hodei guztien gainetik...: Amitges (2851m), Ratera (2862m)

2022/04/19

Amitges (2851m), Ratera (2862m)

EGUNA: 2022/04/14-15

ABIAPUNTUA: Bonaigua 1900 - Baqueira Beret eski estazioa (1912m)

ZAILTASUNA: S4 , Rateraren hego-ekialdeko maldak ematen dio zailtasun hau, bertzela S3

DENBORAK:

Bonaigua 1900 - Pic d'Amitges : 3 ordu
Pic d'Amitges - Refugi d'Amitges : 30 minutu
Refugi d'Amitges - Tuc de Ratera : 2 ordu
Tuc de Ratera - Refugi Saboredo : 30 minutu
Refugi Saboredo - Bonaigua 1900 : 2 ordu eta erdi

NOLA AILEGATU:

Euskal Herriko iparraldetik joanez gero, errazena A64 autopistatik joatea da. Bertatik Lleida/Bagneres de Luchon irteeraraino segitu eta irteera hau hartuta Lleidako norabideari jarraituko diogu une oro. Val d'Aranera ailegatuko gara horrela. Hemen Vielha zeharkatu eta Bonaiguako lepora igotzen den errepidea hartuko dugu. Lepoa pasatu eta beheiti abiatuta, eski estazioko azken aparkalekura ailegatuko gara.

ARRASTOA:

KRONIKA:

Apirila aitzinera doa, baina oraindik bada elurra goietan. Udaberriko oporrak baliatuta, urrunago gelditzen zaigun Pirinioetara bisitatxoa egitea erabaki dugu. Aigües Tortes inguratzen duena Carros de Foc bide ezaguna egin nuela hamar urte betetzen diren honetan, berriz ere inguru hartan ibili gara, baina oraingoan elementu zuriaren gainean irristatuz.

2022/04/14

9:00 : Bonaigua 1900 (1912m)

Mugimendu guti zegoen Baqueira-Beret eski estazioaren ekialderen dagoen aparkaleku honetan bertaratu ginelarik. Jende gehienak eskiak atzendu eta bertze planak egiteari ekin dio. Mendi eskirako baldintzak onak dira oraindik ordea eta ahal den bitartean hortxe segituko dugu.

Aparkalekua utzi eta ezkerretara zeharkaldia egin dugu, malda dezentea alderik alde pasatuz. Bezperan egindako euriak ordu horretarako elurra guri egotea eragiten duen, behintzat 2200 metrotik beheiti.

Zeharkaldiak Gerber bailararen sarreran utzi gintuen. Bailaratxo polit honetatik eginen genuen igoeraren zatirik handiena, gailur zorrotzez inguratako pinu eta laku artetik.

Banuen gogoa bailara hau ezagutzeko eta ez zigun hutsik egin. Leku zoragarria da...

Malda eztietatik eginen genuen igoera tarte honetan, lakuek leundutako ingurunean.

Hala, laku ttipiagoak eskuinetik inguratuta Gerberreko laku nagusira ailegatu ginen. Hau inguratzea ezinezkoa da, zulo batean baitago, eta erditik zeharkatuko genuen.

Ez segitu tracka udan, igerilari onak ez bazarete behintzat...

Lakua zehakatuta kanale estetiko honetatik goiti segituko genuen. Malda pixka bat du, baina elur baldintza onak genituen igateko.

Hodia iganda, paisaia zabaldu egiten da eta malda zabalagoetatik segitu genuen. Egunean igateko intentzioa genuen Amitgeseko gailurra lehendabiziko aldiz ikusi genuen puntu honetatik. Argazkian eskuinean ikusten dena da.

Gailurraz gain, bailara honetan dagoen Mataro izeneko aterpe librea ere begien bistan genuen. Kataluniako Pirinioetan hain ohikoak diren txapazko aterpea da.

Inguru honetan bezperan elurra egina zuen, baina eguneko tenperatura altuek hautsa segidan hezetu zuten. Garai honetan arras zaila da elur-hautsetan eskiatzea.

Aterpearen azpitik pasatu eta Amitgeseko gailur ikusgarriak bailara hesten duelarik, eskuinetara biratu behar da Saboredoko bailararekin konektatzen duen lepotxo batera ateratzeko.

Besta eguna izanagatik, gutaz gain bertze hirukote bat bertzerik ez genuen ikusi bailara guzian zehar. Haiek lekua lehenagotik ezagutzen zuten eta lasaia zela aipatu ziguten.

Aterpe laranja gibelean... Urrunetik ikusten da kolore biziarekin.

11:45 : Coth der Lac Glaçat (2585m)

Azken malda tenteago batetik Gerber eta Saboredoko bailarak bereizten dituen lepo honetara atera ginen.

Bertatik irudiko bizkarra segitu behar da Amitgeseko lepo aldera.

Amitgesen ipar aurpegi ikusgarria gure ezkerretara utziko genuen...

Saboredo aldetik igan zen talde batek egindako arrastoa eroso segituz...

Bizkar honetatik biharamunean eskiatuko genuen Rateraren malda ederra ere begien bistan genuen.

Zati honetan gure foka-larru hezeen azpian elurra kolatzen hasi zitzaigun eta pixka bat moteldu zigun igoera.

Paisaia zoragarria, bezperan botatako elurrak apaindua...

12:35 : Col d'Amitges (2758m)

Bizkar guzia iganda, Amitgeseko lepora ailegatu ginen. Bertatik jaitsiko ginen beranduago gaua pasatuko genuen izen bereko aterpera. Aitzinetik, ordea, eskiak utzi eta ezkerretara biratuta gailurrerako joan-etorria eginen genuen.

Harrizko bloke eta elur zatiak tartekatuz plantatuko ginen kaskoan...

12:54 : Pic d'Amitges (2851m)

Autotik atera eta lau ordura gailurrean ginen. Elur hezeak dezente zaildu zigun igoera, gehienbat lepotik kaskora ailegatzeko.

Garagardoak zain genituen gure zangoetan genuen aterpean...

Eskietara bueltatu eta mendiaren hegoaldeko bailaratxotik jaitsiera motz batek aterpean utziko gintuen.

Elur pisu samarra harrpatu genuen jaitsieran, baina nahiko eskiagarri zegoen. Uste baino hobeki...

14:04 : Refugi d'Amitges (2365m)

Gure bi eguneko itzuliaren lehendabiziko etapa aterpe eder honetan akitu genuen. Lehenagotik pare bat aldiz pasatua nintzen hemendik, baina lehen aldia izanen zen lo egiten. Gela erosoak ditu eta janaria arras ona. Hori bai, Carros de Foc ibilbidean kokatuak dauden bertzeak bezala, garestia da.

Terraza panoramikoan eman genuen arratsaldea, ikuspegi zoragarriaz gozatzen...

Afalondoan azken izpi gorrixkek apaindu zituzten Encantats eta Peguera mendi inguruak. Bi egun beranduago inguru hartan ibiliko ginen...

2022/04/15

7:56 : Refugi d'Amitges (2365m)

Ederki deskantsatu ondotik, zazpietan gosaldu eta martxan paratu ginen.

Amitgeseko orratzen azpitik hasi genuen eguna, Carros de Foc zeharkaldiko bidea segituz Raterako lepo aldera.

Estany dels Barbs eta Estamy de la Munyidera lakuen artetik pasatu ginen eta parean ikusten den maldatxoa igan genuen. Elurra nahiko gogor zegoen ordu horretan oraindik eta hortzak estutu behar izan genituen maldan.

Malda gaindituta bizkar honetara atera ginen. Bideak Raterako lepo aldera altuera sobera galdu gabe zeharkaldi luzea egiten du. Elur gogorrak ordea zeharkaldi hori deseroso eta arriskutsu egiten zuen eta beraz foka-larruak kenduta eginen genuen guk.

Zeharkaldia lautadatxo honetan akitu genuen. Berriz ere larruak paratu eta goiti. Parean genuen Ratera, bere hego-ekialdeko malda ederrarekin...

9:20 : Port de Ratera (2594m)

Lepo zabal honetrara ailegatuta, ezkerretara biratu eta Ratera mendiaren magaletatik goiti abiatu ginen.

Lehendabiziko maldak ez dira sobera tenteak, baina goitiago 40 gradu ere hartzen ditu eta zati hau eskiak bizkarrean genituela eginen genuen. Zerua nahiko hodeitsu zegoen eta elurrari transformatzea kostatzen ari zitzaion...

Zatirik tenteena gainditzen... Zorionez ordurakpo eguzkia malda goxatzen hasia zen eta jaitsierarako bere puntuan izanen genuen elurra.

10:30 : Tuc de Ratera (2862m)

Errtimo lasaian igan ginen kaskora eta han ere ez genuen presa handirik izan. Haizerik gabe, bakar-bakarrik... Elurrari transformatzen utzi nahi genion.

Besiberri eta Anetoko mendiguneak tontorretik...

Egonaldi luzearen ondotik, eskiak paratu eta malda dotorean beheiti abiatu ginen. Elurra baldintza bikainean harrapatu genuen Saboredoko aterperaino eta ziztu bizian ailegatu ginen hara.

11:34 : Refugi de Saboredo (2310m)

Carros de Foc egin nuelarik, xarma gehien zuen aterpea iruditu zitzaidan Saboredokoa. Ttipia eta nahiko zaharra zen. Ordutik berritu egin dute eta itxura desberdina du orain. Kanpoko aldean kafe bat hartuko genuen lasai ederrean aitzinera segitu baino lehen.

Gure hasmentako ideia bailaran beheiti jaitsi eta gero Bonaiguara igatea zen, baina aterpeko zaindariak elur gehiago zuen bide bat proposatu zigun.

Aterpea gibelean utzi eta metro batzuk galdu genituen 2200 metro inguruan dagoen lautadatxo bateraino.

Hor berriz ere fokak paratu eta zeharkaldi motz bat eginda Saboredo orratzen eta Locampo mendiaren arteko zirkutxotik altuera irabazi genuen.

Paraje ikusgarria hau ere, eta bakartia... Harrituta gelditu ginen inguru hauetan egindako bi eguneko zeharkaldu honetan zer jende guti ikusi genuen.

Zirkutik Locampo mendiaren ipar-mendebaldeko ertzaren azpiko bizkar batera igaten segitu genuen, 2400 metrora guti gorabehera. Hemen eginen genuen ondoko transizioa...

Fokak kendu eta beheranzko zeharkaldi luzea eginen genuen, ordurako arras guritua zegoen elur moteletik...