Orriak

Peña Sabocos (2757m) etiketadun mezuak erakusten. Erakutsi mezu guztiak
Peña Sabocos (2757m) etiketadun mezuak erakusten. Erakutsi mezu guztiak

2025/05/31

Peña Sabocos (2757m)

EGUNA: 2025/05/24

ABIAPUNTUA: Petrosos - Panticosako eski estazioa (1922m)

ZAILTASUNA: S4 (goitiko kanalea eskiatu gabe S3)

DENBORAK:
  • Igoera: Hiru ordu
  • Jaitsiera: 45 minutu
NOLA AILEGATU:
Iruñeatik Jakara joan eta hemendik Sabiñanigorako bidea segituko dugu. Sabiñanigotik Biescasera eta Tenako bailaran barneratuko gara. Portaleteko mendatean goiti igotzen den errepideari segituko diogu eskuinetara Hoz de Jaca herrira doan errepidetxoa hartu arte. Herri honetatik goiti Panticosako eski pistetara igotzen den pista hartuko dugu. Luzea da eta zati batzuetan ez da arras egoera onean, baina ibilgailu normalarekin igotzen ahal da. Elurrak mugatuko digu abiapuntua.

ARRASTOA:
Powered by Wikiloc


KRONIKA:
Sabocos ingurua eskiatzaile frikiak garenontzako deboraldia luzatzeko aitzakia paregabea izaten da. Hoz de Jaca herritik goiti ateratzen den pistak elurretaraino eramaten gaitu eta paraje ikusgarri honetan denboraldiko azken arrastoak marrazteko aukera ematen digu. Bertan izan ginen joan den asteburuan...

9:29 : Petrosos - Panticosako eski estazioa (1922m)
Petrosos inguruan autoa utzi eta oraindik goitiago segitzen duen pistatik abiatu ginen oinez. Pista hau Asnos lakuraino igaten da eta azken zatian beheitiago baino egoera hobean dago; beraz autoz aise igaten ahal da.


9:47 : Ibon de Asnos (2055m)
Pistatik 20 minutu eskaseko paseotxoa emanda, laku inguruan hau utzi eta eskiak paratuko genituen.


Hortik kaskoraino 700 metroko elur maldak izanen genituen disfrutatzeko. Laku inguruan akitzen den pistatik ezkerretarako zeharkaldia egin eta malda zabaletatik iganen ginen azken zatian.


Gure eskuinetara Peña Roya inguruak utziko genituen. 


Guk hegoaldera egin genuen malda politetatik, Grau del Escalar deitzen den parajetik. Argazkian parean ikusten diren harkaitz horien ezkerretarantz joko genuen.


IGN mapetan 2269 metrora dagoen lepo gisakora ailegatu ginen. Gure aitzinean zulo bat irekitzen zen eta bertara jaitsiko ginen foka-larruak kendu gabe. Igoera zuloaren ezkerretara harresien artean irekitzen den elurrezko terrazatik ere egiten ahal da, baina esposizio gehiago du zati horrek.


Erran bezala, zuloraino metro batzuk galdu eta pareko kanaletik berriz altuera irabazten hasiko ginen.


Kanalean malda tenteagoa da eta kutxilak paratu behar izan genituen. Gauean fresko egin zuen eta elurra ederki gogortua zen.


Kanaletik atera eta ezkerretara biratuta Sabocos mendiaren mendebaldeko maldan goiti abiatu ginen.


Mantso-mantso bertikaltasuna hartzen joaten den malda da honakoa, harik eta goiti kanal anitzetako batetik ertzera atera arte. Gu argazkiaren eskuinetara gelditzen den kanal bertikaletik aterako ginen, 40 gradu inguruko maldatik.


Azken zati hau gainditzeko kranpoiak paratu behar izan genituen...


Eta mantso-mantso goiti... presaka ibili behar ez genuen elurrari guritzeko astia eman behar baikenion.


Behin ertzean hegoalderantz biratu eta azken metro errazei ekinen genien. Eskuineko aldeko kanal bertikal batetik atera ginenez ertzera, bertan egoten den harkaitzezko irtengunearen goitiko aldera atera ginen; eta beraz azken metroak zailtasunik gabe eginen genituen.


Kaskora ailegatzen...


12:07 : Peña Sabocos (2757m)
Behin gailurrean denbora egiten aritu ginen elurra gehiago guritzeko. Bakar-bakarrik egon ginen tarte batean, jende gehiena mantsoago hasi baitzen agertzen.


Tena bailara kaskotik...


12:30ak aldera ekin genion jaitsierari gailurretik beretik. Ipar magalean bira batzuk egin eta ertzera itzuli ginen, handik mendebaldeko aurpegian barneratzeko. Hainbat kanal daude aukeran eta arrastorik ez zuen bat hautatu genuen guk.


Goiti poliki egindakoa, ziztu bizian jaitsi genuen... Argazkian Sabocos lakua...


Asnos laku bazterrean eskiak kendu eta autorako azken zatia oinez eginen genuen. Paraje ederra eta elur kantitate handia lagun izan genituen.


13:41 : Petrosos - Panticosako eski estazioa (1922m)
Hala akitu genuen ateraldi motz eta polita. Denboraldi akabailako klasiko bat, segur aski udaberriko azkena.

 

2021/05/28

Peña Sabocos (2757m)

EGUNA: 2021/05/25

ABIAPUNTUA: Ibon de los Asnos (2055m)

ZAILTASUNA: S4 (goitiko kanalea eskiatu gabe S3)

DENBORAK:
  • Igoera: Bi  ordu eta erdi
  • Jaitsiera: 45 minutu
NOLA AILEGATU:
Iruñeatik JaKara joan eta hemendik Sabiñanigorako bidea segituko dugu. Sabiñanigotik Biescasera eta Tenako bailaran barneratuko gara. Portaleteko mendatean goiti igotzen den errepideari segituko diogu eskuinetara Hoz de Jaca herrira doan errepidetxoa hartu arte. Herri honetatik goiti Panticosako eski pistetara igotzen den pista hartuko dugu. Luzea da eta zati batzuetan ez da arras egoera onean, baina ibilgailu normalarekin igotzen ahal da. Elurrak mugatuko digu abiapuntua, gure kasuan pistaren hondarreraino ailegatu ahal izan ginen, Asnos lakuraino.

KRONIKA:
Elur eta eskiaren friki xamarrak garenok bi arazo izaten ditugu aunitzetan: lehena, Pirinioetan elur pizar bat gelditzen bada beti bertze eski ateraldi bat gehiago egiteko aukerak bilatzen aritzen garela; eta bigarrena, ateraldi hori gauzatzeko bertze friki bat bilatu behar izaten dugula. Herriko mendiak udako kolorez janzten eta kostaldeko hondartzak jendez betetzen hasten direlarik aurpegi arraroarekin begiratzen digu jendeak eskiatzera goazela erraten diegularik. "Bada elurra oraindik'" izaten da ohiko galdera. Bada bi oztopoak gainditu eta denboraldi akabailako santutegi horietako bat ezagutzeko aukera izan dugu oraingoan: Tendeñerako mendigunea. Bi mendik deitzen dituzte eskiatzaileak bailarak lorez estaltzen direlarik: Tendeñerak eta Sabocosek. Gu bigarren honetan ibili gara eta arras aho zapore onarekin utzi gaitu, mendi ikusgarria iruditu baitzaigu.


9:24 : Ibon de los Asnos (2055m)
Pista zakarra goitiraino igo eta eguzki goxotan igoerarako prestatu ginen. Inguruak marmota eta sarrioez gain, arimarik ere ez...


Autotik pistako metro batzuk eskiak bizkarrean genituela eginen genituen, baina elurra hurbil zegoen.


100 bat metroko altuera irabazi eta eskiak oinetara. Elurretan barneratzen ginen bitartean gibelean udako paisaiak ikusten genituen, laku urdin eta larre berdez apainduak.


Malda bat igo eta Escalar izenez ezagutzen den zuloan sartu ginen. Sabocos inguruko mendi eta gandor harritsuek hesten duten leku hau ikusgarria da eta txiki sentitzen ginen bertan barneratu ahala.


Laku elurturaino metro batzuk galdu eta hodi itxurako pasabide batean goiti abiatu ginen. Eguzkitan goxo zegoen, baina itzaletan tenperaturak beheiti egiten zuen eta elurra gogor zegoen. Kutxilak paratu eta kasu emanez igo ginen.


Berriz ere eguzkitara aterata elur goxo eta errazagoa harrapatu genuen igotzeko.


Metroak irabazi ahala paisaia gero eta ikusgarriagoa da. Lehendabiziko aldia genuen bertan eta aunitz gustatu zitzagun.


Hoditik atera eta Sabocoseko ertzaren mendebaldeko maldan goiti segitu genuen. Eskiekin zati batean, baina laster kenduko genituen irudian ikusten diren kanaletako batetik igotzeko.


Erran bezala, malda tentetzen delarik eskiak motxilara eta kranpoi eta pioletaren laguntzaz igoko genuen kanalea. 40-45 gradu inguruko malda hartuko du tarte batzuetan eta normalean oinez egiten da tarte hau.


Sabocos mendiaren ipar-mendebaldeko sorbaldara atera ginen horrela. Bertan eskiak utzi eta ertzetik segitu genuen gailur aldera.


I. graduko pausu misto erraz bat gainditu behar da, baina ertza aski erraza da.


Azken metroak...


Vignemale handia gailur ingurutik...


12:00 : Peña Sabocos (2757m)

Bi ordu pasatuxean mendi eder honen puntan ginen. Igoera zinez polita iruditu zitzaigun. Polita eta askotarikoa. Lehenik elur malda zabalak lakutik goiti, gero Escalarreko zirkuan barneratzen den hodia, segidan mendebaldeko kanale tentea eta akitzeko ertz panoramikoa. 


Hegoaldean hodei nagi batek ikusoegia murrizten zigun, baina iparraldera urdin eta garbi ageri ziren zeru ertzak. Garmo Negro eta Infierno inguruak parez pare genituen..


Gure oinetan Asnos eta Sabocos lakuak eta Panticosa herria...


Kaskoko egonaldiaren ondotik ertza jaitsi eta eskiak paratuta egin genuen mendebaldeko kanalean beheiti. Goitiko zatia ahal bezala jaitsi genuen, badaezpada pioleta eskuetan hartuko. Hortik beheiti udaberri erako elur goxoarekin bihurgune politak marraztu ahal izan genituen elur marroixkan.


Nahi baino lasterrago akitu zen elur tartea, gehienetan gertatzen den bezala...


13:31 : Ibon de los Asnos (2055m)

Eskiak bizkarrera eta paseotxo motzarekin akitu genuen ateraldi ederra. Azkena eskiekin? Segur aski bai.

 

BIDEOA: