Col d'Oncet (2544m) zirkularra eginez

EGUNA: 2025/11/30

ABIAPUNTUA: Tournaboup (1450m)

ZAILTASUNA: S3

IRAUPENA:

• Igoera (Oncet bailaratik) : Hiru ordu eta erdi
• Jaitsiera (Aoube bailaratik) : Ordu bat

NOLA AILEGATU:

Baionatik autopistaz joanen gara Tarbesen atera arte eta hemendik Lourdesera joko dugu. Lourdes hiritik hegoaldera joanda, Argeles Gazost eta Luz-Saint-Sauveur herrietara ailegatuko gara, hurrenez hurren. Azken herri honetan Tourmalet mendate mitikorako bidea hartu behar da eta Tournaboupeko aparkalekura igan; Grand Tourmalet eski estazioko aparkalekura, hain zuzen ere.

ARRASTOA:

Powered by Wikiloc

KRONIKA:

Berriz ere Tourmalet inguruko ateraldi bat eskiz. Bateko eta bertzeko, martxan paratzea kostatzen zaien neguetan inguru honetan harrapatzen dugu gure babeslekua, behin eta berriz itzultzen gara bertara. Urrun joan gabe azken pare bat urteetan Pene Blanque, Touatere, Ayreko basoa, Barbe, Pegue, Bonida eta Pene det Pourin ibili gara. Oraingoan Oncetekko lepoaren itzuli klasikoa egin dugu, dudarik gabe bailarako mendi-eski ibilbide ezagunenetariko bat.

9:28 : Tournaboup (1450m)

Elurretan hasi genuen eguna Tournaboupeko aparkalekuan. Eguraldi iragarpenak arintzera eginen zuela erraten zuen eta horri lotu gintzaizkion bete-betean.

Aparkalekutik ekialderantz egiten duen eski pista hartu genuen.

Errtimo bizian egin genuen lehen zatia eta fite ailegatu ginen Super Baregeseko sektorera.

Bertan ezkerretara biratu eta Toueko teleskiaren ondoko malda politetik goiti segitu genuen. Horiek izanen zinen pistetatik eginen genituen azken metroak.

1900 metro inguruan pistak gibelean utzi eta Onceteko bailaran sartzeko gainditu beharreko kanala igan genuen.

Behin kanala iganda, malda etzanetatik segitzen da Onceteko laku aldera. 

Tarteka pixka bat argitzen bazuen ere, lainotua zegoen eguna  eta tarteka ikuspen guti genuen.

Onceteko lakura ailegatzean ezkerretara biratu eta izen bereko lepora eramanen gintuzten malda tenteagoei ekin genien.

Mantso-mantso erliebea sobera ikusten ez genuela leporainoko 300 metroak gainditu genituen.

13:13 : Col d'Oncet (2544m)

Hala ailegatu ginen lepo ezagun honetara. Haren azpiko harkaitz handi batean eta lepoan berean argitzeko esperoan denbora dezente pasatu genuen. Errenditu eta gure igoerako arrastoari segituz mantso-mantso jaitsi beharko genuela pentsatzen hasiak ginen, baina...

...bat-batean mendebaldetik argia ikusten hasi ginen eta sobera pentsatu gabe alde hartara jaistea erabaki genuen.

Hala Aoubeko bailarara jaisteko malda ederra elur bikainarekin eskiatu genuen. Bezperan eta goiz horretan zehar botatako 10 bat zentimotroko geruza baldintza arras onetan zegoen.

Malda nahiko tentea da, baina halako baldintzekin nahi gabe jaisten da...

Behin bailarara jaitsi hegoaldera biratu eta malda zabal eta errazetatik beheiti segitu genuen.

Azken zatian Aoubeko etxolaraino zuzen segitu ordez, zeharkaldi bat egin eta Monhaillateko bizkarretik beheiti sartu ginen berriz ere Grand Tourmaleteko pistetan.

 

14:28 : Tournaboup (1450m)

Aldez aldeko irribarrearekin akitu genuen eguna. Gure temazukeriak bere fruituak eman zituen eta igoera guzia lainopean egin ondotik jaitsiera ederra izan genuen opari. Inguru honetan aunitzetan ibilita ere, lehen aldia nuen itzuli ezagun hau egiten eta horregatik ere arras kontent gelditu nintzen.

Pic Wilson (2400m)

EGUNA: 2025/11/29

ABIAPUNTUA: Bois d'Aumede (1190m)

ZAILTASUNA: S3

IRAUPENA: 

• Igoera: Lau ordu
• Jaitsiera: Ordu eta erdi

NOLA AILEGATU: 

Lourdes hiritik hegoaldera joanda, Argeles-Gazost herrira ailegatuko gara. Bertan Cauterets aldera bideratuko gaituzten seinaleei kasu eginen diegu. Pierrefite-Nestalas herritik goiti ailegatuko gara Cauteretsera. Herria zeharkatu, eta goitiko partean Pont d'Espagnera doan bide nagusia ezker utzita baserri arteko errepide estutik iganen gara Igau baserrira. Baserriaren ondoan aparkaleku ttipi bat dago. Elurrik ez badago, baserritik goiti segitzen duen bidea ere autoz igaten ahal da zati batean.

ARRASTOA:

Powered by Wikiloc

KRONIKA:

Wilson mendia Moun Ne ezagunaren itzalean gelditzen da. Eski aldetik, ordea, badu bere interesa, batik bat ipar eta hego orientazioak hautatzeko aukera ematen digulako baldintzen arabera. Horregatik jo genuen bertara azaroko azken asteburuan. Plana kaskora hegoaldetik igan eta jaitsiera baldintzen hoberenen bila egitea zen...

8:50 : Bois d'Aumede (1190m)

Pistaz 100 bat metro irabaztea lortu genuen eta bigarren bihurgune hetsiaren ondoan utzi genuen autoa. Elurra autotik beretik genuen eta eskiak zangoetan abiatu ahal izan ginen.

Pista akitu arte igan eta bide estuago bati pasatzen dio lekukoa. Bertatik eginen genuen goiti basotik atera arte.

1400 metro inguruan bidea belai baten atakara ailegatzen da. Belaia erdiz erdi pasatuko genuen goitiko parteko eskindegiraino.

Belai hau izanen zen jaitsiera eskiatuko genuen azken zatia.

Gaineko eskindegia alanbrearen gainetik zeharkatu eta goiti segitu genuen.

Cabaliros mendirantz doan bide nagusia eskuinetara utzi eta hego-mendebaldera eginez bertze baso zati bat zeharkatuko genuen. Bigarren baso zati hau igateko bai, baina jaisteko ez zegoen baldintzetan. Hala ere, azkenean zirkularra egin eta bertze alde batetik jaitsiko ginen.

1600 metro inguruan basoa behin-betiko gibelean utziko genuen eta Moun Ne ederra aitzinean agertu zitzaigun. Inguru honetatik eskiz bertara igateko aukera dago.

Malda zabaletatik goiti norantza berean iganez segitu genuen.

Zailtasunik gabeko igoera parte honetan...

Bourg Debat erreka gure eskuinetara genuela, elur gutixeago zuen zeharkaldia egin genuen...

Elur gogorrarekin esposizio pixka bat izaten ahal duen zeharkaldia da, baina guk baldintza onetan harrapatu genuen.

Hala, 1800 metro inguruan bizkar batera aterata, Wilson mendia eta bertara eramamen gintuzten hego orientazioko maldak ikusgai genituen.

Metro batzuk galdu, erreka ttipia gurutzatu eta eskuinetara altuera irabazten hasi ginen.

Oraingoan Bourg Dessus errekaren ondotik egin genuen goiti, hasmentan ezkerretara utzita...

Eskiatzeko malda ederrak daude inguru honetan eta elurraren kalitatea uste baino hobea zen gainera. Parean ikusten den arrasto horri segituz kaskoraino ailegatuko ginen; lehenik haren eskuinetara ikusten den lepotxo batera iganez eta bertatik iparraldeko maldetatik kaskora ailegatuz.

Paraje ederrak eskiatzeko eta leku aski bakoitzak bere sinadura uzteko!

Lepora atera aitzineko zatia tentetu eta 40 bat gradutaraino ailegatzen da. Elur-jausi arriskuarekin edo elur gogorrarekin kasu eman beharreko lekua da.

Guk elur guria genuen eta arazorik gabe atera ginen lepora.

Lepotik ezker biratu eta kaskoraino azken maldari ekin genion. Wilsonen benetako tontorra argazkian eskuinetara ikusten den harritsua da. Eskiz normalean ezkerretara gelditzen den tontor zurira ailegatzen da jendea, 25 metro beheitiago.

Ipar-ekialdeko orientazioa duen maldatik ailegatu ginen goiti.

11:39 : Pic Wilson (2375m)

Gailur nagusiaren hegoaldean gelditzen den gailurtxoan trantsizioa egin eta jaisteko prestatu ginen. Igoeran hego aurpegian elurra nahiko ongi zegoela ziurtatu genuen, baina iparraldekoek elur hautsa zutela ikusita bertatik jaitsi eta zirkularra egitea erabaki genuen.

Hala ipar-ekialdeko norabidea hartu genuen Touyeres deitzen den paraje aldera.

Mala bikainak ditu isurialde honek, baina zoritxarrez elur baldintzak ez ziren goitian pentsatu genuen bezain onak. Altuera galdu ahala, kostra geruza fin batek estaltzen zuen elur freskoa eskiatzea pixka bat deserosoago eginez.

Catarrabes errekaren eskuinetik Peyre basoraino eskiatuko genuen. Bertan Bourg Debat bailarara eramanen gintuen bidea hartu eta eskuinetara eginez igoeran zeharkatutako belaiaren gaineraino ailegatu ginen.

13:44 : Bois d'Aumede (1190m)

Belaian azken bihurguneak egin eta basoko bidea eskiak bizkarrean genituela jaitsiko genuen. Ezagutzen ez nuen itzulia eginda, kontent akitu genuen eguna Cauterets inguruan.

 

Adi (1458m) eta Iturrunburu (1338m)

EGUNA: 2025/11/22

ABIAPUNTUA: Sorogaingo aterpetxea (821m)

ZAILTASUNA: S2

IRAUPENA:

• Sorogain - Adi : Bi ordu eta erdi
• Adi - Iturrunburu : 45 minutu
• Iturrunburu - Sorogain : 20 minutu

NOLA AILEGATU:

Elurra dagoelarik Sorogainera hegoaldetik bakarrik ailegatuko gara. Iruñetik Zubirira joko dugu eta bertatik Erroko mendatean barrena Erroibarren barneratuko gara. Gerendiain herria pasatuta ezkerretara Sorogainera igaten den bidea hartuko dugu. Bide honetan elurra ez dute kentzen, beraz ailegatzeko kateak behar izatea posible da, edo baita ez ailegatzea ere.

ARRASTOA:

Powered by Wikiloc

KRONIKA:

Lehen elurte handiak elurra etxe ondoraino ekarri zigun eta beraz eski denboraldia estreinatzeko ez genuen urrunegi joan beharrik izan. Sorogain ingurua bertatik bizikletaz pasatuta ezagutzen dut gehienbat eta banuen gogoa alde horretan eskiak paratzeko. Adiko mendira egindako zirkular polit hau bertaratzeko aitzakia bikaina izan zen. Eskiatzeko paraje arras aproposak eskaintzen dituen parajea da!

8:27 : Sorogaingo aterpetxea (821m)

Goiz abiatu ginen etxetik elurtearen ondoko lehen larunbata izaki jende aunitz egotea espero baikenuen. Lehenak izan ginen hetsia dagoen aterpetxearen ondoan aparkatzen, eta gure sorpresarako egun osoan zehar aski jende guti hurbilduko zen bertara. Errepide elurtuaren ondotik iparralderantz egin genuen lehen zatia.

500 bat metro eginda, errekatxoa gurutzatu eta ezkerretara ateratzen den pista bat hartuko genuen.

Pista hau Odiako basoan goiti igaten da. Iparrak diren magalak dira pistak igaten dituenak, beraz pentsatzeko da elurrak dezente iraunen duena zati honetan.

Galbiderik ez duen pista 1200 metro ingururaino igaten pago artetik. Puntu honetan ipar-mendebalderantz segituko genuen basotik atera arte.

Fite utziko genuen basoa eta elur sakonetik Adiko mendiaren hegoaldeko bizkarrera aterako ginen.

Behin bizkarrean, gainez gain kaskoraino joatea bertzerik ez zitzaigun gelditzen. Zati honetan lainoa eta haizea izan genituen bidelagun.

Kasik ohartu gabe gailur inguruan ginen. Eskindegia zeharkatu eta bertan ginen!

10:42 : Adi (1458m)

Kaskoan eski batekin arazo bat izan nuen eta denbora dezente egon ginen konpontzen. Ondotik argazkia eta beheiti abiatu ginen.

Iturrunburu aldera jaisteko bi aukera daude: eskindegia berriz zeharkatu gabe haren ezkerretik jaistea edo hura zeharkatu eta eskuinetik jaistea. Guk bigarren aukera hartu genuen malda zabalagoak baitaude bertatik. Hala ere, elurraren kalitatea ez zen ona eta ahal zen moduan jaitsi ginen.

11:38 : Adatungo lepoa (1200m)

250 metroko jaitsieraren ondotik Adatungo lepora ailegatu ginen. Bertan lainorik ez zen eta gure ondoko helburua zen Iturrunburu mendia ikusten ahal genuen ekialdean. 

Berriz foka-larruak paratu eta bertara zuzendu ginen bizkarrez bizkar.

Lepo honetatik bertatik pasatzen den GR11aren bidea hartuko genuen zati batean.

Aratungo gain harritsua iparraldetik inguratu genuen GR-ari segituz. Zati honetan elur guti baldin badago eskiak kentzea beharrezkoa izaten ahal da.

Behin Aratun inguratuta malda etzanetatik harrapatuko genuen Iturrunburuko gaina.

Paraje politak elurrak apaindurik...

Azken zatitxoa pixka bat tentetzen da, baina ez du zailtasun berezirik...

12:19 : Iturrunburu (1338m)

Kaskoan trantsizioa eta bigarren jaitsierari ekiteko prestatu ginen.

Eta bigarren hau lehendabizikoa baino aise hobea izanen zen. Sorogaingo lepo aldera jaitsi ginen elur hautsezko malda zabal eta politetatik.

Gozatu ederra hartu genuen!

Jaitsitako malda ongi sinatuta utzi genuen...

12:55 . Aztakarriko erreka (946m)

Elurraren kalitatea ikusita, berriz ere fokak paratu eta malda igatea erabaki genuen.

Malda leun eskiagarriak nonahi daude inguru honetan.

13:30 : Iturrunburuko iparraldeko bizkarra (1240m)

Eguneko hirugarren igoera kaskoa baino iparralderagoko bizkar honetan akitu genuen. Berriz ere Sorogaingo lepo alderako malda bikainak jaitsiko genituen.

 

14:28 : Sorogaingo aterpetxea (821m)

Azken zatia Sorogaingo lepotik aterpetxe aldera jaisten den errepidearen bazterretik eskiatuz egin genuen. Hala ere, ez genuen aterpetxeraino bertaraino ailegatzerik lortu eta eskiak bizkarrean akitu genuen eguna. Ibilbide eta egun zoragarria!