Coma del Forn (2685m)

EGUNA: 2022/04/16

ABIAPUNTUA: Refugi de la Pleta del Prat (1722m)

ZAILTASUNA: S2

DENBORAK:

• Igoera: 2 ordu eta erdi
• Jaitsiera: Ordu bat

NOLA AILEGATU:

ARRASTOA:

Powered by Wikiloc

 

KRONIKA:

Urrun gelditzen zaizkigu Euskal Herritik Vall de Cardos inguruak eta asteburuak baino oporraldi luzeagoak behar ditugu bertaraino ailegatzeko. Bailararen goitiko partean bada eski estazio berezi bat, bertzeak bezalakoa ez dena. Teleaulki bakarrarekin, azpiko aldean aterpe bat duena, eski alpinorako baino gehiago pistaz kanpoko eskia edo mendi eskia praktikatzeko da aproposa. Bertatik abiatuta igaten den eski klasiko batean izan gara.

8:12 : Refugi de la Pleta del Prat (1722m)

Aterpean kafetxo bat hartuta ekin genion egunari. Hasmentako intentzioa Ventolau mendia igatea zen, baina azpiko amildegian elur guti ikusten zen eta elurra bilatzeko orientazio hobea duen Coma del Form erraza hautatu genuen. Pistak hetsiak zeuden dagoeneko, baina elurtuta egonik hasmentatik eskiekin abiatu ahal izan ginen.

Metroak irabazi ahala bailarako bertze eski klasiko batzuk agertzen hasi ziren gibeleko aldean: Flamisella eta Certascan. Pena pixka batekin gelditu ginen biharamunean haietako baten bat egin ezin izanaz. Itzuliko beharko gara...

Gauean hotz guti eginda ere, elurra ongi gogortu zen eta aise egin genuen goiti.

2000 metro inguruan eski pistak utzi behar dira eta irudiko erreka aldera biratu. Mendi arteko bailaratxotik goiti, errekaren sakonetik segituz egiten da goitirainokoa. Galbiderik ez beraz...

Erreka gure eskuinetara utziko genuen lehendabiziko zati horretan...

Estany de Mascarida laku elurtua ezkerretara utzi eta iparraldeko norantza hartu genuen mendiaren hego aurpegi politaren bila.

Eta hara non malda bat gaindituta parez pare agertu zitzaigun. Malda erraza da, zabala eta guk leun-leun harrapatu genuena, baldintza ezin hobeekin.

Coma del Forn eta Campirme mendiek kazo iduriko bat osatzen duten goitiko partean, zirku etzan eta borobil bat... Inguruz inguru hainbat malda eta kanale daude eskiatzeko. Guk hego malda zoragarri hau hautatu genuen...

Azken metroak Pica d'Estats inguruak gibelean genituela...

10:10 : Pic de la Coma del Forn (2685m)

Zailtasunik gabe eta elur baldintza onekin bi ordu eskasean egin genuen igoera. Ipar haize finak ez zuen han luze gelditzera gonbidatzen; hortaz, trasteak prestatu eta beheiti ziztu bizian...

 

Jaitsierak hiru zati izan zituen: goitikoa elur bikainarekin, erdikoa pisuagoa eta azpiko zatian pistetan elur arras ona. 

11:12 : Refugi de la Pleta del Prat (1722m)

Hamaiketarako berriz ere aterpean ginen. Nahi baino motzagoa egin zitzaigun egia erran... Aitzakia badugu bailara polit honetara itzultzeko.

BIDEOA: