hodei guztien gainetik...: Allalinhorn (4027m)

2020/08/23

Allalinhorn (4027m)

EGUNA: 2020/08/11

ABIAPUNTUA: Mittelallalin (3454m)

ZAILTASUNA:

Erraza (F). Ez dauka aprteko zailtasunik eta 4000 metrotik goiti mendirik errazenen artean kokatzen da. Hala ere, kontuan hartu behar da ibilaldi guzia glaziar baten gainetik egiten dela eta arrakalak daudela tarteka. Baldintzak aunitz aldatzen ahal dira momentu batetik bertzera.

DENBORAK:

Igoera: 2 ordu
Jaitsiera: Ordu eta erdi

KRONIKA:

Dolomitetako oporraldi zoragarria akitu eta poliki-poliki etxerako bidea hartu genuen, baina zuzenean etxeratu ordez Austria eta Suitzatik pasatu ginen eta Valais inguruan mendi-ateraldi pare bat egiteko probestu genuen. Lehen egunerako Saas bailaran barneratu ginen Saas Fee herriraino. 4000 metrotik goiti duten mendiz ingururatuta dagoen herritxo polit honetatik Allalinhorn mendia igotzea izanen zen gure helburua.

Herria mendia baino 2200 metro beheitiago egon arren, inguru honetan guzian dauden teleferiko eta trenen bidez 3400 metroraino igoko ginen handik ibilaldi motza burutzeko.

8:03 : Mittelallalin (3454m)

Teleferiko eta lurpeko metroak minutu gutxitan bertze mundu batean utzi gintuzten. Geltokitik atera eta glaziarrez inguratuta geunden. Berez eski estazio bat da hau eta udan nahiz neguan eskiatzen ahal da. Lehen metroak beraz eski pista artetik eginen genituen, igoko genuen mendia parean genuela.

Eski pistak gibelean utzi eta glaziar eta seracen artean murgildu ginen.

Puntu honetan geldialdia egin genuen soka jartzeko. Mendi erraza izan arren, arrakalen gainetik ibili behar da tarteka.

Lehen zatia da maldarik gehien duena, baina jende nahikotxo ibiltzen den mendia izanik arrasto ederra aurkitu genuen.

Laster irabazten da altuera lehen zati honetan eta 600 metroko desnibela bakarrik duenez ibilbide motza da distantziaz.

Eguraldi bikaina genuen lagun. Haizerik eta hotzik gabe...

9:12 : Feejoch (3826m)

Ordubete eskasean lepo honetara ailegatu ginen eta bertze aldean Monte Rossa eta Cervino inguruak bistaratu genituen. Lehen aldia argazkietan hainbertze aldiz ikusitako Matterhorn handia nire begiekin ikusten nuena.

Ezkerretara ere 4000 metrotik goitiko mendi gehiago. Gibelean ikusten den Strahlhorn mendiak deitu zidan atentzioa.

Lepoa utzi eta goiti segitu genuen azken maldari ekinez.

Irudian ikusten dena da gailurra, ez zen aunitzik falta.

Azken metroetan glaziarretik atera eta harkaitz, elur eta izotzez tartekatutako zatiak aurkitu genituen.

Gailurra eskura...

Elurrezko gandor motza zeharkatzea bertzerik ez zitzaigun geelditzen.

9:47 : Allalinhorn (4027m)

Hala zapaldu genuen nire Alpeetako bigarren 4000koa izanen zena.

Ia bakarrik geunden gailurrean eta ikuspegiaz gozatzeko moduko eguna genuen. Irudian arestian aipatutako Strahlhorn eta Rimpfischhorn.

Honek ez du aurkezpenik behar...

Saas Feeko bertze 4000koak: Alphubel, Täschhorn, Dom...

Saas bailarako bertze aldekoak: Weissmies eta Lagginhorn.

2200 metro beheitiago Saas Fee...

Egonaldi motzaren ondotik beheiti abiatu ginen. Tenperatura nahiko altua zen eta ahal bezain fite zeharkatu nahi genituen goitirakoan pasatutako arrakalak.