hodei guztien gainetik...: 26/1/1

2026/01/31

Dome de Gouetsoule (2065m)

EGUNA: 2026/01/18

ABIAPUNTUA: Route Forestiere de Gouetsoule (1131m)

ZAILTASUNA: S2

IRAUPENA:

Igoera: Hiru ordu
Jaitsiera: Ordu bat

NOLA AILEGATU:

Nafarroa Beherea eta Zuberoako probintziak zeharkatu behar dira. Donibane Garazi, Lartzabale, Maule eta Atharratze herriak pasata, Montori herrian utziko ditugu Euskal Herriko lurrak. Lanne en Baretous herrira ailegatuko gara hurrena eta herri hau pasata eskuinetara Arette herrira doan bidegurutzea ikusiko dugu. Bertara joanen gara. Arettetetik Issor herrian barrena, Aspeko bailarara ailegatuko gara. Behin hemen, Zaragozako norabidea hartuko dugu eta aitzinera segituko dugu Urdos herria zeharkatu eta laster ezkerretara ateratzen den pista bat hartzeko. Gouetsouleko bidea da, kartel batez seinaleztatua dagoena. Bertatik iganen gara bortzgarren bihurgune hetsian autoa utzi arte, edo elurra dagoen kasuetan beheitiago.

ARRASTOA:

KRONIKA:

Elur-jausi arriskua altu zegoela eta zuhaitzen babes bila jo genuen Larryko zirku ederrera. Duela hiru urte egon nintzen lehen aldiz paraje hauetan eskiatzen, eta orduan Hourquette mendiaren kanal ederra igan eta jaitsi ahal izan genuen. Oraingoan baldintzek ez zuten hara joateko adinako segurtasunik eskaintzen. Gouetsouleko lepotik goiti ekialdera luzatzen den ertzean badira izenik gabeko tontor batzuk, kasik goitiraino arbolaz inguratuak daudenak. Horietako bat da ateraldi honetako mendia.

8:35 : Route Forestiere de Gouetsoule (1131m)

Inguruan kasik elur izpirik ikusten ez zela abiatu ginen Larryko aterpera igaten den bidetik. Eskiak bizkarrean, doike!

Eskuinetarako lehen bihurgune hetsian utziko genuen Larryrako udako bidea. Jaitsieran bertatik pasatuko ginen, baina igoera basoan goiti igaten den pista ahalik eta gehien baliatuz eginen genuen.

1370 metrotan pistaren laburbide batean paratu genituen eskiak zangoetan.

Pista zati batean moztu eta bertara aterako ginen berriz ere.

1550 metro inguruan segitzen genuen pista akitu eta pinudi trinko batetik segitu genuen goiti. Altuera honetatik goiti bezperan botatako elurteak utzitako 40-50 zentimetroko geruza freskoa harrapatuko genuen.

Baso artean bide garbirik gabe hego-ekialdera egin eta 1750 metro inguruan pinuak bakantzen hasiko ziren.

Gouetsoule lepoa eskuinetara utzi eta hego-ekialdera zeharkaldia egiten segituko genuen.

Pinuz zipriztindutako paisaia ederra...

Elur baldintza arriskutsuak direnerako edo eguraldi ezegonkorra dagoenetarako inguru aproposa da. Guk elur-jausien arrikusa dagoenean elurrak egiten duen soinu berezia hainbatetan aditu genuen.

Gure gibelean Lescun inguruko mendiak hasi ziren agertzen urrunean.

Hegoalderantz Gouetsouleko ertzera ateratzeko azken maldak igaten hasi ginen, pixka bat tenteagoak baina errazak

Eskuinetara ikusten den bizkarrera joanen ginen. IGN mapetan 2065 metrotara kokatutako izenik gabeko gailurra da.

Ezkerretara ertz berean dagoen 2259 metroko izenik gabeko tontorra utzi genuen. Berez asmoa bertaraino igatea zen, baina zati tenteago bat gainditu behar da hara joateko eta baldintzak ikusita ez zigun konfidantzarik ematen malda horrek.

Gandor errazetik eskuinetara biratu eta tontortxora zuzendu ginen.

Ikusten den bezala, pinuak tontorraren ondoraino ailegatzen dira. Ikuspegi gutiko egunetarako erreferentzia ederra izaten ahal dira.

12:04 : Dome de Gouetsoule (2065m)

Izenik gabeko kaskoan akitu genuen hiru ordu eta erdiko igoera. Berez azkarrago igaten ahal da, baina elur sakonean arrastoa ireki behar izanak denbora luzatu zuen.

Hegoaldean Escalar, Moines eta Astungo bertze mendiak ikusten genituen. Aspe bailara aldera mendi horiek duten isurialdea eskiatzeko bikaina da.

Foka-larruak kendu eta lehen jaitsiera ederraz gozatu genuen. Kristoren elur geruza genuen eta tarteka ez genituen eskiak ikusi ere egiten.

1885 metroraino jaitsi ginen eta elurraren kalitatea ikusita berriz igatea erabaki genuen. Gure arrastotik fiteago iganen ginen bigarren aldi honetan.

Bizkar polita eta gure jaitsierako markak...

12:59 : Dome de Gouetsoule (2065m)

Bigarrenez kaskoan... Ordurako pixka lainotzen hasiak ziren bazterrak.

Eta bigarren jaitsiera!

13:16 : Refuge de Larry (1752m)

Zuzen jaitsi ginen iparralderantz Larryko aterperaino. Bertatik Larryko erreka nagusiaren ondotik doan udako bidea segituko genuen auto aldera.

Zirku magiko hau agurtuz...

1370 metro arte eskiatu ahal izan genuen, uste genuena baino beheitiago. Eskiak bizkarrera eta bide arruntetik erorita aurkitu genuen Coustey zubitik autoraino itzuliko ginen.

14:10 : Route Forestiere de Gouetsoule (1131m)

Eski saio polita burututa eman genion amaiera egunari. Hasmentan eguraldi iragarpen eskasarekin eta elur baldintza delikatuekin esperantza handirik gabe hasitakoa ederki borobildu genuen.

2026/01/30

Pic Lasneres (2000m)

EGUNA: 2026/01/11

ABIAPUNTUA: Pont de Salars (797m)

ZAILTASUNA:

Eski zailtasuna: S2

IRAUPENA:

Igoera: 3 ordu eta erdi (goitiko aparkalekuraino ailegatuz gero gutiago)
Jaitsiera: Ordu bat

NOLA AILEGATU:

Aydius herria Aspe haranean kokatuta dago. Aspera Behe Nafarroako eta Zuberoako lurrak zeharkatuz ailegatuko gara, Arette herritik Issor herrian barrena. Behin Aspen gaudela Aydius herrira eramaten gaituen bide estua hartu eta herrira ailegatu aitzinetik erne egonen gara Les Salars auzora igotzen den pista hartzeko. Les Salarsetik pistak gorago segitzen du, Berangueileko etxoletaraino. Zaila da ordea bertara ailegatzea elurra dagoen egunetan.

ARRASTOA:

KRONIKA:

Hamar urte pasatu dira mendi eta inguru eder honetan lehen aldiz izan nintzenetik, eta elur baldintzak ikusita berriz bueltatu gara oroitzapen polita utzi zidan lekura. Mendi etzana da Lasneres eta elur-jausi arriskua altua den egunetarako malda zabal eta politak eskaintzen ditu. Hori guti balitz, Aspe bailarak beti altxatzen duen magia hori ere badu. Ez da aitzakia gehiagorik behar bertaratzeko!

8:57 : Pont de Salars (797m)

Autoz zati hormatuak zituen errepidetik Salarseko zubiraino igan ahal izan ginen. Atsegin hartu nuen autoa bide bazterrean utzi eta goiti abiatzeko prestatu ginelarik, gaizki pasatzen baitut irristakor dauden bideetan. Errepidean berean eskiak paratu eta goiti abiatu ginen.

Errepideak ezkerretara egiten duen lehen bihurgune hetsian zuzen ateratzen den pista bat segituko genuen.

Pistak Berangueil erreka zeharkatu eta goiti egiten du urtegitxo ttipi batean desagertzen den arte.

Bertatik eskiak eskutan eraman behar izan genituen baso arteko malda deseroso batean pixka bat goitiago berriz paratu arte. Zati hau ez pasatzeko hobe da agian errepidetik goiti igatea pista hartu gabe.

Gu laburbidetik zuzenean Berangueileko etxoletara aterako ginen.

Berez autoz inguru honetaraino igaten ahal da elurrik ez badago, baina mendi hau eskiatzeko baldintzetan egoteko elur aunitz behar da eta beraz zaila da bertaraino autoz igatea.

Berangueiletik udan Montagnoneko laku famaturaino jendetza eramaten duen bidea hartuko genuen. Neguan bertzelakoa izaten da egoera, eta leku lasaia da.

Pinu eta pagoz osatutako basoan goiti egin genuen horrela.

Basoa nahiko trinkoa da tarteka eta jaitsierarako bertatik ez pasatzea aholkatzen dut. Igoeran, dena den, gozatzeko lekua da.

1350 metro inguruan baso artetik atera eta Barca izeneko parajean goiti egin genuen. Puntu honetatik kaskoraino malda zabal eta garbiak ditu mendiak.

Zuzenean Taillandereko lepora igaten den bailaratxoa utzi eta ezkerretara igan ginen, Lasneres mendiaren iparraldeko bizkar zabalera.

Behin bizkarrean malda errazetatik kaskoraino eginen genuen.

Gure gibelean Marie Blanqueko lepo ezagunetik igaten diren Mailh Massibe, Montagnon eta abarrak ageri ziren.

Eskuinetara berriz azken urteetan hain ezagun egin den Montagnon d'Iseye mendia. Kaskotik Montagnon lakurako argazkia sareetako izar bat da gaur egun.

Mendiaren gaineko zatia nahiko haizetua zegoen eta elur-plaka batzuk baziren. Baldintza delikatuak zeuden egun horretan, baina Lasneresen aparteko arriskurik ez genuen.

11:44 : Pic Lasneres (2000m)

Azken zatian izkindegia zeharkatu eta kasko zabalera ailegatu ginen.

Arrioutorteko aterpea dagoen zelaittoa gainetik, baita Ossau bailarako herriak ere. Mendi hau Ossau eta Aspe bailaren artean dagoenez, bietatik igaten ahal gara bertara.

Gailurreko ikuspegia ederra da altuera apala badu ere. Sesques eta Midi d'Ossau nabarmentzen ziren hegoalderantz.

Ekialderantz berriz Ger mendigunea, Petite eta Grande Arcizette mendi ikusgarriekin.

Gainerako eskiatzaileak gailurrera agertzen hasi zirenerako guk beheitirakoari ekin genion. Bizkar zabala osorik eskiatuko genuen iparralderantz eta 1450 metro inguruan basoa zeharkatzen duen pista hartuko genuen.

Pista horretatik arazorik gabe jaitsiko ginen nahiko trinkoa den basoan.

13:14 : Pont de Salars (797m)

Berangueileko etxoletara jaitsi ginen pistatik, eta bertatik autoraino eskiatu ahal izan genuen errepidetik. Kontent akitu genuen eski ateraldia beti zerbait berezia duen Aspen.

2026/01/19

Auza (1306m)

EGUNA: 2026/01/05

ABIAPUNTUA: Erratzu (285m)

ZAILTASUNA: Erraza

IRAUPENA (oinez):

Igoera (Basagarretik) : Lau ordu
Jaitsiera (Mazatik) : Bi ordu

NOLA AILEGATU:

Ateraldi honen abiapuntua Erratzu herrian berean dago. Herri sarrerako aparkalekuan uzten ahal da autoa.

ARRASTOA:

KRONIKA:

Erratzuko mendirik garrantzitsuena da Auza, eta Baztangoa ere bai Saioaren baimenarekin. Herritarrondako beti da berezia gure mendi maitatura igatea. Ateraldi honetan mendiaren hegoaldeko aurpegitik igan eta jaistsiko nintzen, urtarrileko egun hotzari eguzkiaren goxotasuna eman nahian edo. Bide luzea da, baina kaskorako joan-etorria egiteko politenetarikoa eta originala.

10:35 : Erratzu (285m)

Goiz hormatuan ekin nion bideari. Herritik Xorroxingo ur-jauzi ezagun aldera doan bidea hartuko nuen lehen zatian.

Galbiderik ez duen bidea da, normalean turistaz betea egoten dena. Urtarrilaren 5ean ez zebilen inor ere...

Errekaren bertze aldean Gorostapolo auzoa gelditzen da.

Zubi honetan utziko nuen Xorroxingo bide arrunta. Zubia zeharkatu eta segidan eskuinetara ateratzen den bidexka hartuko nuen.

Bidexkak bide zabalago batera eramaten du. Bide honetan eskuin hartuko nuen hasmentan eta elkarrengandik hurbil dauden ondoko hiru bidegurutzeetan ezkerretara. Bide horri segituz Zubipuntako bordara ailegatuko nintzen.

Zubipuntako bordara ailegatu baino lehen, ezkerretarako bihurgune hetsi batean bide nagusia utzi eta zuzen segituko nuen Mineiko zokotik goiti pista batera ailegatu arte. Pista zeharkatu eta hegoalderantz pagadi batetik iganen nintzen belai batzuen ondoraino.

Belaia nire eskuinetara utzita, haren kontratik doan bidexkatik hasmentan eta bertze bi belairen artetik doan bidetik geroago Soralar mendiaren ekialdeko magalera atera nintzen. Bertan eskuinetara biratu eta gailur aldera eginen nuen.

Soralar kaskoa baino pixka bat hegoalderago atera nintzen. Bidexka honetatik hegoalderantz Soralar eta Burga arteko lepora jaitsi eta bertatik ezkerretara Basagarreraino eramanen ninduen pista hartu nuen.

11:56 : Basagar (684m)

Lepoan pista utzi eta Berderiz aldera doan GRa hartuko nuen metro batzuetan.

Lepo zabal honetan utziko nuen Berderizerako bidea eta ezkerretara iratze-leku batetik Arlegiko kaskora iganen nintzen.

Inguru honetatik Auza oraindik urrun ikusten da.

Bizkarrez bizkar ekialderantz egiten duen bidea segituko nuen.

Baso politetatik Pagozelaiko lepo aldera...

Pagozelaiko lepotik hegoalderantz GR-aren saihesbide bati segituko nion Auzako mendiaren azken metroetaraino.

Zatirik handienean baso artetik doan bide gorabeheratsua da.

Hotzak paisaia bereziak utziak zituen pago artean. Ez zen elurra, arboletatik eroritako bisutsa baizik.

Burdingurutxeko bizkarretik pasatuko nintzen...

...eta Ixtauzko lepo inguruan basotik aterako nintzen. Hemendik aitzin ipar haize zitalak hotz sentsazioa areagotuko zuen.

Eskerrak eguzkitan egonen nintzen hotz sentsazioa pixka bat arintzeko.

Bideak Antxola mendia inguratzen du eta Sakana deitzen den parajean barrena Auza aldera igaten da.

Aunitz gustatzen zaidan parajea da! Eskiz ere igan izan gara nahiko leuna den bizkar honetatik.

Puntu honetan eskuinetara egiten duen GRa utzi eta zuzen segituko nuen kaskoraino.

Eskuinetara Harrigorriko harkaitz ederrak gelditzen dira.

Eta gibelean Sakanako bizkarra...

13:12 : Auza (1306m)

Gailurrean zerbait jan, argazki batzuk eta beheiti abiatuko nintzen.

Mendebalderantz egin, Auzako zati harritsu ezaguna zeharkatu eta ezkerretara biratuko nintzen Maza aldera.

Zuri-zuri zegoen bizkartxo honetatik ezkerretara malda tenteak jaisten hasiko nintzen Mazarako bide arrunta hartzeko. Zuzen segituz gero, amildegi ttipi batera ailegatuko ginateke.

Behin zati hau jaitsita ateratako argazki honetan ikusten da zuri-zuri zegoen bizkarra (erdian) eta zuzen segituz gero harrapatuko genuen harkaitzezko amildegia. Zailtasunik gabe inguratzen ekialdetik, baina malda tenteak jaitsiz!

Segidan parean nuen Erregarriko puntatxoa eskuineko aldetik doan bidetik inguratuko nuen.

Eta Mazako bizkar zabaletik zuzen segituko nuen hegoalderantz.

Mazako bizkarraren hegoaldeko muturrean ametzezko baso bat hasten da. Baso horren sarreran, borda erori baten ondotik Iñarbegira jaisten den bidexka bat abiatzen da.

Ez da bidexka nabarmena, baina neguan harri mukuruak segituta aise segitzen da.

Sorgin Etxolako trikuharria dagoen bizkarrean akitzen da bidexka, Iñarbegiko errepidean. Errepidea hartu eta iparraldera jaitsiko nintzen zati batean ezkerretara Erratzura doan PR bidea hartu arte.