Areta inguruan

EGUNA: 2022/03/05

ABIAPUNTUA:  Espace Nordique Arette-La Pierre Saint Martin (1520m)

ZAILTASUNA:

• Eski zailtasuna: S2

DENBORAK:

• Igoera: 2 ordu eta erdi
• Jaitsiera: Ordu erdi

NOLA AILEGATU:

Gure kasuan Izpegiko lepoa zeharkatu eta Behe Nafarroa eta Zuberoan barrena egiten dugun Aretteko eski estaziorainokoa. Garazitik Larzabalerako bidea hartu eta hemendik Atharratze aldera doan bidea hartuko dugu. Atharratze gurutzatu eta eskuinetara Santa Grazira doan bideari segituko diogu. Santa Grazitik goiti, Soudeteko lepotik ezker hartuta, ailegatuko gara Arette-La Pierre Saint Martingo ipar-eski estaziora.

KRONIKA:

Eguraldi grisa iragarrita zegoen astebururako, baina ezin etxean gelditu eta Areta aldera jo genuen aitzineko eguneko elur fresko bila. Balizko ikuspen falta zela eta, baso artean ibiltzeko plana diseinatu genuen, Rocher de l'Osque ikusgarriaren azpian paradisu ttipi bat aurkituz. 

9:41 : Espace Nordic Arette-La Pierre Sain Martin (1520m)

Goizean hurbildu ginen Areta aldera. Kafe bat herrian eta mendatean goiti ipar-eskiko estazioraino igo ginen. Gauzak prestatu eta ongi zapaldutako pistetatik ekin genion egunari.

Ipar-eskiko pistak aldez alde zeharkatuko genituen. Pista bat baino gehiagotik joaten ahal da. Gu igoeran Braca pistatik joan ginen eta itzulera Plateau pistatik egin genuen.

Ipar-eskiko pisten lasaitasunetik alpinoko kalapitara pasatu ginen. Estazioaren punturik baxuenera ailegatzen dira ipar-eski pistak eta bertatik Les Ifs pista gorria hartu genuen ezkerretara. 

Zorionez ordu horretan eski pistak nahiko trankil harrapatu genituen. 1720 metro inguruan utziko genituen pistak eta ezkerretara aterako ginen, ipar-ekialdeko norabidean izeiz zipriztindutako paisaia karstikoan barneratuz.

Hortik aitzin ipuinetako paisaia zeharkatuko genituen. Burrunbatik hain hurbil, baina hain urrun aldi berean.

Izei eta zulo karstikoen artean bidea bilatuz basoa pixka bat ireki eta paisaia goxo eta leunagoa bilakatzen den paraje honetara ailegatu ginen.

Inguru honetan 20 zentimetroko elur freskoan bidea irekitzeak ez du preziorik. Jaitsierarik gabe ere hemen bakarrik egoteagatik merezi izan zuen egunak.

Rocher de l'Osqueko eta Tourelleseko harresiak parean genituela ekialderantz segitu genuen Camplongeko etxolaraino. Gero eskuineko arbola arteko malda polit horietatik igoko ginen Soum Couy aldera.

10:59 : Cabane de Camplong (1640m)

Inguru eder honetan dagoen etxola hau bisitatu genuen goiti segitu aitzinetik. Etxetik atera ginelarik ez genuen hain ikuspegi zabala izatea espero eta momentuaz gozatzen ari ginen.

Geldialdia goiti abiatu aitzin...

Etxola eta Barlagneko baso famatuaren gaineko gailurra gibelean utzi eta hegoalderantz biratu ginen. 

Elur sakon eta astun samarrean bidea ireki behar izan genuen. 

GR10a pasatzen da inguru honetatik, bi harkaitzen azpiko pasabide horretatik 

hain zuzen ere. 

Poliki-poliki Osqueko harkaitzak gibelean utzi eta hego-mendebaldera biratzen hasi ginen.

Egunaren hasmentan eguna nahiko argi zegoela ikusita Soum Couy mendiraino ailegatuko ginela pentsatu genuen; baina goiti egin ahala, lainoak sartzen hasi ziren iparraldetik eta afera zailtzen hasi zen. Momentu batetik aitzinera dena zuri-zuri zegoen eta eremu karstiko horretatik ahal den moduan eskapatu ginen pistetara.

Ez zeuden urrun pistak, baina orografiak ez du lerro zuzenik marrazten uzten. Alde guzietan zuloak daude eta lainopean laberinto bilakatzen da ingurua. Zorionez eskuinetarantz biratu eta lainoa gehiago sartu aitzin Arette-La Pierre Saint Martin eski estazioko teleaulkirik altuenera ailegatu ginen.

12:35 : Telesiege le Panoramique (2153m)

Behin teleaulkiaren goitiko aldean, eraikinaren kontra babestu eta lainoak joateko zain egon ginen gehiago igan edo ez erabaki aitzin. Tarte batean egon ondotik, eguna gehiago iluntzen ari zela ikusita, foka-larruak kendu eta pistetatik beheiti jaitsi ginen autoraino.

13:50 : Espace Nordic Arette-La Pierre Sain Martin (1520m)

Eguraldiak utzi ziguna ongi baliatu eta leku zoragarri bat deskubritu izanaren pozaz akitu genuen goiza. Hurrengo baterako planak diseinatzeko ere balio izan zigun...

BIDEOA: