Russelvfjellet (794m)

EGUNA: 2024/04/03

ABIAPUNTUA: Russelv (3m)

ZAILTASUNA: S4

DENBORAK: 

• Igoera: Bi ordu eta erdi
• Jaitsiera: Ordu bat

ARRASTOA:

Powered by Wikiloc

KRONIKA: 

Russelvfjellet Lyngeneko iparraldean kokatua dagoen mendia da. Hortik iparralderago itsasoa bertzerik ez dago. Horrek mendi hau kokapen bikainean uzten du eta bertatik dagoen ikuspegia ederra da arras. Horri bere bide normaletik duen zailtasunik eza gehitzen badiogu, ibilbide klasikoa izatea ekartzen du. Jendea ibiltzen den mendia da bai, baina merezi duelako. Arratsalde apalean bertako magaletatik beheiti eskiatzeak ez du preziorik!

15:20 : Russelv (3m)

Seigarren eguna genuen Lyngeneko Alpeetan ez eguneko plana arratsaldean egitea erabaki genuenez, goiza trankil hartu genuen. Presarik gabe ernatu, goiz bazkaldu eta bazkalondoan penintsularen iparraldera jo genuen. Abiatu ginenerako goizean ibilki zen haizea apaldua zen.

Malda etzanetatik, belai batzuen artetik egin genituen lehen metroak.

Hasmentatik geroago jaitsiko genuen mendebaldeko aurpegia begien bistan genuen. 40-45 gradu arteraino tentetzen den aurpegia da argazkian ematen ez badu ere, elur-baldintza egokietan eskiatzekoa.

Igoera ez genuen malda horretatik eginen. Bide normala mendiaren mendebaldetik hasten da, hegoaldeko aurpegi guzia inguratzen du eta ekialdeko aurpegitik akitzen da. Momentu guzietan malda arras etzana du, arriskurik gabea.

Ekialderantz egin genuen beraz...

Haizea apaldua den ordurako, baina hotza ari zuen eta eguzkia indarra galtzen ari zen.

Behin hegoaldeko magal harritsuak inguratuta, mendiaren ekialdeko parteak ez du zailtasunik. Bertatik egiten da gailurrerainokoa.

Gibelean itsasoa, penintsularen ekialdeko kosta...

Gure ezkerretara hirugarren egunean igan genuen Storgalten ageri zen. Berez egun berean bi mendiok lotzeko aukera dago hurbiltasunagatik.

Tentexeago batetik sasigailurrera atera eta egiazko tontorra metro guti batzuetara gelditzen da.

Azken metroak mendebaldeko kostaldea bistan genuela eginen genituen.

17:08 : Russelfjellet (794m)

Sumendi baten itxura duen mendiaren hegoaldeko gailurrera atera ginen hala. Berez iparraldeko metro batzuk altuagoa da, baina ez da eskiagarria eta bien arteko gandorrak kornisa beldurgarriak ditu. Kaskoan haizerik eta jenderik gabe gozatu ederra hartu genuen, agian Norvegiatik zuku gehien atera genion gailurra izan zen.

Hegoaldean Storgalten eta enparauak...

Jatsiera egiteko bi taldetan zatitu ginen eta gu mendebaldeko aurpegi-kanaletik jaitsiko ginen. Arestian erran bezala 40-45 graduraino tentetzen den jaitsiera da, ederra arras; baina baldintza onetan bakarrik eskiatzekoa.

Kanaletik beheiti berriz ere igoerako malda eztietara aterako ginen, bertatik itsasoraino eskiatzeko.

Azken metroak arratsalde apalean...

Russelven herri xarmangarria...

18:33 : Russelv (3m)

Hala akitu genuen arratsalde apalean egindako ateraldi polit hau.

Etxera bueltan Russelvfjelleteko mendebaldeko aurpegi ederrari argazki bat atera eta leku agurtu genuen. Nire ustez, inguruan egonda bai edo bai igan beharrekoetako mendia da!