor erraza segitu genuen azken zatira arte. Irudi honetan gibelean ikusten den punta da Calderer eta bertara ailegatzeko tarteko bertze kota bat ere gainditu behar da. Bi kotak ikusten diren tximinietatik igotzen dira eta haietan kateak eta sokak daude laguntzeko.


Horrela ekin genion lehen tximiniari. Bertikal samarra da, baina helduleku onak ditu eta gainera kate bat du igoeran laguntzeko.


Kate zatia gaindituta ezkerretara zeharkalditxo bat egin behar da oraindik puntatxoa harrapatzeko.


Lehen puntatik Caldererreko gailurra bistan genuen. Bertara ailegatzeko erran bezala bertze tximinia bat gainditu behar da, irudian ikusten dena.


Aitzinekoa baino zailagoa da bigarrena. Bertikalagoa, estuagoa eta helduleku gutxirekin. Kateak daude laguntzeko, baina hauek gabe IV mailako eskalada pausuren bat izanen du gutxienez.


Zatirik estu eta bertikalenean...


10:43 : Cim Calderer (2493m)
Horrenbertzez mendiguneko bigarren punturik altuena zapaldu genuen. Saldes ingurura ikuspegi bikaina dago gailur honetatik... Egonalditxo bat egin genuen haize babesean zerbait jateko eta jaitsierari ekin genion.


Igotako bi tximiniak jaitsi genituen kateetatik zintzilikatuz. Tximiniarik tenteena den honetan rapel bat egiteko aukera dago, baina ez da beharrezkoa.


Tximiniak gaindituta Enforcadura deitzen den mendiaren erdiko lepo zabalera jo genuen bide jakinik gabeko terrenotik.


11:26 : Enforcadura (2356m)
Behin Enforcaduran, ezkerretara biratu eta Tartera famatuaren ondotik egin berri duten bidexkatik jaitsiko ginen atsedenik gabeko malda gaindituz.


Tarteraren azpiko aldean erne egon behar da gehiegi jaitsi gabe ezker biratu eta basoko bidea hartzeko berriz ere Estasen aterpe aldera.


12:12 : Refugi Lluis Estasen (1668m)
Behin aterpean, lanak kasik eginda, atsedenaldi luzea hartu genuen garagardo baten bueltan azken zatitxoa jaitsi aitzinetik.


13:00 : Mirador de Gresolet (1570m)
Hala akitu genuen mendi polit honetara egiten dudan bigarren bisita. Urrun gelditzen zaigun ingurua da, baina dudarik gabe merezi duena...
 

BIDEOA:

2010/08/22

Pedraforca (2506m)

EGUNA: 2010/08/22

IRTEERA: Gresolet begiratokia (Saldes)

ZAILTASUNA: Errexa (F+). Ez da mendi zaila baina hainbat trepada egin behar dira gailurrera iristeko, Coll de Verdetetik joanez gero (I).

EGURALDIA: Eguzkitsua.

DENBORAK: Igoera 2:30 eta jaitsiera (gailurreko denbora barne) 2:10. Denetara 4:40.

NOLA IRITSI: Bartzelonatik iparralderuntz Berga herrira joan eta errepide horretatik segitu, ezkerretara Pedraforcako mazizora biratzen den bidegurutzea ikusi arte. Hemendik Saldes herrira iritsiko gara eta herria pasa eta gero, Gresolet begiratokiraino doan bidea hartuko dugu eskuinetara. Begiratokiaren ondoan aparkalekua dago.

SARRERA:
Pedraforca Kataluniako mendi mitikoa. Bere forma ikusgarriaz gain, mitologia handiko mendia da. Gainera, bertako paretak eskaldarako aproposak izanik, zailtasun eta edertasun handiko bideak aurki ditzakegu.

DESKRIBAPENA:
Bartzelonan genbiltzan egun batzuk aprobetxatuz, horietako batean Pedraforcara hurbiltzea bururatu zitzaigun. Euskal Herritik oso urruti dagooen mendia da eta aprobetxatu beharra zegoen bertako egonaldia igotzen saiatzeko. Izan ere, entzute handiko mendia da Pedraforca (beharbada Pica d'Estatsekin batera kataluniako ezagunena).
Horrek erakarrita, abuztu beroko 22. egunean Bartzelonatik Saldes herri txikiraino hurbildu ginen. Bidean, azken kilometroetan, Pedraforcaren lehen ikuspegia izan genuenean zeharo harrituta gelditu nintzen bere edertasunarekin. Aparta da benetan. Dudarik gabe, Pirinioetako mendirik ikusgarrienetarikoa.
Gresolet begiratokiko aparkalekura hurbildu, prestatu eta basoan sartu ginen errepide ondoko bidexka batetik Pedraforcarako norabidean. Zortziak eta laurden ziren.

0h 00min (0 km): Gresolet begiratokia (1560m)
Oihanean zehar abiatu ginen, malda leunean eta segidan zabalgune batera ailegatu ginen.

0h 15min (0,8km): Lluis Estasen aterpea (1668m)
Zabalgunean aterpea dago. Bertara sartu ginen eguraldiari buruz galdetzeko, horrelako beroarekin ekaitzen beldurra baikenuen. Hala ere, ez zekitela erran ziguten, baina seguraski arratsaldean ekaitza eginen zuela. Beraz, bizi-bizi gora abiatu ginen.


Aterpearen atzean seinale batzuk, gailurrera joateko bi bide posibleak adierazten dizkigute. Eskuinetara, Coll de Verdet lepotik eta ezkerretara, Enforcaduratik (hau Pedraforcako bi gailurren artean irekitzen den lepo zabala da). Guk ibilbide zirkularra egin genuen, Coll de Verdetetik igo eta Enforcaduratik jaitsi. Irudian, Pedraforcaren pareta iusgarriak bidexkatik.


Poliki-poliki altuera irabazten joan ginen bidexka markatuan zehar. Atzera begirada.


Pareta ikusgarriak azpitik inguratzen ditu bidexkak.



Eta bista zoragarriak uzten dizkigu.


Pareta inguratu ondoren, bidexka ezkerretara biratzen da pixka bat eta Verdeteko kanal tentera eramaten gaitu.


Hemen maldak nabariak dira eta azkar irabazten dira metroak.


Verdeteko kanala.


1h 28min (3,5km): Coll de Verdet
Verdeteko kanaletik izen bereko lepora ailegatu ginen. Bertze aldean Gossol herria.


Pixka bat deskantsatu ondoren, ezkerretara biratu ginen lehenengo trepadaren bila.


Zati honetan marka horiak jarraituz, lehenengo tximiniara ailegatu ginen. Tximinia erreza (I) da, helduleku asko ditu eta ez da sobera aereoa.


Hala ere, bukaeran pixkat tentetzen da, aurreratzea zailduz.


Jendea tximiniako azken metroak igotzen.


2h 04min: Cim Nord (2428m)
Tximiniatik aterata, lehenengo gailurrarekin egin genuen topo. Berez Pedraforca mazizoaren izena da eta hainbat gailur ditu: Cim Nord, Pollego Superior, Pollego Inferior eta Cim Calderer dira ezagunenak.


Lehenengo gailur honetatik, gailur altuenak (Pollego Superior) hurbil dirudi baina...


Bi gailur hauen tartean, izenik gabeko bertze bat dago eta bakoitzaren tartean bretxa bat (beraz denera bi bretxa), horrek suposatzen dituen destrepe eta trepadekin. Irudian lehenengo bretxatik tarteko sasigailurrerako trepada (I).


Tarteko sasigailurretik atzera begiratuta Cim Nord ikusten dugu.


Eta aurrean hurbilago Pollego Superior.


Tarteko sasigailurrak arista pixkat dauka. Aristaren amaieran, bigarren bretxara jaitsi behar da eta berriro igo ikusten den gailurrera.


Azken trepadatik ateratzen (I). Atzean tarteko sasigailurra eta Cim Nord.


2h 30min (4,5km): Pollego Superior edo Pedraforca (2498m)
Zati dibertigarrian gora eta behera ibili ondotik, Pedraforcako gailur mitikoa zapaldu genuen! Poza ikaragarria! Goian nahiko jende zebilen (denak kataluniarrak) eta tenperatura oso atsegina zen. 25 minutu inguru egon ginen bertan.


Paretak gainetik ikusita...


Gailurrean zerbait jan eta edan ondoren, beheraka abiatu ginen. Ibilbide zirkularra egin nahi genuenez, Enforcadurara jaitsi ginen.


2h 46min (4,9km): Enforcadura (2356m)
Enforcadura Pedraforcako bi gailur nagusien artean dagoen zabalgune edo lepoa da, lehen aipatu bezala. Izugarria da bere handitasuna eta benetan txiki sentiarazten zaitu.


Enforkaduratik behera aldapa harritsuan behera jaitsi ginen. Aldapa tentea da eta oso zuzena. Hala ere, harriak xeheak izanda elurretan bezela nahiko azkar jaitsi ginen.


Maldaren behekaldean berriz basora iritsi ginen eta bidea ezkerretara biratzen zen Lluis Estasen aterpe aldera.


Basoko bidea jadanik ez da hain malda eta gustura ibiltzen da bertatik.


4h 30min (7,2km): Lluis Estasen aterpea (1668m)
Aterpera ailegatu eta garagardo fresko bat hartu genuen sari gisa, belardian gustura deskantsatuz.


Aterpetik Coll de Verdetera igotzen den bidearen irudia. Goizean hortik pasatu ginen.


Garagardoa edan ostean, aterpea atzean utzi eta aparkalekura bueltatu ginen, baldar xamar hori bai.


4h 40min (8km): Gresolet bigiratokia (1560m)
Eskailera hauetatik errepidera jaistsi ginen.


Autoa hartu eta Bergara joan ginen bertan bazkaltzeko asmoz. Errepidetik Pedraforcaren ikusmira aparta da!


Mendi bikaina benetan!