2015/12/12

Lenquo de Capo (2716m)

EGUNA: 2015/12/12

IRTEERA: Piau Engaly (1850m)

ZAILTASUNA:
  • Eski zailtasuna: S2
DENBORAK:
  • Igoera: Bi ordu eta erdi
  • Jaitsiera: Ordu bat
NOLA IRITSI:

Euskal Herriko ipar partetik joanez gero, azkarrena Baionan A64 autopista hartu eta bertati joatea Saint Lary Soulango irteera hartu arte. Behin autopistatik aterata aipatutako herriraino iritsi beharko dugu. Saint Lary gurutzatu eta Aragnouet-Bielsa tunelera doan bidea segiko dugu. Bidean goazela, eskuinetara Piau Engaly eski estaziora igotzen den bidea hartu beharko dugu. Estazioaren goiko partean dauden aparkalekuetako batean utziko dugu autoa.
Euskal Herriko hegoaldetik joan nahi badugu ordea, hobe da Iruñeatik Jacara doan autobidea hartzea. Jacatik Huescara jarraitzen duen errepidea segiko dugu baina segidan Fiscal herri aldera desbideratuko gara. Fiscaletik Ainsara segiko dugu eta hemen iparraldera biratuko gara lehen aipatutako tuneleraino igoz Cinca ibaiaren ertzetik. Tunela zeharkatuta pixka bat jaitsi (6 km) eta Piau Engalyko bidea hartuko dugu.
Le Plan auzoa eta Piau Engalyko eski estaziora igotzen den bidea

DESKRIBAPENA:
Eski denboraldia Bareges inguruan estrenatu ondotik eta eski zaharrak hautsi ondotik, Aureko bailarara inguratu gara. Pirinio guztian bezala, hemen ere elur soberakinik ez, baina eskiatzeko nahikoa.

9:22 : Piau Engaly (1850m).
Presa handiegirik gabe abiatu ginen Piau Engalyko aparkalekutik, eguzkiak lan pixka bat eginen zuelakoan. Oker geunden baina. Laino geruza fin batek estali zuen zerua egun osoan zehar eta elurra gogor mantendu zen.


Eski pista batetik metro batzuk galdu, errekatxo erdi-izoztua gurutzatu eta poliki.poliki metroak irabazten hasi ginen.


Denbora guztian bistan izanen genuen gure eguneko helburua, Soum des Salettes handiaren eskuinaldean dagoen Lenquo de Capo mendia. Soum des Saletteseko igoera duela pare bat urte egina nuen eta kasu honetan eskuinerago igoko ginen bide berri bat probatuz.


9:56 : Cabane de Moune (1850m).
Hasierako zatian etxolako bat utziko genuen gure eskuinetara. Prekario xamarra egia erran, atea hautsita eta barruan tximinia bat bertzerik ez.


Igoera guztian zehar elur gogorra, beraz kutxilarik ezean kranpoiak jarri behar.


Pic de la Gela mendiaren itzaletan malda goiti...


Gailurra gero eta hurbilago...


13:57 : Col IGN 2678 (2678m).
Igoera normala baino denbora gehiago pasata, izenik gabeko lepotxora ailegatu ginen. Bertze aldean Gedre aldera jaisten den bailara eta urrunean Vignemale handia.


Lepoan eskiak utzi eta azken metroak oinez eginen genituen, gibelean Campbieil eta Maou mendiak utziz.


Azken metroak gailurrera ailegatzeko...


Gurea da...


14:12 : Lenquo de Capo (2716m).
Behin gailurrean Soum des Saletteseko ipar magala pare-parean genuen.


Gure iparraldean berriz, Campbieil eta Maou. Ttiki sentitzen ginen horien ondoan...


Gailurreko argazkia atera eta segidan beheiti abiatu ginen, jadanik berandu xamar baitzen.


Jaisteko prest lepoan...


15:48 : Piau Engaly (1850m).
Jaitsiera elur gogorra harrapatu genuen gehienean, goi-laino fin batzuk ez baitzioten eguzkiari berotzen utzi. Ipar aurpegiek hauts piska bat gordetzen dute oraindik baina bertzea gero eta gogorrago dago. Ea elurra egiten duen...


BIDEOA:

2015/11/29

Col d'Aoube (2369m)

EGUNA: 2015/11/29

IRTEERA: Tournaboup (1450m)

ZAILTASUNA:
  • Eski zailtasuna: S2
DENBORA:
  • Igoera: 2 ordu eta erdi
  • Jaitsiera: Ordu bat
NOLA IRITSI:
Lourdes hiritik hegoaldera joanda, Argeles eta Luz Saint Sauveur herrietara iritsiko gara hurrenez hurren. Azken herri honetan Tourmalet mendate mitikorako bidea hartu behar da eta Tournaboupeko aparkalekura igo.
Tournaboupeko aparkalekua gauean

DESKRIBAPENA:
Hasi dugu aurtengo eski denboraldia eta elur eta egun bikainarekin hasi ere. Lehen elurteak elurra nahiko altu utzi badu ere, Pirinioek aukera anitz eskaintzen dituzte elur horretaz gozatzeko. Horietako bat da Bareges eski estazio ingurua, zalantzarik gabe klasiko bat eskiatzaileen artean. Barbe, Bedera, Onceteko lepoa, Aoubeko lepoa, Bonida... aukerak ugariak dira.


 9:15 : Tournaboup (1450m).
Furgonetan gau hotza pasa eta gero, presa gehiegirik gabe abiatu ginen, eguzkiari bere lana egiten uzteko.


Lehen metroak errepidetik eginda, 1650 metro inguruan errepidea utzi eta Aoubeko bailaratxoan barneratu ginen.


10:15 : Cabanes d'Aoube (1850m).
Lehen malda bat gaindituta, Aoubeko etxolen lautadatxora ailegatu ginen.


11:02 : Lac d'Aouda (2225m).
Bertze malda tenteago bat gainditu eta Cremat eta Pene Blanque mendiek osatzen duten zirkura ailegatu ginen. Eskuinean Onceteko lepoa ageri da, izen bereko mendia eta Pene Blanqueren artean; ezkerrean berriz, gu igoko ginen Aoubeko lepoa.


11:44 : Col d'Aoube (2369m).
Bertze malda tenteago bat eta kornisa delikatu bat zeharkatuta lepora ailegatu ginen. Berez asmoa bertze aldera jaitsi eta ibilbide zirkular bat egitea zen. Baina, bertze aldea elur gutxirekin zegoenez, igotako bidean harrapatutako elurra aprobetxatzea erabaki genuen.


Honela denboraldiko lehen jaitsiera elur bikainetik egin genuen.


13:51 : Tournaboup (1450m).
Berriz ere autoan, trasteak bildu eta etxera.


BIDEOA:

2015/11/14

Ballibierna (3067m), Culebres (3062m)


EGUNA: 2015/11/14

IRTEERA: Embalse de Llauset (2200m)

ZAILTASUNA:
Nahiko erraza (F+). Teknikoki ez da ibilbide zaila baina hainbat puntutan bidea aldeetako bertikalitateak inpresio handia eragin dezake. Hauxek dira ibilbideko puntu klabeak:
  • Ballibiernako sasigailurretik gailurrera doan ertza: Ez da zaila baina bi aldeetara erorketa handia du. Estu xamarra da eta ezin da hutsik egin.
  • Pas de Cavall: Ballibierna eta Culebreseko gailurren arteko ertz zatia da. 20 bat metroko luzera izanen du baina arras estua da eta erorketa handia du bi aldeetara. Iparraldera plaka inklinatu bat da, baina 300 bat metroko erorketarekin. Hegoaldera berriz, erorketa ttikiagoa izan arren bertikalagoa da.
  • Culebresen hegoaldeko jaitsiera: Llauseteko lepora ailegatzeko hainbat destrepe egin behar dira (I).
DENBORAK:
  • Embalse de Llauset - Ballibierna (Xelateko lakutik): 3 ordu eta erdi
  • Ballibierna - Culebres : 10 minutu
  • Culebres - Embalse de Llauset (Llauseteko lepotik): 2 ordu
NOLA IRITSI:
Euskal Herriko iparraldetik joanez gero, errazena A64 autopistatik joatea da. Bertatik Lleida/Bagneres de Luchon irteeraraino segitu eta irteera hau hartuta Lleidako norabideari jarraituko diogu une oro. Val d'Aranera ailegatuko gara horrela. Hemen Vielha zeharkatu eta tunela pasata Aneto herrira ailegatuko gara. Herri honetatik goiti abiatzen da Llauseteko urtegiraino igotzen den bidea, egoera kaskarrean dagoena. Azken zatian tunel ikusgarri bat zeharkatzen du bideak.

DESKRIBAPENA:
Astebete lehenago egindako saiakeraren ondotik gelditu zitzaidan arantzatxoa atera nahi nuen eta berriz Aran aldera itzultzeko aukera ezin nuen pasatzen utzi. Ortziral arratsaldean abiatu ginen Aran aldera bertan asteburua pasatzeko asmoz. Asteburuko plater nagusia tarunbatean eginen genuen Ballibierna igotzeko saiakera izanen zen.

7:58 : Embalse de Llauset (2200m).
Azaroko udatxoak aitzinera segitzen zuen eta ez zegoen hotz handirik Llauseteko urtegian. Aste batez elur pixka bat joan zen, ipar aurpegietan izan ezik. Eguna bikaina!! Ezin genuen hutsik egin.



Aparkalekuaren ondoko tunela zeharkatu eta lehen seinalean Ballibiernako gailurrera eramanen gintuen bidea hartu genuen. Igoera lakuen bidetik eginen genuen, jaitsiera aldiz Llauseteko lepotik. Horrela egitea gomendatzen dut nik. Izan ere, igoera eztiagoa da lakuen inguruetan atsedenguneak daudelako. jaitsiera aldiz arras zuzena, baina baita erosoa ere, Llausetetik beheiti bidexka erosotik egiten baita.


Lakua inguratu genuen marka zuri-gorrien segika.


Lakua inguratuta bertze seinale batera ailegatu ginen. Hemen, erran bezala, lakuetako bidea hartuko genuen igoeran eta bertze aldetik jaitsiko ginen ibilbide zirkularra eginez.


Ipar aurpegietan elurrak bere horretan dirau. Gutti hala ere azaroaren erdia izateko.


8:39 : Cabaña del Botornas (2343m).
Lehen malda gaindituta etxola hau utzi genuen gure eskuinetara. Bisitatxo bat egiteko aprobetxatu genuen. Nahiko sinplea da, baina ez dago gaizki.


Etxola pasata segidan izen bereko lakura ailegatu ginen.


Inguru ederra da lakukoa.


Gure ezkerretan utziko genuen Cap de Llauseteko errekaren bazterretik segituko genuen goiti, iparralderantz.


Segidan begiztatu genuen Cap de Llauseten eraikitzen ari diren aterpe berria. Laster irekita egonen omen da. GR11ren ibilbidean kokatua dago.


Bertze malda bat igota lehen aldiz bistaratu genuen Ballibiernako gailurra. Zuri-zuri zegoen, dotore, edozein mendizale beregana erakartzeko moduan.


Azken maldara ailegatu aitzinetik ordea Coma Arnauko lakuak inguratu behar genituen, hirurak gure ezkerretara utziz.


Coma Arnauko erdiko lakua, ederra!



Azken malda gero eta hurbilago...


10:04 : Estany Xelat (2760m).
Metroak irabazi ahala ingurunean gero eta ikusgarriagoa da. Xelateko lakura ailegatzean Aneto, Tempestades eta Rusell mendiek ongi-etorria egiten digute. Puntu honetan hasten da azken malda, beraz geldialdia egin genuen kranpoiak janzteko eta zerbait jateko.


Azken maldak zati tente batzuk baditu, baina elurra baldintza bikaina aurkitu genuen eta aunitz gozatu genue zati horretan.


Azken metroak ertzera ateratzeko...


10:57 : Antecima Este de Ballibierna (3035m).
Ballibiernako sasigailurrera ailegatuta ertza hasten da. Teknikoki ez da zaila, baina aereoa da eta gainera elur pixka bat aurkitu genuen guk. Kranpoiak jantzita pasa genuen beraz eta horrek harrizko zatietan nahiko baldar ibiltzea eragin zigun.


Hasieran nahiko zabala da ertza, baina gero pixka bat estutzen da. Iparraldeko aurpegian pilatuta zegoen elurrak zirrara eragiten zuen.


11:06 : Ballibierna (3067m).
Ertza gaindituta gailurra harrapatu genuen. Ikusgarria da!!


Gailurrera ailegatzen...


Poza nabaria zen gure aurpegietan. Mendi ederra, eguraldi ona eta gainera bakar-bakarrik ginen kaskoan.


Ballibiernatik Culebreseko gailurra hurbil dago, baina horretarako Pas de Cavall pausua gainditu behar da. 20 bat metroko pausu estua, Gure kasuan elur pixka batekin zegoena...


Zalantza batzuk izanda, xerpa bidali genuen ingurua aztertzera.


Eta horrela, hirurek uste baino errazago gainditu genuen.


Culebresera ailegatzen...


11:40 : Culebres (3062m).
Eguneko bigarren tontorra sakelera! Gailurretik Aneto eta inguruko mendietara bista ederra dago.


Gailurreko argazkia.


Gure oinetan Ballibiernako harana eta urrunago Monte Perdido, Bachimala, Posets eta Perdigueroko mendilerroak.


Culebres utzi eta gure ibilbidea segitu genuen. Erran bezala, igotako bidetik jaitsi ordez hegoaldera jaitsiko ginen, lehenik destrepe batetik Culebreseko sasigailurrera.


Llauseteko urtegia Culebreseko sasigailurretik.


Bertze destrepe batek Llauseteko lepora eramanen gintuen. Zorteko geunden, destrepe hauek elurrik gabe baitzeuden. Elurrarekin dexente zailagoak bihurtuko dira.


12:18 : Coll de Llauset (2865m).
Culebreseko sasigailurra eta bere hegoaldeko destrepea lepotik ikusita. Pareta horretatik jaitsi ginen.


Lepotik beheiti berriz zailtasun guztiak akitu ziren. Gainera, paisaia bolkanikoan bidexla arras erosoa da jaisteko, harri txikiekin.


Llauseteko bailara goitik behera zeharkatu eta lakuaren hasierara ailegatu ginen. Puntu honetan itxi genuen ibilbide zirkularra. Lakua goizejko bidetik inguratzea bertzerik ez zen gelditzen mendi buelta bikaina akitzeko.


14:08 : Embalse de Llauset (2200m).
Hasi eta sei ordu geroago akitu genuen ibilbidea. Laku bukolikoak, ertz bertikalak, elurra, eguzkia, ezin da gehiago eskatu!!


BIDEOA: